Read Dii Yoohá̧na 19 Bible Online

Yoohá̧na 19 - Dii bible

Yoohá̧na 19

¹Pilád ka ki ná' máa, ɓɛ Yesu, o̧d vu̵ u̵u̵ gbɔ́gɔ kan looɨ.

²Só̧ó̧ze vu̵ tȩȩ mɛɛtawəl sa̧'a̧d gbo'odu̵ yúlí; vu̵ dɔ́ddu̵ sa̧a̧m gbo̧o̧ tóó yȩ́ȩ́ná á̧ḿ.

³Vu̵ séé ya tíŋ́ woolı̵́, vu̵ vá"u̵: “Kəə zee, gbanaa nán Yúúda voo!” Ma vu̵ dȩ́ŋ́ŋɔ á̧ḿ.

⁴Pilád duu vúd ya o̧d nán Yúúda vu̵: “Míń pa̧ŋ Yesu ya pú̵ ví gɔ́ŋ́ yɛlı̵́, moo i gaa ba mín nugun moo tóó woolı̵́ né.”

⁵Ma Yesu vúd ya gɔ́ŋ́ kan mɛɛtawəl sa̧'a̧d pee yúlí, kan sa̧a̧m gbo̧o̧ woo pee fó̧lȩ́. Pilád o̧d vu̵: “Nán sú̵u̵ wu̵ yɛ nɔ.”

⁶Sey gbanaa hȩn ha"ı̵́ ku̵u̵ ho̧go̧ kan só̧ó̧ze ı̵́ lig hȩn ha"ı̵́ vu̵ máa, vu̵ dɔ́b moo vu̵ o̧: “Ga"u̵ la la' vbagadı̵́, ga"u̵ la la' vbagadı̵́.” Pilád o̧d vu̵: “Aga i ɓɛ ga"u̵ la ví ú. Mí ho̧n míí moo tóó woolı̵́ né.”

⁷Nán Yúúda vu̵ hí̧i̧du̵: “Vɔ́ dɨ vóó kan dooká tóó, o̧ ba maa nɔmme, moo tii fó̧ó̧ woo Waa Tayɨɨ woo nɔ.”

⁸Sey Pilád ka ki moo yȩ máa, dú̵ú̵ duu kɔ́gɔ kɔ́lı̵́ gbo̧o̧ mɛ́ń.

⁹Duu fíí dɔ́ la ke'emé, vi Yesu: “Mɔ́ yaa móó yaga tɛ́lá?” Yesu hí̧i̧n ya̧g né.

¹⁰Ma Pilád o̧ddu̵: “Mɔ́ hí̧i̧n míw moo náa? Tóó tée míń kéé gbɔm, tóó tée míń ga'am la' vbagadı̵́ kɔ́ ı̵́ káń hí̧í̧ wɔgɔ. Mɔ́ gaa náa?”

¹¹Yesu hí̧i̧du̵: “Tayɨɨ kan pú̵n mɔ́ zu̵u̵ néélȩ́ be"ı̵́ né tée, mɔ́ kan néélȩ́ tóó waaná' aga yúú míílí̧ pɛ́lı̵́. Moo woo nɔ ma, nán ka dɔn móólȩ́ nagá yɛ kɔ́ hȩn ɓı̵́d mba hȩn káḿ kɔ́ yȩ á̧ḿ.”

¹²Pilád ka ki moo yȩ máa, dəŋ soo kɛb bi kéé gbɔgɔ ú̵. A̧máa nán Yúúda vu̵ dɔ́b moo, vu̵ o̧: “A̧m kéé gbɔgɔ tée, mɔ́ dag gboo gbanii nán Róma voo woo nɔ pɛ́lı̵́. Moo nán aga ka tii fó̧ó̧ woo gbanii tée, kin gbanii nán Róma voo tɔ́g né.”

¹³Sey Pilád ka ki moo yȩ máa, ɓɛ Yesu vud ya gɔ́ŋ́, mbaa daa láan moo sə̧"ȩ́lȩ́. Vu̵ bee ya woo “Gabáta” kan ya̧g eebərə́ə.

¹⁴Zá̧ga̧ woo vu̵ dɨ hȩn páska vu̵ mbɔ́ggı̵́ɨ. Zá̧ga̧ ya̧ sı̵́ sa̧a̧mɔ́, ma Pilád o̧d nán Yúúda vu̵: “Gbanaa víí ka yɔ.”

¹⁵A̧máa vu̵ dɔ́b voo moo, vu̵ o̧: “Nɔɔwo̧ la ú̵! Nɔɔwo̧ la ú̵! Ga"u̵ la la' vbagadı̵́!” Pilád vi vu̵: “A̧n ga' gbanaa víí naa?” Gbanaa hȩn ha"ı̵́ vu̵ hí̧i̧du̵: “Gbanaa vóó wu̵ gbanii nán Róma voo nɔ dágá.”

¹⁶Pig woolı̵́ máa, Pilád ɓɛ Yesu pú̵ vu̵ u̵u̵ ga"u̵ la' vbagadı̵́. Pilád ka ɓɛ Yesu pú̵ vu̵ sú̵'ú̵ máa, vu̵ ɓɛgɛ laan.

¹⁷Yesu gaŋ la' vbagad woo vúdda kaalı̵́, la ya̧ ya tóó ku̵u̵ beewu̵ “gu̵u̵ dag gbágadɨ” máa. (Vu̵ bee ya woo “Golgáta” kan ya̧g eebərə́əɨ.)

¹⁸Vu̵ ga"u̵ wu̵lı̵́ kan nán tóó vu̵ idú, kaa kan kaa; Yesu mbaa woo sa̧a̧mé.

¹⁹Pilád bíńda moo tóó ga' yúú la' vbagad Yesu woolı̵́. Hȩn ka bíńda máa wu̵ yɛ nɔ: “Yesu nán Naazaréddu̵, gbanaa nán Yúúda voo nɔ.”

²⁰Nán Yúúda ɓu̵u̵lı̵́ na'a vu̵ záŋ́ga hȩn yȩ, moo ya ku̵u̵ ga' Yesu wu̵lı̵́ máa, ɗiin kan kaa né. Ká bíńda hȩn yȩ kan ya̧g eebərə́əɨ, kan ya̧g latə̧́ə̧, kan ya̧g gɛrɛ́g á̧ḿ.

²¹Gbanaa hȩn ha"ı̵́ nán Yúúda voo vu̵ o̧d Pilád: “I bíńda: ‘Gbanaa nán Yúúda voo nɔ’ sá. A̧máa i bíńda: ‘Nán yɛ o̧ ba bin gbanaa nán Yúúda voo nɔ.’ ”

²²Ma Pilád hí̧i̧d vu̵: “Hȩn káń bíńda sú̵'ú̵ máa, mí bíńda míí sú̵'ú̵.”

²³Só̧ó̧ze ku̵u̵ ga' Yesu sú̵'ú̵ máa, vu̵ yȩ'ȩn sa̧a̧m woo ya ndaddú̵, kóó nɔ́nná fá̧á̧ ı̵́ woo. Vu̵ ɓɛ sa̧a̧m gbo̧o̧ woo á̧ḿ. Sa̧a̧m woo vu̵ va̧a̧ né, vu̵ tȩȩ də́ń tȩȩlȩ́ȩ kəd.

²⁴Moo woo nɔ, vu̵ ó̧ń ya voolı̵́: “Ba dee ví sa̧a̧m yɛ sá, a̧máa ba gbɔ ví sáásááɨ; nán a lá tée, wú̵ń ɓɛ.” Hȩn yȩ kɔ́y, moo ká vu̵ bíńda debterelı̵́, vu̵ o̧: “Vu̵ yȩ'ȩn sa̧a̧m míí vu̵ sú̵'ú̵, vu̵ gbɔ sáásáá yúú sa̧a̧m gbo̧o̧ míílí̧ á̧ḿ.” Ma só̧ó̧ze vu̵ kɔ́ ı̵́ yo̧go̧ gínú.

²⁵Yesu na' woo dii mbaa dáŋ́ la' vbagadı̵́, kan na"oo daa sá̧ŋ́, kan Maaríi Kelóófa kȩ́ȩ́, kan Maaríi Magdaláa á̧ḿ.

²⁶Yesu ho̧ na' woo kan waa duulí woo tóó ka hí̧í̧wo̧ na'a máa, vu̵ dɨ diilí wu̵lı̵́. Yesu o̧d na' woo: “Na'á, waa móó ka yɔ.”

²⁷Pig woolı̵́ máa, duu o̧d waa duulí woo pee: “Na' móó wu̵ yȩ nɔ.” Diga sey woolı̵́ máa, waa duulí woo pee ɓɛ Yesu na' woo laan woolı̵́, la mbaa kannɔ.

²⁸Pig woolı̵́ Yesu ka gaa hȩn 'waapád ba kɔ́y sú̵'ú̵ máa, o̧: “Mam 'wɔnnɔ́.” Yesu moo moo yȩ moo hȩn debtere ba ka o̧ máa, ba a dɔ́ sé' woolı̵́.

²⁹Tíg tóó ká du̵u̵lı̵́, doo vó̧o̧d hi̧' wu̵lı̵́, ma só̧ó̧ze vu̵ yoo sugud wu̵lı̵́, vu̵ hȩ dȩ"ȩ́ yo̧o̧ 'yɛ́ddu̵ dɔg ya̧gá̧.

³⁰Sey Yesu ka zɔ máa, o̧: “'Wáa sú̵'ú̵.” Gbɔ vəg, ma wə̧m woo sə̧'ə̧y.

³¹Zá̧ga̧ woo ká zá̧ga̧ hȩn mbɔ́ggı̵́ɨ, ma nán Yúúda vu̵ sɛ́n fó̧ó̧ nánán a mbaan la' vbagadı̵́ zá̧ga̧ asawəlı̵́ né, moo asawə woo ká zá̧ga̧ gbo̧o̧ȩ á̧ḿ. Moo woo nɔ vu̵ la vi Pilád, bi la gəə nán ku̵u̵ dɨ la' vbagadı̵́ máa vu̵ doo, bi sid vu̵ á̧ḿ.

³²Moo woo nɔ ma, só̧ó̧ze vu̵ ya dəŋ gəə doo nán tóó vu̵n su̵g ga' vu̵ kan Yesu á̧ḿ pee voo.

³³Ku̵u̵ ya̧ ya Yesu woolı̵́ máa, vu̵ ho̧go̧ nɔɔ sú̵'ú̵, ma vu̵ duu gənnɔ sı̵́ doo né.

³⁴A̧máa só̧ó̧ze tóó saga kan táa waagı̵́, ma mɛm yɛ́d zu̵u̵, kan mam saw.

³⁵Nán ka ho̧ hȩn yȩ kan nɔ́ɔ́ woo máa, wu̵ du̵ ya̧g yɛ nɔ, ya̧g du̵lı̵́ yɛ moo yȩ́ńne. Aga gaa ya̧g du̵lı̵́ bii yɛ ba moo yȩ́ńne, moo i 'yɛ́ zó̧ó̧ wu̵lı̵́ á̧ḿ.

³⁶Hȩn yȩ kɔ́y moo hȩn ku̵u̵ bíńda debterelı̵́ máa, a kɔ́yyú̵; vu̵ bíńda: “Vu̵ gən nɛ́ŋ́ woo né.”

³⁷Vu̵ bíńda hȩn tóó debterelı̵́ á̧ḿ: “Vu̵ 'yɛ́ nɔ́ɔ́ nán ı̵́ ku̵u̵ saga máa woolı̵́.”

³⁸Pig woolı̵́ máa, nán kaa Arimatée tóó ká du̵u̵lı̵́, yéé woo Yu̵u̵séfu (ká yú̵g duu Yesu, moo ká ndɔg nán Yúúda vu̵ yu̵.) Yu̵u̵séfu yȩ la ɓá' Pilád fó̧ó̧ Yesu woo, bi siddu̵ ú̵. Pilád gbɔddu̵ hi̧naa. Ma la sid fó̧ó̧ Yesu woo.

³⁹Níkodém ká dəŋ yaa Yesu woolı̵́ viddí pee, pa̧ŋ ya duusá̧n tóó vu̵ idú, dágá vu̵ beewu̵ “míir,” vu̵ ya̧a̧n kan ı̵́ tóó ku̵u̵ beewu̵ “aloe” máa, kɔ́ kílo vo' ta̧a̧nɔ́ ó̧.

⁴⁰Vu̵ sid fó̧ó̧ Yesu woo, vu̵ túudu̵ duusá̧n pee, vu̵ go̧o̧wo̧ kan sa̧a̧m nɛ́'ɛm kɔ́ ı̵́ nán Yúúda ku̵u̵ baa kɔ́ ya nɔm dɔnnélȩ́ máa wɔgɔ.

⁴¹Ya ku̵u̵ ga' Yesu wu̵lı̵́ máa, dɨ dáŋ́ bab tóólı̵́. Bɛ́ɛ́g 'maŋ tóó ká dɨ tíŋ́ bab yȩlȩ́, vu̵ dɔn ná nɔm wu̵lı̵́ see né.

⁴²Ma vu̵ dɔd Yesu wu̵lı̵́, moo bɛ́ɛ́g sú̵u̵ ká dɨ bə́', zá̧ga̧ woo ká zá̧ga̧ hȩn mbɔ́ggı̵́ nán Yúúda voo nɔ á̧ḿ.