Read Dii Yoohá̧na 20 Bible Online

Yoohá̧na 20 - Dii bible

Yoohá̧na 20

¹Zá̧ga̧ aladdı̵́ máa, Maaríi Magdaláa daa laa bɛ́ɛ́gı̵́ ya̧g ka̧'a̧m hí̧m, ya tú 'waa ná né á̧ḿ. Ho̧ 'yɛgɛ vbíí lúú sı̵́ yúú bɛ́ɛ́gı̵́ ú̵.

²Ma lúú ɗug laa Simɔ́ŋ Piɛ́r woolı̵́, kan waa duulí Yesu woo tóó Yesu ká hí̧í̧wo̧ na'a pee, o̧d vu̵: “Vu̵ gaŋ fó̧ó̧ ı̵́ 'yɛ́lı̵́ baa ví woo luu bɛ́ɛ́gı̵́ sú̵'ú̵; vɔ́ gaan ya ku̵u̵ 'yɛ́nnɔ né.”

³Piɛ́r vu̵ kan waa duulí Yesu woo tóó pee vu̵ vúd laa bɛ́ɛ́gı̵́.

⁴Vu̵ sú̵g kɛ ɗug ya voo idú á̧ḿ, a̧máa waa duulí ı̵́ tóó pee kɛ ɗug mba Piɛ́r, wu̵ dəŋ ya̧ bɛ́ɛ́gı̵́ tíŋ́,

⁵ma nə'əy ho̧ sa̧a̧m nɛ́'ɛm pee mbaa hágá, a̧máa dɔ́n zu̵u̵ bɛ́ɛ́gı̵́ né.

⁶Ma Simɔ́ŋ Piɛ́r duuwu̵ pigim, ya̧ la á̧ḿ, dɔ́ la bɛ́ɛ́g tíŋ́, ho̧ sa̧a̧m ba mbaa hágá pee.

⁷Sa̧a̧m ku̵u̵ go̧o̧n Yesu yúú wu̵lı̵́ máa vu̵ sú̵g mbaan ya dágá peelı̵́ né, a̧máa go̧y woo mbaa kəd.

⁸Pig woo waa duulí ı̵́ ba dəŋ ya̧ tíŋ́ pee duu dɔ́ la bɛ́ɛ́gı̵́, ho̧ hȩn yȩ vu̵, fȩȩ moo woo á̧ḿ;

⁹moo waa duulí vu̵ kin ná moo debtere ká o̧n séý Yesu ban níḿ nɔmmé pȩ́ń máa né.

¹⁰Ma vu̵ daa fíí laa voolı̵́.

¹¹Maaríi dii mbaa woo gɔ́ŋ́ dáŋ́ bɛ́ɛ́gı̵́, ká̧ŋ́. Ka dɨ ká̧ń máa, nə'əy ho̧ zu̵u̵ nɔ́ɔ́ bɛ́ɛ́g tíŋ́,

¹²ho̧ maleeka vu̵ idú vu̵ dɔ́ sa̧a̧m heená, vu̵ mbaa ya vu̵n hu̵u̵ Yesu peelı̵́; dágá mbaa ka' yúlí, tóó mbaa woo ka' dɔlı̵́.

¹³Vu̵ vigi: “Na'á, moo ȩn mɔ́ ká̧ŋ́ŋá?” Hí̧i̧d vu̵: “Moo ku̵u̵ gaŋ ı̵́ 'yɛ́lı̵́ míí luu yɛ nɔ; mí gaan ya ku̵u̵ 'yɛ́nnɔ né.”

¹⁴Sey ka dɨ moo yȩ moolȩ́ máa, tii daa nɔ́ɔ́ pigim, ho̧ Yesu dii mbaa yɔ, a̧máa gaan ba Yesu wu̵ né.

¹⁵Ma Yesu vigi: “Na'á, mɔ́ ká̧ŋ́ ȩná? Mɔ́ soo nɔ́nná?” Maaríi taa woo ba nán bab baalı̵́ tóó nɔ, o̧ddu̵: “Ba'á vu̵, i wu̵ gaŋŋɔ tée, i tú'un ya kíí 'yɛ́gɛ wu̵lı̵́ má nɔ, tée míń gaŋŋɔ.”

¹⁶Ma Yesu beewu̵: “Maaríi!” Maaríi tii daa hí̧i̧du̵ kan ya̧g eebərə́ə: “Rábuní!” (Yéé yȩ tú' “Akaw.”)

¹⁷Yesu o̧ddu̵: “A̧m za'an sá, moo mí dɔgɔ ná Ba' míí woolı̵́ né. A̧máa a̧m la o̧d dan sá̧ŋ́ vu̵ ba míń dɨ ɗáálı̵́ dɔg Ba' míí woolı̵́, wu̵ Ba' víí á̧ḿ; míń dɔg Tayɨɨ míí woolı̵́, wu̵ Tayɨɨ víí á̧ḿ.”

¹⁸Maaríi Magdaláa laa waa duulí voolı̵́, o̧d vu̵: “Mí ho̧ ı̵́ 'yɛ́lı̵́ baa ví sú̵'ú̵.” Ma o̧d vu̵ moo Yesu ka o̧ddu̵ máa 'waapád.

¹⁹Zá̧ga̧ dágá yȩlȩ́ mɛn aladdı̵́, lig waa duulí Yesu woo ku̵u̵ mbaa wu̵lı̵́ máa, vu̵ kúbla, moo vu̵ ndɔg nán Yúúda vu̵ yu̵. Yesu ya dii voolı̵́ sa̧a̧mé, o̧d vu̵: “Ká̧'a̧d Tayɨɨ woo a mbaa kan ví ú.”

²⁰Sey ka moo moo yȩ 'waa máa, tú'ud vu̵ nag woo kan waag woo. Waa duulí woo ku̵u̵ ho̧go̧ máa, zó̧ó̧ voo dȩ'.

²¹Yesu duu o̧d vu̵: “Ká̧'a̧d Tayɨɨ woo a mbaa kan ví ú. Mí ba' ví kɔ́ ı̵́ Ba'á ka ba'an ya yɛ wɔgɔ.”

²²Ka moo moo yȩ 'waa máa, pɛd vu̵, o̧d vu̵: “I fȩȩ yigid Tayɨɨ woo nɔ.

²³Tow i kéé hȩn ɓı̵́d nán voo gbɔ tée, Tayɨɨ kéé hȩn ɓı̵́d voo gbɔ sú̵'ú̵ á̧ḿ. Nán ı̵́ i kéé hȩn ɓı̵́d voo gbɔn né tée, Tayɨɨ kéé gbɔn vu̵ né á̧ḿ.”

²⁴A̧máa nán dágá sa̧a̧m waa duulí Yesu woo ı̵́ wa̧nɓó' zu̵u̵ idú voolı̵́, yéé woo Tomás (vu̵ beewu̵ tóó “Baasa̧m”). Sey Yesu ká maa vu̵ máa, Tomás wu̵lı̵́ pɛ́lı̵́.

²⁵Ma waa duulí tóó vu̵ o̧ddu̵: “Vɔ́ ho̧ ı̵́ 'yɛ́lı̵́ baa ví sú̵'ú̵.” A̧máa Tomás o̧d vu̵: “A̧n ho̧n ndɔ́g kúúsa nag woolı̵́ né, a̧n dɔn nag vbaŋ waa míí ndɔ́g kúúsa woolı̵́ né, a̧n dɔn nag míí waag woolı̵́ né tée, mí fȩȩn moo víí yȩ né sá̧ḿ.”

²⁶Alad dágá pig woolı̵́ máa, waa duulí woo vu̵ duu sú̵g ligí, máa Tomás du̵u̵lı̵́ á̧ḿ. Vu̵ kúbla lig, ma Yesu ya dii voolı̵́ sa̧a̧mé, o̧: “Ká̧'a̧d Tayɨɨ woo a mbaa kan ví ú.”

²⁷Pig woolı̵́ máa, o̧d Tomás: “A̧m yo̧o̧ nag vbaŋ waa móó ya yɛlı̵́, a̧m ho̧ nag pɛ́ɛ́g míí. A̧m yo̧o̧ nag móó, mɔ́ dɔd ya waag míílí̧. A̧m mbaa nán moo faalı̵́ sá, a̧máa a̧m fȩȩ mooɨ.”

²⁸Tomás hí̧i̧du̵ ya̧g o̧: “Ɨ́ 'yɛ́lı̵́ míí! Tayɨɨ míí!”

²⁹Yesu duu o̧ddu̵: “Moo káḿ ho̧n máa, mɔ́ 'yɛ́ zó̧ó̧ míílí̧ wu̵ yaa? A̧máa du̵u̵d nán ı̵́ ku̵u̵ ho̧n mí ní, ku̵u̵ 'yɛ́ zó̧ó̧ míílí̧ máa vu̵ yu̵.”

³⁰Yesu ká kɔ́ hȩn sa̧ga̧ tóó vu̵ ɓu̵u̵lı̵́ na'a nɔ́ɔ́ waa duulí woo voolı̵́; hȩn woo mí bíńda vu̵ debtere yɛlı̵́ né.

³¹A̧máa hȩn ı̵́ káń bíńda vu̵ yɛ, moo i gaa Yesu ba wu̵ ı̵́ nán sənné, wu̵ Waa Tayɨɨ woo á̧ḿ. I duuwu̵ tée, víń nuŋ vágád káákáá kan yɛ́g woo nɔ.