Read Dii Yoohá̧na 10 Bible Online

Yoohá̧na 10 - Dii bible

Yoohá̧na 10

¹Yesu duu o̧: “Mí o̧d ví moo yȩ́ńne, nán ka dɔ́n ya̧g dɔ́m ság mbeelı̵́ né, a̧máa ka ɗáá duu ya tóólı̵́ tée, nán líwwi, kɛmme á̧ḿ.

²A̧máa nán ka dɔ́ ya̧g dɔ́m ság mbeelı̵́ tée, waa tu̵ mbeeɨ.

³Nán ya̧g dɔ́m tu̵lı̵́ tú̵'u̵du̵, tée mbee vu̵ ki yɛ́g woo gaa, bee mbee dáń woo vu̵ kan yéé, kan yéé, pa̧ŋ vu̵ laan gɔ́ŋ́.

⁴Ka vud mbee dáń woo vu̵ gɔ́ŋ́ 'waapád sú̵'ú̵ tée, ɓə́əd vu̵ tíŋ́, vu̵ dugu, moo vu̵ ki yɛ́g woo gaa ú̵.

⁵Vu̵ duun gáá né sá̧ḿ, a̧máa vú̵ń lúú ɗug gbɔgɔ, moo vu̵ ki yɛ́g woo gaa né.”

⁶Yesu ka zíd vu̵ ya̧g yȩ máa, vu̵ kin moo ka hí̧í̧ bi o̧n vu̵ yȩ né.

⁷Yesu duu o̧d vu̵: “Mí o̧d ví moo yȩ́ńne, mí mbaa kɔ́ ı̵́ ya̧g dɔ́m ság mbee wɔgɔ.

⁸Nán 'waapád kú̵u̵ yaa tíŋ́ míílí̧ yȩ, vu̵ nán líw kan kɛm vu̵ yu̵. A̧máa mbee vu̵ ki yɛ́g voo gaa né.

⁹Mí mbaa kɔ́ ı̵́ ya̧g dɔ́m wɔgɔ; nán a dɔ́ duu míílí̧ tée, wú̵ń sə́ddú̵. Wú̵ń dɔ́, wú̵ń vúd, wú̵ń nuŋ hȩn lálı̵́ á̧ḿ.

¹⁰Nán líw yaa woo də́ń moo líwwi, kan moo mbee vu̵ sə̧'ə̧né lı̵́nnée. A̧máa ı̵́ míí, mí yaa moo nán u̵u̵ nuŋ vágád káákáá, u̵u̵ nuŋŋɔ ɓu̵u̵lı̵́ na'a á̧ḿ.

¹¹Mí waa tu̵ mbee du̵u̵ɨ. Waa tu̵ mbee du̵u̵ pú̵ fó̧ó̧ woo moo mbee voolı̵́.

¹²A̧máa nán ba'ad sɨɨde, ka waa tu̵ mbee pɛ́lı̵́, mbee ku̵u̵ woo nɔ pɛ́lı̵́ á̧ḿ máa, ka ho̧ zág ya̧'a̧d ka yaa tée, kéé mbee vu̵ gbɔ, bé' ɗug mɛ́ń. Zág ya̧'a̧d má'a vu̵, hɨ'ɨ vu̵.

¹³Nán ba'ad lúú ɗug, moo woo nán ba'ad sɨɨdeɨ; hȩn tóó kannɔ moo mbee voo né.

¹⁴Míi waa tu̵ mbee du̵u̵. Mí gaa mbee míí vu̵ ú̵, mbee míí vu̵ gaan á̧ḿ,

¹⁵kɔ́ ı̵́ Ba' míí ka gaan, ma káń gaawu̵ máa wɔgɔ á̧ḿ. Ma mí pú̵ fó̧ó̧ míí moo mbee míí voo.

¹⁶Mí dɨ kan mbee tóó vu̵ á̧ḿ, vu̵ ság yɛlı̵́ pɛ́lı̵́; séý míń tu̵ vu̵ á̧ḿ. Vú̵ń ki yɛ́g míí, tée hú' woo wú̵ń mbaa dágá, waa tu̵ mbee wú̵ń dágá á̧ḿ.

¹⁷Ba'á hí̧i̧n moo káń pú̵ fó̧ó̧ míí má nɔ, ma míń duu ɓɛgɛ.

¹⁸Nán tóó wú̵ń vbinnɔ né, a̧máa aga míńnɔ pú̵ kan nag míí. Mí dɨ kan néélȩ́ pú̵lı̵́ woo ú̵, mí dɨ kan néélȩ́ duu ɓɛgɛ á̧ḿ. Hȩn Ba'á ka mbɔ́g, ka o̧n máa, wu̵ yȩ nɔ.”

¹⁹Nán Yúúda ku̵u̵ ki máa, vu̵ duu moo moo ya̧g kə́dkə́d yúú moo yȩlȩ́.

²⁰Nán ɓu̵u̵lı̵́ na'a vu̵ o̧: “Yigid ɓı̵́d kɔ́gɔ ú̵; yı̵́gı̵́d sú̵'ú̵ náa? Moo ȩn ví ki moo woolá?”

²¹A̧máa nán tóó vu̵ o̧ voo: “Moo yȩ moo nán yigid ɓı̵́d woo nɔ pɛ́lı̵́. Yigid ɓı̵́d tóó kɔ́n nán yə̧m vu̵ ho̧n nɔ́ɔ́ né náa?”

²²Mam vúnní nán Yúúda voo tóó ká du̵u̵lı̵́ sey ho̧o̧mé, vu̵ mbɔ́g lig hȩn ha"ı̵́ Yerúsalemmé wu̵lı̵́.

²³Yesu 'yȩm daa lig hȩn ha"ı̵́lı̵́, ɗaŋ waa ı̵́ Súlemáánu woolı̵́.

²⁴Nán Yúúda vu̵ gbɔ daa kan Yesu, vu̵ vigi: “Vɔ́ń laam há̧á̧ sey woo téé? Móo ı̵́ nán sənnáa? A̧m o̧d vɔ́ ya ha̧d.”

²⁵Yesu hí̧i̧d vu̵: “Mí o̧d ví sú̵'ú̵, ma ví fȩȩn moo míí ní; ba'ad káń dɨ kɔ́lı̵́ kan yɛ́g Ba'á woo yɛ, vú̵ńnɔ du̵ ya̧g yúú míílí̧.

²⁶A̧máa ví 'yɛ́n zó̧ó̧ woolı̵́ né, moo ví sa̧a̧m mbee míí voolı̵́ pɛ́lı̵́.

²⁷Mbee míí vu̵ ki yɛ́g míí, mí gaa vu̵, vu̵ dɨn duulíi á̧ḿ.

²⁸Ma mí pú̵ vu̵ vágád káákáá; vú̵ń tin ní sá̧ḿ há̧á̧ káákáá. Nán tóó wú̵ń vbin vu̵ míílí̧ nagá né á̧ḿ.

²⁹Ba' míí ka pú̵n vu̵ máa, wu̵ mba hȩn 'waapád. Nán tóó wú̵ń vbid vu̵ nag woolı̵́ mban né.

³⁰Vɔ́ kan Ba'á máa, vɔ́ dágá.”

³¹Nán Yúúda vu̵ duu fá̧á̧ 'yɛgɛ moo bi gbóowu̵ wu̵lı̵́.

³²Ma Yesu o̧d vu̵: “Ba'á pú̵n néélȩ́ ba'ad du̵u̵ kɔ́lı̵́ ɓu̵u̵lı̵́ na'a, ma víi bi gbóon kan 'yɛgɛ nɔɔ moo ba'ad ı̵́ téé dágálá?”

³³Nán Yúúda vu̵ hí̧i̧du̵: “Vɔ́ bi gbóon mɔ́ kan 'yɛgɛ nɔɔn moo ba'ad du̵u̵ tóó nɔ né, a̧máa moo káḿ haa Tayɨɨ má nɔ. Mɔ́ nánánne, a̧máa mɔ́ tii fó̧ó̧ móó Tayɨɨɨ.”

³⁴Yesu duu hí̧i̧d vu̵: “Ká vu̵ bíńda debtere víílí, Tayɨɨ ba o̧: ‘Ví tayɨɨ vu̵ yu̵.’ Ɨ́ yo̧go̧ pɛ́láa?

³⁵Hȩn debtere Tayɨɨ woo ka o̧ máa, moo yȩ́ńne. Máa nán ı̵́ moo Tayɨɨ ka yaa voolı̵́ máa, debtere bee vu̵ ‘tayɨɨ vu̵ yu̵.’

³⁶Ɨ́ míí, Ba'á yeen, ba'an ya hágá yɛlı̵́. Dəŋ née ví o̧ ba mín haa Tayɨɨɨlá? Moo káń o̧ ba bin Waa Tayɨɨ woo nɔ má naa?

³⁷Ba'ad káń kɔ́ vu̵ yɛ, a ba'ad Ba'á Tayɨɨ woo nɔ pɛ́lı̵́ tée, i 'yɛ́ zó̧ó̧ míílí̧ sá.

³⁸A̧máa a̧n kɔ́ ba'ad woo nɔ tée, kóó i fȩȩn moo míí ní si̧', i 'yɛ́ zó̧ó̧ yúú ba'ad yȩ vu̵lı̵́, tée víń ho̧ Ba'á gaa kan fó̧ó̧ míí, vɔ́n dágá.”

³⁹Nán vu̵ duu soo kɛb bi ma"o̧ ó̧, a̧máa Yesu sɔ́d voolı̵́ nagá.

⁴⁰Pig woolı̵́ máa, Yesu daa la mbaa ziŋ Yu̵ŕdɛn dən, ya Yoohá̧na ı̵́ mam Tayɨɨ wooné ká dəŋ kɔ́ ba'ad wu̵lı̵́ peelı̵́.

⁴¹Nán ɓu̵u̵lı̵́ na'a vu̵ yaa woolı̵́, vu̵ o̧: “Yoohá̧na ká kɔ́n hȩn sa̧ga̧ tóó né, a̧máa hȩn 'waapád ka o̧ yúú nán yɛ woolı̵́ máa, moo yȩ́ńne.”

⁴²Ya yȩlȩ́ nán tóó vu̵ ɓu̵u̵lı̵́ na'a vu̵ 'yɛ́ zó̧ó̧ Yesu woolı̵́.