Read Dii Yoohá̧na 15 Bible Online

Yoohá̧na 15 - Dii bible

Yoohá̧na 15

¹Yesu duu o̧d vu̵: “Mí man kan la' ka lii də́ń kəd má nɔ; Ba' míí wu̵ ı̵́ bab aga ka dɨ baalı̵́ má nɔ.

²La' waa 'waapád ka hȩȩ míílí̧ máa, a lii ní tée, wú̵ń heewu̵ gbɔ. La' waa 'waapád ı̵́ ka lii máa, wú̵ń mbɔ́ggu̵ moo a duu lii mba hȩnne.

³Tayɨɨ mbɔ́g zó̧ó̧ víí yúú moo káń o̧d ví yɛlı̵́ sú̵'ú̵.

⁴I má'án kan mí tée, míń má'án kan ví á̧ḿ. Tow i má'án kan mí ní tée, víń kɔ́n hȩn yȩ́ń tóó né, kɔ́ ı̵́ la' waa ka liin kan fó̧ó̧ woo né máa wɔgɔ. Séý wú̵ń bé'én kan la' na'a pȩ́ń.

⁵“Mí man kan la"ɨ; ví man víí kan waa hȩȩné woo vu̵ yu̵. Nán a má'án kan mí, a̧n má'án kannɔ á̧ḿ tée, wú̵ń kɔ́ hȩn yȩ́ń ɓu̵u̵lı̵́ na'a. Tow i hı̵́'ı̵́n kan mí tée, víń kɔ́n hȩn yȩ́ń tóó né sá̧ḿ.

⁶Nán a má'án kan mí ní tée, vú̵ń gbɔgɔ gɔ́ŋ́ kɔ́ ı̵́ la' waa wɔgɔ. Wú̵ń 'wɔ́, tée vú̵ń fá̧á̧ gbɔgɔ vɛlı̵́, wú̵ń a̧n.

⁷Tow i má'án kan mí, moo míí u̵u̵ mbaa zó̧ó̧ víílí á̧ḿ tée, i ɓá' hȩn kíí hí̧í̧ máa tée, víń nuŋŋɔ́.

⁸I kɔ́ hȩn yȩ́ń vu̵ ɓu̵u̵lı̵́ na'a tée, Ba' míí wú̵ń nuŋ na"ȩ́ wu̵lı̵́; víń mbaa waa duulí míí vu̵ ı̵́ yo̧go̧ á̧ḿ.”

⁹Yesu duu o̧: “Mí hí̧í̧ ví kɔ́ ı̵́ Ba'á ka hí̧i̧n yɛ wɔgɔ á̧ḿ. I mbaa kan hí̧í̧lí̧ míí yɛ ú̵.

¹⁰I duu moo míí káń pa yɛ vu̵ ú̵ tée, víń mbaa kan hí̧í̧lí̧ míí yɛ kɔ́ ı̵́ káń duu dooká Ba'á woo, ma káń mbaa kan hí̧í̧lí̧ woo yɛ wɔgɔ á̧ḿ.

¹¹“Mí o̧d ví hȩn yȩ vu̵ sú̵'ú̵, moo zó̧ó̧ dȩ"ȩ́ míí a mbaa kan víw, moo zó̧ó̧ dȩ"ȩ́ víí a dȩ' sí̧' la gbug á̧ḿ.

¹²Dooká míí wu̵ yɛ nɔ. I hí̧í̧n ya víílí kɔ́ ı̵́ káń hí̧í̧ ví yɛ wɔgɔ.

¹³Hí̧í̧lí̧ gbo̧o̧ tóó mban nán ka pú̵n fó̧ó̧ woo moo daga gboo voo máa né.

¹⁴I kɔ́ hȩn káń o̧d ví yɛ vu̵ tée, ví dan gboo vu̵ yu̵.

¹⁵Míń duu been ví sı̵́ nán ba'ad vu̵ né, moo nán ba'ad gaan hȩn baa lig woo ka kɔ́n né. Ɨ́ víí, mí bee ví dan gboo vu̵, moo mí tú'ud ví hȩn 'waapád káń ki Ba'á woolı̵́ máa sú̵'ú̵.

¹⁶Víi yeen mí ní, a̧máa míi yee 'yɛ́ ví, moo i la kɔ́ hȩn yȩ́ńne, ba'ad víí a lı̵́d sá á̧ḿ. Moo woo nɔ, i ɓá' Ba'á hȩn kan yɛ́g míí tée, wú̵ń pú̵ ví ú.

¹⁷Hȩn káń bi o̧d ví máa, wu̵ yɛ nɔ: I hí̧í̧n ya víílí ú.”

¹⁸Yesu duu o̧d vu̵: “Nán hágá yɛ u̵u̵ máń ví tée, i gaa ba vu̵n dəŋ máń míw tíŋ́.

¹⁹Ka víń nán hágá yɛ vu̵ yu̵ á̧ḿ tée, ka vu̵n hí̧í̧ ví ú, moo ví nán voo vu̵ yu̵. A̧máa ví nán hágá yɛ vu̵ yu̵ pɛ́lı̵́, mí yee ví sı̵́ sa̧a̧m voolı̵́ ú̵, moo woo nɔ ma, vu̵ máń ví.

²⁰I duu taa moo káń o̧d ví yȩ nɔ: ‘Gba'a tóó mban ı̵́ buulí woo né.’ Ku̵u̵ duun mí kan hȩn ɓı̵́d yɛ, vú̵ń duun ví kannɔ á̧ḿ. Ku̵u̵ duu moo míí yɛ, vú̵ń duu moo víí á̧ḿ.

²¹A̧máa vú̵ń kɔ́d ví hȩn yȩ vu̵ 'waapád moo míí nu, moo vu̵ gaan ı̵́ ka ba'an mí ya yɛ né.

²²Ka míń ya o̧n vu̵ moo yɛ né tée, ka vu̵n kan hȩn ɓı̵́d tóó pɛ́lı̵́. A̧máa vu̵ kan hȩn tóó u̵u̵ o̧n yúú hȩn ɓı̵́d kɔ́lı̵́ voolı̵́ né.

²³Nán a máń mí tée, máń Ba' míí nu á̧ḿ.

²⁴Ka míń kɔ́n ba'ad ku̵u̵ kin ná see né yɛ voolı̵́ sa̧a̧mé né tée, ka vu̵n kan hȩn ɓı̵́d pɛ́lı̵́. A̧máa 'ya̧'a̧ yɛ vu̵ ho̧ sú̵'ú̵, vu̵ máń vɔ́ kan Ba'á á̧ḿ.

²⁵A̧máa hȩn ku̵u̵ bíńda debtere moo Tayɨɨ voolı̵́ máa, a kɔ́yyú̵; vu̵ bíńda: ‘Vu̵ máń mí té'.’

²⁶“Míń ba'ad ví ı̵́ zó̧ó̧ ka̧"ȩ́, yigid moo yȩ́ń ka vúd ya Ba'á woolı̵́ má nɔ. A yaa tée, wú̵ń moo moo yúú míílí̧.

²⁷Ví á̧ḿ, víń du̵n ya̧g, moo ká ví mbaa ya kan mí, ya dəné woolı̵́ pi nu.”