Read Dii Lúg 4 Bible Online

Lúg 4 - Dii bible

Lúg 4

¹Yigid Tayɨɨ woo hi̧' Yesu woolı̵́. Yesu fíí ya ziŋ Yu̵ŕdɛnné. Yigid Tayɨɨ woo pa̧ŋŋɔ kə̧́ə̧n daa hó̧g kȩŋŋı̵́.

²Seeɗán baa zo"u̵ wu̵lı̵́ bá' vo' ndaddú̵. Bá' vo' ndaddú̵ yȩ, Yesu lán hȩn tóó né sá̧ḿ. Bá' yȩ ka ya̧a̧ sú̵'ú̵ máa, go̧o̧m ya̧ga̧.

³Ma Seeɗán o̧ddu̵: “A̧m Waa Tayɨɨ woo nɔ tée, a̧m o̧d 'yɛgɛ yɛ a tii nanne.”

⁴Yesu duu hí̧i̧du̵: “Debtere o̧: ‘Nánán mbaan kan vágád moo nan aga yɛ nɔ né.’ ”

⁵Seeɗán duu ɓɛ dɔgɔnɔ há̧á̧ yúba, vaŋná tú'udu̵ hág vu̵ 'waapád,

⁶o̧ddu̵: “Míń dɔm gbanaa hág yɛlı̵́, míń pú̵m kan hȩn naa woo vu̵ 'waapád, moo vu̵ míí nu. Míń pú̵ nán ı̵́ káń hí̧í̧ má nɔ.

⁷A̧m gun doo núug tíŋ́ tée, hȩn yȩ vu̵ 'waapád vú̵ń mbaa móó nɔ.”

⁸Yesu duu hí̧i̧du̵: “Debtere o̧: ‘A̧m gud ı̵́ 'yɛ́lı̵́ Tayɨɨ móó wu̵ doo núug, a̧m kɔ́d wu̵ yu̵ ba'ad dágá 'nɛ́ŋ́.’ ”

⁹Seeɗán duu pa̧ŋŋɔ laan Yerúsalemmé, diiwu̵ dɔg yúú lig hȩn ha"ı̵́lı̵́, o̧ddu̵: “A̧m Waa Tayɨɨ woo nɔ tée, a̧m wa̧ŋ zu̵u̵ hágá,

¹⁰moo debtere o̧: ‘Tayɨɨ wú̵ń o̧d maleeka woo vu̵ moo yúú móólȩ́, u̵u̵ tu̵mmɔ́.’

¹¹“Debtere duu o̧: ‘Vú̵ń kam nagá, moo doo móó a zuguy 'yɛgɛlı̵́ sá.’ ”

¹²Yesu duu hí̧i̧du̵: “Debtere o̧: ‘A̧m zo' ı̵́ 'yɛ́lı̵́ Tayɨɨ móó moo sá.’ ”

¹³Sey Seeɗán ka gu̵ggu̵ 'waa sú̵'ú̵ máa, daa lúú, duu laawu̵ sey tóólı̵́.

¹⁴Yesu daa fíí ya kan néélȩ́ yigid Tayɨɨ woo, daa laa hág Gáliléelı̵́. Yɛ́g woo kiy hág 'waapád ka gbɔ daa kan vu̵ wu̵lı̵́ á̧ḿ.

¹⁵Baa tú' moo lig sú̵ggı̵́ nán Yúúda voolı̵́. Nán 'waapád vu̵ dəmmɔ́.

¹⁶Yesu ya̧ Naazaréddı̵́ kaa ka na' wu̵lı̵́ máalȩ́. Dɔ́ lig sú̵ggı̵́ nán Yúúda voolı̵́ zá̧ga̧ asawəlı̵́ kɔ́ ı̵́ ka baa kɔ́ daa see máa wɔgɔ. Dii dɔg yúba moo bi záŋ́ga hȩnne.

¹⁷Ma vu̵ pú̵gu̵ debtere anábi Esáya woo. Yesu ka buuwu̵ zu̵u̵ máa, nuŋ ya tóó ku̵u̵ bíńda hȩn yɛ wu̵lı̵́ ná':

¹⁸“Yigid ı̵́ 'yɛ́lı̵́ Tayɨɨ woo dɨ míílí̧. Wu̵ yeen moo a̧n tú'ud nán gíḿ vu̵ moo to̧o̧ 'maŋŋɨ. Ba'an moo a̧n o̧d gba'a vu̵ moo mbaalı̵́ kan yúú voo nɔ, nán yə̧m u̵u̵ ho̧ nɔ́ɔ́. Ba'an moo a̧n səd nán ı̵́ ku̵u̵ igid vu̵ máa gbɔ la té',

¹⁹moo a̧n o̧ moo ve' zó̧ó̧ nán Tayɨɨ woo á̧ḿ.”

²⁰Pig woolı̵́ máa, Yesu ka dɔg debtere pee pú̵ nán ba'ad, ma tii mbaa daa ká̧á̧mé bi tú'ud vu̵ mooɨ. Nán ku̵u̵ mbaa lig sú̵ggı̵́ peelı̵́ yȩ vu̵ su̵g nɔ́ɔ́ laan woolı̵́.

²¹Ma dəŋ o̧d vu̵: “Ɓəə hȩn kíí ki ku̵u̵ bíńda yɛ dɔ́ sé' woolı̵́ sú̵'ú̵.”

²²Nán 'waapád ku̵u̵ ki moo to̧o̧ ka vúd ya̧g woolı̵́ yȩ máa, kɔ́ vu̵ la ɓá'. Ma vu̵ duu o̧: “Waa Yu̵u̵séfu woo nɔ pɛ́láa?”

²³Yesu ka ki máa, o̧d vu̵: “Ví hí̧í̧ bi zíń ya̧ggɨ, víń o̧n: ‘Gbaŋ gam, aga a̧m za̧a̧ sı̵́ fó̧ó̧ móó pȩ́ń’ lá? Víń duu o̧n: ‘Hȩn káḿ kɔ́ vu̵ kaa Kapɛrnáhu̧mmé kóó ki máa, a̧m duu kɔ́ vu̵ kaa móólȩ́ yɛlı̵́ á̧ḿ.’ ”

²⁴Duu o̧d vu̵: “Mí o̧d ví moo yȩ́ńne, vu̵ fȩȩn anábi tóó kaa ha̧a̧lȩ́ woolı̵́ né.

²⁵Moo yȩ́ńná, sey anábi Elía woolı̵́ máa, wakȩ́ȩ́ yɛd vu̵ ɓu̵u̵ hág Izraɛ́llı̵́ ú̵. Sey woolı̵́ máa, mam naga né ve' ta̧a̧nɔ́ kan sȩȩ gúú, go̧o̧m gbo̧o̧ kɔ́y hág 'waapád.

²⁶Kóó ı̵́ yo̧go̧ si̧' Tayɨɨ ba'an anábi Elía wakȩ́ȩ́ yɛd tóó woolı̵́ né, séý wakȩ́ȩ́ yɛd tóó woolı̵́ kaa Sarɛ́btalı̵́ hág Sidɔ́ŋŋı̵́.

²⁷Sey anábi Elíza woolı̵́ á̧ḿ, nán ho̧o̧ naa ká vu̵ ɓu̵u̵ hág Izraɛ́llı̵́ ú̵. A̧máa nán dágá aga fó̧ó̧ woo yu̵n né, séý fó̧ó̧ Naamáń, nán Siiríi woo wu̵ yu̵d.”

²⁸Nán ku̵u̵ mbaa lig sú̵ggı̵́ peelı̵́, ku̵u̵ ki moo yȩ máa, ya voo 'waapád vu̵ kɔ́ zó̧ó̧ yȩ́ȩ́.

²⁹Vu̵ lúú nɛŋŋɔ vud kaalı̵́, vu̵ pa̧ŋŋɔ laan há̧á̧ kpə́'əm gu̵u̵ ku̵u̵ waa kaa yúú woolı̵́ máalȩ́, moo bi ndaawu̵ gbɔ zu̵u̵ haagı̵́.

³⁰A̧máa Yesu ya̧a̧ vu̵ daa sa̧a̧mé, daa ka la.

³¹Yesu daa zu̵u̵ kaa Kapɛrnáhu̧mmé hág Gáliléelı̵́, baa tú' moo Tayɨɨ wu̵lı̵́ zá̧ga̧ asawəlı̵́.

³²Moo tú"í woo pi̧i̧ vu̵ 'waapád, la' vu̵ la fid.

³³Nán tóó yigid ɓı̵́d kɔ́gɔ, mbaa lig sú̵ggı̵́ nán Yúúda voolı̵́, moo dɔg moo yúba, o̧:

³⁴“Wí, Yesu nán Naazaréd, moo móó kan vɔ́ máa ȩná? Mɔ́ yaa vɔ́ tunnáa? Mí gaamɔ́, mɔ́ nán gbo̧o̧ Tayɨɨ ka ba' ya má nɔ.”

³⁵Ma Yesu sée yigid ɓı̵́d yȩ, o̧ddu̵: “Mbaa simná, vúd la nán yȩ woolı̵́.” Vaŋná yigid ɓı̵́d ndaa gbɔgɔ la hágá voolı̵́ sa̧a̧mé, daa vúd. Nán pee mbaa hȩn woo pá̧á̧.

³⁶Nán vu̵ 'waapád vu̵ mbaa ɗii, vu̵ víń ya voolı̵́: “Moo yȩ, moo ȩná? Nán yɛ pi̧i̧ yigid ɓı̵́d vu̵ kan néélȩ́ kɔ́ ı̵́ nán gbo̧o̧ wɔgɔ, nɛŋ vu̵ vud á̧ḿ.”

³⁷Yɛ́g Yesu woo kiy ya 'waapád hág yȩlȩ́.

³⁸Yesu vúd lig sú̵ggı̵́ nán Yúúda voolı̵́, dɔ́ kíi Simɔ́ŋ woolı̵́. Simɔ́ŋ a̧a̧ fa̧a̧ ká ud ho̧o̧ fó̧ó̧ píím gbo̧o̧ ba'a, ma vu̵ vi Yesu a za̧a̧wo̧ ó̧.

³⁹Yesu ya dii yúú woolı̵́, sée ho̧o̧. Vaŋná fó̧ó̧ ka̧"o̧, há̧á̧ lúú yúba, kɔ́d vu̵ ba'ad.

⁴⁰Zá̧ga̧ ka dɨ dɔ́lı̵́ máa, vu̵ pa̧ŋ nán ho̧o̧ vu̵ 'waapád yaan Yesu woolı̵́. Yéé ho̧o̧ kə́dkə́d ká wu̵ ho̧o̧ vu̵. Ma Yesu ha'ad vu̵ nag 'waa daa pád, za̧a̧ vu̵.

⁴¹Yigid ɓı̵́d vu̵ vúd fó̧ó̧ nán voolı̵́ ɓu̵u̵lı̵́ na'a á̧ḿ. Vu̵ moo dɔg moo yúba, vu̵ o̧: “Mɔ́ Waa Tayɨɨ woo nɔ.” Ma Yesu sée vu̵, sɛ́n vu̵ ya̧g kuuní ní. Moo vu̵ gaa ba wu̵ ı̵́ nán sənné.

⁴²Zá̧ga̧ ka ye' máa, Yesu vúd kaalı̵́ lúú laa ya tutugu tóólı̵́. Dúú vu̵ soowu̵ há̧á̧. Ku̵u̵ ho̧go̧ máa, vu̵ há"u̵, vu̵ hí̧í̧ a lúú biilí sá.

⁴³A̧máa Yesu o̧d vu̵: “Séý míń pa moo to̧o̧ 'maŋ, moo gbaŋ waalı̵́ Tayɨɨ woo kaa tóó vu̵lı̵́ á̧ḿ. Moo woo nɔ Tayɨɨ ba'an ya.”

⁴⁴Baa pa moo Tayɨɨ lig sú̵ggı̵́ nán Yúúda voo vu̵lı̵́ hág Yúúdalı̵́.