Read Dii Yoohá̧na 16 Bible Online

Yoohá̧na 16 - Dii bible

Yoohá̧na 16

¹Yesu duu o̧d vu̵: “Mí o̧d ví hȩn yɛ vu̵ moo hȩn woo a ya̧ tée, ka víń kéé gbɔnnɔ́.

²Vú̵ń nɛŋ vud ví lig sú̵ggı̵́ nán Yúúda voolı̵́. Sey tóó wú̵ń yaa dɨlı̵́ á̧ḿ, kóó nɔ́nná a nɔɔ ví tée, wú̵ń taa ba bin kɔ́d Tayɨɨ wu̵ ba'ad.

³Vu̵ kɔ́ ı̵́ yo̧go̧ moo vu̵ gaan vɔ́ kan Ba'á né á̧ḿ.

⁴Mí o̧d ví sı̵́ hȩn yȩ vu̵ yɔ, moo hȩn woo a ya̧ tée, víń gaa ba mín o̧d bi sı̵́ tíŋ́ŋɔ́. “Ká mí dəŋ o̧n ví lá moo yɛ tíŋ́ né, moo ká mí dɨ lá kan víw.

⁵'Ya̧'a̧ yɛ máa mí dɨ laalı̵́ ı̵́ ka ba'an ya yɛ woolı̵́. Nán tóó víílí sa̧a̧mé wú̵ń vin mí: ‘Mɔ́ dɨ laalı̵́ tɛ́lá?’ máa né.

⁶Moo káń o̧d ví yɛ vi̧i̧ zó̧ó̧ víí du̵u̵n də́ń né.

⁷A̧máa mí o̧d ví moo yȩ́ńne, wú̵ń du̵u̵d ví moo a̧n laa má nɔ; a̧n laa né tée, ı̵́ zó̧ó̧ ka̧"ȩ́ wú̵ń yaan víílí ní. A̧máa a̧n laa tée, míń ba"u̵ ya víílí.

⁸Sey a yaa sú̵'ú̵ tée, wú̵ńnɔ tú'ud nán vu̵, ká ba vu̵n gaan hȩn ɓı̵́d kɔ́lı̵́ voo yȩ vu̵ né, ká ba vu̵n gaan hȩn hí̧í̧lí̧ Tayɨɨ woo né, ká ba vu̵n gaan moo sə̧"ȩ́ Tayɨɨ woo né á̧ḿ.

⁹Wú̵ń tú'ud vu̵ hȩn ɓı̵́d voo, moo ku̵u̵ 'yɛ́n zó̧ó̧ míílí̧ né yɛ nɔ.

¹⁰Wú̵ń tú'ud vu̵ vu̵n mbaan kɔ́ ı̵́ Tayɨɨ ba ka hí̧i̧n wɔgɔ né, moo ba káń dɨ laalı̵́ Ba'á woolı̵́ yɛ nɔ; víń duu ho̧n mí sı̵́ né á̧ḿ.

¹¹Wú̵ń tú'ud vu̵ ba vu̵n gaa moo sə̧"ȩ́ 'waa né, moo Tayɨɨ ba sə̧' sı̵́ moo yúú Seeɗán[10] woolı̵́ ú̵.

¹²“Mí dɨ lá kan moo ɓu̵u̵lı̵́ na'a moo bi o̧d ví ú, a̧máa víń dɨ kan néélȩ́ kin vu̵ 'ya̧'a̧ yɛ né.

¹³Sey yigid moo yȩ́ń yȩ a yaa tée, wú̵ń tú'ud ví moo yȩ́ń 'waapád. Aga wú̵ń o̧n moo dáń woo nɔ né, a̧máa moo a ki máa, wú̵ń o̧ wu̵ yu̵. Hȩn tóó u̵u̵ dɨ yaalı̵́ tée, wú̵ń tú'ud ví moo yúú woolı̵́ á̧ḿ.

¹⁴Víń ho̧ na"ȩ́ míí yúú ba'ad woolı̵́, moo wú̵ń ɓɛ hȩn míí tú'ud ví wu̵ yu̵.

¹⁵Hȩn 'waapád Ba'á ka dɨ kannɔ máa, míí nu á̧ḿ. Moo woo nɔ mí o̧ yigid Tayɨɨ woo wú̵ń ɓɛ hȩn míí tú'ud ví wu̵ yu̵.

¹⁶“Zaa tée víń ho̧n mí sı̵́ né, a̧máa zaa tée víń duu ho̧n pig woolı̵́.”

¹⁷Waa duulí woo tóó ku̵u̵ ki máa vu̵ víń ya voolı̵́: “Moo ka o̧d ba ví yȩ tú' nɛ́nná? ‘Zaa tée víń ho̧n mí sı̵́ né, a̧máa zaa tée víń duu ho̧n pig woolı̵́.’ Duu o̧: ‘Moo mí dɨ laalı̵́ Ba'á woolı̵́’ máalá̧?”

¹⁸Vu̵ duu vi: “Moo ȩn ka o̧ ‘zaa tɛ́ nɔ,’ ‘zaa tɛ́ nɔ’ lá? Ba gaan ví hȩn ka o̧n yȩ né.”

¹⁹Yesu gaa ba vu̵n hí̧í̧ bi ki moo yȩ ó̧, ma vi vu̵: “Ví víń moo ȩná? Moo káń o̧d ví: ‘Zaa tée víń ho̧n mí sı̵́ né, a̧máa zaa tée víń duu ho̧n pig woolı̵́’ yȩ naa?

²⁰Mí o̧d ví moo yȩ́ńne, víń ká̧ŋ́ŋɔ́, víń bee yéé ká̧ń nɔm, a̧máa nán hágá yɛ vú̵ń dȩ' voo zó̧ó̧. Ɨ́ víí, víń mbaa kan zó̧ó̧ ví̧i̧ní, a̧máa zó̧ó̧ ví̧i̧ní víí wú̵ń duu tii zó̧ó̧ dȩ"ȩ́ á̧ḿ.

²¹Wakȩ́ȩ́ ka dɨ waa ha̧a̧lȩ́ tée, zó̧ó̧ ví̧i̧wo̧, moo sey woo ya̧ sú̵'ú̵. A̧máa ka síd waa woo sú̵'ú̵ tée, duu taan sı̵́ hȩn ndɔ́gɔné woo yȩ né. Zó̧ó̧ dȩ"o̧ moo ka ha̧a̧ nánán má nɔ.

²²Ví á̧ḿ, ví dɨ kan zó̧ó̧ ví̧i̧ní 'ya̧'a̧ yɛ yɔ. A̧máa míń duu ho̧ ví ú. Tée zó̧ó̧ víí wú̵ń dȩ'. Nán tóó wú̵ń vbin zó̧ó̧ dȩ"ȩ́ víí yȩ né á̧ḿ.

²³Zá̧ga̧ woo víń duu vin mí sı̵́ hȩn tóó né. Mí o̧d ví moo yȩ́ńne, i ɓá' Ba'á hȩn kan yɛ́g míí tée, wú̵ń pú̵ ví ú.

²⁴Há̧á̧ 'ya̧'a̧ yɛ ví ɓá'a ná hȩn kan yɛ́g míí ní. I ɓá' hȩnne, víń nuŋŋɔ, moo zó̧ó̧ víí a dȩ' sí̧' la gbug.

²⁵“Mí o̧d ví moo yɛ vu̵ kan ya̧g zílí sú̵'ú̵. Zá̧ga̧ tóó wú̵ń yaa dɨlı̵́, míń duu o̧n ví sı̵́ moo kan ya̧g zílí ní, a̧máa míń o̧d ví la sı̵́ moo ha̧d yúú Ba'á woolı̵́.

²⁶Zá̧ga̧ woo tée víń ɓá' hȩn kan yɛ́g míí. Mí o̧n ví míńnɔ o̧n Ba'á moo yúú víílí pȩ́ń né,

²⁷moo aga Ba'á hí̧í̧ ví á̧ḿ. Ba'á hí̧í̧ ví moo kíí hí̧i̧n, kíí fȩȩ moo míí ba mín vúd ya dɨ Tayɨɨ woolı̵́ má nɔ.

²⁸Mí vúd ya Ba'á woolı̵́ gínú, mí yaa hágá yɛlı̵́. Míń duu lúú hágá yɛlı̵́ moo fíiní la Ba'á woolı̵́.”

²⁹Ma waa duulí woo vu̵ o̧ddu̵: “'Ya̧'a̧ yɛ máa, mɔ́ o̧ sı̵́ moo ha̧d ha̧ddú̵, mɔ́ zín sı̵́ ya̧g né.

³⁰'Ya̧'a̧ yɛ vɔ́ gaa ba mɔ́n gaa hȩn 'waapád, mɔ́ hí̧í̧ nán tóó ba a duu vin bi sı̵́ moo né. Moo woo nɔ vɔ́ 'yɛ́ zó̧ó̧ móólȩ́, vɔ́ gaa mɔ́ vúd ya dɨ Tayɨɨ woolı̵́.”

³¹Yesu hí̧i̧d vu̵: “'Ya̧'a̧ yɛ ví 'yɛ́ zó̧ó̧ míílí̧ sá'áa?

³²Sey tóó wú̵ń yaa dɨlı̵́, sey woo ya̧ sú̵'ú̵ á̧ḿ, víń hɨ'ɨ. Kóó nɔ́nná wú̵ń daa lúú ka la woolı̵́, víń kéé gbɔn mí dágá mɛ́ń. A̧máa míń mbaan mí dágá mɛ́ń né, moo Ba'á dɨ kan míw.

³³Mí o̧d ví moo yɛ vu̵ moo i nuŋ zó̧ó̧ ká̧'a̧d yúú míílí̧. Nán vú̵ń yú ví kɔɔgná hágá yɛlı̵́, a̧máa i mbi nɔ́ɔ́ la ú̵, moo mí mba hȩn hágá yɛlı̵́ vu̵ 'waa sú̵'ú̵.”