Read Dii Yoohá̧na 6 Bible Online

Yoohá̧na 6 - Dii bible

Yoohá̧na 6

¹Pig woolı̵́ máa, Yesu daa lúú laa mam dən Gáliléelı̵́ (vu̵ bee mam yȩ “Tiberíaɨ” á̧ḿ).

²Dúú ɓu̵u̵lı̵́ na'a vu̵ dugu, moo vu̵ ho̧ hȩn sa̧ga̧ ka kɔ́, ka za̧a̧ kan nán ho̧o̧ vu̵ máa á̧ḿ.

³Yesu ɗáá dɔg gu̵u̵lı̵́, mbaa wu̵lı̵́ kan waa duulí woo vu̵.

⁴Mam vúnní páska nán Yúúda voo ká dɨ bə́'.

⁵Yesu luu dɔg nɔ́ɔ́ yúba ho̧ dúú vu̵ dɨ yaalı̵́ woolı̵́ du̵u̵n də́ń né, ma o̧d Filíb: “Báń nuŋ ví beréd téé, báń hɨ ví moo dúú yȩ u̵u̵ nuŋ hȩn lálı̵́lá?”

⁶(Yesu o̧ddu̵ moo yȩ moo bi gu̵ggu̵ ú̵, moo aga gaa hȩn a dɨ kɔ́lı̵́ máa ó̧.)

⁷Filíb hí̧i̧du̵: “Kóó beréd booro tȩmɛre idú moo kóó nɔ́nná a nuŋ waaná'ná' si̧', kan maan vu̵ né á̧ḿ.”

⁸Waa duulí Yesu woo tóó, yéé woo A̧ndɛrée, Simɔ́ŋ Piɛ́r daa sá̧ŋ́ŋɨ, o̧ddu̵:

⁹“Náásá̧ŋ́ waa tóó dɨ kan beréd yɛlı̵́ kígi nɔ́nɔ́, kan ze' waa idú. A̧máa hȩn ı̵́ yo̧go̧ yȩ wú̵ń dəŋ née maa dúú yȩ vu̵lá?”

¹⁰Ma Yesu o̧d vu̵: “I mbɔ́g vu̵ u̵u̵ mbaa la hágá.” Ya woo hó̧d ká ɓu̵u̵ wu̵lı̵́ ú̵. Ma vu̵ mbaa hágá. Wayée zaa ka vu̵n ya̧ fó̧ó̧ uzinɛɛre nɔ́nɔ́ ó̧.

¹¹Yesu ɓee beréd pee vu̵ dɔg nagá, dȩn Tayɨɨ nag, yȩ'ȩ nán ku̵u̵ mbaa hágá pee vu̵. Duu pú̵ vu̵ kan ze' pee á̧ḿ, vu̵ lá kɔ́ ı̵́ ku̵u̵ hí̧í̧ wɔgɔ.

¹²Ku̵u̵ ha̧' sú̵'ú̵ máa, Yesu o̧d waa duulí woo vu̵: “I su̵g kéélı̵́ woo yȩ vu̵ 'waapád, moo hȩn tóó a ti sá.”

¹³Dúú yȩ ku̵u̵ lá beréd kígi nɔ́nɔ́ pee vu̵ sú̵'ú̵ máa, waa duulí woo vu̵ su̵g kéélı̵́ woo hi̧' ɓaa wa̧nɓó' zu̵u̵ idú.

¹⁴Nán vu̵ ho̧ hȩn sa̧ga̧ Yesu ka kɔ́ yȩ, ma vu̵ o̧: “Moo yȩ́ńne, anábi ku̵u̵ o̧ ban yaa dɨlı̵́ pee, wu̵ yɛ nɔ.”

¹⁵Yesu ka gaa ba vú̵ń dɨ yaalı̵́ ma' laan bi gbanaaɨ máa, daa lúú dɔg gu̵u̵lı̵́, wu̵ dágá.

¹⁶Ya̧g mɛn ka kɔ́ máa, waa duulí Yesu woo vu̵ sí zu̵u̵ ya̧g mammé.

¹⁷Vu̵ ɗáá nɛ́ŋ́ŋı̵́, vu̵ dɨ laalı̵́ mam dən kaa Kapɛrnáhu̧mmé. Vid sa̧' sú̵'ú̵, a̧máa Yesu ya̧n ná voolı̵́ né.

¹⁸Ma sápéém gbo̧o̧ tóó pɛ, mam nam gbo̧o̧ ba'a á̧ḿ.

¹⁹Sey ku̵u̵ yú̵ú̵ nɛ́ŋ́ kílomɛ́ɛtər nɔ́nɔ́, tóó tée gúú máa, vu̵ ho̧ Yesu 'yȩm ya yúú mammé, dɨ yaalı̵́ dáŋ́ nɛ́ŋ́ŋı̵́. Dú̵ú̵ kɔ́ vu̵ sú̵'ú̵.

²⁰A̧máa Yesu o̧d vu̵: “Míw náa! I kɔ́ dú̵ú̵ sá.”

²¹Ku̵u̵ ki ná' máa, vu̵ fȩȩwo̧ dɔd dɔg nɛ́ŋ́ŋı̵́. Vaŋná vu̵ ya̧ ya̧g nɛ'ɛm hág ba vu̵n dɨ laalı̵́ wu̵lı̵́ peelı̵́.

²²Ya̧g ka̧'a̧mé dúú ı̵́ ku̵u̵ kéé ya peelı̵́ máa, vu̵ gaa nɛ́ŋ́ ká ba du̵u̵lı̵́ dágá 'nɛ́ŋ́, a̧máa Yesu ban dɔ́n wu̵lı̵́ kan waa duulí woo vu̵ á̧ḿ né, ba vu̵n laa vu̵ mɛ́ń.

²³A̧máa nɛ́ŋ́ tóó vu̵ lúú kaa Tiberíalı̵́, vu̵ ya̧ ya bə́' kan ya ı̵́ 'yɛ́lı̵́ Yesu ba bag hȩn yúú beréddı̵́, ma dúú ku̵u̵ lá yȩlȩ́.

²⁴Sey dúú ku̵u̵ ho̧n sı̵́ Yesu kan waa duulí woo vu̵ né á̧ḿ máa, vu̵ ɗáá nɛ́ŋ́ yȩ vu̵lı̵́, vu̵ laa kaa Kapɛrnáhu̧mmé, vu̵ soo Yesu.

²⁵Dúú ku̵u̵ nuŋ Yesu mam dən máa, vu̵ vigi: “Akaw, mɔ́ yaa yɛlı̵́ zag ndɛnná?”

²⁶Yesu hí̧i̧d vu̵, o̧: “Mí o̧d ví moo yȩ́ńne, ví soon moo kíí lá beréd ha̧' má nɔ, a̧máa ví soon mí moo hȩn kíí ki, kan hȩn sa̧ga̧ kíí ho̧ vu̵ má nɔ né.

²⁷I kɔ́ ba'ad moo hȩn lálı̵́ ı̵́ a dɨ 'wáané má nɔ sá, a̧máa i kɔ́ moo hȩn lálı̵́ ı̵́ a mbaa, a pú̵ vágád ı̵́ káákáá má nɔ. Ɨ́ míí, Tayɨɨ ka ba'an ya yɛ, míń pú̵ ví wu̵ yu̵, moo Ba'á Tayɨɨ kɔ́ hȩn a tú' ba binnɔ ba'an ya máa sú̵'ú̵.”

²⁸Ku̵u̵ ki máa, vu̵ duu vigi: “Oo kɔ́ ba'ad Tayɨɨ woo nɛ́nná?”

²⁹Yesu duu hí̧i̧d vu̵ o̧: “Ba'ad Tayɨɨ woo ka hí̧í̧ máa, wu̵ yɛ nɔ. I 'yɛ́ zó̧ó̧ míílí̧, ı̵́ míí Tayɨɨ ka ba'an ya yɛ nɔ.”

³⁰Ma vu̵ duu vigi: “Mɔ́ń kɔ́ hȩn sa̧ga̧ woo ȩn, oo ho̧ ma oo 'yɛ́ zó̧ó̧ móólȩ́lá? Mɔ́ń kɔ́ ba'ad gbo̧o̧ woo ȩná?

³¹A ba ví yée ká vu̵ lá mána hó̧g kȩŋŋı̵́ kɔ́ ı̵́ ká vu̵ bíńda debterelı̵́ máa wɔgɔ: ‘Ká pú̵ vu̵ hȩn lálı̵́ zu̵u̵ be"ı̵́, moo u̵u̵ lá ú̵.’ ”

³²Yesu duu hí̧i̧d vu̵: “Mí o̧d ví moo yȩ́ńne, Múúsa ká pú̵n ví hȩn lálı̵́ ı̵́ ka zu̵u̵n be"ı̵́ pi má nɔ né, a̧máa Ba' míí wu̵ pú̵ ví hȩn lálı̵́ ı̵́ də́ń kəd ka zu̵u̵ be"ı̵́ má nɔ,

³³moo hȩn lálı̵́ ı̵́ Tayɨɨ ka pú̵ máa, wu̵ nán ı̵́ ka zu̵u̵ be"ı̵́ pi má nɔ. Ɨ́ woo wu̵ pú̵ nánán vu̵ vágád káákáá.”

³⁴Ku̵u̵ ki máa, vu̵ vigi: “Ba'á, a̧m pú̵ vɔ́ hȩn lálı̵́ máa yȩ sey 'waapád!”

³⁵Ma Yesu duu hí̧i̧d vu̵: “Míi hȩn lálı̵́ ı̵́ ka pú̵ vágád káákáá má nɔ. Nán a yaa míílí̧ tée, wú̵ń mbaa kɔ́ ı̵́ go̧o̧m ka duu ya̧nnɔ né máa wɔgɔ. Nán a fȩȩ moo míí tée, wú̵ń mbaa kɔ́ ı̵́ mam ka duu 'wɔnnɔ né máa wɔgɔ á̧ḿ.

³⁶A̧máa ba mín o̧d ví sú̵'ú̵, ví ho̧n sú̵'ú̵ á̧ḿ, ma ví 'yɛ́n zó̧ó̧ míílí̧ ní.

³⁷Kóó nɔ́nná Ba'á ka pú̵n kannɔ máa, wú̵ń yaa míílí̧ ó̧. Nán ı̵́ a yaa míílí̧ máa, míń nɛŋŋɔ gbɔn gɔ́ŋ́ né;

³⁸moo mí sí zu̵u̵ be"ı̵́ pi moo bi kɔ́n hȩn hí̧í̧lí̧ míí nu né, a̧máa moo hȩn hí̧í̧lí̧ ı̵́ ka ba'an ya máa woo nɔ.

³⁹Hȩn hí̧í̧lí̧ ı̵́ ka ba'an máa woo, wu̵ yɛ nɔ, o̧ nán 'waapád ba kii pú̵n kan vu̵ yɛ, kóó dágá aga ba a ti wu̵lı̵́ sá, a̧máa ba a̧n nim vu̵ nɔmmé bá' sí̧'í̧dí.

⁴⁰Hȩn hí̧í̧lí̧ Ba'á woo wu̵ yɛ nɔ, kóó nɔ́nná a ho̧ Waa Tayɨɨ woo, a 'yɛ́ zó̧ó̧ woolı̵́ tée, séý míń nimmɔ nɔmmé bá' sí̧'í̧dí á̧ḿ, wú̵ń mbaa kan Tayɨɨ káákáá.”

⁴¹Nán Yúúda ku̵u̵ ki máa, vu̵ lágán moo yúú woolı̵́, moo ka o̧: “Míi hȩn lálı̵́ ı̵́ ka zu̵u̵ be"ı̵́ yȩ nɔ.”

⁴²Vu̵ o̧: “Yesu yȩ, waa Yu̵u̵séfu woo nɔ pɛ́láa? Ba gaan ví ba' woo kan na' woo á̧ḿ náa? Dəŋ née ka o̧ ba bin sí zu̵u̵ be"ı̵́lá?”

⁴³Ma Yesu ka moo o̧d vu̵: “I ŋguu moo ya víílí sá.

⁴⁴Nán tóó wú̵ń dɨ kan néélȩ́ yaan míílí̧ né, séý Ba'á ı̵́ ka ba'an ya yɛ, wú̵ńnɔ woowu̵ pa̧ŋ ya, tée míń nimmɔ nɔmmé bá' sí̧'í̧dí.

⁴⁵Debtere anábi voo o̧: ‘Ya voo 'waapád, Tayɨɨ wú̵ńnɔ tú'ud vu̵ hȩn.’ Kóó nɔ́nná ka ki moo Ba'á woo, ka fȩȩ moo tú"í woo máa, wú̵ń yaa míílí̧ ó̧.

⁴⁶Nán tóó ho̧n Ba'á Tayɨɨ né, séý nán ı̵́ ka vúd ya Tayɨɨ woolı̵́ máa, wu̵ ho̧go̧.

⁴⁷“Mí o̧d ví moo yȩ́ńne, nán a 'yɛ́ zó̧ó̧ míílí̧ tée, nuŋ sı̵́ vágád Tayɨɨ woolı̵́ ú̵.

⁴⁸Míi hȩn lálı̵́ ı̵́ ka pú̵ vágád káákáá má nɔ.

⁴⁹Kóó a ví yée ká u̵u̵ lá mána hó̧g kȩŋŋı̵́ si̧', vu̵ nɔɔ á̧ḿ.

⁵⁰Hȩn lálı̵́ ı̵́ ka zu̵u̵ be"ı̵́ máa, wu̵ yɛ nɔ, nán a lá tée, wú̵ń nuŋ vágád káákáá ú̵.

⁵¹Aga míi hȩn lálı̵́ vágád ı̵́ ka zu̵u̵ be"ı̵́ má nɔ. Nán a lá tée, wú̵ń nuŋ vágád káákáá. Hȩn lálı̵́ woo, wu̵ fó̧ó̧ míí káń dɨ pú̵lı̵́ moo nánán u̵u̵ nuŋ vágád káákáá wu̵lı̵́ má nɔ.”

⁵²Nán Yúúda ku̵u̵ ki moo yȩ máa, vu̵ fan moo yúú moo woo yȩlȩ́, vu̵ o̧: “Dəŋ née wú̵ń pú̵ ba ví fó̧ó̧ yo̧go̧ woo, báń lá vílá?”

⁵³Ma Yesu hí̧i̧d vu̵: “Mí o̧d ví moo yȩ́ńne, i lán fó̧ó̧ yo̧go̧ míí, ı̵́ míí Tayɨɨ ka ba'an ya yɛ né, i zɔn mɛm míí ní tée, víń nugun vágád Tayɨɨ woolı̵́ né.

⁵⁴Nán a lá fó̧ó̧ míí, a zɔ mɛm míí á̧ḿ tée, nuŋ sı̵́ vágád Tayɨɨ woolı̵́ ú̵. Míń nimmɔ nɔmmé bá' sí̧'í̧dí á̧ḿ,

⁵⁵moo fó̧ó̧ míí wu̵ hȩn lálı̵́ də́ń kəd. Mɛm míí wu̵ hȩn zɔlı̵́ də́ń kəd á̧ḿ.

⁵⁶Nán a lá fó̧ó̧ míí, a zɔ mɛm míí tée, wú̵ń má'án kan mí fó̧ó̧ dágá; míń má'án kannɔ fó̧ó̧ dágá á̧ḿ.

⁵⁷Ba'á ka pú̵ vágád máa, wu̵ ba'an ya, ma mí nuŋ vágád moo woo. Nán a lán tée, wú̵ń nuŋ vágád moo míí á̧ḿ.

⁵⁸Hȩn lálı̵́ ka zu̵u̵ be"ı̵́ máa, wu̵ yɛ nɔ. Kɔ́n ı̵́ a ví yée kú̵u̵ lá si̧', kú̵u̵ nɔɔn máa wɔgɔ né. A̧máa nán a lá hȩn lálı̵́ ı̵́ yɛ tée, wú̵ń nuŋ vágád ı̵́ káákáá ú̵.”

⁵⁹Sey Yesu ka moo moo yɛ máa, ká dɨ hȩn tú"í lig sú̵ggı̵́ nán Yúúda voolı̵́, kaa Kapɛrnáhu̧mmé.

⁶⁰Nán ɓu̵u̵lı̵́ na'a sa̧a̧m waa duulí Yesu woo voolı̵́, ku̵u̵ ki moo yȩ máa, vu̵ o̧: “Moo máa yȩ təə ú̵ náa! Nóo wú̵ń duulá?”

⁶¹Yesu gaa zó̧ó̧ woolı̵́ waa duulí bii ba vu̵n dɨ moo ŋguuní yúú moo yȩlȩ́, ma o̧d vu̵: “Moo yȩ sa ví zó̧ó̧a̧a̧?

⁶²A̧máa i ho̧ ı̵́ míí Tayɨɨ ka ba'an ya yɛ, a̧n ɗáá dɔg ya mbaalı̵́ míí ká tíŋ́ peelı̵́ tée, víń o̧ nɛ́nná?

⁶³Yigid Tayɨɨ woo wú̵ńnɔ pú̵ nánán vu̵ vágád; nánán vu̵ kan fó̧ó̧ voo máa, vú̵ń kɔ́n hȩn tóó né. Moo káń o̧d ví yɛ vu̵, vu̵u̵ yigid Tayɨɨ woo, kan vágád káákáá á̧ḿ.

⁶⁴A̧máa nán tóó vu̵ víílí sa̧a̧mé, vu̵ 'yɛ́n zó̧ó̧ míílí̧ né.” (Yesu moo moo yȩ ná', moo ká gaa dəné woolı̵́ nóo ká ba vú̵ń fȩȩn moo bii nílá máa ó̧; ká gaa á̧ḿ nóo ba ka dɨ bi dɔnné nag nánán voolı̵́lá máa ó̧ á̧ḿ,)

⁶⁵ma duu o̧: “Moo woo nɔ mí o̧d ví Ba'á a wu̵ pú̵n nán tóó néélȩ́ né tée, wú̵ń nugun néélȩ́ yaan míílí̧ ní.”

⁶⁶Ma waa duulí woo tóó vu̵ ɓu̵u̵lı̵́ na'a vu̵ dəŋ zu̵u̵ lúuní ya̧g woolı̵́, vu̵ duunɔ sı̵́ né.

⁶⁷Moo woo nɔ Yesu vi waa duulí woo ı̵́ wa̧nɓó' zu̵u̵ idú yȩ vu̵: “Ví hí̧í̧ bi fíí la á̧ḿmaa?”

⁶⁸Simɔ́ŋ Piɛ́r hí̧i̧du̵: “Ɨ́ 'yɛ́lı̵́ vóó, vɔ́ń laa nóo woolı̵́lá? Mɔ́ dɨ kan moo ı̵́ ku̵u̵ pú̵ nánán vu̵ vágád káákáá má nɔ.

⁶⁹Vɔ́ gaa vóó mɔ́ nán gbo̧o̧ Tayɨɨ ka ba' ya má nɔ; vɔ́ 'yɛ́ zó̧ó̧ móólȩ́ sú̵'ú̵ á̧ḿ.”

⁷⁰Ma Yesu o̧d vu̵: “Aga míi yeen ví ya víí wa̧nɓó' zu̵u̵ idú á̧ḿ náa? A̧máa nán dágá víílí sa̧a̧mé, yigid ɓı̵́d tóó nɔ.”

⁷¹Yesu moo moo yȩ yúú Yúúdas, waa Iskarió Simɔ́ŋ woolı̵́. Kóó Yúúdas ka mbaa sa̧a̧m ı̵́ wa̧nɓó' zu̵u̵ idú voolı̵́ yȩ nɔ si̧', duu dɔd Yesu nag nánán voolı̵́.