Read Dii Yoohá̧na 17 Bible Online

Yoohá̧na 17 - Dii bible

Yoohá̧na 17

¹Sey Yesu ka moo moo yȩ 'waa máa, luu dɔg nɔ́ɔ́ be"ı̵́ o̧: “Ba'á, sey ya̧ sú̵'ú̵. A̧m tú' na"ȩ́ míí, mín Waa móó nɔ, moo a̧n tú' na"ȩ́ móó á̧ḿ.

²Mɔ́ pú̵n néélȩ́ yúú nánán voolı̵́ 'waapád, moo nán ı̵́ káḿ pú̵n vu̵ máa, a̧n pú̵ vu̵ vágád káákáá á̧ḿ.

³Vágád káákáá sú̵u̵ wu̵ nán u̵u̵ mbaa kan ba má nɔ. Móo Tayɨɨ dágá kəd, ı̵́ yȩ́ń. Míi Yesu Krístu káḿ ba'an ya yɛ nɔ.

⁴Ɨ́ míí, mí kɔ́ ba'ad káḿ pú̵n kɔ́lı̵́ hágá yɛlı̵́ máa 'waa sú̵'ú̵, ma mɔ́ nuŋ na"ȩ́ wu̵lı̵́.

⁵'Ya̧'a̧ yɛ máa, Ba'á, a̧m na'an kan na"ȩ́ míí ká mí dɨ kannɔ móólȩ́, sey hág ká mbɔ́gɔy ná né máalȩ́.

⁶“Mí tú'ud nán káḿ pú̵n vu̵ hágá yɛlı̵́ yɛ vu̵ kan mɔ́ sú̵'ú̵. Vu̵ nán móó vu̵ yu̵, ma mɔ́ ɓɛ vu̵ pú̵n; vu̵ duu moo móó sú̵'ú̵.

⁷'Ya̧'a̧ yɛ vu̵ gaa hȩn 'waapád káń nuŋ yɛ, ba mɔ́nnɔ pú̵n,

⁸moo mí o̧d vu̵ moo móó káḿ 'yɛ́n vu̵ ya̧gá̧ máa 'waa sú̵'ú̵, vu̵ fȩȩ vu̵ sú̵'ú̵ á̧ḿ. Ma vu̵ gaa du̵u̵lı̵́ na'a ba mín vúd ya dɨ móólȩ́; vu̵ fȩȩ moo ba mɔ́nnɔ ba'an ya máa á̧ḿ.

⁹“Ɨ́ míí, mí ɓá'am yúú voolı̵́. Mí ɓá'an mɔ́ yúú nán tóó voolı̵́ né, a̧máa mí ɓá'am yúú nán káḿ pú̵n vu̵ máa voolı̵́, moo vu̵ móó nɔ.

¹⁰Hȩn míí 'waapád móó nɔ; hȩn móó 'waapád míí nu á̧ḿ; nán vu̵ ho̧ na"ȩ́ míí voolı̵́ á̧ḿ.

¹¹Míń duu mbaan sı̵́ hágá yɛlı̵́ né, a̧máa ı̵́ voo, vú̵ń dɨ lá mbaalı̵́ hágá yɛlı̵́. Ɨ́ míí, mí dɨ laalı̵́ móólȩ́. Ba'á gbo̧o̧, a̧m tu̵ vu̵ kan yɛ́g móó káḿ 'yɛ́n vu̵ yɛ nɔ, moo u̵u̵ má'án dágá kɔ́ ı̵́ kaa dágá yɛ wɔgɔ.

¹²Ká mí mbaa kan vu̵ máa, mí baa tu̵ vu̵ kan yɛ́g móó káḿ 'yɛ́n vu̵ yɛ. Mí tu̵ vu̵; nán dágá tin voolı̵́ sa̧a̧mé né, séý waa tilí yȩ nɔ moo hȩn debtere ka o̧ máa a kɔ́yyú̵.

¹³A̧máa 'ya̧'a̧ yɛ mí dɨ laalı̵́ móólȩ́, ma mí o̧ ı̵́ yo̧go̧ hágá yɛlı̵́, moo u̵u̵ mbaa kan zó̧ó̧ dȩ"ȩ́ yúú míílí̧ yȩ́ńná.

¹⁴Ɨ́ míí, mí pú̵ vu̵ moo móó sú̵'ú̵, ma nán hágá yɛ vu̵ máń vu̵, moo vu̵ sa̧a̧m voolı̵́ pɛ́lı̵́, kɔ́ ı̵́ káń sa̧a̧m voolı̵́ pɛ́lı̵́ yɛ wɔgɔ á̧ḿ.

¹⁵Mí vin mɔ́ a̧m luun vu̵ hágá yɛlı̵́ ú̵ né, a̧máa a̧m tu̵ vu̵; hȩn ɓı̵́d a mba vu̵ kɛb sá á̧ḿ.

¹⁶Vu̵ nán hágá yɛ vu̵ yu̵ pɛ́lı̵́, kɔ́ ı̵́ káń nán hágá yɛlı̵́ pɛ́lı̵́ yɛ wɔgɔ á̧ḿ.

¹⁷A̧m mbɔ́g vu̵ kan moo yȩ́ń móó, u̵u̵ mbaa də́ń nán móó nɔ. Moo móó, moo yȩ́ńne.

¹⁸Mí ba' vu̵ la nán hágá yɛ voolı̵́ kɔ́ ı̵́ káḿ ba'an ya yɛ wɔgɔ.

¹⁹Mí kɔ́ də́ń hȩn hí̧í̧lí̧ móó, moo u̵u̵ mbaa nán móó vu̵ yu̵ yȩ́ńná á̧ḿ.

²⁰“Mí ɓá'an mɔ́ yúú voolı̵́ dágá né, a̧máa nán tóó vú̵ń duun yúú moo voolı̵́, mí ɓá'am yúú ı̵́ yȩ voolı̵́ á̧ḿ,

²¹moo ya voo 'waapád u̵u̵ má'án dágá kɔ́ ı̵́ ba wɔgɔ. Ba'á, mɔ́ má'án kan mí, mí má'án kan mɔ́, u̵u̵ má'án kan ba á̧ḿ, moo nán hágá yɛ u̵u̵ fȩȩ moo ba mɔ́nnɔ ba'an ya.

²²Mí pú̵ vu̵ na"ȩ́ káḿ pú̵n yɛ sú̵'ú̵, moo u̵u̵ má'án dágá kɔ́ ı̵́ kaa dágá yɛ wɔgɔ á̧ḿ;

²³mí má'án kan vu̵, mɔ́ má'án kan mí, moo u̵u̵ má'án dágá kəd á̧ḿ, moo nán hágá yɛ u̵u̵ gaa ba mɔ́nnɔ ba'an ya, ba mɔ́n hí̧í̧ vu̵ kɔ́ ı̵́ káḿ hí̧i̧n yɛ wɔgɔ á̧ḿ.

²⁴“Ba'á, mí hí̧í̧ nán káḿ pú̵n vu̵ máa u̵u̵ mbaa ya a̧n mbaa wu̵lı̵́ máalȩ́ á̧ḿ, moo u̵u̵ ho̧ na"ȩ́ máa káḿ pú̵n yȩ nɔ, moo móo dəŋ hí̧i̧n pȩ́ń, hág mbɔ́gɔy.

²⁵Ba'á ı̵́ hȩn yȩ́ń kɔ́lı̵́, nán hágá yɛ vu̵ gaan mɔ́ né, a̧máa ı̵́ míí máa, mí gaamɔ́. Nán yɛ vu̵ gaa ba mɔ́nnɔ ba'an ya á̧ḿ.

²⁶Mí tú'ud vu̵ kan mɔ́ sú̵'ú̵, míń duu tú'ud vu̵ tóó, moo u̵u̵ sú̵g mbaa kan hí̧í̧lí̧ móó káḿ hí̧i̧n yɛ, moo a̧n má'án kan vu̵ á̧ḿ.”