Read Dii Debtere ba'ad waa ba'ad voo nɔ 1 Bible Online

Debtere ba'ad waa ba'ad voo nɔ 1 - Dii bible

Debtere ba'ad waa ba'ad voo nɔ 1

¹Ɨ́ hí̧í̧lí̧ míí Toofíl, ká mí dəŋ bíńda o̧m hȩn 'waapád Yesu ká dəŋ kɔ́lı̵́ ya do̧do̧o̧ woolı̵́ máa, kan hȩn ká tú' máa sú̵'ú̵,

²há̧á̧ ya̧ zá̧ga̧ Tayɨɨ ka ɓɛ dɔgɔnɔ be"ı̵́ máa á̧ḿ. Tíŋ́ dɔggı̵́ woo be"ı̵́ máa, Yesu yee waa ba'ad woo vu̵, o̧d vu̵ hȩn u̵u̵ kɔ́ máa kan néélȩ́ yigid Tayɨɨ woo.

³Pig nɔm woolı̵́ máa, tú'ud waa duulí woo vu̵ fó̧ó̧ zá̧a̧dná do' ɓu̵u̵lı̵́ na'a, há̧á̧ ya̧ bá' vo' ndaddú̵, tú'ud vu̵ fó̧ó̧ woo, o̧d vu̵ moo gbaŋ waalı̵́ Tayɨɨ woo.

⁴Zá̧ga̧ tóólı̵́ ka sú̵g lá hȩn kan vu̵ á̧ḿ máa, o̧d vu̵ wu̵lı̵́: “I lúú kaa Yerúsalemmé sá, i laa hȩn Ba'á Tayɨɨ ká ta ya̧g yúú woolı̵́, ba bíń pú̵ ví ú yȩ pȩ́ń. Ká mí o̧d ví moo woo sú̵'ú̵,

⁵moo Yoohá̧na ká woo nán vu̵ mam Tayɨɨ kan mamme, a̧máa ı̵́ víí bá' wú̵ń ɗii ní, Tayɨɨ wú̵ń woo ví kan yigid woo nɔ.”

⁶Waa duulí Yesu woo ku̵u̵ sú̵g kannɔ máa, vu̵ vigi moo yɛ, vu̵ o̧: “Ba'á, sey a̧m duu mbɔ́gɔd zig Izraɛ́l gbaŋ waalı̵́ máa, wu̵ yȩ naa?”

⁷Ma Yesu hí̧i̧d vu̵: “Sey woo kan zá̧ga̧ woo, Ba' míí ka 'yɛ́ kan néélȩ́ woo máa, kan ví ní.

⁸A̧máa yigid Tayɨɨ woo a yaa víílí tée, víń nuŋ néélȩ́ tóó, víń mbaa ı̵́ ya̧g du̵lı̵́ míí vu̵ kaa Yerúsalemmé kan hág Yúúdalı̵́ 'waapád kan hág Samaríilí á̧ḿ, há̧á̧ wú̵ń ya̧ la hág sí̧'í̧dí sag.”

⁹Yesu ka o̧d vu̵ moo yȩ 'waa sú̵'ú̵ máa, vu̵ ho̧go̧ daa ɗáá dɔg be"ı̵́. Mam hi̧i̧g ya tiddu̵ la voolı̵́ nɔ́lȩ́.

¹⁰Sey ku̵u̵ baa tə́g dɔg nɔ́ɔ́ be"ı̵́ máa, nán tóó vu̵ gbɔ vúd ya idú, vu̵ dɔ́ sa̧a̧m heená, vu̵ dii dáŋ́ voolı̵́,

¹¹vu̵ o̧d vu̵: “Nán Gálilée vu̵, moo ȩn ví tə́gə nɔ́ɔ́ dɔg be"ı̵́lá? Tayɨɨ ɓɛ Yesu yȩ dɔgɔn be"ı̵́ ma, wú̵ń duu dɨ zu̵u̵ fíiní ı̵́ yo̧go̧ á̧ḿ kɔ́ ı̵́ kíí ho̧go̧ dɔg yȩ wɔgɔ.”

¹²Pig woolı̵́ máa, waa duulí Yesu woo vu̵ lúú ya gu̵u̵ ku̵u̵ bee “gu̵u̵ la' kúḿmi” máalȩ́ vu̵ fíí ya Yerúsalemmé. Gu̵u̵ yȩ dɨ dáŋ́ kaa Yerúsalemmé kɔ́ ı̵́ kílomɛ́ɛtər dágá wɔgɔ.

¹³Ku̵u̵ ya̧ ya Yerúsalemmé máa, vu̵ ɗáá dɔg lig ı̵́ yúba kú̵u̵ səə mbaa wu̵lı̵́ máalȩ́. Piɛ́r du̵u̵lı̵́ kan Yoohá̧na kan Yaakúbu kan A̧ndɛrée, kan Filíb kan Tomás, kan Baatelemíi kan Matío, kan Yaakúbu Álfa waa kan Simɔ́ŋ nán zó̧ó̧ pilí máa, kan Yúúda Yaakúbu waa á̧ḿ.

¹⁴Ya voo 'waapád, vu̵ baa sú̵g kan zó̧ó̧ voo 'waapád, vu̵ o̧d Tayɨɨ moo kan wakȩ́ȩ́ tóó vu̵, kan Maaríi Yesu na' woo kan daa sá̧ŋ́ vu̵ á̧ḿ.

¹⁵Zá̧ga̧ tóó pig woolı̵́ máa, nán kirtȩ́n vu̵ sú̵g, zaa ka vu̵n dɨ fó̧ó̧ tȩmɛre kan fó̧ó̧ gbɛg, ma Piɛ́r lúú dɔg sa̧a̧m voolı̵́, o̧d vu̵:

¹⁶“Nán sú̵ggı̵́ vu̵, hȩn yigid Tayɨɨ woo ka o̧ ya̧g Daavíd woolı̵́ ku̵u̵ bíńda debterelı̵́ máa, séý a kɔ́y pȩ́ń. Ká o̧ moo Yúúdas woo ka pa̧ŋ nán vu̵, ma ku̵u̵ la ma' Yesu má nɔ.

¹⁷Yúúdas ká dɨ sa̧a̧m vóó yɛlı̵́, ká dɔ́ dɨ ya̧g ba'ad vóó yɛlı̵́ á̧ḿ.”

¹⁸(Sɨɨde ku̵u̵ sú̵ú̵ Yúúdas moo yúú nɔɔné woo yȩ máa, ɓɛ hɨn bab wu̵lı̵́. Ma gagay wá̧á̧ gbuu, ha̧g woo dɛ́ń zu̵u̵ sa̧a̧mé, ya̧' woo kə̧́'ə̧́da hágá, nɔɔ zu̵u̵ bab sú̵u̵lı̵́.

¹⁹Nán Yerúsalem vu̵ 'waapád vu̵ ki hȩn yȩ. Moo woo nɔ vu̵ bee bab yȩ kan ya̧g voo “hakeldáma.” Yéé woo tú' “bab nán ka nɔɔ wu̵lı̵́ má nɔ[1].”)

²⁰Piɛ́r duu o̧: “A̧máa ká vu̵ bíńda debtere yéélı̵́ ná': ‘Kíi woo a tii gbá̧á̧ȩ. Nán tóó a mbaa wu̵lı̵́ sá.’ Vu̵ duu bíńda tóó o̧: ‘Nán tóó a ɓɛ ba'ad woo ú̵.’ ”

²¹Ma Piɛ́r duu o̧d vu̵: “Séý nán tóó a maa vɔ́ ya̧g du̵lı̵́ yúú nímní ı̵́ 'yɛ́lı̵́ baa ví Yesu woo nɔmmé yɛlı̵́ pȩ́ń. Ba yee ví nán ı̵́ ka mbaa kan ba ví bá' 'waapád sey ı̵́ 'yɛ́lı̵́ baa ví Yesu ká 'yȩ́ḿ daa kan ba ví má nɔ, dəŋ sey Yoohá̧na ka woowu̵ mam Tayɨɨ máalȩ́, há̧á̧ ya̧ zá̧ga̧ Tayɨɨ ka ɓɛ dɔgɔnɔ be"ı̵́ yȩlȩ́.”

²³Ku̵u̵ ki moo Piɛ́r woo yɛ máa, vu̵ pú̵ fó̧ó̧ idú. Vu̵ pú̵ Yu̵u̵séfu, yéé woo tóó Baasába, vu̵ duu ha'adu̵ yéé tóó Yústus á̧ḿ, vu̵ kan Matía.

²⁴Ma vu̵ o̧d Tayɨɨ moo yɛ: “Ɨ́ 'yɛ́lı̵́ vóó, mɔ́ gaa zó̧ó̧ nán voo 'waapád. A̧m tú'ud vɔ́ sa̧a̧m nán idú yɛ voolı̵́, mɔ́ń yee nóo

²⁵a mbaa waa ba'ad, a ɓɛ ya̧g ba'ad Yúúdas woo ka kéé gbɔ, ka la mbaa ya mbaalı̵́ dáń woolı̵́ yȩlá?”

²⁶Vu̵ gbɔ sáásáá, moo bi yee nán dágá sa̧a̧m voolı̵́. Sáásáá ka lá Matía máa, vu̵ ɓɛ ha"u̵ daa sa̧a̧m waa ba'ad voolı̵́, vu̵ sú̵g fó̧ó̧ wa̧nɓó' zu̵u̵ idú.