Read Dii Debtere ba'ad waa ba'ad voo nɔ 11 Bible Online

Debtere ba'ad waa ba'ad voo nɔ 11 - Dii bible

Debtere ba'ad waa ba'ad voo nɔ 11

¹Waa ba'ad Yesu woo vu̵, kan nán sú̵ggı̵́ ı̵́ ku̵u̵ dɨ hág Yúúdalı̵́ máa, vu̵ ki zig nán tóó vu̵n fȩȩ sı̵́ moo Tayɨɨ ú̵ á̧ḿ.

²Sey Piɛ́r ka vȩ́' dɔg Yerúsalemmé máa, nán sú̵ggı̵́ ı̵́ ku̵u̵ nda doo yúú moo do̧ŋ dɔ́lı̵́lı̵́ máa, vu̵ séewu̵, vu̵ o̧:

³“Mɔ́ la dɔ́ zaga yȩ voolı̵́, mɔ́ lá hȩn kan vu̵ máalá̧!”

⁴Piɛ́r ka ki moo voo máa, pá'ad vu̵ hȩn ka kɔ́y yȩ 'waapád, kan ya woo, ya woo, o̧d vu̵:

⁵“Ká mí dɨ míí mbaalı̵́ kaa Yu̵péelı̵́. Káń dɨd Tayɨɨ moo o̧lȩ́ máa, mí ho̧ hȩn sa̧ga̧. Hȩn tóó vúd be"ı̵́ zu̵u̵ míílí̧, kɔ́ ı̵́ píg gbo̧o̧ tóó ku̵u̵ tíddu̵ ka' ndaddú̵ máa wɔgɔ.

⁶Sey káń tə́g tíŋ́ woo máa, mí ho̧ hȩn doo ndaddú̵ ndaddú̵ vu̵, ká pú̵g hó̧g vu̵ yu̵, kan hȩn wóoné hágá vu̵, kan nɔ́g waa vu̵ á̧ḿ.

⁷Ma mí ki yɛ́g tóó o̧n: ‘Piɛ́r, a̧m lúú dɔg mɔ́ ma' hȩn yȩ tóó dágá, mɔ́ sə̧', mɔ́ lá la ú̵.’

⁸Sey káń ki yɛ́g yȩ máa, mí hí̧i̧du̵: ‘Áá'a, ı̵́ 'yɛ́lı̵́ míí, hȩn kı̵́b kan hȩn ka dȩ'ȩ né ı̵́ yo̧go̧ máa, mí lán vu̵ lá míí see né.’

⁹Yɛ́g pee duu o̧n zu̵u̵: ‘Hȩn Tayɨɨ ka o̧ ba dȩ' sú̵'ú̵ máa, a̧m ho̧ vu̵ móó hȩn kı̵́b sá.’

¹⁰Hȩn yȩ kɔ́y do' ta̧a̧nɔ́ ma píg gbo̧o̧ pee daa vȩ́' dɔg be"ı̵́.

¹¹Sey woo, nán tóó vu̵ há̧á̧ ya̧ ya fó̧ó̧ ta̧a̧nɔ́ lig mín mbaa wu̵lı̵́ peelı̵́. Vu̵ ba' vu̵ ya kaa Sezaréelı̵́, moo u̵u̵ ya beenɔ́.

¹²Ku̵u̵ yaa máa, yigid Tayɨɨ woo o̧n ba a̧n ká̧ŋ́ laalı̵́ kan vu̵ á̧ḿ. Nán kirtȩ́n gúú yɛ vu̵ sú̵g laa kan mí kaa Sezaréelı̵́ á̧ḿ, vɔ́ dɔ́ la Kornéy woolı̵́ kíilí.

¹³Ma Kornéy pá'ad vɔ́ ba bin ho̧ maleeka tóó ba ya dii biilí ligí, ba o̧d bi: ‘A̧m ba' la kaa Yu̵péelı̵́, u̵u̵ beem Simɔ́ŋ ı̵́ ku̵u̵ beewu̵ Piɛ́r á̧ḿ má nɔ.

¹⁴Wú̵ńnɔ o̧m moo a̧m sə́d wu̵lı̵́, kan nán móó vu̵ 'waapád á̧ḿ.’

¹⁵Sey káń dəŋ dɔg moo o̧lȩ́ ná' máa, yigid Tayɨɨ woo sí zu̵u̵ dɔ́ voolı̵́ kɔ́ ı̵́ ká dəŋ dɔ́ baa vílí pee wɔgɔ.

¹⁶Ma mí duu taa moo ı̵́ 'yɛ́lı̵́ Yesu woo ká o̧ máa: ‘Yoohá̧na ká woo nán vu̵ mam Tayɨɨ kan mamme, a̧máa ı̵́ víí máa, Tayɨɨ wú̵ń woo ví kan yigid woo nɔ.’

¹⁷Tayɨɨ pú̵ nán yȩ vu̵ yigid woo kɔ́ ı̵́ ká pú̵ ba ví máa wɔgɔ, moo kaa 'yɛ́ ví zó̧ó̧ Yesu Krístu ı̵́ 'yɛ́lı̵́ baa ví woolı̵́ má nɔ. Tayɨɨ ka kɔ́ hȩn yȩ máa, mí nóo ma, míń há' Tayɨɨ ba'ad woo kɔ́lı̵́lá?”

¹⁸Sey nán sú̵ggı̵́ pee ku̵u̵ ki sı̵́ moo yȩ ó̧ máa, vu̵ mbaa simná, vu̵ na' Tayɨɨ, vu̵ o̧: “Asée, Tayɨɨ tú̵'u̵d nán ı̵́ ku̵u̵ Yúúda pɛ́lı̵́ máa vu̵ hi̧naa, u̵u̵ tii zó̧ó̧, u̵u̵ mbaa kan bi á̧ḿ.”

¹⁹Sey ku̵u̵ nɔɔ Itȩ́n ma ku̵u̵ bé' nán Yesu woo vu̵ dunní kan moo máa, nán sú̵ggı̵́ vu̵ hɨ'ɨ la. Tóó vu̵ la ya̧ há̧á̧ hág Fenisíilí, kan mam bam Kíipərəlı̵́ kan kaa gbaŋ Aŋtiósdı̵́ á̧ḿ, a̧máa vu̵ tú'ud də́ń nán Yúúda vu̵ yu̵ moo Tayɨɨ kəd.

²⁰Kóó ı̵́ yo̧go̧ si̧', nán sú̵ggı̵́ tóó vu̵ diga hág Kíipərəlı̵́ kan Siirɛ́nné á̧ḿ, vu̵ laa kaa gbaŋ Aŋtiósdı̵́, vu̵ laa nán ı̵́ ku̵u̵ Yúúda pɛ́lı̵́ máa voolı̵́ á̧ḿ, vu̵ tú'ud vu̵ moo to̧o̧ 'maŋ yúú ı̵́ 'yɛ́lı̵́ baa ví Yesu woolı̵́.

²¹Ma ı̵́ 'yɛ́lı̵́ maa vu̵ ba'ad; nán ɓu̵u̵lı̵́ na'a vu̵ tii zó̧ó̧ voo, vu̵ ya duu ı̵́ 'yɛ́lı̵́ Yesu.

²²Nán sú̵ggı̵́ ı̵́ Yerúsalemmé vu̵ ki moo yȩ, ma vu̵ ba' la Baanábas kaa gbaŋ Aŋtiósdı̵́.

²³Sey Baanábas ka ya̧ la, ka ho̧ Tayɨɨ ka bag nán sú̵ggı̵́ vu̵ hȩn ı̵́ yo̧go̧ máa, zó̧ó̧ dȩ"o̧, zigid vu̵ zó̧ó̧ moo u̵u̵ nda doo, u̵u̵ 'yɛ́ zó̧ó̧ ı̵́ 'yɛ́lı̵́ Yesu woolı̵́ kəd.

²⁴Baanábas ká nán to̧o̧ȩ. Yigid Tayɨɨ woo maawo̧, 'yɛ́ zó̧ó̧ Tayɨɨ woolı̵́ á̧ḿ. Ma nán ɓu̵u̵lı̵́ na'a vu̵ tii zó̧ó̧, vu̵ duu ı̵́ 'yɛ́lı̵́ Yesu.

²⁵Pig woo máa, Baanábas daa soo la Sól kaa Társəlı̵́.

²⁶La nuŋŋɔ, duu daa pa̧ŋŋɔ yaan kaa gbaŋ Aŋtiósdı̵́. Vu̵ səə wu̵lı̵́ ve' dágá sa̧a̧m nán sú̵ggı̵́ voolı̵́, ya voo idú á̧ḿ, vu̵ tú'ud nán ɓu̵u̵lı̵́ na'a vu̵ moo Tayɨɨ wu̵lı̵́. Ya ku̵u̵ dəŋ bee waa duulí vu̵ “kirtȩ́n” wu̵lı̵́ máa, wu̵ kaa gbaŋ Aŋtiósdı̵́.

²⁷Sey woolı̵́ máa, anábi tóó vu̵ lúú Yerúsalemmé, vu̵ zu̵u̵ kaa gbaŋ Aŋtiósdı̵́.

²⁸Tóó dágá yéé woo Agabúu. Yigid Tayɨɨ woo ka tú'udu̵ hȩn máa, Agabúu lúú dɔg yúba, o̧ go̧o̧m gbo̧o̧ ban dɨ kɔ́yné hág 'waapád. (Go̧o̧m yȩ kɔ́y sey Kolóod ka mbaa gbanii nán Róma voolı̵́ máalȩ́.)

²⁹Waa duulí vu̵ mbɔ́g moo ya voolı̵́, vu̵ o̧: “Kóó nɔ́nná a pú̵ hȩn ka maa pú̵lı̵́ má nɔ, moo ba ba'ad ví dɔg da ba ví kirtȩ́n ı̵́ hág Yúúdalı̵́ máa vu̵ yu̵.”

³⁰Ma vu̵ kɔ́ kɔ́ ı̵́ ku̵u̵ o̧ wɔgɔ. Vu̵ pú̵ Baanábas kan Sól, vu̵u̵ pa̧ŋ dɔg hág Yúúdalı̵́, vu̵ la pú̵ nag ı̵́ nii voolı̵́.