Read Dii Lúg 22 Bible Online

Lúg 22 - Dii bible

Lúg 22

¹Mam vúnní 'yɛ́ wág sá ku̵u̵ beewu̵ páska máa, ká dɨ bə́'.

²Gbanaa hȩn ha"ı̵́ vu̵ kan nán moo Tayɨɨ tú"í vu̵, vu̵ soo hi̧naa bi nɔɔ Yesu wu̵, a̧máa vu̵ ndɔg dúú vu̵ yu̵.

³A̧máa nán tóó sa̧a̧m waa duulí wa̧nɓó' zu̵u̵ idú voolı̵́ máa, yéé woo Yúúdas. Vu̵ beewu̵ Iskarió á̧ḿ. Seeɗán dɔ́ la zó̧ó̧ woolı̵́,

⁴Yúúdas la mba moo kan gbanaa hȩn ha"ı̵́ vu̵, kan ı̵́ nii só̧ó̧ze ku̵u̵ tu̵ lig hȩn ha"ı̵́ máa vu̵. Ma mbɔ́g moo yúú hȩn a kɔ́ pȩ́ń, Yesu a dɔ́ voolı̵́ nagá máa.

⁵Ma zó̧ó̧ voo dȩ', vu̵ taddu̵ ya̧g tée ba bíń pú̵gu̵ sɨɨde.

⁶Yúúdas ka fȩȩ ya̧g talı̵́ voo sú̵'ú̵ máa, soo kɛb du̵u̵lı̵́ na'a, moo bi dɔd Yesu voolı̵́ nagá, dúú u̵u̵ ho̧ sá.

⁷Zá̧ga̧ mam vúnní 'yɛ́ wág sá ka ya̧, u̵u̵ sə̧'ə̧ mbee waa páska vu̵ wu̵lı̵́ máa,

⁸Yesu ba' Piɛ́r vu̵ kan Yoohá̧na, o̧d vu̵: “I la mbɔ́g hȩn lálı̵́ páska, ba lá ví ú.”

⁹Ma vu̵ hí̧i̧du̵: “Mɔ́ hí̧í̧ oo la mbɔ́g ya woo tɛ́lá?”

¹⁰Yesu duu o̧d vu̵: “I ki pȩ́ń. Sey kíí dɨ dɔ́lı̵́ la kaalı̵́ tɛ́ na, víń kan kan wayée tóó gaŋ gbág mam. Sey ka dɔ́ kíi woolı̵́ tée, ví dugu wu̵lı̵́,

¹¹ví o̧d ı̵́ kíi aga: ‘Akaw o̧ lig ba ii lá hȩn lálı̵́ páska kan waa duulí bii vu̵ wu̵lı̵́ máa, ba dɨ tɛ́lá?’

¹²Tée wú̵ń tú'ud ví lig ı̵́ yúba gbo̧o̧ ba'a, kan hȩn vu̵ tíŋ́ woolı̵́ 'waapád. Tée víń mbɔ́g hȩn lálı̵́ páska wu̵lı̵́.”

¹³Ku̵u̵ laa máa, vu̵ nuŋ hȩn 'waapád kɔ́ ı̵́ Yesu ba o̧d vu̵ pee wɔgɔ. Ma vu̵ mbɔ́g hȩn lálı̵́ páska wu̵lı̵́.

¹⁴Sey hȩn lálı̵́ páska ka ya̧ sú̵'ú̵ máa, Yesu ya mbaa ya hȩn lálı̵́lı̵́ kan waa ba'ad woo vu̵.

¹⁵O̧d vu̵: “Hȩn lálı̵́ páska káń lá kan ví yɛ to̧o̧n 'yɛ́nné, moo kaa dəŋ lá ví tíŋ́ hȩn ndɔ́gɔné nɔm míílí̧ yɛ nɔ.

¹⁶A̧máa mí o̧d ví, míń duu lánnɔ sı̵́ né há̧á̧ hȩn woo wú̵ń dɔ́ sé' woolı̵́ ya gbaŋ waalı̵́ Tayɨɨ woolı̵́ pȩ́ń.”

¹⁷Ɓɛ ɗag waa hȩn zɔlı̵́, dȩn Tayɨɨ nag, o̧: “I fȩȩ hȩn yɛ, i yȩ'ȩn zɔ ví la ú̵,

¹⁸moo mí o̧d ví, 'ya̧'a̧ yɛ míń duu zɔn sı̵́ doo yɛ né, há̧á̧ gbaŋ waalı̵́ Tayɨɨ woo wú̵ń ya̧ pȩ́ń.”

¹⁹Pig woolı̵́ máa, ɓɛ beréd, dȩn Tayɨɨ nag, yɨɨ zu̵u̵, pú̵ vu̵, o̧: “Hȩn yɛ fó̧ó̧ míí, [káń dɨ pú̵lı̵́ moo víí má nɔ. I kɔ́ ná', moo ví taan wu̵lı̵́.”

²⁰Pig hȩn lálı̵́lı̵́ máa, duu ɓɛ ɗag waa hȩn zɔlı̵́, o̧: “Hȩn zɔlı̵́ yɛ, wu̵ ya̧g talı̵́ 'maŋ yúú mɛm míí ka dɨ yɛ́nné moo víí yɛ nɔ.]

²¹A̧máa i ho̧ ó̧, nán ka dɨn dɔnné nag nánán voolı̵́ máa, dɨ hȩn lálı̵́ kan mí yɛlı̵́.

²²Ɨ́ míí Tayɨɨ ka ba'an ya yɛ, míń dɨ nɔm kɔ́ ı̵́ Tayɨɨ ká o̧ máa wɔgɔ. A̧máa zó̧ó̧ wú̵ń ví̧i̧ nánán ı̵́ a dɔn voolı̵́ nagá máa ó̧.”

²³Ma waa duulí woo vu̵ víń ya voolı̵́, nóo voolı̵́ sa̧a̧mé ban kɔ́ hȩn yȩlá?

²⁴Waa duulí Yesu woo vu̵ lúun moo ya voolı̵́, vu̵ o̧: “Sa̧a̧m baa ví yɛ, nóo nán gbo̧o̧ ka mba daga vu̵lá?”

²⁵Yesu ka ki ı̵́ yo̧go̧ máa, o̧d vu̵: “Gbanii hágá yɛ vu̵ baa igid nán voo vu̵. A̧máa kóó ı̵́ yo̧go̧ si̧', nán gbo̧o̧ hágá yɛlı̵́ vu̵ hí̧í̧ nán bii u̵u̵ bee bi ı̵́ hȩn du̵u̵ kɔ́lı̵́.

²⁶Ɨ́ víí máa, i kɔ́ ı̵́ yo̧go̧ sá. Ɨ́ nii víí máa a mbaa kɔ́ ı̵́ náásá̧ŋ́ wɔgɔ. Nán gbo̧o̧ a mbaa kɔ́ ı̵́ nán ba'ad wɔgɔ.

²⁷Nóo nán gbo̧o̧lá? Nán ı̵́ ka mbaa ya hȩn lálı̵́lı̵́ má naa? Tóó tée, nán ı̵́ ka kɔ́ddu̵ ba'ad má naa? Ɨ́ ka mbaa ya hȩn lálı̵́lı̵́ máa, wu̵ mbaga. A̧máa ı̵́ míí, mí mbaa víílí sa̧a̧mé kɔ́ ı̵́ nán ba'ad wɔgɔ.

²⁸“Ɨ́ víí máa, sey nán ku̵u̵ duun mí kan hȩn ɓı̵́d máa, ví kéé gbɔn mí ní.

²⁹Ɨ́ míí, míń dɔd ví gbanaa kɔ́ ı̵́ Ba'á ka mbɔ́g moo bi 'yɛ́n gbaniii yɛ wɔgɔ.

³⁰Tée víń sú̵g lá hȩn kan mí, víń zɔ hȩn kan mí ya gbaŋ waalı̵́ míílí̧. Víń mbaa láané, víń 'yɛ́ zig Izraɛ́l ı̵́ wa̧nɓó' zu̵u̵ idú yȩ vu̵.”

³¹Yesu o̧: “Simɔ́ŋ, Simɔ́ŋ, a̧m ki pȩ́ń. Seeɗán ɓá' Tayɨɨ néélȩ́ na'a yúú víílí 'waapád, moo bi tɨgɨ ví kɔ́ ı̵́ tú̵d gu̵u̵g wɔgɔ.

³²A̧máa ı̵́ míí mí o̧d Tayɨɨ moo yúú móólȩ́, moo zó̧ó̧ 'yɛ́lı̵́ móó a 'wáa sá. A̧máa ı̵́ móó, káḿ kɔ́ hȩn, káḿ duu tii zó̧ó̧ fíí ya míílí̧ yɛ, a̧m zigid dam vu̵ zó̧ó̧ á̧ḿ.”

³³A̧máa Piɛ́r o̧ddu̵: “Ɨ́ 'yɛ́lı̵́ míí, mí mbɔ́g fó̧ó̧ 'waa sú̵'ú̵, moo dɔ́lı̵́ kan mɔ́ lig púúsinalȩ́, kan nɔmmé á̧ḿ.”

³⁴Yesu duu o̧ddu̵: “Piɛ́r, mí o̧m, vid ɓəə yɛ nɔ́g va̧a̧ wú̵ń hȩ́ȩ ná né, mɔ́ń su̵u̵n do' ta̧a̧nɔ́, mɔ́ń o̧ bin gaan mí ní.”

³⁵Yesu duu o̧d vu̵: “Sey káń ba' ví, kíí pa̧ga̧n kə́ə sɨɨde né, kə́ə 'yȩ́ȩm ka pɛ́lı̵́, tɛ́gɛ́ ka pɛ́lı̵́ á̧ḿ máa, hȩn tóó gee ví áa?” Vu̵ hí̧i̧du̵: “Áá'a.”

³⁶Ma duu o̧d vu̵: “A̧máa 'ya̧'a̧ yɛ, nán ka dɨ kan kə́ə sɨɨde tée, a ɓɛ. Nán ka dɨ kan kə́ə 'yȩ́ȩm tée, a ɓɛ á̧ḿ. Nán ı̵́ ka 'yɛ́n pag naa né tée, a gí sa̧a̧m woo, a fȩȩn wu̵lı̵́.

³⁷Moo mí o̧d ví, hȩn ku̵u̵ bíńda debterelı̵́ máa, wú̵ń kɔ́y yúú míílí̧ ú̧. Moo sú̵u̵ wu̵ yɛ nɔ: ‘Ká vu̵ beewu̵ nán hȩn ɓı̵́d kɔ́lı̵́ɨ.’ Moo hȩn ku̵u̵ bíńda yúú míílí̧ máa, dɔ́ sı̵́ sé' woolı̵́ ú̵.”

³⁸Waa duulí woo vu̵ duu o̧ddu̵: “Ba'á, pag naa tóó vu̵u̵ idú yɛ nɔ.” Duu o̧d vu̵: “Maa yȩ.”

³⁹Pig woolı̵́ máa, Yesu vúd daa laa gu̵u̵ la' kúḿmí kɔ́ ı̵́ ka baa kɔ́ see máa wɔgɔ. Ma waa duulí woo vu̵ dugu.

⁴⁰Ka ya̧ ya woo máa, o̧d vu̵: “I ɓá' Tayɨɨɨ, moo ka vín dɔ́ hȩn zo"ı̵́lı̵́.”

⁴¹Aga daa séé la kɔ́ ı̵́ ya kaa gbɔ 'yɛgɛ, ka pɛ la wu̵lı̵́ máa wɔgɔ. Ma gu zu̵u̵ doo núug hágá,

⁴²baa ɓá' Tayɨɨ ná': “Ba' míí, a̧m hí̧í̧ ú̧ tée, hȩn ndɔ́gɔné nɔm yɛ a ya̧n sá.[16] A̧máa a̧m duu hȩn hí̧í̧lí̧ míí sá, séý hí̧í̧lí̧ móó a wu̵ kɔ́y.” [

⁴³Maleeka Tayɨɨ woo tóó vúd maa Yesu, zigidu̵ zó̧ó̧.

⁴⁴Zó̧ó̧ nam Yesu ɓu̵u̵lı̵́ na'a, ma pin Tayɨɨ kan hȩn ɓá"ı̵́. Ha̧a̧g woo təgə hágá kɔ́ ı̵́ mɛm wɔgɔ.]

⁴⁵Ka ɓá' Tayɨɨ 'waa máa, vȩ́' yaa waa duulí woo voolı̵́, maa vu̵ dɨ nəm kan zó̧ó̧ ví̧i̧níi.

⁴⁶Ka ho̧ vu̵ la ná' máa, o̧d vu̵: “Moo ȩn ví nəlá̧? I níḿ dɔg, i ɓá' Tayɨɨɨ, moo ka vín dɔ́ hȩn zo"ı̵́lı̵́.”

⁴⁷Sey Yesu ka dɨ moo yȩ o̧lȩ́ máa, dúú vu̵ ya̧ ya. Yúúdas ı̵́ ka dɨ sa̧a̧m waa duulí wa̧nɓó' zu̵u̵ idú woo voolı̵́ pee, ɓə́əd vu̵ tíŋ́, séé ya Yesu woolı̵́ moo bi vá"u̵ kan hȩn hu̧u̧lí̧i̧.

⁴⁸A̧máa Yesu o̧ddu̵: “Yúúdas, ı̵́ míí Tayɨɨ ka ba'an ya yɛ, mɔ́ ka vá'an, ma mɔ́ń dɔn nag nánán vooláa?”

⁴⁹Nán ı̵́ ku̵u̵ gbɔ daa kan Yesu, ku̵u̵ ho̧ hȩn kɔ́ a dɨ kɔ́yné yȩ máa, vu̵ o̧: “Ba'á, oo du̵ kan pag naaa?”

⁵⁰Nán dágá voolı̵́ sa̧a̧mé du̵ nán ba'ad ı̵́ nii hȩn ha"ı̵́ woo pee tɔ́g nag nán sə̧'.

⁵¹A̧máa Yesu o̧ddu̵: “Gbɔ la ú̵. Dii naggɨ.” Yesu za' tɔ́g woo, ma ndɔ́g yó̧.

⁵²Pig woolı̵́ Yesu ka ho̧ gbanaa hȩn ha"ı̵́ vu̵ kan ı̵́ nii só̧ó̧ze lig hȩn ha"ı̵́lı̵́ vu̵, kan ı̵́ nii Yúúda tóó ku̵u̵ yaa wu̵lı̵́ máa, o̧d vu̵: “Ví yaa míílí̧ kan pag naa vu̵ kan yé'en vu̵ kɔ́ ı̵́ kíí laa dɨ kɛm tóó woolı̵́ wɔgɔ máalá̧!

⁵³Ká mí mbaa kan ví zá̧ga̧ 'waapád lig hȩn ha"ı̵́lı̵́. Kóó ı̵́ yo̧go̧ si̧', nán tóó za'an mí ní. A̧máa zá̧ga̧ víí wu̵ yɛ nɔ, kan néélȩ́ vid woo á̧ḿ.”

⁵⁴Ku̵u̵ ma' Yesu máa, vu̵ pa̧ŋŋɔ laan ı̵́ nii hȩn ha"ı̵́ woolı̵́ kíilí. Piɛ́r duuwu̵ pigim ɗiilí na'a.

⁵⁵Nán tóó vu̵ kab vee na'am sa̧a̧mé, vu̵ sú̵g mbaa wu̵lı̵́. Piɛ́r ya mbaa sa̧a̧m voolı̵́ á̧ḿ.

⁵⁶Wakȩ́ȩ́ ba'ad tóó ho̧go̧ mbaa dáŋ́ vɛlı̵́, tə́gəwu̵, o̧: “Ɨ́ yɛ ká mbaa kan nán yȩ á̧ḿ.”

⁵⁷A̧máa Piɛ́r su̵u̵ ya̧g o̧: “Mí gaanɔ míí ní, na' míí.”

⁵⁸Zag zaa pɛ́lı̵́, nán tóó duu ho̧go̧ o̧: “Mɔ́ á̧ḿ, mɔ́ dɨ sa̧a̧m nán yȩ voolı̵́.” A̧máa Piɛ́r duu hí̧í̧: “Áá'a, míw pɛ́lı̵́, baa!”

⁵⁹Zamndi dágá ka ya̧a̧ daa máa, nán tóó kə́d duu ya sȩn fó̧ó̧ o̧: “Moo yȩ́ńne, nán yɛ mbaa kannɔ á̧ḿ, moo nán Gálilée.”

⁶⁰A̧máa Piɛ́r hí̧i̧du̵: “Mí gaan hȩn káḿ o̧n yȩ né, baa.” Piɛ́r o̧ moo yȩ 'waa ná né, nɔ́g va̧a̧ há̧á̧ hȩ́ȩ́.

⁶¹Ɨ́ 'yɛ́lı̵́ Yesu tii daa nɔ́ɔ́, tə́g Piɛ́r. A̧máa Piɛ́r duu dȩ́' moo ı̵́ 'yɛ́lı̵́ ba o̧ddu̵: “Vid ɓəə yɛ nɔ́g va̧a̧ wú̵ń hȩ́ȩ ná né, mɔ́ń su̵u̵n do' ta̧a̧nɔ́” pee.

⁶²Ma Piɛ́r daa vúd laa gɔ́ŋ́, ká̧ŋ́ kan zó̧ó̧ ví̧i̧ní.

⁶³Nán ku̵u̵ tu̵ Yesu máa, vu̵ kɔ́ddu̵ ba̧a̧m, vu̵ go̧o̧wo̧ nɔ́ɔ́, vu̵ zúŋ́ŋɔ, vu̵ vigi: “Nóo ku̵u̵ zúgumá? A̧m moo dɔg sı̵́ moo anábi móó pee na!”

⁶⁴

⁶⁵Vu̵ háá du̵g zaga vu̵ ɓu̵u̵lı̵́ na'a.

⁶⁶Ya̧g ka̧'a̧m ka tú sú̵'ú̵ máa, ı̵́ nii Yúúda vu̵ sú̵g kan gbanaa hȩn ha"ı̵́ vu̵ kan nán moo Tayɨɨ tú"í vu̵, vu̵ pa̧ŋ Yesu laan ı̵́ nii moo sə̧"ȩ́ voolı̵́.

⁶⁷Vu̵ vigi: “A̧m o̧d vɔ́ ú̵, móo ı̵́ nán sənnáa?” A̧máa Yesu hí̧i̧d vu̵: “Kóó a̧n o̧d ví si̧', víń fȩȩ né sá̧ḿ.

⁶⁸Tow a̧n vi ví moo, víń hí̧i̧ ní á̧ḿ.

⁶⁹A̧máa diga 'ya̧'a̧ yɛ, ı̵́ míí Tayɨɨ ka ba'an ya yɛ, míń dəŋ mbaa nag nán Tayɨɨ ı̵́ néélȩ́ na'a zu woolı̵́.”

⁷⁰Ya voo 'waapád ku̵u̵ ki ná' máa, vu̵ o̧: “Ɨ́ yo̧ga̧a̧? Mɔ́ Waa Tayɨɨ woo naa?” Yesu hí̧i̧d vu̵: “Ví o̧ sú̵'ú̵ naa? Mí wu̵ yu̵.”

⁷¹Ku̵u̵ ki ı̵́ yo̧go̧ máa, vu̵ ó̧ń: “Moo ȩn ba duu soo ví nán ya̧g du̵lı̵́ vu̵lá? Aga ba ki ví moo ya̧g woolı̵́ sú̵'ú̵ náa?”