Read Dii Debtere ba'ad waa ba'ad voo nɔ 13 Bible Online

Debtere ba'ad waa ba'ad voo nɔ 13 - Dii bible

Debtere ba'ad waa ba'ad voo nɔ 13

¹Anábi tóó ká vu̵ dɨ sa̧a̧m nán sú̵ggı̵́ kaa gbaŋ Aŋtiósdı̵́ yȩ voolı̵́, ı̵́ moo Tayɨɨ tú"í vu̵ du̵u̵lı̵́ á̧ḿ. Ká Baanábas kan Simió̧ŋ tóó ku̵u̵ beewu̵ Baadii má nɔ, kan Lusíw (nán Siirɛ́n tóó nɔ), kan Sól, kan Manahȩ́n ku̵u̵ sú̵g na' kan gbanaa Heeród máa á̧ḿ.

²Zá̧ga̧ tóó ku̵u̵ sú̵g moo Tayɨɨ na"ȩ́, ku̵u̵ kȩȩ hȩn lálı̵́ máa, yigid Tayɨɨ woo o̧d vu̵: “I yee Baanábas vu̵ kan Sól 'yɛ́n kə́d, moo u̵u̵ kɔ́ ba'ad káń bee vu̵ u̵u̵ kɔ́ ú̵ yɛ nɔ.”

³Ku̵u̵ ki moo yȩ máa, nán sú̵ggı̵́ vu̵ kȩȩ hȩn lálı̵́, vu̵ o̧d Tayɨɨ moo, vu̵ ha'ad Baanábas kan Sól vu̵ nag yúlí, ma vu̵ gbɔ vu̵ u̵u̵ laa la ú̵.

⁴Yigid Tayɨɨ woo ka ba' Baanábas vu̵ kan Sól ı̵́ yo̧go̧ máa, vu̵ ya̧a̧ duu zu̵u̵ kaa Selesíilí, vu̵ dɔ́ la nɛ́ŋ́ tóólı̵́, vu̵ daa laa mam bam tóó ku̵u̵ beewu̵ Kíipərə máalȩ́.

⁵Ku̵u̵ ya̧ la kaa Salamínní máa, vu̵ bé' moo Tayɨɨ tú"í, lig sú̵ggı̵́ nán Yúúda voolı̵́. Yoohá̧na ı̵́ ku̵u̵ beewu̵ Márkus máa maa vu̵ ba'ad wu̵lı̵́ á̧ḿ.

⁶Ku̵u̵ kə̧́ə̧́ 'waa daa mam bam yȩlȩ́ pád há̧á̧ ya̧ la kaa Pafósdı̵́ sag máa, vu̵ kan kan nán mbú̵gu̵ tóó wu̵lı̵́, yéé woo Bar Yesu. Ká nán Yúúdaɨ. O̧ ba bin anábiɨ á̧ḿ.

⁷Mbaa dɨ lig guvɛrnə́ər mam bammé yȩ woolı̵́. Guvɛrnə́ər sú̵u̵ yéé woo Segíu Pól, ká nán moo gaalı̵́ɨ á̧ḿ, bee Baanábas vu̵ kan Sól á̧ḿ, hí̧í̧ bi ki moo Tayɨɨɨ.

⁸A̧máa nán mbú̵gu̵ pee, vu̵ tii yéé woo bee kan ya̧g gɛrɛ́g Elíma. Elíma pee há' vu̵, zo' guvɛrnə́ər a 'yɛ́ zó̧ó̧ woo Tayɨɨ woolı̵́ sá.

⁹A̧máa Sól ku̵u̵ beewu̵ Pól á̧ḿ pee, yigid Tayɨɨ woo ka maawo̧ máa, tə́g Elíma pee,

¹⁰o̧ddu̵: “Nán káḿ hi̧' kan hȩn dɔnné, kan zó̧ó̧ ɓı̵́d, waa Seeɗán woo yȩ, mɔ́ yo̧. Mɔ́ sɛ́n hȩn hí̧í̧lí̧ Tayɨɨ woo né sá̧ḿ. Mɔ́ń gbɔn sı̵́ hi̧naa Tayɨɨ woo ka mbɔ́g du̵u̵ na'a yɛ lı̵́nné náa?

¹¹A̧m ki ú. Ɨ́ 'yɛ́lı̵́ wú̵ń kɔ́m, mɔ́ń há̧á̧ yə̧ə̧ zu̵u̵ 'ya̧'a̧ yɛ nɔ, mɔ́ń ho̧n túlí zá̧ga̧ woo né, há̧á̧ sey tóólı̵́.” Nɔ́ɔ́ Elíma woo há̧á̧ yə̧ə̧ zu̵u̵ ya̧g woolı̵́, mbaa la dammad. Ma kpá'a nag kə̧́ə̧́ daa soo nán tóó a tee bi ú.

¹²Sey guvɛrnə́ər ka ho̧ hȩn yȩ máa, 'yɛ́ zó̧ó̧ woo Tayɨɨ woolı̵́. Moo ı̵́ 'yɛ́lı̵́ Yesu woo la"u̵ la fid.

¹³Pól kan daga 'yȩ́ḿ vu̵, vu̵ dɔ́ nɛ́ŋ́ kaa Pafósdı̵́, vu̵ daa laa kaa Pɛ́ɛzəlı̵́, hág Pa̧mfilíilí. Yoohá̧na ı̵́ ku̵u̵ beewu̵ Márkus pee lúú gbɔ vu̵ wu̵lı̵́, daa fíí la Yerúsalemmé.

¹⁴A̧máa ı̵́ voo, vu̵ daa lúú Pɛ́ɛzəlı̵́, vu̵ ya̧ la kaa Aŋtiós ı̵́ hág Pisidíilí. Zá̧ga̧ asawəlı̵́ máa, vu̵ dɔ́ lig sú̵ggı̵́ nán Yúúda voolı̵́, vu̵ mbaa hágá.

¹⁵Ku̵u̵ záŋ́ga moo tóó debtere Múúsa woolı̵́ kan debtere anábi voolı̵́ máa, ı̵́ nii lig sú̵ggı̵́ pee vu̵ ba' la o̧d Pól vu̵: “Nán vóó vu̵, i dɨ kan moo tóó bi o̧d nán sú̵ggı̵́ yɛ vu̵, bi zigid vu̵ zó̧ó̧ wu̵lı̵́ tée, i o̧ la sú̵m.”

¹⁶Pól ka ki máa, lúú dɔg, gəd vu̵ kan nag, o̧: “Nán Izraɛ́l vu̵, kan nán ı̵́ kíí dɨ Tayɨɨ na"ȩ́ yɛlı̵́ á̧ḿ, i ki ú.

¹⁷Tayɨɨ zig Izraɛ́l yȩ, wu̵ yee a ba ví yée vu̵, wu̵ kɔ́, ma vu̵ na', vu̵ dɨ hág Mísiralı̵́, ya gáálı̵́, ma wu̵ duu vud vu̵ hág Mísiralı̵́ kan nag gbaŋ woo.

¹⁸Duu tu̵ vu̵ hó̧g kȩŋŋı̵́ ve' vo' ndaddú̵.

¹⁹Tayɨɨ tud zig tóó vu̵ gúndɛm hág Kanánné á̧ḿ, ma ɓɛ hág voo pú̵ zig woo vu̵ hȩn gaga.

²⁰Tayɨɨ kɔ́ hȩn yȩ 'waapád yúú ve' tȩmɛre ndaddú̵lı̵́ kan ve' vo' nɔ́nɔ́. Pig woolı̵́ máa pú̵ vu̵ gbanaa vu̵, há̧á̧ ya̧ bá' anábi Samɛ́l woolı̵́.

²¹Sey woo máa, vu̵ vi Tayɨɨ ba a pú̵ bi gbaniii. Ma Tayɨɨ pú̵ vu̵ Sól, Kís waa, zig Bɛnzamɛ́ŋ woolı̵́, waa gbanii ve' vo' ndaddú̵.

²²Pig Tayɨɨ ka kéé Sól gbɔ máa, duu pú̵ vu̵ gbanii Daavíd, o̧ moo yúú Daavíd woolı̵́, o̧: ‘Mí nuŋ Daavíd Izáy waa sú̵'ú̵, to̧o̧n kannɔ 'yɛ́nné; wú̵ń kɔ́ hȩn káń hí̧í̧ máa 'waapád.’

²³Tayɨɨ taddu̵ ya̧g ba bíń ba'ad Izraɛ́l ı̵́ nán sənné zig Daavíd woolı̵́, ma ba' Yesu ya yɔ.

²⁴Yesu ka yaa ná né máa, Yoohá̧na ı̵́ mam Tayɨɨ wooné baa pa moo, bee zig Izraɛ́l 'waapád a tii mbaalı̵́ 'maŋ, a woo mam Tayɨɨɨ.

²⁵Zaa Yoohá̧na kan 'waa ba'ad woo sú̵'ú̵ máa, o̧: ‘Ví taa víí ba mín nɔ́nná? Mí nán ı̵́ kíí laawu̵ yȩ nɔ pɛ́lı̵́. A̧máa i ki ú. Wú̵ń duun ya dɨlı̵́, mí maan míí zaŋ tɛ́gɛ́ woo buuní ní á̧ḿ.’

²⁶“Nán míí vu̵, Ibrahí̧í̧ma aa yée vu̵, kan ı̵́ kíí dɨ Tayɨɨ na"ȩ́ yɛ, moo yúú nán vu̵ sənnélȩ́ yɛ, Tayɨɨ ba'ad ba víw.

²⁷Nán Yerúsalem vu̵ kan ı̵́ nii voo vu̵, ká vu̵ ho̧ Yesu gaa né. Vu̵ kin moo anábi voo ku̵u̵ záŋ́ga asawə 'waapád yȩ né á̧ḿ, a̧máa vu̵ sə̧' moo yúú Yesu woolı̵́, kɔ́ ı̵́ anábi kú̵u̵ o̧ wɔgɔ.

²⁸Kóó ku̵u̵ ho̧n hȩn tóó ka maanɔ nɔɔné né yȩ nɔ si̧', vu̵ vi Pilád a nɔɔwo̧ la ú̵.

²⁹Pig ku̵u̵ kɔ́ hȩn debtere ka o̧ yúú woolı̵́ yȩ 'waa sú̵'ú̵ máa, vu̵ siddu̵ zu̵u̵ la' vbagadı̵́, vu̵ dɔddu̵ bɛ́ɛ́gı̵́,

³⁰a̧máa Tayɨɨ nimmɔ nɔmmé sú̵'ú̵.

³¹Nán tóó ká vu̵ duuwu̵ diga hág Gáliléelı̵́, ma vu̵ dɔg Yerúsalemmé á̧ḿ. Yesu ka níḿ nɔmmé sú̵'ú̵ máa, baa tú'ud vu̵ fó̧ó̧ bá' ɓu̵u̵lı̵́ na'a. 'Ya̧'a̧ yɛ, nán sú̵u̵, vu̵u̵ mbaa ı̵́ ya̧g du̵lı̵́ woo, vu̵u̵ dɨd zig Izraɛ́l moo woo tú"í yɛ nɔ.

³²Ɨ́ vóó máa, vɔ́ pa̧n ví ya moo to̧o̧ 'maŋ sú̵u̵ wu̵ yɛ nɔ á̧ḿ. Hȩn Tayɨɨ ka tad a ba ví yée vu̵ ya̧g wu̵lı̵́ pee,

³³sey Tayɨɨ ka nim Yesu nɔmmé sú̵'ú̵ máa, hȩn woo dɔ́ sé' woolı̵́ baa vílí sú̵'ú̵. Vu̵ bíńda moo yɛ debtere yéélı̵́ sapíitər idú woolı̵́, Tayɨɨ o̧ ı̵́ yo̧go̧: ‘Mɔ́ waa míí nu. Mí ha̧a̧m sı̵́ ɓəə ú̵.’

³⁴“Tayɨɨ ká o̧ ba bíń nimmɔ nɔmmé moo fó̧ó̧ woo a duu buŋ sá. Tayɨɨ ká moo moo ı̵́ yo̧go̧: ‘Moo yȩ́ńná, míń bag ví hȩn káń tad Daavíd ya̧g wu̵lı̵́ máa pȩ́ń.’

³⁵“Ya tóólı̵́ máa, Tayɨɨ o̧ debtere woolı̵́: ‘Mɔ́ń gbɔ nán móó fó̧ó̧ woo wú̵ń bugu ní.’

³⁶“Daavíd ká kɔ́ woo hȩn, duu hȩn Tayɨɨ ká tú' má nɔ, ma nɔɔ, vu̵ dɔddu̵ bɛ́ɛ́g a ba ví yée voolı̵́, buŋ.

³⁷A̧máa ı̵́ Tayɨɨ ka nimmɔ nɔmmé yȩ, bugun woo né.

³⁸“Nán míí vu̵, i ki ú. Ká ví duu dooká Múúsa woo máa, Tayɨɨ kéé hȩn ɓı̵́d víí vu̵ gbɔn 'waapád né. A̧máa Tayɨɨ wú̵ń kéé hȩn ɓı̵́d víí vu̵ gbɔ 'waapád, moo Yesu woo nɔ.

³⁹Kóó nɔ́nná a 'yɛ́ zó̧ó̧ Yesu woolı̵́ tée, vu̵ to̧n sı̵́ kan Tayɨɨ ú̵.

⁴⁰I gággú̵, moo hȩn debtere anábi woo ka o̧ yȩ kan kɔ́ ví ú. O̧:

⁴¹‘Nán kíí ɓéé hȩn na'a yȩ, i tə́g moo yɛ ho̧ lá ví, hȩn woo a la' ví la fid, i ti la ú, moo míń dɨ ba'ad tóó kɔ́lı̵́ bá' víí yɛlı̵́, a̧máa nán tóó kan pá'ad ví moo woo tée, ka víń fȩȩn moo woo né sá̧ḿ.’ ”

⁴²Sey Pól ku̵u̵ daa vúd kan Baanábas lig sú̵ggı̵́lı̵́ máa, nán vu̵ vi vu̵: “I duu vȩ́' ya o̧d vɔ́ moo dágá yȩ asawə pigim pȩ́ń.”

⁴³Pig sú̵ggı̵́ yȩlȩ́ máa, nán Yúúda vu̵ ɓu̵u̵lı̵́ na'a, kan nán ı̵́ ku̵u̵ Yúúda pɛ́lı̵́ ma ku̵u̵ tii sı̵́ nán Yúúda tiilíi máa vu̵ á̧ḿ, vu̵ duu Pól vu̵ kan Baanábas. Pól vu̵ zigid vu̵ zó̧ó̧, vu̵ o̧d vu̵: “Tée i dii néélȩ́ na'a yúú zó̧ó̧ nán Tayɨɨ woo ka kɔ́ yȩlȩ́.”

⁴⁴Zá̧ga̧ asawə woo tóó máa, nán ɓu̵u̵lı̵́ na'a kaa gbaŋ yȩlȩ́ yȩ, vu̵ sú̵g ya moo ı̵́ 'yɛ́lı̵́ Yesu woo kilí.

⁴⁵Sey nán Yúúda ku̵u̵ ho̧ dúú na'a yȩ vu̵ máa, vu̵ moo sɨg, vu̵ faa moo Pól ba moo pee, vu̵ haawu̵.

⁴⁶Pól vu̵ kan Baanábas, vu̵ o̧d vu̵ moo kan zó̧ó̧ voo 'waapád, vu̵ o̧: “Séý ka vɔ́n dəŋ o̧d víw moo Tayɨɨ tíŋ́ pȩ́ń. A̧máa moo kíí ma gbɔgɔ máa, tú' ba víń sɛ́n mbaalı̵́ kan Tayɨɨ né, ma kóó daa tii ya sı̵́ vóó zig tóó voolı̵́ yɛ nɔ!

⁴⁷I ki sı̵́ hȩn ı̵́ 'yɛ́lı̵́ Tayɨɨ ka o̧ má nɔ: ‘Mí 'yɛ́ mɔ́ yo̧ ya túlí zig nán tóó voo, moo a̧m səd nán vu̵ há̧á̧ ya̧ hág sí̧'í̧dí.’ ”

⁴⁸Nán ı̵́ ku̵u̵ Yúúda pɛ́lı̵́, ku̵u̵ ki moo yȩ máa, zó̧ó̧ dȩ' vu̵, vu̵ dəŋ moo ı̵́ 'yɛ́lı̵́ woo na"ȩ́. Nán Tayɨɨ ka mbɔ́g vu̵ moo vágád káákáá dáŋ́ woolı̵́ máa, vu̵ 'yɛ́ zó̧ó̧ voo Tayɨɨ woolı̵́ 'waapád.

⁴⁹Moo ı̵́ 'yɛ́lı̵́ Yesu woo fȩȩ hág yȩ 'waa daa pád.

⁵⁰A̧máa nán Yúúda vu̵ sȩn fó̧ó̧, vu̵ o̧d wakȩ́ȩ́ ı̵́ ku̵u̵ dɨ kan hȩn naalȩ́, ma ku̵u̵ dɨ Tayɨɨ duulí máa vu̵, kan ı̵́ nii kaa vu̵ á̧ḿ, vu̵ ɓaa ya̧g, vu̵ duun Pól vu̵ moo kan Baanábas, vu̵ nɛŋ vu̵ vud hág yȩlȩ́.

⁵¹Nán idú yȩ vu̵ tá'ad vu̵ nag voo[7], ma vu̵ daa lúú laa kaa Ikónné.

⁵²A̧máa waa duulí Yesu woo ı̵́ kaa Aŋtiósdı̵́ vu̵ mbaa voo kan zó̧ó̧ dȩ"ȩ́. Yigid Tayɨɨ woo maa vu̵ laa tíŋ́ tíŋ́ á̧ḿ.