Read Dii Yoohá̧na 4 Bible Online

Yoohá̧na 4 - Dii bible

Yoohá̧na 4

¹Nán farísa vu̵ ki Yesu ba nuŋ waa duulí vu̵ mba Yoohá̧na ú̵, ba dɨd vu̵ mam Tayɨɨ woonée á̧ḿ. (A̧máa Yesu ká wu̵ woon vu̵ kan nag woo né, waa duulí woo ká vu̵u̵ woo vu̵.) Sey Yesu ka gaa nán farísa ba vu̵n ki sı̵́ ı̵́ yo̧go̧ ó̧ máa,

³kéé hág Yúúda gbɔ, fíí la hág Gáliléelı̵́.

⁴Hi̧naa woo ya̧a̧ duu la hág Samaríilí.

⁵Yesu ya̧ kaa tóólı̵́ hág Samaríilí, yéé woo Sikár, bə́' kan bab tóó Yaakúbu ká pú̵ waa woo Yu̵u̵séfu máalȩ́.

⁶Dəə mam Yaakúbu woo ká du̵u̵lı̵́. Yesu ka ta̧a̧ kan 'yȩ́ȩm zá̧ga̧ sa̧a̧mé máa, nəə mbaa dáŋ́ mam zɔg yȩlȩ́.

⁷Waa duulí woo vu̵ laa voo kaalı̵́ moo hȩn lálı̵́ soolı̵́ɨ. Yesu ka dɨ mbaalı̵́ wu̵lı̵́ máa, wakȩ́ȩ́ Samaríi tóó yaa mam kɔlı̵́. Yesu vigi: “A̧m pú̵n mam mí zɔ ú̵.”

⁸

⁹Ma wakȩ́ȩ́ pee hí̧i̧du̵: “A̧máa mɔ́ móó nán Yúúdaɨ. Kɔ́ née mɔ́ o̧ a̧n pú̵ bi mammelá? Mí wakȩ́ȩ́ Samaríi pɛ́láa?” (Moo nán Yúúda vu̵ sɛ́n nán Samaríi vu̵ né.)

¹⁰Yesu hí̧i̧du̵ ya̧g o̧: “Ka mɔ́n gaa hȩn pú̵lı̵́ Tayɨɨ woo ú̵, ka mɔ́n gaa nóo ka vim mam zɔlı̵́ yɛlá tée, ka mɔ́ń ɓá'an mam, ka míń pú̵m mam[3] dȩ"ȩ́ na'a á̧ḿ.”

¹¹Wakȩ́ȩ́ pee o̧ddu̵: “Ba'á, ví kan sóo pɛ́lı̵́, dəə mam yɛ sú ú á̧ḿ; mam dȩ"ȩ́ yȩ, víń nuŋŋɔ tɛ́lá?

¹²Víi mba a ba ví yée Yaakúbu aa? Yaakúbu aga ká zɔ mam yɛ kan waa woo vu̵, kan hȩn buulí woo vu̵, ma ka nɔɔ gbɔd vɔ́ yɛ nɔ náa!”

¹³Yesu duu hí̧i̧du̵: “Kóó nɔ́nná a zɔ mam yɛ tée, mam wú̵ń duu 'wɔddu̵ ú̵,

¹⁴a̧máa nán a zɔ mam ı̵́ káń dɨgɨ pú̵lı̵́ yɛ tée, mam wú̵ń duu 'wɔnnɔ né sá̧ḿ. Mam a̧n pú̵gu̵ máa, wú̵ń gaddu̵ mam gaɓud zó̧ó̧lȩ́. Nán a zɔ tée, wú̵ń nuŋ vágád káákáá.”

¹⁵Wakȩ́ȩ́ pee duu o̧ddu̵: “Ba'á, i pú̵n mam yȩ ó̧, moo mam a duu 'wɔn sá, a̧n ya duu kɔ mam yɛlı̵́ sá á̧ḿ.”

¹⁶Ma Yesu o̧ddu̵: “A̧m la bee wə̧́ə̧́m ya ú̵.”

¹⁷Wakȩ́ȩ́ pee hí̧i̧du̵: “Mí kan wə̧ə̧ pɛ́lı̵́.” Yesu duu o̧ddu̵: “Mɔ́ moo moo yȩ́ńne, káḿ o̧: ‘Mí kan wə̧ə̧ pɛ́lı̵́’ má nɔ;

¹⁸moo ká mɔ́ dɨ kan wə̧ə̧ nɔ́nɔ́, a̧máa ı̵́ káḿ dɨ kannɔ yȩ, wə̧ə̧ móó nɔ pɛ́lı̵́. Moo káḿ moo yȩ, moo yȩ́ńne.”

¹⁹Wakȩ́ȩ́ pee ka ki moo yɛ máa, o̧ddu̵: “Ba'á, mí ho̧ ví máa, ví anábiɨ.

²⁰A vɔ́ yée vu̵ baa ha'ad Tayɨɨ hȩn gu̵u̵ yɛlı̵́, a̧máa ı̵́ víí nán Yúúda vu̵, ví o̧ ya hȩn ha"ı̵́ ba dɨ Yerúsalemmé dágá.”

²¹Yesu duu o̧ddu̵: “Wakȩ́ȩ́ yɛ mɔ́, a̧m ki du̵u̵lı̵́ na'a. Sey tóólı̵́ tée, víń ha'an Ba'á Tayɨɨ hȩn gu̵u̵ yɛlı̵́ né, kan Yerúsalemmé á̧ḿ.

²²Ɨ́ víí nán Samaríi vu̵, ví na' víí hȩn kíí gaa né má nɔ. Ɨ́ vóó nán Yúúda vu̵, vɔ́ gaa vóó hȩn kóó na"ó̧, moo hȩn nán sənné yaa dɨ nán Yúúda voolı̵́.

²³A̧máa zaa tée, nán ku̵u̵ duu Tayɨɨ yȩ́ńná máa, vú̵ń na"o̧ zó̧ó̧lȩ́ kan moo yȩ́ńne; hȩn woo dəŋ sú̵'ú̵ á̧ḿ, moo Ba'á Tayɨɨ soo woo nán ku̵u̵ na"o̧ ı̵́ yo̧go̧ máa vu̵ yu̵.

²⁴Tayɨɨ wu̵ pú̵ nánán vu̵ vágád.[4] Nán u̵u̵ na"o̧ tée, séý u̵u̵ na"o̧ zó̧ó̧lȩ́ kan moo yȩ́ńne.”

²⁵Wakȩ́ȩ́ pee ka ki ı̵́ yo̧go̧ máa, o̧ddu̵: “Mí gaa ı̵́ nán sənné wú̵ń yaa dɨlı̵́, ı̵́ ku̵u̵ beewu̵ Krístu má nɔ. A yaa sú̵'ú̵ tée, wú̵ńnɔ tú'ud ba ví hȩn 'waapád.”

²⁶Ma Yesu hí̧i̧du̵: “Míi yɛ nɔ. Míi dɨ moo moolȩ́ kan mɔ́ yɛ nɔ.”

²⁷Sey ku̵u̵ dɨ moo yȩ mbalı̵́ máa, waa duulí Yesu woo vu̵ fíí ya, ma vu̵ ho̧go̧ dɨ moo mbalı̵́ kan wakȩ́ȩ́ tóó nɔ, la' vu̵ la fid. Kóó ı̵́ yo̧go̧ si̧', nán tóó vinnɔ moo tóó né. Vu̵ vinnɔ: “Mɔ́ vigi ȩná?” máa né. Vu̵ vinnɔ: “Moo ȩn mɔ́ mba moo kannɔlá?” máa né á̧ḿ.

²⁸Sey wakȩ́ȩ́ pee ka ki ı̵́ yo̧go̧ máa, gbɔ gbág mam woo zɔggı̵́ wu̵lı̵́, daa laa kaalı̵́, o̧d nán vu̵:

²⁹“I ya ho̧ sı̵́ nán tóó nɔ! O̧n hȩn káń kɔ́ máa 'waapád sú̵'ú̵. Tóó tée ı̵́ nán sənné wu̵.”

³⁰Ma vu̵ vúd kaalı̵́, vu̵ yaa Yesu woolı̵́.

³¹Sey wakȩ́ȩ́ yȩ ka laa kaalı̵́ máa, waa duulí Yesu woo vu̵ o̧ddu̵: “Akaw, hȩn lálı̵́ ka yɛlá.”

³²A̧máa Yesu hí̧i̧d vu̵: “Mí dɨ kan hȩn lálı̵́ tóó, ví gaanɔ né.”

³³Waa duulí woo ku̵u̵ ki máa, vu̵ víń ya voolı̵́: “Nán tóó pa̧nnɔ ya hȩn lálı̵́ yɛlı̵́ áa?”

³⁴Ma Yesu o̧d vu̵: “Hȩn lálı̵́ míí wu̵ yɛ nɔ, séý míń kɔ́ hȩn hí̧í̧lí̧ ı̵́ ka ba'an ya yɛ woo, míń kɔ́ ba'ad woo 'waa pȩ́ń.

³⁵Ví o̧n bá' tú̵d sə̧"ȩ́ ba kéen sȩȩ ndaddú̵ náa? Mí o̧d ví, i luu dɔg lá ví nɔ́ɔ́ yúba, i ho̧ tú̵d yó̧ggɨ. Bá' tú̵d sə̧"ȩ́ ya̧ sú̵'ú̵.

³⁶Nán a sə̧' máa, nuŋ hȩn sú̵ú̵lı̵́ woo sú̵'ú̵, su̵g tú̵d ı̵́ a pú̵ vágád káákáá má nɔ. Moo woo nɔ nán ka ba máa u̵u̵ sú̵g dȩ' zó̧ó̧ kan nán ı̵́ ka sə̧' su̵g máa á̧ḿ.

³⁷Moo máa ku̵u̵ moo yȩ, moo yȩ́ńne; nán tóó ba woo, nán tóó sə̧' su̵g woo.

³⁸Ɨ́ míí, mí ba' ví moo hȩn su̵ggı̵́ ya ka ví kɔ́n ba'ad wu̵lı̵́ né máalȩ́. Nán tóó ká vu̵u̵ kɔ́ ba'ad woo. Ɨ́ víí, ví dɔ́ ba'ad voo yȩlȩ́ sú̵'ú̵.”

³⁹Wakȩ́ȩ́ pee ka du̵ ya̧g yúú Yesu woolı̵́, ka o̧: “O̧n hȩn káń kɔ́ máa 'waapád sú̵'ú̵” máa, nán Samaríi ɓu̵u̵lı̵́ na'a kaa yȩlȩ́ vu̵ fȩȩ moo Yesu woo yúú moo wakȩ́ȩ́ yȩ ba o̧d vu̵ yȩlȩ́.

⁴⁰Moo woo nɔ nán Samaríi vu̵ yaa, vu̵ nuŋ Yesu, vu̵ vigi a mbaa biilí. Ma Yesu səə wu̵lı̵́ bá' idú.

⁴¹Sey ku̵u̵ ki moo woolı̵́ ya̧gá̧ máa, nán tóó vu̵ ɓu̵u̵lı̵́ na'a vu̵ fȩȩ,

⁴²ma vu̵ o̧d wakȩ́ȩ́ pee: “Vɔ́ duu fȩȩn moo woo yúú moo móólȩ́ȩ né, moo aga vɔ́ ki kan tɔ́g vóó, ma vɔ́ gaawu̵ ba ı̵́ nán sənné yȩ́ńne.”

⁴³Bá' idú yȩ ka ya̧a̧ sú̵'ú̵ máa, Yesu lúú wu̵lı̵́ laa hág Gáliléelı̵́,

⁴⁴moo aga ká o̧: “Anábi tóó nugun na"ȩ́ kaa ha̧a̧lȩ́ woolı̵́ né.”

⁴⁵Sey ka ya̧ la hág Gáliléelı̵́ máa, nán kaa vu̵ fȩȩwo̧, moo ká vu̵ laa mam vúnní páska dɨ Yerúsalemmé, vu̵ ho̧ hȩn gbo̧o̧ ka kɔ́ wu̵lı̵́ 'waapád.

⁴⁶Yesu duu daa laa kaa Kanáalȩ́, hág Gáliléelı̵́, ya ká tii mam doo peelı̵́. Nán gbo̧o̧ tóó ká du̵u̵lı̵́, nán gbanii woo nɔ. Waa yée woo ud ho̧o̧ dɨ Kapɛrnáhu̧mmé.

⁴⁷Nán gbo̧o̧ pee ki Yesu ba lúú hág Yúúdalı̵́, ba yaa dɨ hág Gáliléelı̵́, ma laa Yesu woolı̵́, dȩnnɔ nag, ba a sí zu̵u̵ la zá̧a̧d bi waaɨ, moo waa yȩ ud ho̧o̧, zaa kan nɔɔ sú̵'ú̵ á̧ḿ.

⁴⁸Ma Yesu hí̧i̧du̵: “Kíí ho̧n hȩn sa̧ga̧ gbo̧o̧ tóó vu̵ kan hȩn zálı̵́ tóó vu̵ né tée, ví fȩȩn moo né sá̧ḿ.”

⁴⁹Nán gbo̧o̧ pee duu o̧ddu̵: “Ba' naa, i sí zu̵u̵ vaŋná, waa míí kan nɔɔ ó̧!”

⁵⁰Yesu duu hí̧i̧du̵: “A̧m laa la ú̵, waa móó mbaa nánne!” Nán pee fȩȩ moo Yesu ka o̧ddu̵ yȩ, daa zu̵u̵.

⁵¹Ka dɨ zu̵u̵ sílí máa, nán ba'ad woo vu̵ ya laawu̵ hi̧naalȩ́, vu̵ o̧ddu̵: “Waa móó mbaa nánne!”

⁵²Baa pee ka ki máa, vi vu̵ fó̧ó̧ ba ka̧"o̧ sey woo tɛ́lá? Vu̵ hí̧i̧du̵: “Ká bán zamndi dágá ya̧g mɛnné máa, fó̧ó̧ píím 'wáawu̵ wu̵lı̵́.”

⁵³Moo woo nɔ waa ba'a pee gaa Yesu ba o̧d bi moo sey woolı̵́: “Waa móó mbaa nánne!” Ma baa pee 'yɛ́ zó̧ó̧ Yesu woolı̵́ kan nán woolı̵́ kíilí vu̵ 'waapád.

⁵⁴Pig Yesu ka lúú hág Yúúdalı̵́, ka daa laa hág Gáliléelı̵́ máa, hȩn sa̧ga̧ ı̵́ idú woo ka kɔ́ máa, wu̵ yȩ nɔ.