Read Dii Lúg 5 Bible Online

Lúg 5 - Dii bible

Lúg 5

¹Zá̧ga̧ tóólı̵́ máa, Yesu dɨ diilí ya̧g mam Gȩnɛzarɛ́ddı̵́. Dúú vu̵ ndáń laa moo Tayɨɨ kilí woolı̵́.

²Yesu ho̧ nɛ́ŋ́ tóó idú ya̧g mammé. Nán ze' ma"ȩ́ vu̵ vúd wu̵lı̵́, vu̵ dɨ kȩgȩ voo vu̵ tɛlı̵́ɨ.

³Ma ɗáá dɔg nɛ́ŋ́ ı̵́ Simɔ́ŋ Piɛ́r woolı̵́, o̧ddu̵ a see la nɛ́ŋ́ tíŋ́ waaná'. Ma Yesu mbaa zu̵u̵ nɛ́ŋ́ŋı̵́, tú'ud dúú vu̵ moo Tayɨɨ woo há̧á̧.

⁴Ka tú' moo 'waa máa, o̧d Simɔ́ŋ: “A̧m séé la tíŋ́ ya mam súlílí, ví la tú̵ú̵ kȩgȩ wu̵lı̵́, tée víń ma' ze'.”

⁵Simɔ́ŋ hí̧i̧du̵: “Ba' naa, vɔ́ kɔ́ ba'ad viviivid, vɔ́ nugun hȩn tóó né. A̧máa moo kíí o̧ sú̵'ú̵ máa, míń la tú̵ú̵ ú̵.”

⁶Ku̵u̵ tú̵ú̵ kȩgȩ máa, ze' vu̵ ma'ay há̧á̧, zaa kȩgȩ kan deyyú̵.

⁷Vu̵ gbóod daga vu̵ nag nɛ́ŋ́ tóólı̵́, moo ba u̵u̵ ya maa bi ú. Vu̵ yaa, vu̵ má'a ze' hi̧' nɛ́ŋ́ idú á̧ḿ. Zaa nɛ́ŋ́ ka vu̵n də́ə́b mammé.

⁸Simɔ́ŋ Piɛ́r ka ho̧ ku̵u̵ ma' ze' na'aa máa, zó̧ó̧ tó̧"o̧. Tó̧' nán ku̵u̵ mbaa kannɔ yȩ vu̵ á̧ḿ. Ma la gu doo núug tíŋ́ Yesu woolı̵́, o̧: “Ɨ́ 'yɛ́lı̵́ míí, i lúú la dáŋ́ míílí̧, moo mí nán hȩn ɓı̵́d kɔ́lı̵́ɨ.”

¹⁰Dú̵ú̵ kɔ́ waa Zebedée woo vu̵, Yaakúbu vu̵ kan Yoohá̧na á̧ḿ, moo ká vu̵ Simɔ́ŋ daga ba'ad vu̵ yu̵. A̧máa Yesu o̧d Simɔ́ŋ: “A̧m kɔ́ dú̵ú̵ sá. Diga 'ya̧'a̧ yɛ mɔ́ń dɨ nánán vu̵ beelı̵́ɨ.”

¹¹Ma vu̵ woo nɛ́ŋ́ vu̵ vud ɓá"ı̵́, vu̵ gbɔ hȩn 'waapád, vu̵ lúú dugu.

¹²Yesu ka dɨ kaa tóólı̵́ máa, nán tóó du̵u̵lı̵́, ho̧o̧ naa yɛ́ddu̵ fó̧ó̧ 'waa la pád. Ka ho̧ Yesu máa, ya kə̧ə̧du̵ la tíŋ́, ɓá"u̵ o̧: “Ba' naa, tow i hí̧í̧ ú̧ tée, víń kɔ́ fó̧ó̧ míí yɛ wú̵ń yu̵d.”

¹³Yesu yo̧o̧ nag, za"u̵, o̧: “Mí hí̧í̧ sú̵'ú̵, a yu̵dda ú̵.” Vaŋná ho̧o̧ 'wáawu̵ zu̵u̵ ya̧g woolı̵́.

¹⁴Yesu o̧ddu̵: “Tée a̧m o̧d nán tóó moo yɛ sá. A̧máa a̧m la tú' fó̧ó̧ móó nán hȩn ha"ı̵́ woolı̵́, mɔ́ la ha'ad Tayɨɨ hȩn kɔ́ ı̵́ anábi Múúsa ká o̧ máa wɔgɔ, moo nán 'waapád a gaa fó̧ó̧ móó ba yu̵d sú̵'ú̵.”

¹⁵A̧máa yɛ́g Yesu woo duu kiy mba hȩn ya 'waapád. Dúú vu̵ baa sú̵g ya moo woo kilí, moo a za̧a̧ bi ho̧o̧ bii á̧ḿ.

¹⁶A̧máa Yesu daa laa ya tutugulí, o̧d Tayɨɨ moo wu̵lı̵́.

¹⁷Zá̧ga̧ tóólı̵́ máa, Yesu dɨ moo Tayɨɨ tú"í. Nán farísa vu̵ kan nán moo Tayɨɨ tú"í vu̵, vu̵ mbaa dɨ dáŋ́ woolı̵́ á̧ḿ. Vu̵ yaa kaa 'waapád hág Gáliléelı̵́, kan hág Yúúdalı̵́ kan Yerúsalemmé á̧ḿ. Néélȩ́ ı̵́ 'yɛ́lı̵́ Tayɨɨ woo dɨ Yesu woolı̵́, ma baa za̧a̧ nán ho̧o̧ vu̵.

¹⁸Nán tóó ká vu̵ du̵u̵lı̵́, vu̵ gaŋ nán kpee tóó kan píg yaan. Vu̵ soo hi̧naa bi dɔ́ lig tíŋ́, bi 'yɛ́gɛ tíŋ́ Yesu woolı̵́.

¹⁹A̧máa vu̵ nugun ya dɔ́lı̵́ né, moo dúú ká vu̵ ɓu̵u̵ wu̵lı̵́ ú̵. Ku̵u̵ ho̧ ı̵́ yo̧go̧ máa, vu̵ gaŋŋɔ ɗaa dɔg yúú ligí, vu̵ kɛ yúú lig, vu̵ ta zaŋ píggí, vu̵ siddu̵ zu̵u̵ ya vu̵n kɛ peelı̵́, sa̧a̧m nán voolı̵́, vu̵ 'yɛ́gɛ tíŋ́ Yesu woolı̵́.

²⁰Yesu ka ho̧ zó̧ó̧ 'yɛ́lı̵́ voo máa, o̧d nán kpee pee: “Dan gboo, hȩn ɓı̵́d móó vu̵ kéé gboy sú̵'ú̵.”

²¹Nán moo Tayɨɨ tú"í vu̵ kan nán farísa ku̵u̵ ki moo yȩ máa, vu̵ taa moo voolı̵́ zó̧ó̧lȩ́: “Nán yȩ nóo pȩ́ń, ka haa Tayɨɨ yɛlı̵́? Nán tóó dɨ kan néélȩ́ kéé hȩn ɓı̵́d nán voo gbɔn né, séý Tayɨɨɨ.”

²²Yesu ka gaa moo taalı̵́ voo máa, vi vu̵: “Ví taa moo ȩn ı̵́ yo̧go̧ zó̧ó̧ víílílá?

²³Kaa o̧d nán: ‘Hȩn ɓı̵́d móó vu̵ kéé gboy sú̵'ú̵,’ tóó tée kaa o̧: ‘A̧m lúú yúba, mɔ́ 'yȩmma ó̧’ tée ȩn təə mbalá?

²⁴A̧máa ı̵́ míí Tayɨɨ ka ba'an ya yɛ, mí hí̧í̧ i gaa ba mín dɨ kan néélȩ́ kéé hȩn ɓı̵́d nán voo vu̵ gbɔ hágá yɛlı̵́ ú̵.” Ma o̧d nán kpee pee: “Míi o̧m a̧m lúú dɔg yúba, mɔ́ ɓɛ píg móó, mɔ́ laa móólȩ́ kíilí.”

²⁵Vaŋná nán kpee pee lúú dɔg ha̧d tíŋ́ voolı̵́, ɓɛ píg woo ba ud wu̵lı̵́ pee, daa laa woolı̵́ kíilí, na' Tayɨɨ.

²⁶Hȩn yȩ kɔ́ nán 'waapád vu̵ la ɓá'. Dú̵ú̵ kɔ́ vu̵ á̧ḿ, vu̵ na' Tayɨɨ, vu̵ o̧: “Ba ho̧ ví hȩn sa̧ga̧ gbo̧o̧ tóó ɓəə sú̵'ú̵.”

²⁷Pig woo, Yesu ka vúd gɔ́ŋ́ máa, ho̧ nán lámba su̵ggı̵́ tóó, yéé woo Levíd, dɨ mbaalı̵́ bilów woolı̵́. Yesu o̧ddu̵: “A̧m duun ya ú̵.”

²⁸Levíd lúú dɔg, gbɔ hȩn 'waapád, dugu.

²⁹Pig woolı̵́ máa, Levíd kɔ́d Yesu hȩn lálı̵́ ɓu̵u̵lı̵́ na'a woolı̵́ kíilí. Nán lámba su̵ggı̵́ tóó vu̵ du̵u̵lı̵́ ɓu̵u̵lı̵́ na'a, sú̵g kan nán tóó ku̵u̵ mbaa kan vu̵ máa á̧ḿ.

³⁰Nán farísa vu̵ kan nán moo Tayɨɨ tú"í ku̵u̵ duu moo voo máa, vu̵ ŋguu moo, vu̵ vi waa duulí Yesu woo vu̵: “Moo ȩn ví sú̵g lá hȩn, ví zɔ hȩn kan nán lámba su̵ggı̵́ vu̵ kan nán hȩn ɓı̵́d kɔ́lı̵́ vu̵ dágálá?”

³¹Yesu hí̧i̧d vu̵: “Nán ku̵u̵ mbaa nánná máa, vu̵u̵ soon gbaŋ gam né. A̧máa nán ho̧o̧ vu̵u̵ baa soo.

³²Mí yaan nán ku̵u̵ taa ba bin kɔ́ hȩn hí̧í̧lí̧ Tayɨɨ woo nɔ máa vu̵ yu̵ beelı̵́ né, a̧máa mí ya bee nán ı̵́ ku̵u̵ gaa ba bin kɔ́ hȩn ɓı̵́ddɨ máa vu̵ yu̵, moo u̵u̵ tii zó̧ó̧ȩ.”

³³Nán pee vu̵ duu o̧d Yesu: “Waa duulí Yoohá̧na woo vu̵ kan nán farísa vu̵, vu̵ baa kȩȩ hȩn lálı̵́ bə́' bə́', vu̵ baa o̧d Tayɨɨ moo á̧ḿ. A̧máa waa duulí móó vu̵ dɨ voo hȩn lálı̵́, vu̵ zɔ hȩn á̧ḿ.”

³⁴Yesu hí̧i̧d vu̵ o̧: “Nán ku̵u̵ bee vu̵ hȩn lálı̵́ lig pú̵lı̵́lı̵́, ma ı̵́ kȩ́ȩ́ aga ka dɨ lá kan vu̵ tée, víń hí̧í̧ u̵u̵ kȩȩ hȩn lálı̵́ á̧ḿma?

³⁵A̧máa zá̧ga̧ tóó wú̵ń yaa dɨlı̵́, vú̵ń luu ı̵́ kȩ́ȩ́ aga voolı̵́ sa̧a̧mé, tée vú̵ń kȩȩ hȩn lálı̵́ sey yȩlȩ́.”

³⁶Duu zíd vu̵ ya̧g tóó, o̧: “Nán tóó sə̧' sa̧a̧m dɔ́lı̵́ 'maŋ la ní'in sa̧a̧m dɔ́lı̵́ seelı̵́ né, moo sa̧a̧m 'maŋ wú̵ń lı̵́d, sa̧a̧m də̧'ə̧ 'maŋ yȩ wú̵ń man kan sa̧a̧m see né.

³⁷Vu̵ to̧o̧n doo gbág seelı̵́ né. Nán a kɔ́ ı̵́ yo̧go̧ tée, doo wú̵ń 'wɔ gbág lı̵́d, tée doo wú̵ń yɛ́d á̧ḿ.

³⁸A̧máa ba to̧o̧ doo gbág 'maŋŋı̵́.

³⁹Nán ka zɔ doo salı̵́ tée, duu sɛ́n doo zȩ́ȩm né. Moo o̧ doo salı̵́ ba wu̵ to̧o̧.”