Read Dii Lúg 21 Bible Online

Lúg 21 - Dii bible

Lúg 21

¹Sey woolı̵́ máa, Yesu tə́gə nɔ́ɔ́ daa na'am gbo̧o̧ lig hȩn ha"ı̵́lı̵́, ho̧ nán naa vu̵ dɨ hȩn ha"ı̵́ voo vu̵ paggı̵́ akɔti hȩn ha"ı̵́lı̵́.

²Ho̧ wakȩ́ȩ́ gíḿ tóó á̧ḿ, ká wakȩ́ȩ́ yɛddɨ, pag dála idú wu̵lı̵́.

³Ma Yesu o̧: “Mí o̧d ví moo yȩ́ńne, wakȩ́ȩ́ gíḿ yȩ wu̵ ha' hȩn mba nán ı̵́ tóó vu̵ 'waapád.

⁴Ɨ́ voo 'waapád vu̵ ha' voo hȩn, moo ku̵u̵ dɨ kan hȩn naa má nɔ. A̧máa wakȩ́ȩ́ yȩ a gíḿmi si̧', ɓɛ hȩn ka 'yɛ́ də́ń kəd máa, ha' wu̵ yu̵.”

⁵Sey woolı̵́ máa, nán tóó vu̵ dɨ moo moolȩ́ yúú lig hȩn ha"ı̵́ ku̵u̵ yo̧o̧ kan 'yɛgɛ du̵u̵ vu̵, ku̵u̵ mbɔ́ggu̵ du̵u̵ na'a yȩlȩ́. Yesu ka ki máa o̧d vu̵:

⁶“Hȩn kíí ho̧ yɛ, bá' tóó wú̵ń yaa dɨlı̵́, 'yɛgɛ tóó wú̵ń mbaan yúú daga woolı̵́ né, vú̵ń ndaa vu̵ tum 'waapád.”

⁷Ma nán vu̵ vi Yesu: “Akaw, hȩn yȩ vú̵ń ya̧ zag ndɛnná? Hȩn a tú' zaa ban ya̧ sú̵'ú̵ máa, wu̵ ȩná?”

⁸Ma Yesu hí̧i̧d vu̵: “I gággú̵. Nán tóó a zo' ví moo sá, moo nán ɓu̵u̵lı̵́ na'a vú̵ń yaa kan yɛ́g míí, vú̵ń o̧ ba bin míw. Tóó vú̵ń o̧: ‘Zá̧ga̧ woo ya̧ sú̵'ú̵.’ Tée i duu vu̵ sá.

⁹Kíí ki moo sɨɨ, kan ya̧g hɨ'ɨné vu̵ tée, zó̧ó̧ a tó̧' ví sá, moo hȩn woo vú̵ń dəŋ kɔ́y pȩ́ń. A̧máa bá' sí̧'í̧d wú̵ń ya̧n ná vaŋná né.”

¹⁰Pig woo máa, duu o̧d vu̵: “Zig nán vú̵ń lúún sɨɨ kan daga vu̵. Gbanii vú̵ń lúún sɨɨ kan daga vu̵.

¹¹Hág vú̵ń nam ya tóó vu̵lı̵́ gbo̧o̧ ba'a. Go̧o̧m gbo̧o̧ kan ho̧o̧ gbo̧o̧ vú̵ń kɔ́y ya tóó vu̵lı̵́. Hȩn zálı̵́ vú̵ń kɔ́y be"ı̵́, kan hȩn sa̧ga̧ gbo̧o̧ vu̵ á̧ḿ.

¹²“A̧máa vú̵ń dəŋ ma' ví pȩ́ń, vú̵ń duun ví kan moo, vú̵ń laan ví lig sú̵ggı̵́ nán Yúúda voolı̵́ moo u̵u̵ sə̧'ə̧d ví moo wu̵lı̵́, vú̵ń dɔd ví lig púúsinalȩ́, vú̵ń pa̧ŋ ví laan gbanaa voolı̵́, kan ŋgó̧ḿna voolı̵́ moo míí nu.

¹³Vú̵ń kɔ́ ví hȩn yȩ vu̵, moo i du̵n ya̧g wu̵lı̵́.

¹⁴Tée i 'yɛ́ moo yɛ vu̵ zó̧ó̧ víílí, tée i taa: ‘Yee vɔ́ń la hí̧í̧ nɛ́nná?’ sá,

¹⁵moo míńnɔ pú̵ ví ya̧g moo hí̧í̧lí̧ kan kɛb. Kóó nán maag woo nɔ́nná, wú̵ń diin tíŋ́ víílí kan moo né, kan moo fanné 'waapád.

¹⁶Ɨ́ ha̧a̧lȩ́ víí vu̵ kan dey nii vu̵ kan mɛm víí vu̵ kan dey gboo vu̵, vú̵ń dɔd ví nag nán gbo̧o̧ voolı̵́, vú̵ń nɔɔ nán tóó vu̵ sa̧a̧m víílí.

¹⁷Nán 'waapád vú̵ń máń ví moo míílí̧.

¹⁸A̧máa yúú hú̧' víí dágá aga wú̵ń tin ní sá̧ḿ.

¹⁹I ma' zó̧ó̧ víí tée, víń sə́ddú̵.”

²⁰Ma Yesu duu o̧: “Sey kíí ho̧ sɨɨ ka gbɔ daa kan Yerúsalem tée, i gaa zá̧ga̧ lı̵́nné woo ba dɨ bə́'.

²¹Tée nán ı̵́ ku̵u̵ dɨ hág Yúúdalı̵́ máa, u̵u̵ kɛ ɗug dɔg gu̵u̵lı̵́. Nán ı̵́ ku̵u̵ dɨ tíŋ́ kaa Yerúsalemmé máa, u̵u̵ vúd wu̵lı̵́. Nán ı̵́ ku̵u̵ dɨ babbı̵́ máa, u̵u̵ duu fíí dɔ́ la kaalı̵́ sá,

²²moo bá' yȩ Tayɨɨ wú̵ń si̧'i̧d nán hȩn ɓı̵́d kɔ́lı̵́ vu̵ wu̵lı̵́. Hȩn woo 'waapád wú̵ń kɔ́y kɔ́ ı̵́ debtere ka o̧ wɔgɔ.

²³Bá' yȩ vu̵lı̵́ zó̧ó̧ sı̵́ń ví̧i̧ wakȩ́ȩ́ ha̧g silí vu̵, kan ı̵́ ku̵u̵ dɨ waa a̧a̧né máa vu̵ yu̵, moo hȩn zálı̵́ gbo̧o̧ vú̵ń kɔ́y hág yȩlȩ́. Tayɨɨ wú̵ń kɔ́d zig yȩ vu̵ zó̧ó̧ yȩ́ȩ́.

²⁴Vú̵ń sá vu̵ kan táa[15], vú̵ń ma' vu̵ gba'a laan zig nán tóó voolı̵́ 'waapád. Nán gaa Tayɨɨ sá vú̵ń 'ná'a Yerúsalem há̧á̧ bá' zig yȩ voo wú̵ń 'wáa wu̵lı̵́.”

²⁵Yesu duu o̧: “Hȩn tú"í woo wú̵ń kɔ́y zá̧ga̧lȩ́, kan sȩȩ, kan zoo waa vu̵. Sey mam kan mam nɔ́ɔ́ u̵u̵ gágán tée, zó̧ó̧ wú̵ń tó̧' zig nán vu̵, vú̵ń gaan hȩn u̵u̵ kɔ́n né.

²⁶Nán vú̵ń nɔɔ kan dú̵ú̵ yúú hȩn a dɨ kɔ́yné hág 'waapád yȩlȩ́. Moo hȩn néélȩ́ ku̵u̵ dɨ be"ı̵́ máa, vú̵ń nam á̧ḿ.

²⁷Tée ı̵́ míí Tayɨɨ ka ba'an ya yɛ, nán 'waapád vú̵ń ho̧n, míń yaa kan mam hi̧i̧g kan néélȩ́, kan na"ȩ́ gbo̧o̧ tóó.

²⁸Hȩn yȩ ku̵u̵ dəŋ ya̧lȩ́ tée, i yágá dɔg, ví dȩ' zó̧ó̧, moo bá' sənné víí dɨ bə́'.”

²⁹Yesu zíd vu̵ ya̧g tóó o̧: “I ho̧ zɔgɔb vu̵, kan la' tóó vu̵ 'waapád.

³⁰Ku̵u̵ sa kpag tée, aga ví ho̧ kan nɔ́ɔ́ víí, ví gaa mam hí̧i̧g ba dɨ bə́'.

³¹Ɨ́ yo̧go̧ á̧ḿ, kíí ho̧ hȩn yȩ ku̵u̵ ya̧ sú̵'ú̵ tée, i gaa gbaŋ waalı̵́ Tayɨɨ woo ba dɨ bə́'.

³²Mí o̧d ví moo yȩ́ńne, nán 'ya̧'a̧ yɛ vú̵ń nɔɔ 'waa né, hȩn yȩ vu̵ 'waapád vú̵ń ya̧ pȩ́ń.

³³Be' kan hág vú̵ń 'wáa ú̵, a̧máa moo míí vú̵ń 'wáa né sá̧ḿ.

³⁴“I gággú̵. Hȩn lálı̵́ a zo' ví sá, kan doo zɔlı̵́, kan hȩn hágá yɛ vu̵ á̧ḿ, moo zá̧ga̧ Yesu woo kan yɔg maa ví ya té' má nɔ.

³⁵Moo zá̧ga̧ woo wú̵ń mbaad nán vu̵ hágá yɛlı̵́ 'waapád kɔ́ ı̵́ ndow ka ma' ku̵u̵ wɔgɔ.

³⁶I nə sá, i o̧d Tayɨɨ moo mbaan wu̵lı̵́, moo há̧á̧ ví nuŋ néélȩ́, ví sə́d hȩn yȩ vu̵lı̵́. Tée ı̵́ míí Tayɨɨ ka ba'an ya yɛ, míń sə̧'ə̧n ví moo né.”

³⁷Zá̧ga̧lȩ́ tée, Yesu tú' moo na'am gbo̧o̧ lig hȩn ha"ı̵́lı̵́, a̧máa viddí tée, dɔg yúú gu̵u̵ la' kúḿmí, ud wu̵lı̵́.

³⁸Ya̧g ka̧'a̧m hí̧m tée, nán 'waapád vu̵ baa yaa woolı̵́ na'am gbo̧o̧ lig hȩn ha"ı̵́lı̵́, moo moo woo kilí.