Read Dii Yoohá̧na 18 Bible Online

Yoohá̧na 18 - Dii bible

Yoohá̧na 18

¹Sey Yesu ka moo moo yȩ 'waa máa, daa laa kan waa duulí woo vu̵ ziŋ waa Keedərɔ́ŋ dən. Bab tóó ká du̵u̵lı̵́, Yesu dɔ́ la wu̵lı̵́ kan waa duulí woo vu̵.

²Yúúdas ı̵́ ka dɨgɨ dɔnné nag nánán voolı̵́ pee, gaa yaga á̧ḿ, moo Yesu baa sú̵g kan waa duulí woo vu̵ wu̵lı̵́ do' ɓu̵u̵lı̵́ na'a.

³Yúúdas yaa bab yȩlȩ́ á̧ḿ, pa̧ŋ hú' só̧ó̧ze vu̵ kan só̧ó̧ze ı̵́ lig hȩn ha"ı̵́ vu̵; gbanaa hȩn ha"ı̵́ vu̵u̵ ba' vu̵, kan nán farísa vu̵ á̧ḿ; ma vu̵ yaa kan káláŋ́, kan lám, kan hȩn sɨɨ vu̵.

⁴Yesu ka gaa hȩn ka dɨ yaalı̵́ yúú woolı̵́ 'waapád yȩ sú̵'ú̵ máa, séé la, vi vu̵: “Ví soo nɔ́nná?”

⁵Vu̵ hí̧i̧du̵: “Yesu nán Naazaréddu̵.” Ma o̧d vu̵: “Aga míw.” Yúúdas ı̵́ ba dɨgɨ dɔnné nag voolı̵́ pee, dii dɨ dúú yȩ voolı̵́ sa̧a̧mé á̧ḿ.

⁶Sey Yesu ka o̧d vu̵ dɔg: “Aga míw” máa, vu̵ vȩ́' la pigim, vu̵ wá̧a̧ hágá.

⁷Yesu duu vi vu̵: “Ví soo nɔ́nná?” Ma vu̵ duu hí̧í̧: “Yesu nán Naazaréddu̵.”

⁸Yesu duu o̧d vu̵: “Mín o̧d ví ba míw sú̵'ú̵. I soo míw tée, i gbɔ nán ı̵́ yȩ vu̵ la ú̵.”

⁹Yesu o̧ ı̵́ yo̧go̧ moo moo woo yɛ a kɔ́yyú̵: “Ba'á, nán káḿ pú̵n vu̵ yɛ, dágá aga tin ní.”

¹⁰Simɔ́ŋ Piɛ́r ká wu̵ dɨ kan pag naa, woowu̵, du̵ nán ba'ad ı̵́ nii hȩn ha"ı̵́ woo tɔ́g nag nán sə̧'. Yéé woo Málkus.

¹¹A̧máa Yesu o̧d Piɛ́r: “A̧m doo pag naa móó la fə́ə́ woolı̵́. Hȩn ndɔ́gɔné[11] Ba'á ka pú̵n yɛ, séý míń fȩȩwo̧ ó̧ náa?”

¹²Hú' só̧ó̧ze vu̵, kan kolonɛ́l, kan só̧ó̧ze ı̵́ lig hȩn ha"ı̵́ nán Yúúda voo vu̵, vu̵ ma' Yesu ta.

¹³Vu̵ dəŋ pa̧ŋŋɔ laan Ána woolı̵́, moo ká Káýfa ag woo nɔ. Káýfa ká wu̵ mbaa ı̵́ nii hȩn ha"ı̵́ ve' woolı̵́.

¹⁴Ká wu̵ tiŋ nán Yúúda vu̵, ká o̧: “Ndíga nán dágá a pí nɔm zig baa ví yɛ woo ú̵.”

¹⁵Simɔ́ŋ Piɛ́r vu̵ kan waa duulí Yesu woo tóó vu̵, vu̵ duu Yesu pigim. Waa duulí woo ı̵́ tóó yȩ, ı̵́ nii hȩn ha"ı̵́ ká gaawu̵ ú̵, ma sú̵g dɔ́ la kan Yesu ya̧g na'am ı̵́ nii hȩn ha"ı̵́ woolı̵́ á̧ḿ.

¹⁶A̧máa Piɛ́r mbaa woo ya̧g dɔ́mmé gɔ́ŋ́. Waa duulí ı̵́ ı̵́ nii hȩn ha"ı̵́ ba gaawu̵ pee vúd la gɔ́ŋ́, o̧d wakȩ́ȩ́ ka tu̵ dɔ́m máa moo, ma ɓɛ Piɛ́r dɔd ya.

¹⁷Wakȩ́ȩ́ pee ka ho̧ Piɛ́r máa, vigi: “Mɔ́ á̧ḿ, mɔ́ waa duulí Yesu woo nɔ náa?” Ma Piɛ́r hí̧i̧du̵: “Áá'a, míw pɛ́lı̵́.”

¹⁸Gba'a vu̵ kan só̧ó̧ze ı̵́ lig hȩn ha"ı̵́ vu̵ kab vee o̧o̧, moo ho̧o̧m ká ka̧"ó̧. Piɛ́r ya dii o̧o̧ vee kan vu̵.

¹⁹Ku̵u̵ pa̧ŋ Yesu laan ı̵́ nii hȩn ha"ı̵́ Ána woolı̵́ máa, vígi moo yúú waa duulí woo voolı̵́, kan moo tú"í woo á̧ḿ.

²⁰Yesu hí̧i̧du̵: “Mí tú' míí moo la zo"ı̵́. Mí baa tú' moo lig sú̵ggı̵́ nán Yúúda voo vu̵lı̵́, kan lig hȩn ha"ı̵́lı̵́ á̧ḿ, kan ya nán Yúúda ku̵u̵ sú̵g mbaa wu̵lı̵́ yȩlȩ́ 'waapád. Mí tú'un moo tóó ya yú̵ggı̵́lı̵́ né.

²¹Mɔ́ vín moo ȩná? A̧m vi nán ku̵u̵ ki moo míí máa vu̵ yu̵, mí baa o̧d vu̵ moo nɛ́nná? Vu̵ gaa voo moo káń o̧d vu̵ máa ó̧.”

²²Sey Yesu ka moo moo yȩ máa, só̧ó̧ze tóó ká dii du̵u̵lı̵́, dȩŋŋɔ, o̧ddu̵: “Mɔ́ hí̧i̧d ı̵́ nii hȩn ha"ı̵́ moo ȩn ı̵́ yo̧go̧lá?”

²³Ma Yesu hí̧i̧du̵: “Káń moo moo ɓı̵́ddɨ tée, mɔ́ o̧n ya. A̧máa a̧n moo moo to̧o̧ȩ tée, moo ȩn káḿ dȩgȩná?”

²⁴Ma Ána ba' Yesu kan zaŋ waa nagá laan ı̵́ nii hȩn ha"ı̵́ Káýfa voolı̵́.

²⁵Sey woolı̵́ Simɔ́ŋ Piɛ́r ká du̵u̵lı̵́, ká dɨ vee o̧o̧lȩ́ȩ. Vu̵ vigi: “Mɔ́ á̧ḿ, mɔ́ dɨ sa̧a̧m waa duulí woo voolı̵́ náa?” A̧máa Piɛ́r su̵u̵, o̧: “Áá'a, míw pɛ́lı̵́.”

²⁶Nán ba'ad ı̵́ nii hȩn ha"ı̵́ woo tóó, o̧o̧g nán Piɛ́r ba du̵gu̵ tɔ́g sə̧' pee woo nɔ, ka ki máa, o̧: “Mín ho̧m kan Yesu á̧ḿ babbı̵́ yȩlȩ́. Ɨ́ yo̧go̧ pɛ́láa?”

²⁷Moo woo nɔ Piɛ́r duu su̵u̵wu̵, ma nɔ́g va̧a̧ há̧á̧ hȩ́ȩ́.

²⁸Ɨ́ nii hȩn ha"ı̵́ Káýfa ka ví Yesu moo 'waa sú̵'ú̵ máa, vu̵ ɓɛgɛ laan ke'em guvɛrnə́ər woolı̵́ ya̧g ka̧'a̧m hí̧m. Nán Yúúda vu̵ dɔ́n voo ke'em woolı̵́ né, moo ba ka bin ví̧i̧ bii ú, ba ka bin lán hȩn lálı̵́ páska né á̧ḿ.

²⁹Moo woo nɔ ma, guvɛrnə́ər Pilád vúd ya voolı̵́, vi vu̵: “Dom woo ȩn kíí pa̧ŋ yaan yúú nán yɛ woolı̵́lá?”

³⁰Vu̵ hí̧i̧du̵ o̧: “Kan nán ɓı̵́d pɛ́lı̵́ tée, ka vɔ́n ya dɔnnɔ víílí nagá né.”

³¹Ma Pilád o̧d vu̵: “Aga i ɓɛgɛ, ví sə̧' moo yúú woolı̵́ kɔ́ ı̵́ dooká víí ka o̧ wɔgɔ.” Nán Yúúda vu̵ hí̧i̧du̵: “Vɔ́ dɨ kan néélȩ́ nɔɔn vóó nánán né.”

³²Hȩn yȩ dɨ kɔ́yné duu hȩn Yesu ká tú' ba vú̵ń nɔɔ bi nɛ́nná má nɔ.

³³Ma Pilád duu dɔ́ la ya moo sə̧"ȩ́lȩ́, bee Yesu, vigi: “Mɔ́ gbanaa nán Yúúda voo naa?”

³⁴Yesu hí̧i̧du̵: “Aga móo o̧a̧a̧? Tóó tée nán vu̵u̵ o̧m moo yȩ yúú míílá̧a̧?”

³⁵Pilád duu vigi: “Mí nán Yúúdaɨ pɛ́lı̵́ náa? Aga zig móó kan gbanaa hȩn ha"ı̵́ vu̵, vu̵u̵ dɔm míílí̧ nagá. Máa mɔ́ kɔ́ ȩná?”

³⁶Yesu duu hí̧i̧du̵: “Ya gbaŋ waalı̵́ míí hágá yɛlı̵́ pɛ́lı̵́. Nánán ka vu̵nnɔ 'yɛ́n gbanaa tée, nán ba'ad míí ka vú̵n kɔ́ ya̧g moo míí, moo ba ka mín dɔ́ nag nán Yúúda voolı̵́. A̧máa ya gbaŋ waalı̵́ míí hágá yɛlı̵́ pɛ́lı̵́.”

³⁷Pilád ka ki máa, vigi: “Asée, mɔ́ gbanaaa?” Yesu duu hí̧i̧du̵: “Aga móo o̧; mí gbanaaɨ. Vu̵ ha̧a̧n moo moo yȩ́ń tú"íi; mí yaa hágá yɛlı̵́ moo woo nɔ á̧ḿ. Kóó nɔ́nná a duu moo yȩ́ń tée, wú̵ń ki moo míí ú̧.”

³⁸Ma Pilád duu vigi: “Moo yȩ́ń sú̵u̵ ȩná?” Sey Pilád ka moo moo yȩ 'waa máa, duu vúd laa nán Yúúda voolı̵́, o̧d vu̵: “Mí nugun moo tóó ɓı̵́dná yúú nán yȩ woolı̵́ né.

³⁹A̧máa mí baa vúd ví nán si̧'i̧ní dágá moo mam vúnní páskalı̵́. Máa, ví hí̧í̧ a̧n gbɔd bi gbanaa víí yɛ naa?”

⁴⁰Ku̵u̵ ki máa, vu̵ dɔ́b moo, vu̵ o̧: “Áá'a, wu̵ yu̵ pɛ́lı̵́, a̧máa vɔ́ hí̧í̧ Barábaddu̵.” A̧máa Barábas sú̵u̵, ká kɛmme.