Read Dii Yoohá̧na 2 Bible Online

Yoohá̧na 2 - Dii bible

Yoohá̧na 2

¹Bá' idú, ta̧a̧nɔ́ woo, pig woolı̵́ máa, vu̵ pú̵ lig kaa Kanáalȩ́, hág Gáliléelı̵́. Yesu na' woo du̵u̵lı̵́.

²Vu̵ bee Yesu kan waa duulí woo vu̵ wu̵lı̵́ á̧ḿ.

³Doo ka 'wáa vu̵ máa, Yesu na' woo la o̧ddu̵: “Doo 'wáa vu̵ sú̵'ú̵.”

⁴A̧máa Yesu hí̧i̧du̵: “Na'á, moo móó wu̵lı̵́ pɛ́lı̵́. Sey míí ya̧n ndɛ́ né.”

⁵Na' woo la o̧d nán ba'ad vu̵: “Ka o̧d ví ȩná si̧', i ká̧ŋ́ kɔ́lı̵́ɨ.”

⁶Ya woo dəg gbo̧o̧ tóó ká vu̵ du̵u̵lı̵́ gúú. Vu̵ baa 'yɛ́ mam wu̵lı̵́ moo mam woolı̵́ nán Yúúda voo nɔ. Dəg yȩ vu̵ baa 'yɛ́ mam tíŋ́ voolı̵́ líitər tȩmɛre tȩmɛre.

⁷Ma Yesu o̧d nán ba'ad vu̵: “I kɔ mam a hi̧' dəg yȩ vu̵ la ú̵.” Ma vu̵ kɔ mam hi̧' ság ság.

⁸Yesu duu o̧d vu̵: “'Ya̧'a̧ yɛ, i yaa mam yɛ pa̧n la ı̵́ hȩn yȩ"ȩ́ȩ.” Ma vu̵ yaa pa̧nnɔ la.

⁹Sey ı̵́ hȩn yȩ"ȩ́ ka fa̧' mam ba tii doo pee ho̧ máa, gaan ya doo yȩ ka yaa né (a̧máa nán ba'ad vu̵n kɔ mam pee, vu̵u̵ gaa). Ma bee ı̵́ kȩ́ȩ́ aga,

¹⁰o̧ddu̵: “Nán 'waapád vu̵ baa dəŋ doo to̧o̧ wu̵ pú̵lı̵́ tíŋ́, ma nán ku̵u̵ kíí tée, vu̵ pú̵ doo ı̵́ ka to̧o̧n na'a né máa pig woolı̵́. A̧máa ı̵́ móó, mɔ́ tu̵ doo to̧o̧ 'yɛ́ há̧á̧ 'ya̧'a̧ yɛ máalá̧!”

¹¹Hȩn sa̧ga̧ Yesu ka dəŋ kɔ́ máa, wu̵ yȩ nɔ. Kɔ́ kaa Kanáalȩ́, hág Gáliléelı̵́; tú' néélȩ́ woo, ma waa duulí woo vu̵ 'yɛ́ zó̧ó̧ woolı̵́.

¹²Pig woolı̵́ máa, Yesu vu̵ sí zu̵u̵ kaa Kapɛrnáhu̧mmé kan na' woo, kan daa sá̧ŋ́ vu̵, sú̵g kan waa duulí woo vu̵ á̧ḿ. Vu̵ mbaa wu̵lı̵́ bá' waaná' aga nɔ.

¹³Pig woolı̵́ máa, mam vúnní páska nán Yúúda voo dɨ bə́'; ma Yesu dɔg Yerúsalemmé.

¹⁴Ka dɔ́ na'am gbo̧o̧ lig hȩn ha"ı̵́lı̵́ máa, nuŋ nán ndaa gílí vu̵, kan mbee vu̵, kan gbɔkii vu̵, kan nán sɨɨde pílí vu̵, vu̵ dɨ mbaalı̵́ wu̵lı̵́.

¹⁵Yesu ə̧ə̧ loo zaŋ waa, nɛ́ŋ́ vu̵ vud 'waapád na'am gbo̧o̧ lig hȩn ha"ı̵́lı̵́ kan mbee voo vu̵, kan ndaa vu̵, á̧ sɨɨde nán sɨɨde pílí voo vu̵, ndaa táabələ voo vu̵ su' gbɔ la.

¹⁶O̧d nán gbɔkii gílí vu̵: “I luu la hȩn yȩ vu̵ zulí. I kɔ́ lig Ba' míí woo lig lum sá.”

¹⁷Waa duulí woo vu̵ duu taa moo debtere ká o̧: “Mí hí̧í̧ lig móó dam pɛ́lı̵́, mbaa dɨ zó̧ó̧ míílí̧ kɔ́ ı̵́ vee wɔgɔ.”

¹⁸Ma nán Yúúda vu̵ vigi: “Káḿ kɔ́ hȩn yȩ vu̵ máa, a̧m kɔ́d vɔ́ hȩn sa̧ga̧ tóó a tú' Tayɨɨ ba wu̵ pú̵m néélȩ́ woo pȩ́ń.”

¹⁹Yesu hí̧i̧d vu̵: “I 'wɔ lig hȩn ha"ı̵́ yɛ tée, míń duu luuwu̵ dii dɔg yúú bá' ta̧a̧nɔ́lȩ́.”

²⁰Nán Yúúda ku̵u̵ ki máa, vu̵ o̧ddu̵: “Vɔ́ kɔ́ ba'ad lig yɛ yo̧o̧lȩ́ woo ve' vo' ndaddú̵ zu̵u̵ gúú, ma móó mɔ́ń luuwu̵ dii dɔg yúú bá' ta̧a̧nɔ́lȩ́ȩ!”

²¹A̧máa Yesu moo moo lig hȩn ha"ı̵́ yȩ yaan dɨ woolı̵́ fó̧lȩ́.

²²Sey ka níḿ nɔmmé máa, waa duulí woo vu̵ duu taa moo ká o̧ yȩ. Vu̵ fȩȩ moo debtere ka o̧ kan moo Yesu ka o̧ máa á̧ḿ.

²³Sey Yesu ka dɨ lá Yerúsalemmé mam vúnní páskalı̵́ máa, nán ɓu̵u̵lı̵́ na'a vu̵ fȩȩ moo woo, moo ku̵u̵ ho̧ ka kɔ́ hȩn sa̧ga̧ vu̵ má nɔ.

²⁴A̧máa Yesu 'yɛ́n zó̧ó̧ voolı̵́ né, moo gaa zó̧ó̧ nánán voo 'waapád.

²⁵Nán tóó o̧nnɔ moo yúú moo taalı̵́ nánán voolı̵́ né á̧ḿ, moo aga gaa hȩn zó̧ó̧ nánán voolı̵́ 'waapáddú̵.