Read Dii Yoohá̧na 5 Bible Online

Yoohá̧na 5 - Dii bible

Yoohá̧na 5

¹Pig woolı̵́ máa, mam vúnní nán Yúúda voo tóó ká dɨlı̵́, ma Yesu daa dɔg Yerúsalemmé.

²Mam tóó ká key dɨ kaa yȩlȩ́ ya̧g dɔ́m tóólı̵́, ká ya mam woolı̵́ɨ, yéé woo “Mbee.” Vu̵ beewu̵ kan ya̧g eebərə́ə “Betésta,” dɨ kan ɗaŋ waa nɔ́nɔ́.

³Nán ho̧o̧ vu̵ baa ud mbaa wu̵lı̵́ ɓu̵u̵lı̵́ na'a, kan nán yə̧m vu̵, kan nán gbu̵u̵g kȩ́'ȩ vu̵, kan nán kpee vu̵, [vu̵ mbaa laa mam namné wu̵lı̵́,

⁴moo maleeka ı̵́ 'yɛ́lı̵́ woo baa sí zu̵u̵ nam mam yȩ sey tóólı̵́, tée nán ka dəŋ dɔ́ zu̵u̵ mam yȩlȩ́ tíŋ́ pȩ́ń tée, ho̧o̧ ka̧"o̧, kóó ho̧o̧ woo ȩná si̧'.]

⁵Nán tóó ká du̵u̵lı̵́, ud ho̧o̧ ve' vo' ta̧a̧nɔ́ zu̵u̵ ka'andaddú̵.

⁶Sey Yesu ka ho̧go̧ ka dɨ úud mbaa máa, gaa ba ud ho̧o̧ ɗii sú̵'ú̵, vigi: “Mɔ́ hí̧í̧ ho̧o̧ a ka̧' bi áa?”

⁷Nán ho̧o̧ pee hí̧i̧du̵: “Ba' naa, sey mam ka dɨ namné tée, nán tóó a gaŋ pa̧ga̧n zu̵u̵ wu̵lı̵́ máa pɛ́lı̵́. Káń dɨ zu̵u̵ sílí tée, nán tóó ya̧ tíŋ́ míílí̧ ma.”

⁸Ma Yesu o̧ddu̵: “A̧m lúú dɔg yúba, mɔ́ ɓɛ píg móó, mɔ́ 'yȩmma ó̧.”

⁹Vaŋná ho̧o̧ ka̧"o̧ zu̵u̵ ya̧g woolı̵́, ɓɛ píg woo 'yȩm. Zá̧ga̧ woo ká zá̧ga̧ asawəɨ.

¹⁰Nán Yúúda ku̵u̵ ho̧ nán ho̧o̧ ba ka̧"o̧ pee máa, vu̵ o̧ddu̵: “Ɓəə zá̧ga̧ asawəɨ, dooká baa ví há' ba a̧m gaŋ píg móó ɓəə sá.”

¹¹Ma hí̧i̧d vu̵: “Nán ka za̧a̧n ho̧o̧lȩ́ yɛ wu̵ o̧n: ‘A̧m gaŋ píg móó, mɔ́ 'yȩmma ó̧.’ ”

¹²Vu̵ vigi: “Nóo o̧m: ‘A̧m gaŋ píg móó, mɔ́ 'yȩmma ó̧’ lá?”

¹³A̧máa nán ho̧o̧ ba ka̧"o̧ pee, gaan sı̵́ nán pee né, moo Yesu ká lúú sı̵́ wu̵lı̵́ ú̵, moo dúú ká vu̵ ɓu̵u̵ ya yȩlȩ́ ó̧.

¹⁴Pig woolı̵́ máa, Yesu la kan kannɔ na'am gbo̧o̧ lig hȩn ha"ı̵́lı̵́, ma o̧ddu̵: “A̧m ki sú̵m! Ho̧o̧ ka̧'a̧m sı̵́ yɔ. A̧m duu kɔ́ hȩn ɓı̵́d sá, moo hȩn tóó kan duu kɔ́m kan mba ı̵́ yȩ ó̧.”

¹⁵Nán pee daa lúú laa, la o̧d nán Yúúda vu̵ Yesu ba wu̵ za̧a̧ bi.

¹⁶Moo woo nɔ ma, nán Yúúda vu̵ duun Yesu kan moo, moo ká kɔ́ hȩn yȩ dɨ zá̧ga̧ asawəlı̵́.

¹⁷A̧máa Yesu hí̧i̧d vu̵: “Ba' míí dɨ ba'ad kɔ́lı̵́ há̧á̧ ya̧ 'ya̧'a̧ yɛ yɔ. Mí á̧ḿ, mí dɨ kɔ́lı̵́ɨ.”

¹⁸Yúú moo yȩlȩ́, nán Yúúda vu̵ duu soowu̵ soolı̵́ gbo̧o̧ mɛ́ń, moo bi nɔɔwo̧ ó̧, moo ka lı̵́d zá̧ga̧ asawəɨ má nɔ dágá pɛ́lı̵́, a̧máa moo ka o̧ Ba' bii ba Tayɨɨɨ má nɔ, moo ba tii fó̧ó̧ woo bi man kan Tayɨɨɨ.

¹⁹Yesu duu ka moo sɔd vu̵, o̧: “Mí o̧d ví moo yȩ́ńne, Waa dɨ kan néélȩ́ kɔ́n hȩn dáń woo né sá̧ḿ, a̧máa baa kɔ́ hȩn Ba' woo ka kɔ́ má nɔ. Kóó Ba' woo a kɔ́ ȩná, Waa woo kɔ́ duu wu̵ yu̵ á̧ḿ.

²⁰Ba'á hí̧í̧ Waa woo, ma tú'udu̵ hȩn aga ka baa kɔ́ kan fó̧ó̧ woo máa 'waapád. Wú̵ń tú'udu̵ hȩn gbo̧o̧ tóó vu̵, vú̵ń mba ı̵́ yɛ vu̵ á̧ḿ, moo hȩn woo a la' ví la fid.

²¹Ba'á nim nɔm vu̵, vu̵ mbaa zá̧a̧d, ma dɨ ı̵́ yo̧go̧ á̧ḿ, Waa woo wú̵ń nim nán ı̵́ ka hí̧í̧ bi nim vu̵ máa á̧ḿ.

²²Ba'á wú̵ń sə̧'ə̧n moo yúú nán tóó woolı̵́ né, a̧máa gbɔ moo sə̧"ȩ́ 'waapád nag Waa woo woolı̵́,

²³moo nán 'waapád u̵u̵ na' Waa woo kɔ́ ı̵́ ku̵u̵ na' Ba'á wɔgɔ á̧ḿ. Nán a na'an Waa woo né tée, na'an Ba'á ka ba'anɔ ya yɛ né á̧ḿ.

²⁴“Mí o̧d ví moo yȩ́ńne, nán ka fȩȩ moo míí, ka 'yɛ́ zó̧ó̧ ı̵́ ka ba'an ya yɛ woolı̵́ tée, nuŋ vágád káákáá sú̵'ú̵. Wú̵ń ya̧n ya moo sə̧"ȩ́lȩ́ né, a̧máa ya̧a̧ nɔm, nuŋ vágád káákáá sú̵'ú̵.

²⁵Mí o̧d ví moo yȩ́ńne, sey tóó wú̵ń yaa dɨlı̵́, sey woo ya̧ sú̵'ú̵ á̧ḿ. Nán nɔm vú̵ń ki yɛ́g Waa Tayɨɨ woo; ı̵́ u̵u̵ ki máa, vú̵ń mbaa zá̧a̧dná.

²⁶Ba'á wu̵ dɨ kan néélȩ́ pú̵ nán vu̵ vágád, ma pú̵ Waa woo néélȩ́ yȩ ı̵́ yo̧go̧ á̧ḿ.

²⁷Pú̵gu̵ néélȩ́ moo sə̧"ȩ́ sú̵'ú̵ á̧ḿ, moo Tayɨɨ wu̵ ba"u̵ ya yɛlı̵́.

²⁸Hȩn yɛ a la' ví kɛb sá. Sey tóó wú̵ń yaa dɨlı̵́, nán 'waapád ku̵u̵ dɨ bɛ́ɛ́gı̵́ máa, vú̵ń ki yɛ́g woo,

²⁹vú̵ń níḿ vúd ya. Nán ı̵́ ku̵u̵ kɔ́ hȩn du̵u̵ máa, vú̵ń níḿ, vú̵ń nuŋ vágád káákáá Tayɨɨ woolı̵́. Nán ı̵́ ku̵u̵ kɔ́ hȩn ɓı̵́d máa, vú̵ń níḿ voo moo moo si̧'i̧ní.”

³⁰Yesu duu o̧d vu̵: “Mí dɨ kan néélȩ́ kɔ́n hȩn tóó kan fó̧ó̧ míí ní. Mí sə̧' moo kɔ́ ı̵́ káń ki Ba'á woolı̵́ máa wɔgɔ. Moo sə̧"ȩ́ míí dɨ woo tə́g tə́g, moo mí soon hȩn hí̧í̧lí̧ dáń míí nu né, a̧máa mí soo hȩn hí̧í̧lí̧ ı̵́ ka ba'an ya máa woo nɔ.

³¹“Aga a̧nnɔ du̵ ya̧g yúú míílí̧ tée, ya̧g du̵lı̵́ míí yȩ́ńne pɛ́lı̵́.

³²A̧máa nán tóó dɨlı̵́, wu̵ baa du̵n ya̧g. Mí gaa ya̧g du̵lı̵́ woo yúú míílí̧ yȩ, ba moo yȩ́ńne.

³³Aga ká kíí ba' nán tóó vu̵ la Yoohá̧na woolı̵́ máa, Yoohá̧na du̵ ya̧g yȩ́ń.

³⁴Ɨ́ míí, mí soon míí ya̧g du̵lı̵́ nánán tóó woolı̵́ né, a̧máa mí o̧d ví moo yɛ moo i sə́ddú̵.

³⁵Yoohá̧na ká wu̵ mbaa kɔ́ ı̵́ lám ka má' vee, ka dɨ túlí máa wɔgɔ. Ká ví hí̧í̧ bi dȩ' zó̧ó̧ kan túlí woo waaná'.

³⁶Ɨ́ míí, mí dɨ kan hȩn ya̧g du̵lı̵́ gbo̧o̧ ba'a ka mba ı̵́ Yoohá̧na woo máa á̧ḿ. Ba'ad míí máa, Ba'á ka pú̵n a̧n kɔ́ vu̵ ú̵ yɛ, ba'ad sú̵u̵ vu̵u̵ tú' Ba'á aga ba wu̵ ba'an ya.

³⁷Ba'á ká ba'an ya sú̵u̵, aga du̵ ya̧g yúú míílí̧ á̧ḿ. Ví kin yɛ́g woo né, ví ho̧n ya̧g túń woo né á̧ḿ.

³⁸Ví fȩȩn moo Tayɨɨ woo vu̵ zó̧ó̧ víílí ní, moo ví 'yɛ́n zó̧ó̧ víí ı̵́ Tayɨɨ ka ba'anɔ ya yɛ woolı̵́ né á̧ḿ.

³⁹Ví baa kúgú moo debterelı̵́, moo ví taa ba bíń nuŋ vágád káákáá wu̵lı̵́, a̧máa debtere yȩ aga wu̵ du̵ ya̧g yúú míílí̧.

⁴⁰Kóó ı̵́ yo̧go̧ si̧', ví sɛ́n yaalı̵́ míílí̧ moo bi nugun vágád káákáá né.

⁴¹“Mí soon na"ȩ́ nánán tóó voolı̵́ né,

⁴²a̧máa mí gaa ví hí̧i̧n Tayɨɨ zó̧ó̧ víílí ní.

⁴³Mí yaa míí kan yɛ́g Ba' míí woo nɔ, ma ví fȩȩn mí ní. Nán tóó aga a yaa kan yɛ́g dáń woo tée, víń fȩȩwo̧.

⁴⁴Ɨ́ víí aga kíí hí̧í̧ ná'ané ya víílí, kíí hí̧í̧ Tayɨɨ aga a wu̵ na' bi sá yȩ, víń dəŋ née fȩȩ moo woolá?

⁴⁵I taa ba míńnɔ doo bi Ba' míí woolı̵́ sá. Nán ka doo ví máa, wu̵ Múúsa kíí 'yɛ́ zó̧ó̧ woolı̵́ yȩ nɔ.

⁴⁶Moo ka víń fȩȩ moo Múúsa woo ú̵ tée, ka víń fȩȩ moo míí á̧ḿ, moo Múúsa ká bíńda də́ń moo yúú míílí̧ wu̵ má nɔ.

⁴⁷A̧máa i fȩȩn moo Múúsa ka bíńda yȩ vu̵ né tée, víń dəŋ née fȩȩ moo káń o̧ yȩ vu̵lá?”