Read Dii Yoohá̧na 7 Bible Online

Yoohá̧na 7 - Dii bible

Yoohá̧na 7

¹Pig woolı̵́ máa, Yesu 'yȩm kə̧́ə̧́ daa hág Gáliléelı̵́, sɛ́n səəlı̵́ hág Yúúdalı̵́ né, moo nán Yúúda vu̵ hí̧í̧ bi nɔɔwo̧ ó̧.

²Mam vúnní nán Yúúda voo dɨ bə́', mam vúnní “ı̵́ waa kəmnée,”

³ma Yesu daa sá̧ŋ́ vu̵ o̧ddu̵: “A̧m lúú yɛlı̵́, mɔ́ dɔg hág Yúúdalı̵́, moo waa duulí móó u̵u̵ ho̧ ba'ad móó káḿ kɔ́ má nɔ.

⁴Nán tóó ka kɔ́ hȩn moo yɛ́g bii a kiyyú tée, kɔ́n ya yú̵ggı̵́lı̵́ né. Káḿ dɨ hȩn yȩ vu̵ kɔ́lı̵́ tée, a̧m kɔ́ vu̵ la ya zo"ı̵́.”

⁵(Daa sá̧ŋ́ ká vu̵ 'yɛ́n zó̧ó̧ woolı̵́ né á̧ḿ.)

⁶Ma Yesu hí̧i̧d vu̵: “Sey míí ya̧n ná né, a̧máa ı̵́ víí máa, hȩn tóó há'an ví ní.

⁷Nánán vu̵ mán ví víí ní. Ɨ́ míí, vu̵ máń mí míí ú̧, moo mí o̧d vu̵ la ha̧d ba'ad voo yȩ ba ba'ad ɓı̵́ddɨ.

⁸Ɨ́ víí, i dɔg víí mam vúnní yȩ la ú̵. Mí dɔgɔn míí ní, moo sey míí ya̧n ná né.”

⁹Pig ka o̧d vu̵ moo yȩ máa, Yesu tii mbaa daa woo hág Gáliléelı̵́.

¹⁰Sey Yesu daa sá̧ŋ́ ku̵u̵ ɗáá dɔg mam vúnní peelı̵́ máa, Yesu dɔg á̧ḿ, a̧máa vún la nɔ́ɔ́ na'alȩ́ né, yú̵g ma dɔg.

¹¹Nán Yúúda ku̵u̵ soowu̵ ya mam vúnnílí̧ máa, vu̵ vi: “Dɨ tɛ́lá? Dɨ tɛ́lá?”

¹²Dúú vu̵ lágán moo yúú woolı̵́ ɓu̵u̵lı̵́ na'a. Nán tóó vu̵ o̧: “Nán to̧o̧ȩ náa?” Tóó vu̵ o̧ voo: “Pɛ́lı̵́, a̧máa baa zo' nán vu̵ leená té'.”

¹³A̧máa nán tóó moona moo woo ha̧d né, moo vu̵ ndɔg nán Yúúda tóó vu̵ yu̵.

¹⁴Mam vúnní pee ka ya̧ sa̧a̧m máa, Yesu daa laa lig hȩn ha"ı̵́lı̵́, dəŋ hȩn tú"í wu̵lı̵́.

¹⁵Kɔ́ la nán Yúúda vu̵ ɓá', vu̵ o̧: “Dəŋ née nán yȩ ka kúgun hȩn né, ka gaa hȩn na'a yȩlá?”

¹⁶Yesu ka ki máa, hí̧i̧d vu̵: “Hȩn tú"í míí yɛ, ı̵́ míí nu pɛ́lı̵́, a̧máa ı̵́ ka ba'an ya máa woo nɔ.

¹⁷Nán a bi kɔ́ hȩn hí̧í̧lí̧ Tayɨɨ woo nɔ tée, aga wú̵ń gaa hȩn tú"í míí yɛ ba vúd ya dɨ Tayɨɨ woolı̵́, a̧máa ba moo tú"í dáń míí nu pɛ́lı̵́.

¹⁸Nán a moo moo dáń woo tée, soo na"ȩ́ dáń woo nɔ. A̧máa nán ı̵́ ka sood nán ka ba"u̵ ya máa na"ȩ́ȩ tée, wu̵ nán yȩ́ń; kɔ́n hȩn kə̧ə̧g zó̧ó̧ woolı̵́ né.

¹⁹Múúsa ká wu̵ pú̵n ví moo Tayɨɨ woo náa? A̧máa kóó nán dágá aga víílí sa̧a̧mé, duun moo Tayɨɨ woo né. Moo ȩn ví soo bi nɔɔnɔ́lá?”

²⁰Ma dúú vu̵ o̧ddu̵: “Yigid ɓı̵́d tóó kɔ́mmɔ́. Nóo soom bi nɔɔmɔ́lá?”

²¹Yesu duu hí̧i̧d vu̵: “Ká mí kɔ́ ba'ad tóó dágá 'nɛ́ŋ́, ma ya víí 'waapád, ví mbaa yəbəə.

²²Múúsa ká tú'ud ví do̧ŋ dɔ́lı̵́ sú̵'ú̵ (a̧máa do̧ŋ dɔ́lı̵́ yȩ ká dəgən Múúsa woolı̵́ né; ká dəŋ ya a ba ví yée voolı̵́). Ma ví dɔd waa víí vu̵ do̧ŋ kóó zá̧ga̧ asawəlı̵́ á̧ḿ.

²³Nán a dɔ́ do̧ŋ zá̧ga̧ asawəlı̵́ moo dooká Múúsa woo[5] a lı̵́d sá tée, káń za̧a̧ nán fó̧ó̧ woo 'waapád zá̧ga̧ asawəlı̵́ máa, moo ȩn ví kɔ́n zó̧ó̧ yȩ́ȩ́lá?

²⁴I sə̧' moo, moo nɔ́ɔ́ nánánne sá; a̧máa kíí sə̧' moo tée, i sə̧' moo yagalı̵́ tə́g.”

²⁵Nán kaa Yerúsalem tóó ku̵u̵ ki máa, vu̵ o̧: “Yesu vu̵n soo bi nɔɔwo̧ ó̧ pee, ka wo yɛ.

²⁶Ka dii woo moo moolȩ́ nɔ́ɔ́ na'alȩ́ yȩ, ma nán tóó ka o̧nnɔ moo né máalá̧! Tóó tée ı̵́ nii vu̵ gaa ba wu̵ ı̵́ nán sənnáa?

²⁷Ba gaa ví nán yȩ, ya ha̧a̧lȩ́ woo ú̵ náa? A̧máa ı̵́ nán sənné yȩ a yaa tée, vu̵ o̧ nán tóó ba wú̵ń gaan ya yaalı̵́ woo né.”

²⁸Sey woolı̵́ Yesu tú' moo na'am gbo̧o̧ lig hȩn ha"ı̵́lı̵́. O̧ dɔg moo yúba: “Ví gaanɔ́, ví gaa ya káń yaa á̧ḿ. A̧máa mí yaan kan yɛ́g dáń míí ní. Ɨ́ ka ba'an ya máa, moo moo yȩ́ń sú̵'ú̵. Ma ví gaanɔ víí ní.

²⁹Ɨ́ míí, mí gaawu̵ ú̵, moo mí yaa woolı̵́, aga wu̵ ba'an ya.”

³⁰Nán tóó ku̵u̵ ki moo yȩ máa, vu̵ soo hi̧naa moo bi ma"o̧ ó̧, a̧máa nán tóó yo̧o̧ nag za'anɔ né, moo sey woo ya̧n ná né.

³¹A̧máa nán ɓu̵u̵lı̵́ na'a sa̧a̧m dúú yȩ voolı̵́ vu̵ 'yɛ́ zó̧ó̧ woolı̵́, vu̵ o̧: “Sey ı̵́ nán sənné a yaa tée, wú̵ń kɔ́ hȩn sa̧ga̧ tóó mba ı̵́ yɛ áa?”

³²Nán farísa vu̵ ki dúú zo' vu̵ dɨ moo lágané ı̵́ yo̧go̧ yúú Yesu woolı̵́. Ma gbanaa hȩn ha"ı̵́ vu̵ kan nán farísa vu̵, vu̵ ba' só̧ó̧ze ı̵́ lig hȩn ha"ı̵́ vu̵, moo u̵u̵ la ma' Yesu wu̵.

³³Ma Yesu o̧: “Míń dɨ lá mbaalı̵́ kan ví waaná' pȩ́ń, tée míń vȩ́' la ı̵́ ka ba'an ya yɛ woolı̵́.

³⁴Víń soonɔ́, a̧máa víń nugun mí ní, moo víń ya̧ ya mbaalı̵́ míí mban né á̧ḿ.”

³⁵Nán Yúúda ku̵u̵ ki máa, vu̵ víń ya voolı̵́: “Wú̵ń laa téé báń nugunɔ ví nílá? Wú̵ń laa nán Yúúda ı̵́ ku̵u̵ hɨ'ɨ la yúkaa máa vooláa? Tóó tée wú̵ń la tú'ud nán Gɛrɛ́g vu̵ yu̵ hȩnnaa?

³⁶Moo woo ka o̧: ‘Víń soonɔ́, a̧máa víń nugun mí ní, moo víń ya̧ ya mbaalı̵́ míí mban né á̧ḿ’ yȩ, tú' ȩná?”

³⁷Bá' sí̧'í̧d mam vúnní woo máa, zá̧ga̧ gbo̧o̧ȩ, ma Yesu pa moo yúba, o̧: “Mam ka 'wɔd nán tóó tée, a yaa míílí̧, a zɔ ú̵!

³⁸‘Nán a 'yɛ́ zó̧ó̧ míílí̧ tée, ziŋ gbo̧o̧ tóó, nán u̵u̵ nuŋ vágád kannɔ máa, wú̵ń ga vúd zó̧ó̧ woolı̵́,’ kɔ́ ı̵́ debtere ka o̧ wɔgɔ.”

³⁹(Yesu moo moo yȩ yúú yigid Tayɨɨ woolı̵́; nán u̵u̵ 'yɛ́ zó̧ó̧ Yesu woolı̵́ tée, vú̵ń nuŋŋɔ. A̧máa sey yȩlȩ́ yigid Tayɨɨ woo ká yaa ná né, moo Yesu ká nugu ná na"ȩ́ Tayɨɨ woolı̵́ né á̧ḿ.)

⁴⁰Nán tóó vu̵ dúú voolı̵́ sa̧a̧mé, ku̵u̵ ki moo yȩ máa, vu̵ o̧: “Moo yȩ́ńne, nán yȩ anábi pee nɔ gínú.”

⁴¹Nán tóó vu̵ o̧ voo: “Ɨ́ nán sənné wu̵.” Tóó vu̵ o̧: “A̧máa ı̵́ nán sənné sú̵u̵ wú̵ń yaa hág Gáliléeláa?

⁴²Debtere o̧ ban yaan zig Daavíd woolı̵́, kaa Daavíd ka mbaan wu̵lı̵́ Bɛ́tɛlɛhɛmme náa?”

⁴³Nán vu̵ hɨ'ɨn ya̧g moo woolı̵́.

⁴⁴Nán tóó vu̵ hí̧í̧ bi ma"o̧ ó̧, a̧máa nán tóó yo̧o̧ nag za'anɔ né á̧ḿ.

⁴⁵Só̧ó̧ze ı̵́ lig hȩn ha"ı̵́ ku̵u̵ vȩ́' laa gbanaa hȩn ha"ı̵́ voolı̵́, kan nán farísa vu̵ máa, nán farísa vu̵ vi vu̵: “Moo ȩn ví pa̧ga̧n Yesu ya nélá?”

⁴⁶Ma só̧ó̧ze pee vu̵ hí̧í̧: “Nán tóó moon moo ı̵́ yo̧go̧ tíŋ́ né sá̧ḿ!”

⁴⁷Nán farísa ku̵u̵ ki máa, vu̵ o̧d vu̵: “Ví á̧ḿ, ví bá̧a̧ hi̧naa sá'áa?

⁴⁸Nán tóó sa̧a̧m ı̵́ nii Yúúda voolı̵́, kan nán farísa tóó vu̵ fȩȩ moo woo sá'áa?

⁴⁹A̧máa dúú ı̵́ yȩ ku̵u̵ gaan voo moo Tayɨɨ woo né máa, Tayɨɨ fáá vu̵ sı̵́ voo ú̵.”

⁵⁰Nán dágá voolı̵́ sa̧a̧mé, yéé woo Níkodém; ká wu̵ laa Yesu woolı̵́ tíŋ́ má nɔ. Ma Níkodém o̧d vu̵:

⁵¹“Tow aa kin ví ya̧g nánán tóó woo né, aa gaan ví hȩn ka kɔ́n né pȩn, tée dooká baa ví o̧ aa sə̧' ví moo yúú woolı̵́ há̧ná á̧a̧?”

⁵²Ma vu̵ hí̧i̧du̵: “Mɔ́ nán Gáliléelı̵́ á̧ḿma? A̧m soo ho̧ lá mɔ́ debterelı̵́. Mɔ́ń ho̧ anábi tóó yaan hág Gáliléelı̵́ né.” [

⁵³Vaŋná vu̵ daa lúú ka la, kóó nɔ́nná laa kíi woolı̵́.