Read Dii Yoohá̧na 3 Bible Online

Yoohá̧na 3 - Dii bible

Yoohá̧na 3

¹Nán farísa tóó yéé woo Níkodém, ká ı̵́ nii tóó nán Yúúda voolı̵́.

²Yaa Yesu woolı̵́ viddí, o̧ddu̵: “Akaw, vɔ́ gaa mɔ́ akaw ka yaa Tayɨɨ woolı̵́ má nɔ. Tow Tayɨɨ a mbaan kan nán tóó né tée, wú̵ń kɔ́n hȩn sa̧ga̧ káḿ kɔ́n yȩ vu̵ né.”

³Yesu ka ki máa, hí̧i̧du̵: “Mí o̧m moo yȩ́ńne, tow u̵u̵ ha̧a̧n nán ha̧a̧lȩ́ 'maŋ né tée, wú̵ń dɔ́n gbaŋ waalı̵́ Tayɨɨ woolı̵́ né.”

⁴Níkodém vigi: “Nán ka gbo̧o̧ sú̵'ú̵ tée, dəŋ née ku̵u̵ duu ha̧a̧wo̧ ha̧a̧lȩ́ 'maŋŋá? Wú̵ń duu fíí dɔ́n sii na' woo woolı̵́, ma vú̵ń duu ha̧a̧nɔ né!”

⁵Yesu duu hí̧i̧du̵: “Mí o̧m moo yȩ́ńne, u̵u̵ ha̧a̧n nán kan mam, kan yigid Tayɨɨ woo né tée, wú̵ń dɔ́n gbaŋ waalı̵́ Tayɨɨ woolı̵́ né.

⁶Hȩn fó̧ó̧ nánán ka ha̧a̧wo̧ máa, woo nánánne. Nán ı̵́ yigid Tayɨɨ woo ka ha̧a̧wo̧ máa, woo nán yigid woo nɔ.

⁷Moo káń o̧m, u̵u̵ ha̧a̧m ha̧a̧lȩ́ 'maŋŋɨ yȩ, a la'am kɛb sá.

⁸Sápéém pɛ ya ka hí̧í̧ máalȩ́. Ba ki namné woo, a̧máa ba gaan ya ka yaa né, kan ya ka dɨn laalı̵́ né á̧ḿ. Nán yigid Tayɨɨ woo ka ha̧a̧wo̧ máa, dɨ ı̵́ yo̧go̧ á̧ḿ.”

⁹Ma Níkodém duu vigi: “Hȩn woo wú̵ń kɔ́y nɛ́nná?”

¹⁰Yesu duu hí̧i̧du̵: “Móo akaw nán Izraɛ́l voo, ma mɔ́ gaan hȩn yȩ vu̵ néee!

¹¹Mí o̧m moo yȩ́ńne, vɔ́ o̧ vóó hȩn kóó gaa, kóó ho̧ á̧ḿ má nɔ. Vɔ́ du̵ ya̧g yúú woolı̵́, a̧máa ví fȩȩn moo vóó né.

¹²Káń o̧d ví moo hȩn ı̵́ hágá yɛlı̵́ vu̵, kíí fȩȩ né yɛ, víń dəŋ née fȩȩ moo ı̵́ a̧n o̧d ví yúú hȩn ı̵́ ku̵u̵ dɨ be"ı̵́ máalá̧!

¹³Nán tóó ɗáan dɔg be"ı̵́ né, séý ı̵́ míí Tayɨɨ ka ba'an ya yɛ nɔ. Mí zu̵u̵ wu̵lı̵́ á̧ḿ.

¹⁴Ɨ́ míí Tayɨɨ ka ba'an ya yɛ, séý vú̵ń gaŋ dɔgɔn mí yúba kɔ́ ı̵́ Múúsa ká ɓɛ bɨɨg do̧' sə́ə́ yúba la' tóólı̵́ hó̧g tíŋ́ máa wɔgɔ,

¹⁵moo kóó nɔ́nná a 'yɛ́ zó̧ó̧ míílí̧ tée, wú̵ń nuŋ vágád káákáá ú̵.

¹⁶“A̧máa Tayɨɨ hí̧í̧ nán vu̵ dam pɛ́lı̵́, ma ba' Waa dágá 'nɛ́ŋ́ woo yaa moo kóó nɔ́nná a 'yɛ́ zó̧ó̧ woolı̵́ tée, a nɔɔ sá, a̧máa a nuŋ vágád ı̵́ káákááɨ.

¹⁷Tayɨɨ ba'an Waa woo ya hágá yɛlı̵́ moo moo sə̧"ȩ́ȩ né, a̧máa moo nánán vu̵ sənnée.

¹⁸Nán a 'yɛ́ zó̧ó̧ woolı̵́ tée, moo woo kə̧ə̧ né, a̧máa nán ı̵́ a 'yɛ́n zó̧ó̧ woo woolı̵́ né tée, moo woo kə̧ə̧ sú̵'ú̵, moo ka 'yɛ́n zó̧ó̧ Waa dágá 'nɛ́ŋ́ Tayɨɨ woolı̵́ né má nɔ.

¹⁹Hȩn kə̧ə̧g kɔ́lı̵́ wu̵ yɛ nɔ: Túlí yaa hágá yɛlı̵́, a̧máa nán vu̵ hí̧í̧ dim wu̵ mba túlí, moo ba'ad voo, ba'ad ɓı̵́ddɨ.

²⁰Kóó nɔ́nná ka kɔ́ hȩn ɓı̵́d tée, máń túlí, yaan túlí woolı̵́ né, moo ba'ad bii ba vú̵ń vúd nɔ́ɔ́ nánán voolı̵́ ú̵.

²¹Nán ka kɔ́ hȩn yȩ́ń máa, yaa ya túlí woolı̵́, moo ba'ad bii u̵u̵ vúd nɔ́ɔ́ nánán voolı̵́ ú̵, moo nán yȩ kid Tayɨɨ tɔ́g sú̵'ú̵.”

²²Pig woolı̵́ máa, Yesu laa hág Yúúdalı̵́ kan waa duulí woo vu̵, sú̵g mbaa kan vu̵ wu̵lı̵́, woo nán vu̵ mam Tayɨɨ[2] wu̵lı̵́ á̧ḿ.

²³Yoohá̧na dɨd nán vu̵ mam Tayɨɨ wooné á̧ḿ, kaa Enóŋŋı̵́, bə́' kan Salím, moo mam ká ɓu̵u̵ wu̵lı̵́ ú̵. Nán vu̵ baa yaa woolı̵́, ma Yoohá̧na baa woo vu̵ mam Tayɨɨ.

²⁴(Ká vu̵ dɔn ná Yoohá̧na lig púúsinalȩ́ né.)

²⁵Sey woolı̵́ máa, waa duulí Yoohá̧na woo tóó vu̵ fan moo kan nán Yúúda tóó yúú mam woonélı̵́,

²⁶ma vu̵ pa̧ŋ moo woo yaan Yoohá̧na woolı̵́, vu̵ o̧ddu̵: “Akaw, nán ka mbaa kan mɔ́ ziŋ Yu̵ŕdɛn dən, káḿ du̵ddu̵ ya̧g pee, dɨd nán vu̵ mam Tayɨɨ wooné, ma nán 'waapád vu̵ dɨ laalı̵́ woolı̵́.”

²⁷Yoohá̧na ka ki máa, hí̧i̧d vu̵ o̧: “Tayɨɨ a pú̵n nán hȩn né tée, wú̵ń nugun hȩn tóó né.

²⁸Víi nán ya̧g du̵lı̵́ míí yúú moo káń o̧d ví yȩlȩ́: ‘Mí ı̵́ nán sənnée pɛ́lı̵́, a̧máa Tayɨɨ wu̵ ba'an ya tíŋ́ woolı̵́.’

²⁹Nán ku̵u̵ pú̵gu̵ lig máa, wu̵ ı̵́ kȩ́ȩ́ aga, a̧máa daga gboo ka ki yɛ́g woo tée, zó̧ó̧ dȩ"o̧ mba hȩn, moo ka ki yɛ́g ı̵́ kȩ́ȩ́ aga woo má nɔ. Zó̧ó̧ dȩ"ȩ́ míí dɔ́ yagalı̵́ yȩ.

³⁰Na"ȩ́ woo a wu̵ laa tíŋ́, a̧máa ı̵́ míí, a̧n fíí ya pigim.”

³¹“Ɨ́ ka zu̵u̵ be"ı̵́ máa, wu̵ mbaa yúú nán voolı̵́ 'waapád. Nán ı̵́ ka dɨ woo hágá yɛlı̵́ máa, mbaad woo hággɨ, moo woo moo yúú hȩn ku̵u̵ dɨ hágá yɛlı̵́ máa vu̵ yu̵. A̧máa ı̵́ ka zu̵u̵ woo be"ı̵́ máa, mbaa woo yúú nánán voolı̵́ 'waapád;

³²du̵ woo ya̧g yúú hȩn ka ho̧, kan hȩn ka ki gaa máalȩ́, a̧máa nán vu̵ fȩȩn moo woo né.

³³Nán ka fȩȩ moo woo máa, hȩn woo tú' moo Tayɨɨ woo ba moo yȩ́ńne.

³⁴Nán Tayɨɨ ka ba"u̵ yȩ, wu̵ dɨ moo Tayɨɨ woo moolȩ́, moo Tayɨɨ pú̵gu̵ yigid woo ɓu̵u̵lı̵́ na'a.

³⁵Ba'á Tayɨɨ hí̧í̧ Waa woo ú̵. 'Yɛ́ hȩn 'waapád nag woolı̵́.

³⁶Nán a 'yɛ́ zó̧ó̧ Waa Tayɨɨ woolı̵́ tée, nuŋ vágád ı̵́ káákáá sú̵'ú̵. A̧máa nán a kin Waa Tayɨɨ woo tɔ́g né tée, wú̵ń nugun vágád ı̵́ káákáá né. Tayɨɨ kɔ́ddu̵ zó̧ó̧ yȩ́ȩ́ sú̵'ú̵.”