Read Dii Yoohá̧na 21 Bible Online

Yoohá̧na 21 - Dii bible

Yoohá̧na 21

¹Pig woolı̵́ máa, Yesu duu tú'ud waa duulí woo tóó vu̵ fó̧ó̧ ya̧g mam Tiberíalı̵́, hág Gáliléelı̵́. Fó̧ó̧ tú"í woo ká dɨ ná':

²Simɔ́ŋ Piɛ́r kan Tomás (ı̵́ ku̵u̵ beewu̵ “Baasa̧m” máa), kan Natanaɛ́l (nán Kanáa ı̵́ hág Gáliléelı̵́ pee), kan Zebedée waa vu̵, kan waa duulí Yesu woo tóó vu̵ idú vu̵ sú̵g mbaa ya dágá.

³Simɔ́ŋ Piɛ́r o̧d vu̵: “Mí laa ze' ma"ȩ́ yɔ.” Ma vu̵ o̧ddu̵: “Ba laa ví á̧ḿ.” Vu̵ daa ɗáa nɛ́ŋ́ŋı̵́ ka la, a̧máa vid woo vu̵ ma'an hȩn tóó né.

⁴Ya̧g ka̧'a̧m ka tú máa, Yesu ya dii ya̧g nɛ'ɛmé, waa duulí woo vu̵ gaanɔ né.

⁵Yesu o̧d vu̵: “Waa vu̵, ví ma' sı̵́ hȩn tóó áa?” Vu̵ hí̧i̧du̵: “Pɛ́lı̵́.”

⁶Ma o̧d vu̵: “I la tú̵ú̵ kȩgȩ ka' nag nánné, tée víń ma' ze'.” Ku̵u̵ la tú̵ú̵ kȩgȩ ı̵́ yo̧go̧ máa, ze' ma'ay wu̵lı̵́ ɓu̵u̵lı̵́ na'a, vu̵ woowu̵ mban né.

⁷Waa duulí Yesu woo ı̵́ ká hí̧í̧wo̧ na'a pee, ka ho̧ hȩn yȩ máa, o̧d Piɛ́r: “Ɨ́ 'yɛ́lı̵́ baa ví wu̵ yȩ nɔ.” Sey Simɔ́ŋ Piɛ́r ka ki ı̵́ 'yɛ́lı̵́ ba wu̵ yȩ nɔ máa, ɓɛ sa̧a̧m dɔ́lı̵́ woo ta daa gə́ńsə́ŋ́ŋı̵́, moo sa̧a̧m woo ká zi̧i̧ ní, ma kə̧ə̧ la mammé.

⁸Waa duulí Yesu woo tóó vu̵ yaa voo kan nɛ́ŋ́, moo vu̵ ɗiin kan ya̧g nɛ'ɛm né, ká dɨ mɛ́ɛtər tȩmɛre aga nɔ. Vu̵ dɨ kȩgȩ woolı̵́ á̧ḿ, ze' vu̵ hi̧' dɨ wu̵lı̵́ á̧ḿ.

⁹Sey ku̵u̵ sí la ya ɓá"ı̵́ máa, vu̵ ho̧ vee yɨg, kan ze' yúú woolı̵́, kan beréd á̧ḿ.

¹⁰Yesu o̧d vu̵: “I gɛ ze' kíí ma' yȩ tóó vu̵ pa̧n ya ú̵.”

¹¹Simɔ́ŋ Piɛ́r ka ki máa, ɗáá dɔg nɛ́ŋ́ŋı̵́, woo kȩgȩ vud ya ɓá"ı̵́. Kȩgȩ hi̧' kan ze' gbo̧o̧ vu̵ tȩmɛre kan vo' nɔ́nɔ́ zu̵u̵ ta̧a̧nɔ́. Ze' ka ɓu̵u̵ na'a yȩ si̧', kȩgȩ dey né á̧ḿ.

¹²Ma Yesu o̧d vu̵: “I ya lá hȩnne.” Waa duulí woo tóó ba zi̧i̧ zó̧ó̧ vigi: “Mɔ́ nɔ́nná?” máa pɛ́lı̵́, moo vu̵ gaa ı̵́ 'yɛ́lı̵́ ba wu̵ yȩ nɔ.

¹³Yesu séé la ɓɛ beréd pú̵ vu̵, kan ze' pee á̧ḿ.

¹⁴Pig Yesu ka níḿ nɔmmé máa, tú'ud waa duulí woo vu̵ fó̧ó̧ do' ta̧a̧nɔ́ woo wu̵ yȩ nɔ.

¹⁵Ku̵u̵ lá hȩn 'waa máa, Yesu vi Simɔ́ŋ Piɛ́r: “Simɔ́ŋ Yoohá̧na waa, mɔ́ hí̧i̧n mba nán yɛ vu̵ áa?” Simɔ́ŋ hí̧i̧du̵: “Ɨ́ 'yɛ́lı̵́ míí, mɔ́ gaa mí hí̧i̧mɔ́.” Yesu o̧ddu̵: “A̧m baa pa̧ŋ mbee waa míí vu̵ laan ya sígidí.”

¹⁶Duu vigi do' idú woo: “Simɔ́ŋ Yoohá̧na waa, mɔ́ hí̧i̧náa?” Piɛ́r duu hí̧i̧du̵: “Ɨ́ 'yɛ́lı̵́ míí, mɔ́ gaa mí hí̧i̧mɔ́.” Yesu duu o̧ddu̵: “A̧m tu̵ mbee míí vu̵ ú̵.”

¹⁷Yesu duu faa vigi do' ta̧a̧nɔ́ woo: “Simɔ́ŋ Yoohá̧na waa, mɔ́ hí̧i̧náa?” Yesu ka vigi do' ta̧a̧nɔ́ “Mɔ́ hí̧i̧náa?” “Mɔ́ hí̧i̧náa?” máa, zó̧ó̧ Piɛ́r woo ví̧i̧, hí̧i̧du̵: “Ɨ́ 'yɛ́lı̵́ míí, mɔ́ gaa hȩn 'waapád; mɔ́ gaa ba mín hí̧í̧ bi ú!” Ma Yesu duu o̧ddu̵: “A̧m baa pa̧ŋ mbee míí vu̵ laan ya sígidí.

¹⁸Mí o̧m moo yȩ́ńne, káḿ dɨ lá náásaalı̵́ máa, aga mɔ́ kaa sa̧a̧m móó ta dɔg, mɔ́ laa ya káḿ hí̧í̧ máalȩ́. A̧máa sey a̧m gbo̧o̧ sú̵'ú̵ tée, mɔ́ń yo̧o̧ nag móó, nán tóó wú̵ń tam kan zaŋ gaŋ laan mɔ́ ya káḿ sɛ́n né máalȩ́.”

¹⁹Yesu o̧ddu̵ ı̵́ yo̧go̧ moo nɔm Piɛ́r woo a dɨ nɔɔlȩ́, ma a na' Tayɨɨ wu̵lı̵́ má nɔ. Sey Yesu ka moo moo yȩ 'waa máa, duu o̧d Piɛ́r: “A̧m duunɔ́.”

²⁰Sey Piɛ́r ka tii daa nɔ́ɔ́ máa, ho̧ waa duulí Yesu woo ká hí̧í̧wo̧ na'a pee dɨ vu̵ duulíi. (Ká wu̵ ɓəg Yesu haalı̵́ ya hȩn lálı̵́lı̵́, ma ka vigi: “Ba'á, nóo dɨm dɔnné nag nánán voolı̵́lá?” má nɔ.)

²¹Piɛ́r ho̧go̧, ma vi Yesu: “Ɨ́ 'yɛ́lı̵́ míí, ȩn wú̵ń kɔ́ nán ı̵́ yȩ woolá?”

²²Yesu hí̧i̧du̵: “Kam móó tɛ́lá? A̧n hí̧í̧ tée, wú̵ń mbaa há̧á̧ míń fíí ya. Ɨ́ móó máa, a̧m duunɔ́.”

²³Moo woo nɔ, moo yȩ kiy nán kirtȩ́n voolı̵́ sa̧a̧mé, vu̵ o̧ waa duulí Yesu woo ı̵́ yɛ ban nɔɔ né. A̧máa Yesu o̧n Piɛ́r: “Nán yȩ wú̵ń nɔɔ né” né. A̧máa o̧: “A̧n hí̧í̧ a mbaa há̧á̧ a̧n fíí ya tée, kam móó tɛ́lá?”

²⁴Waa duulí yȩ wu̵ du̵ ya̧g yúú moo yȩlȩ́, aga wu̵ bíńda hȩn yɛ á̧ḿ. Vɔ́ gaa ya̧g du̵lı̵́ woo yɛ moo yȩ́ńne.

²⁵Yesu kɔ́ hȩn tóó vu̵ ɓu̵u̵lı̵́ na'a á̧ḿ. Ka vu̵n bíńda vu̵ dágá dágá tée, mí taa ka vu̵n nugun ya debtere woo 'yɛ́lı̵́ hágá yɛlı̵́ né á̧ḿ.