Read Dii Yoohá̧na 8 Bible Online

Yoohá̧na 8 - Dii bible

Yoohá̧na 8

²Ya̧g ka̧'a̧m hí̧m máa, duu laa lig hȩn ha"ı̵́lı̵́. Nán 'waapád vu̵ sú̵g ya woolı̵́, ma Yesu mbaa hágá, dən vu̵ moo tú"í.

³Ma nán moo Tayɨɨ tú"í vu̵, kan nán farísa vu̵, vu̵ pa̧ŋ wakȩ́ȩ́ tóó ku̵u̵ ma"o̧ ya ɓáalı̵́ máa, vu̵ 'yɛ́gɛ dúú voolı̵́ sa̧a̧mé.

⁴Vu̵ vi Yesu: “Akaw, vɔ́ nuŋ wakȩ́ȩ́ yɛ ya ɓáa kɔ́lı̵́lı̵́.

⁵Dooká Múúsa woo o̧ wakȩ́ȩ́ ı̵́ yo̧go̧ máa, ba oo gbóo vu̵ kan 'yɛgɛ nɔɔ ó̧. Ɨ́ móó máa, mɔ́ o̧ móó nɛ́nná?”

⁶Vu̵ vi moo yȩ moo bi ki moo tóó woolı̵́ ya̧gá̧, tée bi doowu̵ wu̵lı̵́. A̧máa Yesu sum zu̵u̵ nɔ́ɔ́ woo hágá, dəŋ hȩn dȩȩné hágá kan nag vbaŋ waa.

⁷Vu̵ baa sȩgȩ moo yȩ vilí, ma Yesu luu dɔg nɔ́ɔ́ woo yúba, hí̧i̧d vu̵: “Nán ı̵́ ka kɔ́n ná hȩn ɓı̵́d tóó né máa, a wu̵ dəŋ gbɔgɔ.”

⁸Ma duu sum zu̵u̵ nɔ́ɔ́ woo hágá, baa dȩȩ hȩn hágá.

⁹Ku̵u̵ ki moo yȩ máa, vu̵ baa lúu dágá dágá, ı̵́ nii voo vu̵u̵ dəŋ lúú, há̧á̧ ya̧ sí̧'í̧d woo; kéé sı̵́ Yesu wu̵ dágá, kan wakȩ́ȩ́ vu̵n 'yɛ́gɛ sa̧a̧mé pee.

¹⁰Ma Yesu duu luu dɔg nɔ́ɔ́ woo yúba, vigi: “Dan kȩ́ȩ́, nán pee vu̵ dɨ voo téé? Nán tóó sə̧'ə̧n moo yúú móólȩ́ náa?”

¹¹Wakȩ́ȩ́ pee hí̧i̧du̵: “Pɛ́lı̵́, ba' míí.” Ma Yesu o̧ddu̵: “Míń sə̧'ə̧n moo yúú móólȩ́ né á̧ḿ. A̧m laa la ú̵, a̧máa a̧m duu kɔ́ hȩn ɓı̵́d tóó sá.”]

¹²Yesu duu ka moo o̧d dúú vu̵: “Míi ı̵́ ka pú̵ nánán vu̵ túlí. Nán ı̵́ a duun tée, wú̵ń mbaan ya dimmí né sá̧ḿ, a̧máa wú̵ń nuŋ túlí ı̵́ a pú̵gu̵ vágád ı̵́ káákáá má nɔ.”

¹³Nán farísa ku̵u̵ ki máa, vu̵ o̧ddu̵: “Mɔ́ du̵ ya̧g yúú fó̧ó̧ móóláa? Tée ya̧g du̵lı̵́ móó yɛ maa né.”

¹⁴Yesu hí̧i̧d vu̵: “Kóó a̧n du̵ ya̧g yúú míílí̧ ó̧ si̧', moo míí moo yȩ́ńne, moo mí gaa ya káń yaa wu̵lı̵́ máa ó̧, kan ya a̧n dɨ laalı̵́ wu̵lı̵́ máa á̧ḿ. A̧máa ı̵́ víí, ví gaan ya káń yaa né, kan ya a̧n dɨ laalı̵́ wu̵lı̵́ né á̧ḿ.

¹⁵Ɨ́ víí, ví sə̧' víí moo kɔ́ ı̵́ nánán ku̵u̵ sə̧' moo máa wɔgɔ, a̧máa ı̵́ míí mí sə̧'ə̧n moo yúú nánán tóó woolı̵́ né.

¹⁶A̧n sə̧' moo ó̧ tée, moo sə̧"ȩ́ míí yagalı̵́, moo mí dágá mɛ́ń pɛ́lı̵́, a̧máa Ba'á ka ba'an ya yɛ dɨ kan míw.

¹⁷Vu̵ bíńda debtere víílí: ‘Nán idú ku̵u̵ du̵ ya̧g tée, moo voo maa fȩȩlȩ́ sú̵'ú̵.’

¹⁸Mí du̵ ya̧g yúú míílí̧, ma Ba'á ka ba'an ya yɛ du̵ ya̧g yúú míílí̧ á̧ḿ.”

¹⁹Ma vu̵ vigi: “Ba' móó sú̵u̵ dɨ tɛ́lá?” Yesu hí̧i̧d vu̵ o̧: “Ví gaan mí ní. Ví gaan Ba' míí ní á̧ḿ. Ka víń gaanɔ́ tée, ka víń gaa Ba' míí á̧ḿ.”

²⁰Yesu ká moo moo yȩ dáŋ́ akɔti hȩn ha"ı̵́lı̵́, sey ka dɨ moo tú"í lig hȩn ha"ı̵́lı̵́ máalȩ́. A̧máa nán tóó ma'anɔ né, moo sey woo ya̧n ná né.

²¹Yesu duu o̧d nán Yúúda vu̵: “Míń dɨ lúúlíi; víń soon, víń nɔɔ kan hȩn ɓı̵́d víí; ya a̧n dɨ laalı̵́ wu̵lı̵́ yȩ, víń dɨ kan néélȩ́ ya̧n ya woo né á̧ḿ.”

²²Ma nán Yúúda ku̵u̵ ki máa, vu̵ o̧: “Wú̵ń nɔɔ fó̧ó̧ woo naa? Moo ka o̧: ‘Ya a̧n dɨ laalı̵́ wu̵lı̵́ yȩ, víń dɨ kan néélȩ́ ya̧n ya woo né’ yȩ nɔ.”

²³Yesu duu o̧d vu̵: “Ví mbaad víí hággɨ, a̧máa ı̵́ míí mí yaa diga be"ı̵́. Ɨ́ víí, ví nán hágá yɛ vu̵ yu̵, ı̵́ míí, mí nán hágá yɛ nɔ pɛ́lı̵́.

²⁴Moo woo nɔ ba mín o̧d ví ba víń nɔɔ kan hȩn ɓı̵́d víí ú má nɔ. Mí, ‘Aga míw.’[6] I fȩȩn moo yɛ né tée, víń nɔɔ kan hȩn ɓı̵́d víí vu̵ yu̵.”

²⁵Ma vu̵ vigi: “Yee mɔ́ nɔ́nná?” Yesu hí̧i̧d vu̵: “Hȩn káń o̧d ví diga dəné woolı̵́.

²⁶Mí dɨ kan moo ɓu̵u̵lı̵́ na'a a̧n o̧d ví, a̧n sə̧' yúú víílí á̧ḿ. A̧máa ı̵́ ka ba'an ya yɛ wu̵ dɨ kan moo yȩ́ń. Ma mí o̧d ví də́ń moo káń ki woolı̵́ má nɔ.”

²⁷Yesu o̧d vu̵ moo yȩ yúú Ba'á Tayɨɨ woolı̵́, a̧máa vu̵ kin ní.

²⁸Moo woo nɔ ma, Yesu duu o̧d vu̵: “Ɨ́ míí Tayɨɨ ka ba'an ya yɛ, sey i ɓɛ dɔgɔn mí yúba tée, víń gaa sı̵́ ba min ‘Aga míw,’ ba míń kɔ́n hȩn tóó kan fó̧ó̧ míí ní. Mí moo séý moo Ba'á ka tú'un má nɔ.

²⁹Ɨ́ ka ba'an ya yɛ dɨ kan míw, gbɔn mí sɛ́ɛg né, moo mí baa kɔ́ hȩn ka to̧o̧du̵ máa sey 'waapád.”

³⁰Yesu ka moo moo yȩ máa, nán ɓu̵u̵lı̵́ na'a vu̵ 'yɛ́ zó̧ó̧ woolı̵́.

³¹Yesu o̧d nán Yúúda ı̵́ ku̵u̵ 'yɛ́ zó̧ó̧ woolı̵́ máa vu̵: “I duu moo míí tée, ví waa duulí míí vu̵ yu̵ gínú.

³²Tée víń gaa moo yȩ́ń; tée moo yȩ́ń wú̵ń buu ví zaŋ gba'alı̵́.”

³³Vu̵ hí̧i̧du̵: “Vɔ́ vóó zig Ibrahí̧í̧ma woo vu̵ yu̵, ká vɔ́ mbaan gba'a nán tóó woo né sá̧ḿ, kóó sey woo tɛ́lá! Moo ȩn káḿ o̧: ‘Víń vúd zaŋ gba'alı̵́’ lá?”

³⁴Yesu ka ki máa, o̧d vu̵: “Mí o̧d ví moo yȩ́ńne, kóó nɔ́nná ka baa kɔ́ hȩn ɓı̵́d tée, gba'a hȩn ɓı̵́d woo nɔ.

³⁵Gba'a mbaan woo kíilí káákáá né, a̧máa waa lig mbaa woo ú̵.

³⁶Tow Waa Tayɨɨ woo a vud ví nag gba'alı̵́ tée, víń mbaa kan yúú víí dáńná.

³⁷Mí gaa ví zig Ibrahí̧í̧ma woo vu̵ yu̵, a̧máa ví soo kɛb bi nɔɔnɔ́, moo moo míí dɔ́n zó̧ó̧ víílí ní.

³⁸Hȩn káń ho̧ Ba' míí woolı̵́ máa, mí o̧ wu̵ yu̵. Ví á̧ḿ, hȩn kíí ki ba' víí woolı̵́ máa, ví kɔ́ duu wu̵ yu̵.”

³⁹Nán Yúúda pee vu̵ hí̧i̧d Yesu: “Ba' vóó wu̵ Ibrahí̧í̧ma wu̵.” Ma Yesu duu o̧d vu̵: “Ka víń waa Ibrahí̧í̧ma woo vu̵ yu̵ gínú tée, ka víń kɔ́ ba'ad kɔ́ ı̵́ Ibrahí̧í̧ma ká kɔ́ máa wɔgɔ á̧ḿ.

⁴⁰A̧máa 'ya̧'a̧ yɛ, kóó káń o̧d ví moo yȩ́ń káń ki Tayɨɨ woolı̵́ yȩ si̧', ví soo kɛb bi nɔɔnɔ́. Ibrahí̧í̧ma ká kɔ́n ı̵́ yo̧go̧ né.

⁴¹Ɨ́ víí, ví kɔ́ ba'ad duu ba' víí nu.” Vu̵ duu hí̧i̧du̵: “Vɔ́ waa ɓáa pɛ́lı̵́; vɔ́ dɨ kan Ba'á dágá, wu̵ Tayɨɨɨ.”

⁴²Yesu ka ki máa, duu o̧d vu̵: “Tayɨɨ kan Ba' víí nu gínú tée, ka víń hí̧i̧nɔ́, moo mí vúd Tayɨɨ woolı̵́, mí yaa woolı̵́. Aga mí yaan kan fó̧ó̧ míí ní, wu̵ ba'an ya.

⁴³Moo ȩn ví kin moo míí vu̵ nélá? Moo ví kan néélȩ́ moo míí kilí pɛ́lı̵́.

⁴⁴Ba' víí kíí vúd woolı̵́ yȩ Seeɗánne, ví hí̧í̧ bi kɔ́ hȩn hí̧í̧lí̧ ba' víí woo nɔ. Dəŋ ya dəné woolı̵́ pi nu, wu̵ nán nɔm nɔɔné. Wú̵ń mbaan woo kan moo yȩ́ń né, moo moo yȩ́ń woolı̵́ pɛ́lı̵́. Sey ka dɨ moo dáń woo moolȩ́ tée, moo də́ń moo vbáddɨ kəd, moo nán vbáddɨ, ba' ı̵́ nán vbád voo nɔ á̧ḿ.

⁴⁵Ɨ́ míí, káń o̧d ví moo yȩ́ń máa, ví fȩȩ né.

⁴⁶Nóo víílí sa̧a̧mé wú̵ń tú'un hȩn ɓı̵́d míí káń kɔ́ máalá̧? Káń o̧d ví moo yȩ́ń máa, moo ȩn ví fȩȩ nélá?

⁴⁷Nán Tayɨɨ woo baa ki woo moo Tayɨɨ woo ú̵, a̧máa ı̵́ víí, ví kin ní, moo ví nán Tayɨɨ woo nɔ pɛ́lı̵́.”

⁴⁸Nán Yúúda vu̵ hí̧i̧d Yesu ya̧g, vu̵ o̧: “Náá vɔ́ o̧ moo yȩ́ń sú̵'ú̵ ná! Mɔ́ nán Samaríii; yigid ɓı̵́d kɔ́m á̧ḿ!”

⁴⁹Ma Yesu hí̧i̧d vu̵: “Yigid ɓı̵́d kɔ́n mí míí ní, a̧máa mí na' Ba' míí nu; a̧máa ví vun fó̧ó̧ kan du̵g.

⁵⁰Mí soon míí na"ȩ́ dáń míí nu né. Ɨ́ ka hí̧í̧ na"ȩ́ míí máa dɨlı̵́, wu̵ sə̧' moo woo á̧ḿ.

⁵¹Mí o̧d ví moo yȩ́ńne, nán tóó a duu moo míí tée, wú̵ń nɔɔ né sá̧ḿ.”

⁵²Nán Yúúda ku̵u̵ ki moo yȩ máa, vu̵ o̧ddu̵: “'Ya̧'a̧ yɛ máa, vɔ́ gaa sú̵'ú̵, yigid ɓı̵́d kɔ́mmɔ́. Ibrahí̧í̧ma vu̵ kan anábi vu̵, vu̵ nɔɔ sú̵'ú̵, a̧máa mɔ́ o̧ móó: ‘Nán tóó a duu moo míí tée, wú̵ń nɔɔ né sá̧ḿma?’

⁵³Ba' vóó Ibrahí̧í̧ma nɔɔ sú̵'ú̵; mɔ́ na' mbaga áa? Anábi vu̵ nɔɔ sú̵'ú̵ á̧ḿ. Mɔ́ taa móó ba bin nɔ́nná?”

⁵⁴Yesu hí̧í̧: “A̧n na' yúú míí nu tée, hȩn leene. Ba' míí wú̵ńnɔ na'an, ı̵́ víí kíí dɨ o̧lȩ́ ba wu̵ Tayɨɨ bii máa á̧ḿ,

⁵⁵a̧máa ví gaanɔ né. Mí gaawu̵ míí ú̧. A̧n o̧: ‘Mí gaanɔ né’ tée, míń mbaa nán vbád kɔ́ ı̵́ ví wɔgɔ á̧ḿ. A̧máa mí gaawu̵ ú̵, mí duu moo woo á̧ḿ.

⁵⁶A ví yée Ibrahí̧í̧ma ká dȩ' zó̧ó̧ ba bíń ho̧ zá̧ga̧ míí yɛ ú̵. Ka ho̧ máa, zó̧ó̧ woo dȩ'.”

⁵⁷Nán Yúúda ku̵u̵ ki máa, vu̵ o̧ddu̵: “Ve' móó ya̧n ná vo' nɔ́nɔ́ né á̧ḿ, ma mɔ́ o̧ ba bin ho̧ Ibrahí̧í̧ma á̧a̧!”

⁵⁸Ma Yesu duu hí̧i̧d vu̵: “Mí o̧d ví moo yȩ́ńne, sey ku̵u̵ ha̧a̧ ná Ibrahí̧í̧ma né á̧ḿ, ‘Aga míw’ dɨlı̵́.”

⁵⁹Nán ku̵u̵ ki ná' máa, vu̵ fá̧á̧ 'yɛgɛ moo bi gbóowu̵ wu̵lı̵́, a̧máa Yesu kɨ zu̵u̵ vbı̵́d, daa vúd lig hȩn ha"ı̵́lı̵́.