Read Dii Lúg 9 Bible Online

Lúg 9 - Dii bible

Lúg 9

¹Yesu su̵g waa duulí ı̵́ wa̧nɓó' zu̵u̵ idú vu̵, pú̵ vu̵ néélȩ́ yigid ɓı̵́d vu̵ nɛné, kan ho̧o̧ za̧a̧né á̧ḿ.

²Ba' vu̵ moo u̵u̵ la pa moo gbaŋ waalı̵́ Tayɨɨ woo nɔ, u̵u̵ za̧a̧ nán ho̧o̧ vu̵ á̧ḿ.

³O̧d vu̵: “I ɓɛ hȩn 'yȩ́ȩm vu̵ sá, kóó táa, kóó kə́ə, kóó hȩn sə́né, kóó sɨɨde. Kóó nɔ́nná á̧ḿ, a pa̧ŋ sa̧a̧m idú sá.

⁴Kíí dɔ́ kíi tóólı̵́ tée, i mbaa wu̵lı̵́, há̧á̧ a ya̧ bá' lúúlí víí.

⁵Nán kaa tóó ku̵u̵ fȩȩn ví ní, kíí dɨ lúúlí wu̵lı̵́ tée, i ta'ad nag víí,[4] moo a mbaad vu̵ hȩn ya̧g du̵lı̵́ɨ.”

⁶Waa ba'ad pee vu̵ laa, vu̵ kə̧́ə̧́ duu kaalı̵́ kaalı̵́, vu̵ pa moo to̧o̧ 'maŋ, vu̵ za̧a̧ nán ho̧o̧ vu̵ ya 'waapád.

⁷Sey gbanaa Heeród ka ki hȩn ka kɔ́y 'waapád yȩ máa, la"u̵ kɛb, moo nán tóó vu̵ o̧: “Yoohá̧na ı̵́ mam Tayɨɨ wooné wu̵ níḿ nɔmmé.”

⁸Tóó vu̵ o̧ voo: “Anábi Elía wu̵ tú' fó̧ó̧ woo.” Tóó vu̵ o̧: “Anábi gbo̧o̧ tóó wu̵ níḿ nɔmmé.”

⁹A̧máa Heeród ka ki máa, o̧: “Aga ká mí du̵ yúú Yoohá̧na woo sə̧' sú̵'ú̵. A̧máa nán káń duu ki moo ı̵́ yo̧go̧ yúú woolı̵́ yȩ, nɔ́nná?” Heeród soo kɛb bi ho̧ Yesu ú̵.

¹⁰Waa ba'ad ku̵u̵ fíí ya máa, vu̵ o̧d Yesu hȩn ku̵u̵ kɔ́ máa 'waapád. Ma ɓɛ vu̵ ya voolı̵́ mɛ́ń, pa̧ŋ vu̵ lúú laan dáŋ́ kaa Bɛdsáýdalı̵́.

¹¹Nán ɓu̵u̵lı̵́ na'a ku̵u̵ gaa máa, vu̵ dugu. Yesu fȩȩ vu̵ pu̵dpu̵d, pad vu̵ moo gbaŋ waalı̵́ Tayɨɨ woo, za̧a̧ nán ho̧o̧ vu̵ á̧ḿ.

¹²Zá̧ga̧ ka 'yɨg máa, waa duulí ı̵́ wa̧nɓó' zu̵u̵ idú pee vu̵ ya o̧d Yesu: “A̧m gbɔ dúú yɛ u̵u̵ laa kaalı̵́ kan lumnde ka'adı̵́ yȩ vu̵lı̵́, u̵u̵ la ud, u̵u̵ nuŋ hȩn lálı̵́ wu̵lı̵́ á̧ḿ, moo ya yɛ hó̧ggɨ.”

¹³A̧máa Yesu hí̧i̧d vu̵ o̧: “Aga a víi pú̵ vu̵ hȩn lálı̵́.” A̧máa vu̵ duu hí̧i̧du̵: “Vɔ́ dɨ kan beréd kígi nɔ́nɔ́ kan ze' idú aga nɔ. Mɔ́ hí̧í̧ oo la fȩȩd dúú yɛ vu̵ 'waapád hȩn láláa?”

¹⁴Moo zaa wayée ka vu̵n dɨ fó̧ó̧ uzinɛɛre nɔ́nɔ́. Ma Yesu duu o̧d waa duulí woo vu̵: “I mbɔ́g 'yɛ́ vu̵ hágá hú' kan hú', vo' nɔ́nɔ́ nɔ́nɔ́.”

¹⁵Waa duulí woo vu̵ kɔ́ ı̵́ yo̧go̧. Vu̵ mbɔ́g vu̵, vu̵ mbaa hágá.

¹⁶Pig woo máa, Yesu ɓee dɔg beréd nɔ́nɔ́ pee, kan ze' idú pee vu̵ á̧ḿ, 'yɛ́ dɔg nɔ́ɔ́ be"ı̵́, dȩn Tayɨɨ nag, ma yɨɨ zu̵u̵, pú̵ waa duulí woo vu̵, moo u̵u̵ yȩ'ȩ dúú pee vu̵ ú̵.

¹⁷Ya voo 'waapád vu̵ lá, vu̵ ha̧', ma vu̵ duu su̵g kéélı̵́ woo, ɓaa wa̧nɓó' zu̵u̵ idú.

¹⁸Zá̧ga̧ tóólı̵́ máa, Yesu o̧d Tayɨɨ moo, vu̵ kan waa duulí woo vu̵ mɛ́ń. Ma vi vu̵: “Yee nán vu̵ o̧ ba mín nɔ́nná?”

¹⁹Vu̵ hí̧i̧du̵: “Tóó vu̵ o̧ ba mɔ́n Yoohá̧na ı̵́ mam Tayɨɨ wooné wu̵. Tóó vu̵ o̧ ba mɔ́n Elía wu̵. Tóó vu̵ o̧ voo ba mɔ́n anábi gbo̧o̧ tóó ba ka níḿ nɔmmé má nɔ.”

²⁰Ma Yesu duu vi vu̵: “Ví o̧ víí nɛ́nná?” Ma Piɛ́r hí̧i̧du̵ o̧: “Mɔ́ ı̵́ nán sənné Tayɨɨ ka ba' ya má nɔ.”

²¹Yesu ka ki máa, há' vu̵ u̵u̵ o̧d nán tóó moo yȩ sá.

²²Duu o̧: “Ɨ́ míí Tayɨɨ ka ba'an ya yɛ, séý míń nuŋ hȩn ndɔ́gɔné gbo̧o̧ ba'a pȩ́ń. Ɨ́ nii Yúúda vu̵ kan gbanaa hȩn ha"ı̵́ vu̵ kan nán moo Tayɨɨ tú"í vú̵ń man, vú̵ń nɔɔn, a̧máa bá' idú, ta̧a̧nɔ́ woo tée, míń níḿ nɔmmé.”

²³Yesu duu o̧d nán vu̵ 'waapád: “Nán tóó a hí̧í̧ bi duunɔ́ tée, a gbɔ moo taalı̵́ fó̧ó̧ woolı̵́ pȩ́ń, a ndɔg nɔm sá, a duun zá̧ga̧ 'waapád.

²⁴Nán tóó a hí̧í̧ bi səd fó̧ó̧ bii nu tée, wú̵ń tiddu̵ ú̵. A̧máa nán a tid fó̧ó̧ woo moo míílí̧ tée, wú̵ń sə́ddú̵.

²⁵Nán tóó a nuŋ hȩn góó 'waapád pȩ́ń, a tid vágád woo, a lı̵́ddu̵ tée, ȩn wú̵ń yagadu̵lá?

²⁶Moo nán tóó a kɔ́ sȩ́ḿ yúú míílí̧, kan moo míí vu̵lı̵́ tée, mí á̧ḿ, sey a̧n yaa yaalı̵́ gbo̧o̧ kan na"ȩ́ Ba' míí woo kan maleeka woo vu̵ tée, sȩ́ḿ sı̵́ń kɔ́n kannɔ á̧ḿ.

²⁷Mí o̧d ví moo yȩ́ńne, nán kíí dii yɛlı̵́ yɛ, tóó vú̵ń nɔɔ né, vú̵ń ho̧ gbaŋ waalı̵́ Tayɨɨ woo pȩ́ń.”

²⁸Sey Yesu ka moo moo yȩ máa, duu səə alad dágá, ma ɓɛ Piɛ́r kan Yoohá̧na kan Yaakúbu, vu̵ ɗáá dɔg gu̵u̵lı̵́, moo bi o̧d Tayɨɨ mooɨ.

²⁹Sey ka dɨd Tayɨɨ moo o̧lȩ́ máa, ya̧g túń woo tii, sa̧a̧m woo bú mbaa kɛ́ŋ́kɛ́ŋ́.

³⁰Vaŋná, nán tóó vu̵ idú vu̵ mba moo kannɔ. Ká anábi Múúsa vu̵ kan Elía wu̵.

³¹Vu̵ tú' fó̧ó̧ voo, vu̵ gáá mbaa wəŋ. Vu̵ mba moo kan Yesu yúú ba'ad a dɨ kɔ́lı̵́ Yerúsalemmé máa, kan nɔm woo wu̵lı̵́ á̧ḿ.

³²Piɛ́r vu̵ kan daga vu̵, vu̵ nə la səŋgələŋ. Ku̵u̵ níḿ, nɔ́ɔ́ voo ka tá'ád sú̵'ú̵ máa, vu̵ ho̧ gáálı̵́ Yesu woo kan nán idú vu̵n mba moo kannɔ pee vu̵ á̧ḿ.

³³Sey nán yȩ ku̵u̵ bi hı̵́'ı̵́n kan Yesu ú máa, Piɛ́r o̧d Yesu: “Ba' naa, kaa sú̵g mbaa ví yɛ, du̵u̵ ú̵. Vɔ́ń kəb waa ta̧a̧nɔ́, ı̵́ móó a dágá, Múúsa woo a dágá, Elía woo a dágá.” A̧máa Piɛ́r gaan hȩn ka o̧n yȩ né á̧ḿ.

³⁴Sey ka dɨ moo yȩ moolȩ́ máa, mam hi̧i̧g vúd fii vu̵ ya, sú' vu̵ zu̵u̵ ɓilim. Sey mam hi̧i̧g ka fii sú' vu̵ zu̵u̵ máa, dú̵ú̵ kɔ́ vu̵.

³⁵Yɛ́g tóó kiy zu̵u̵ mam hi̧i̧g peelı̵́, o̧: “Ɨ́ yɛ waa míí, káń yeewu̵ má nɔ. I kiddu̵ tɔ́ggú̵.”

³⁶Sey yɛ́g yȩ ka moo moo 'waa sú̵'ú̵ máa, Yesu kéé sı̵́ wu̵ dágá. Waa duulí woo vu̵ mbaa sı̵́ voo simná. Sey woolı̵́ máa, vu̵ o̧n nán tóó moo yúú hȩn ku̵u̵ ho̧n yȩlȩ́ né sá̧ḿ.

³⁷Ya̧g ka̧'a̧m woo ku̵u̵ dɨ zu̵u̵ sílí gu̵u̵lı̵́ máa, dúú ɓu̵u̵lı̵́ na'a vu̵ yaa, vu̵ kan kan Yesu.

³⁸Nán tóó ká dɨ sa̧a̧m dúú yȩ voolı̵́, moo moo dɔg yúba: “Akaw, mí dȩm naggɨ, a̧m ya ho̧ waa[5] míí yɛ ú̵, moo waa míí 'wáa dágá yɔ.

³⁹Yigid ɓı̵́d baa ma"o̧, baa wá̧á̧ wa̧ya̧g bə́' bə́', waa 'wóy mbaa kpu̵r, fú̵g baa vúd ya̧g woolı̵́. Ka ma"o̧ sú̵'ú̵ tée, gbɔnnɔ vaŋ né, baa ko̧go̧wo̧ hágá.

⁴⁰Ba mín vi waa duulí móó u̵u̵ nɛŋ yigid yȩ ó̧, a̧máa vu̵ nɛŋŋɔ mban né.”

⁴¹Ma Yesu hí̧i̧du̵ o̧: “Nán moo faalı̵́ kan hȩn kə̧ə̧g kɔ́lı̵́ yɛ ví, míń ma' zó̧ó̧ mbaa kan ví nɛ́nná? A̧m pa̧nnɔ ya ú̵.”

⁴²Sey waa ka dɨ séélı̵́ ya máa, yigid ɓı̵́d gbɔgɔ hágá, nammɔ za̧a̧ná. A̧máa Yesu sée yigid ɓı̵́d pee, za̧a̧ waa pee á̧ḿ, daa ɓɛ pú̵gu̵ kan ba' woo.

⁴³Hȩn gbo̧o̧ Tayɨɨ woo yɛ la' nán vu̵ kɛb fid. Hȩn 'waapád Yesu ka kɔ́ yȩ la' kóó nɔ́nná kɛb. Ma Yesu o̧d waa duulí woo vu̵:

⁴⁴“Ɨ́ víí, i 'yɛ́ moo yɛ zó̧ó̧ víílí du̵u̵lı̵́ na'a; ı̵́ míí Tayɨɨ ka ba'an ya yɛ, vú̵ń dɔn nag nánán voolı̵́.”

⁴⁵A̧máa vu̵ kin moo yȩ né. Hȩn woo big vu̵ la ɓid moo u̵u̵ ki sá, ma vu̵ duu ndɔggu̵ vilí á̧ḿ.

⁴⁶Waa duulí Yesu woo vu̵ fan moo voolı̵́ sa̧a̧mé, vu̵ víń, nóo mba daga vu̵ na"ȩ́lá?

⁴⁷Yesu ka gaa moo taalı̵́ voo máa, ɓɛ náásá̧ŋ́ waa tóó díid vu̵ tíŋ́,

⁴⁸o̧d vu̵: “Nán a fȩȩ náásá̧ŋ́ waa yɛ kan yɛ́g míí tée, fȩȩ míw. Nán a fȩȩn tée, fȩȩ ı̵́ ka ba'an ya máa á̧ḿ, moo nán ı̵́ ka mbaa waaná' víílí sa̧a̧mé máa, wu̵ nán gbo̧o̧.”

⁴⁹Yoohá̧na ka moo sɔ, o̧: “Ba' naa, vɔ́ ho̧ nán tóó nɛŋ yigid ɓı̵́d vu̵ vud kan yɛ́g móó, ma vɔ́ há"u̵, moo ka duun ba ví ní má nɔ.”

⁵⁰A̧máa Yesu hí̧i̧du̵: “Ka víń há"u̵ sá, moo nán ka mán ví ní tée, wu̵ nán víí.”

⁵¹Zaa Yesu wú̵ń dɔg sı̵́ be"ı̵́ ú̵ máa, 'yɛ́ zó̧ó̧ bi dɔg Yerúsalemmé.

⁵²Ba' waa ba'ad woo vu̵ laan tíŋ́. Vu̵ lúú laa kaa tóólı̵́ hág Samaríilí, moo bi mbɔ́gɔdu̵ hȩn ya dɔ́lı̵́ woolı̵́.

⁵³A̧máa nán kaa yȩ vu̵ fȩȩnɔ né, moo ka dɨ dɔggı̵́ Yerúsalemmé má nɔ.

⁵⁴Sey waa duulí woo Yaakúbu vu̵ kan Yoohá̧na ku̵u̵ ho̧ ná' máa, vu̵ o̧: “Ba'á, mɔ́ hí̧í̧ oo bee vee dɔg be"ı̵́, a zu̵u̵ a̧n vu̵ áa?”

⁵⁵Yesu ka ki ná' máa, tii daa sée vu̵.

⁵⁶Ma vu̵ daa laa kaa tóólı̵́.

⁵⁷Sey ku̵u̵ dɨ laalı̵́ hi̧naalȩ́ máa, nán tóó o̧d Yesu: “Ya 'waapád i dɨ laalı̵́ máa, míń duu ví wu̵lı̵́.”

⁵⁸Yesu hí̧i̧du̵: “Ɗɨɨd vu̵ dɨ voo kan dəə ú̵. Nɔ́g waa vu̵ dɨ kan waa waa voo vu̵ á̧ḿ, a̧máa ı̵́ míí Tayɨɨ ka ba'an ya yɛ, mí kan ya úud pɛ́lı̵́.”

⁵⁹Yesu o̧d nán tóó: “A̧m duunɔ́.” Ma nán pee hí̧i̧du̵: “Ba'á, ba' míí nɔɔ ó̧, i gbɔn hi̧naa mí la dɔddu̵ pȩ́ń.”

⁶⁰A̧máa Yesu duu hí̧i̧du̵: “A̧m gbɔ nán nɔm u̵u̵ dɔd nɔm voo vu̵ la ú̵. A̧m la tú' móó moo gbaŋ waalı̵́ Tayɨɨ woo nɔ.”

⁶¹Nán tóó duu o̧ddu̵: “Ba'á, míń duu ví ú. A̧máa i gbɔn hi̧naa mí la vá' nán míí vu̵ pȩ́ń.”

⁶²A̧máa Yesu hí̧i̧du̵: “Nán ka dɨ hȩn baalı̵́ pȩ́ń, ka tii nɔ́ɔ́ 'yɛ́ la pigim tée, maanɔ mbaalı̵́ gbaŋ waalı̵́ Tayɨɨ woolı̵́ né.”