Read Dii Debtere ba'ad waa ba'ad voo nɔ 19 Bible Online

Debtere ba'ad waa ba'ad voo nɔ 19 - Dii bible

Debtere ba'ad waa ba'ad voo nɔ 19

¹Sey Apolóo ka dɨ lá woo kaa gbaŋ Koríńtilí máa, Pól ya̧a̧ duu woo hág mgbaŋŋı̵́, ma daa zu̵u̵ kaa gbaŋ Ɛfɛ́ɛzlı̵́, la nuŋ waa duulí Yesu woo tóó vu̵ wu̵lı̵́.

²Vi vu̵: “Sey kíí 'yɛ́ zó̧ó̧ víí Yesu woolı̵́ yɛ, ví nuŋ yigid Tayɨɨ woo sá'áa?” Ma vu̵ hí̧i̧du̵: “Vɔ́ kin ná moo yigid Tayɨɨ woo ba dɨlı̵́ á̧ḿ máa né.”

³Pól ka ki ná' máa, duu vi vu̵: “Máa vu̵ woo ví mam Tayɨɨ ı̵́ tɛ́lá?” Vu̵ hí̧i̧du̵: “Mam Tayɨɨ ı̵́ Yoohá̧na woo nɔ.”

⁴Pól duu o̧d vu̵: “Nán ku̵u̵ hí̧í̧ bi tii mbaalı̵́ 'maŋŋɨ máa, Yoohá̧na woo vu̵ yu̵ mam Tayɨɨ, o̧d zig Izraɛ́l ba a duu nán ı̵́ ba ka dɨ yaalı̵́ pig biilí má nɔ. Máa, nán sú̵u̵ wu̵ Yesu wu̵.”

⁵Nán yȩ ku̵u̵ ki moo yȩ máa, vu̵ duu woo vu̵ mam Tayɨɨ kan yɛ́g ı̵́ 'yɛ́lı̵́ Yesu woo.

⁶Pól ha'ad vu̵ nag yúlí á̧ḿ, ma Tayɨɨ pú̵ vu̵ yigid woo, vu̵ bé' ya̧g tóó vu̵ moolȩ́, vu̵ moo moo anábi á̧ḿ.

⁷Nán yȩ ká vu̵ dɨ wa̧nɓó' zu̵u̵ idú.

⁸Pól baa laa lig sú̵ggı̵́ nán Yúúda voolı̵́, o̧d vu̵ moo kan zó̧ó̧ woo 'waapád, baa pa moo gbaŋ waalı̵́ Tayɨɨ woo wu̵lı̵́, sȩȩ ta̧a̧nɔ́. Baa tú'ud vu̵ moo Tayɨɨ woo ba moo yȩ́ńne.

⁹A̧máa nán tóó vu̵ ŋgó̧ó̧ tɔ́g, vu̵ fȩȩn moo Tayɨɨ né, vu̵ móó moo ya̧ŋ vu̵ yúú moo Tayɨɨ yȩlȩ́ zo"ı̵́. Pól ka ho̧ ná' máa, daa ɓɛ waa duulí Yesu woo vu̵ lúun, la tú'ud vu̵ moo Tayɨɨ zá̧ga̧ 'waapád, lig zaŋde Tiranúsdı̵́.

¹⁰Pól mbaa wu̵lı̵́ há̧á̧ ve' idú, há̧á̧ nán ku̵u̵ mbaa hág Aazíilí 'waapád, vu̵ ki moo ı̵́ 'yɛ́lı̵́ woo, nán Yúúda vu̵ kan nán ı̵́ ku̵u̵ Yúúda pɛ́lı̵́ máa vu̵ á̧ḿ.

¹¹Tayɨɨ baa pú̵ Pól néélȩ́ kɔ́ hȩn sa̧ga̧ ı̵́ ku̵u̵ baa ɓán kɔ́lı̵́ né máa.

¹²Sa̧a̧m ha̧a̧g na'ané vu̵ kan sa̧a̧m tóó Pól ka za' vu̵ máa, nán vu̵ baa ɓɛ pa̧n nán ho̧o̧ vu̵, tée ho̧o̧ voo ka̧' vu̵. Sa̧a̧m yȩ vu̵u̵ kɔ́ ma yigid ɓı̵́d vu̵ vúd fó̧ó̧ nánán voolı̵́ á̧ḿ.

¹³Nán Yúúda tóó ku̵u̵ 'yȩ́ḿ nɛ́ŋ́ daa yigid ɓı̵́d vu̵ vud fó̧ó̧ nánán voolı̵́ máa, vu̵u̵ bi bee yɛ́g Yesu woo á̧ḿ, vu̵ o̧d yigid ɓı̵́d vu̵: “Mí o̧d ví kan yɛ́g Yesu ı̵́ Pól ka pa moo woo yȩ nɔ, i vúd la fó̧ó̧ nán yȩ woolı̵́.”

¹⁴Nán ı̵́ ku̵u̵ kɔ́ hȩn yȩ, tóó vu̵ waa ı̵́ nii hȩn ha"ı̵́ nán Yúúda woo tóó nɔ, yéé woo Sééva; waa yȩ ká vu̵ dɨ gúndɛm.

¹⁵A̧máa yigid ɓı̵́d pee hí̧i̧d vu̵: “Mí gaa Yesu ú̵. Mí gaa Pól á̧ḿ. A̧máa ı̵́ víí máa, ví nɔ́nná?”

¹⁶Nán yigid ɓı̵́d ka fígiwu̵ pee wa̧ŋ pɛd vu̵ la fó̧lȩ́, mba vu̵ 'waapád, ma vu̵ hɨ'ɨ ɗug lig woolı̵́, fó̧ó̧ leená. Nán pee dú̵ vu̵ ndɔ́g á̧ḿ.

¹⁷Nán Yúúda vu̵ kan nán ı̵́ ku̵u̵ Yúúda pɛ́lı̵́ ku̵u̵ mbaa kaa gbaŋ Ɛfɛ́ɛzlı̵́ máa, vu̵ ki hȩn yȩ. Dú̵ú̵ kɔ́ vu̵ 'waapád. Vu̵ na' yɛ́g ı̵́ 'yɛ́lı̵́ Yesu woo.

¹⁸Nán ku̵u̵ 'yɛ́ zó̧ó̧ voo Yesu woolı̵́ máa, ɓu̵u̵lı̵́ na'a vu̵ ya vud hȩn ɓı̵́d kɔ́lı̵́ voo vu̵ o̧ la zo"ı̵́.

¹⁹Tóó vu̵ ɓu̵u̵lı̵́ na'a ı̵́ ku̵u̵ ho̧ gan máa, vu̵ pa̧ŋ debtere gan ho̧lȩ́ voo vu̵ ya a̧n la zo"ı̵́. Ka vu̵n gí debtere yȩ vu̵ gílíi tée, sɔ́g woo kan dɨ miliyó̧ŋ nɔ́nɔ́.

²⁰Moo ı̵́ 'yɛ́lı̵́ Yesu woo laa tíŋ́ tíŋ́ kan néélȩ́ ı̵́ yo̧go̧.

²¹Hȩn yȩ ka kɔ́y sú̵'ú̵ máa, Pól taa moo woolı̵́ zó̧ó̧lȩ́, hí̧í̧ bi ya̧a̧ duu hág Masedo̧wá̧nné kan Akáyyı̵́ á̧ḿ, tée bi daa laa Yerúsalemmé, ma o̧: “A̧n laa tée, míń daa ya̧a̧ la kaa gbaŋ Rómalȩ́ á̧ḿ.”

²²Pól ba' la waa ba'ad woo Timɔtée vu̵ kan Ɛrás, hág Masedo̧wá̧nné, ma Pól səə woo hág Aazíilí bá' waaná'.

²³Sey woo máa, moo gbo̧o̧ tóó lúú yúú moo ı̵́ 'yɛ́lı̵́ Yesu woolı̵́.

²⁴Naŋ tóó yéé woo Demetiríi mbɔ́g lig hȩn ha"ı̵́ kan sardi, moo u̵u̵ ha'ad tayɨɨ voo Aatemíi hȩn wu̵lı̵́. Naŋ vu̵ baa nuŋ hȩn naa wu̵lı̵́ ɓu̵u̵lı̵́ na'a á̧ḿ.

²⁵Demetiríi pee su̵g naŋ tóó vu̵ kan nán ba'ad voo vu̵, ma o̧d vu̵: “Nán yɛ ví, ví gaa hȩn naa baa ví, wu̵ ba'ad baa ví yɛ nɔ.

²⁶Ví ho̧, ví ki hȩn Pól ka o̧, tayɨɨ nánán ba ku̵u̵ mbɔ́g kan nag máa, ba Tayɨɨɨ pɛ́lı̵́ máa á̧ḿ. Pól zo' nán Ɛfɛ́ɛz vu̵, zaa kan zo' nán Aazíi vu̵ 'waapád á̧ḿ, ma dúú ɓu̵u̵lı̵́ na'a vu̵ dugu.

²⁷Nán vú̵ń ho̧ ba'ad baa ví hȩn leene. A̧máa vú̵ń ho̧ lig hȩn ha"ı̵́ tayɨɨ gbo̧o̧ baa ví Aatemíi woo yȩ hȩn leene á̧ḿ. Tayɨɨ máa yȩ, nán 'waapád vu̵ na' də́ń wu̵ yu̵ hág Aazíilí yɛlı̵́ kan hág tóó vu̵ 'waapád, a̧máa zaa wú̵ń tii sı̵́ hȩn lee ú̵.”

²⁸Sey nán ku̵u̵ ki la moo yȩ ná' máa, vu̵ kɔ́ zó̧ó̧ yȩ́ȩ́, vu̵ bé' wa̧ya̧g wa̧a̧lȩ́, vu̵ baa o̧: “Aatemíi nán Ɛfɛ́ɛz voo, wu̵ hȩn gbo̧o̧, wu̵ hȩn gbo̧o̧.”

²⁹Vu̵ fá̧'a̧ kɔɔg fȩȩ kaa 'waapád. Nán vu̵ laa ɗug, ya voo 'waapád saalı̵́. Nán ku̵u̵ dɨ sú̵ggı̵́ yȩ vu̵ ma' Gayús vu̵ kan Aristáar á̧ḿ (ká vu̵ nán Masedo̧wá̧n tóó vu̵ yu̵), vu̵ pa̧ŋ vu̵ nagá. Nán idú yȩ ká vu̵ sú̵g 'yȩm kan Pól á̧ḿ.

³⁰Pól á̧ḿ, hí̧í̧ bi vúd maa dúú vu̵ la wu̵lı̵́, a̧máa waa duulí Yesu woo vu̵ há"u̵.

³¹Minísta tóó hág Aazíilí ku̵u̵ kɔ́ dag gboo kan Pól máa, vu̵ ba' la dȩnnɔ nag ba a laa saalı̵́ sá,

³²moo dúú vu̵n dɨ lá zó̧ó̧ yȩ́ȩ́ kɔ́lı̵́ɨ. Nán tóó vu̵ moo dɔg moo yúba, vu̵ ó̧ moo kə́dkə́d. Nán ɓu̵u̵lı̵́ na'a vu̵ gaan sú̵ggı̵́ yȩ do̧o̧ woo né á̧ḿ.

³³Nán tóó yéé woo Alegzá̧ŋndərə. Nán Yúúda vu̵ sȩnnɔ fó̧ó̧ ba a la moo mooɨ. Alegzá̧ŋndərə ka ki moo 'waa sú̵'ú̵ máa, luu dɔg nag, hí̧í̧ bi gəd dúú vu̵, bi o̧d vu̵ moo waaná' yúú woolı̵́.

³⁴A̧máa dúú ku̵u̵ ki ba nán Yúúdaɨ máa, ya voo 'waapád vu̵ faa moo dágá yȩ, vu̵ baa o̧: “Aatemíi nán Ɛfɛ́ɛz voo, wu̵ hȩn gbo̧o̧.” Zamndi idú ku̵u̵ ya̧a̧ sú̵'ú̵ máa, moo vu̵ gə́d.

³⁵Ma akaw nán Ɛfɛ́ɛz voo tóó gəd vu̵, o̧d vu̵: “Nán Ɛfɛ́ɛz vu̵! Nán 'waapád vu̵ gaa kaa gbaŋ Ɛfɛ́ɛz ba wu̵ tu̵ lig Aatemíi gbo̧o̧ woo kan fóto woo ka pɛ zu̵u̵ be"ı̵́ yȩ á̧ḿ. Ɨ́ yo̧go̧ pɛ́láa?

³⁶Nán tóó wú̵ń o̧n ba vbáddɨ né. Ndíga i mbaa la víí simmi, i há̧n sá.

³⁷A̧máa ví pa̧ŋ nán yȩ vu̵ yaan yɛlı̵́, vu̵ lı̵́n ná hȩn tóó lig hȩn ha"ı̵́lı̵́ né, vu̵ haan tayɨɨ baa ví ní á̧ḿ.

³⁸Tow Demetiríi u̵u̵ kan nán ba'ad woo vu̵ u̵u̵ dɨ kan moo tóó bi doo nán tóó nɔ tée, u̵u̵ pa̧ŋ vu̵ ya ú̵. Zá̧ga̧ u̵u̵ mbɔ́g moo wu̵lı̵́ máa, dɨlı̵́. Nán moo mbɔ́ggı̵́ vu̵ dɨlı̵́ á̧ḿ.

³⁹Kíí dɨ kan moo tóó bi duu ú tée, ba la mbɔ́g ví ya sú̵ggı̵́ baa vílí.

⁴⁰Hȩn kaa kɔ́ ví ɓəə yɛ, maa ba vu̵n doo ba ví wu̵lı̵́ máa ó̧. Ba ví kan moo yȩ́ń tóó wu̵lı̵́ waaná' aga, ban sú̵g ví, ma ban dii ví wu̵lı̵́ dəg máa pɛ́lı̵́.”

⁴¹Ka moo moo yȩ 'waa máa, daa nɛŋ dúú vu̵ gbɔ la.