Read Dii Debtere ba'ad waa ba'ad voo nɔ 21 Bible Online

Debtere ba'ad waa ba'ad voo nɔ 21 - Dii bible

Debtere ba'ad waa ba'ad voo nɔ 21

¹Kóó hı̵́'ı̵́n sı̵́ kan vu̵ ú̵ máa, vɔ́ dɔ́ nɛ́ŋ́ daa líí la mam bam tóó ku̵u̵ beewu̵ Kós máalȩ́. Ya̧g ka̧'a̧m woo máa, vɔ́ daa ya̧ la mam bam Róódəlı̵́, ma vɔ́ duu lúú daa laa kaa Pataráalı̵́.

²Vɔ́ nuŋ nɛ́ŋ́ tóó kaa yȩlȩ́ ka dɨ laalı̵́ hág Fenisíilí máa, ma vɔ́ dɔ́ wu̵lı̵́, vɔ́ daa laa.

³Kóó ya̧ la dáŋ́ mam bam Kíipərəlı̵́ bə́' máa, vɔ́ gbɔgɔ nag kpáagı̵́, vɔ́ daa laa kan nɛ́ŋ́ pee há̧á̧ hág Siiríilí, vɔ́ la ya̧ kaa Tír, moo vu̵ hí̧í̧ bi sid hȩn gané voo vu̵ wu̵lı̵́.

⁴Vɔ́ nuŋ waa duulí Yesu woo tóó vu̵ wu̵lı̵́, ma vɔ́ mbaa kan vu̵ alad dágá. Yigid Tayɨɨ woo o̧d vu̵ moo, ma vu̵ o̧d Pól ba a dɔg Yerúsalemmé sá.

⁵A̧máa kóó mbaa wu̵lı̵́ kan vu̵ alad dágá máa, nán pee vu̵ ba' vɔ́, ya voo 'waapád, wayée kan wakȩ́ȩ́ kan wasá̧ŋ́ waa vu̵ á̧ḿ, vu̵ vud vɔ́ la kaa pigim. Vɔ́ gu doo núug hágá, vɔ́ o̧d Tayɨɨ moo ya̧g mam gbo̧o̧ yȩlȩ́.

⁶Sey kóó vá'án 'waa sú̵'ú̵ máa, vɔ́ dɔ́ vóó nɛ́ŋ́ŋı̵́, ma vu̵ daa vȩ́' la voo ya mbaalı̵́ voolı̵́.

⁷Kóó lúú kaa Tírlı̵́ máa, vɔ́ si̧' 'yȩ́ȩm kan nɛ́ŋ́ kaa Tolomɛ́ɛlı̵̧́. Vɔ́ vá' nán kirtȩ́n vu̵ wu̵lı̵́, vɔ́ səə kan vu̵ zá̧ga̧ dágá.

⁸Ya̧g ka̧'a̧m woo máa, vɔ́ duu lúú wu̵lı̵́, vɔ́ ya̧ dɔg kaa Sezaréelı̵́. Vɔ́ duu lig Filíb nán moo to̧o̧ 'maŋ tú"í tóó woolı̵́, vɔ́ ud wu̵lı̵́. Filíb yȩ, ká dɨ sa̧a̧m fó̧ó̧ gúndɛm ku̵u̵ yee vu̵ Yerúsalemmé máa voolı̵́.

⁹Ká dɨ kan wakȩ́ȩ́ waa vu̵ ndaddú̵, vu̵ éen wə̧ə̧ né, vu̵ baa moo voo moo anábiɨ.

¹⁰Kóó mbaa wu̵lı̵́ bá' ɓu̵u̵lı̵́ na'a máa, anábi tóó lúú zu̵u̵ hág Yúúdalı̵́, yéé woo Agabúu.

¹¹Yaa vóólı̵́, ɓɛ dɔg kandá Pól woo, ta doo woo kan nag woo á̧ḿ, o̧: “Hȩn yigid Tayɨɨ woo ka o̧ máa, wu̵ yɛ nɔ. Nán ka dɨ kan kandá yɛ, nán Yúúda vú̵ń taga ı̵́ yɔgɔ Yerúsalemmé, tée vú̵ń dɔddu̵ nag gáá voolı̵́.”

¹²Sey kóó ki la moo yȩ ná' máa, vɔ́ kan nán sú̵ggı̵́ ı̵́ kaa Sezaréelı̵́ vu̵, vɔ́ dȩn Pól nag: “Úsȩnɛ, a̧m dɔg Yerúsalemmé sá.”

¹³A̧máa Pól hí̧i̧d vɔ́: “Ví ká̧ŋ́ moo ȩná? Ví hí̧í̧ bi to̧'o̧n zó̧ó̧ȩ! Ɨ́ míí, mí hí̧i̧n moo talı̵́ɨ dágá né, a̧máa kóó u̵u̵ bi nɔɔn moo ı̵́ 'yɛ́lı̵́ Yesu woo nɔ Yerúsalemmé si̧', moo tóó pɛ́lı̵́.”

¹⁴Pól ka fȩȩn moo vóó né máa, 'wáa yȩ, vɔ́ o̧: “Ɨ́ 'yɛ́lı̵́ a kɔ́ hȩn hí̧í̧lí̧ woo nɔ.”

¹⁵Pig bá' tóó vu̵lı̵́ máa, vɔ́ mbɔ́g hȩn vóó vu̵, vɔ́ daa dɔg Yerúsalemmé.

¹⁶Waa duulí Yesu woo kaa Sezaréelı̵́ tóó vu̵ ba' vɔ́ laan nán Kíipərə tóó woolı̵́, moo a sid vɔ́ ú̵. Yéé woo Manasó̧ŋ. Ká 'yɛ́ zó̧ó̧ woo Yesu woolı̵́ ɗii sú̵'ú̵.

¹⁷Sey kóó ya̧ Yerúsalemmé máa, nán sú̵ggı̵́ vu̵ fȩȩ vɔ́ kan zó̧ó̧ dȩ"ȩ́.

¹⁸Ya̧g ka̧'a̧m woo máa, Pól daa laa Yaakúbu ho̧lȩ́, vɔ́ sú̵g laa á̧ḿ. Ɨ́ nii sú̵ggı̵́ vu̵ sú̵g wu̵lı̵́ 'waapád.

¹⁹Pól vá' vu̵, pá'ad vu̵ hȩn Tayɨɨ ka kɔ́ yúú ba'ad woolı̵́ hág tóó vu̵lı̵́ yȩ, kan ya woo, ya woo 'waapád.

²⁰Sey nán yȩ ku̵u̵ ki máa, vu̵ na' Tayɨɨ, ma vu̵ o̧d Pól: “Dag sá̧ŋ́, mɔ́ ho̧ nán Yúúda vu̵ uzinɛɛre ɓu̵u̵lı̵́ na'a vu̵ tii nán zó̧ó̧ 'yɛ́lı̵́ sú̵'ú̵, a̧máa vu̵ pi zó̧ó̧ yúú debtere Múúsa woolı̵́ 'yɛ́nné.

²¹Vu̵ ki ba mɔ́n tú'ud nán Yúúda ı̵́ ku̵u̵ mbaa sa̧a̧m zig nán tóó voolı̵́ yȩ, ba u̵u̵ duu dooká Múúsa woo vu̵ sá, ba mɔ́n o̧d vu̵ u̵u̵ dɔd waa vu̵ do̧ŋ sá, ba u̵u̵ duu hȩn dikab baa ví sá á̧ḿ máalá̧!

²²Báń kɔ́ ví nɛ́nná, moo vú̵ń gaa ba mɔ́n yaa dɨ yɛlı̵́.

²³Moo woo nɔ, a̧m kɔ́ hȩn kóó dɨm o̧lȩ́ yɛ nɔ. Nán tóó vu̵ dɨ yɛlı̵́ ndaddú̵, ká vu̵ ta ya̧g bi kɔ́d Tayɨɨ ba'adɨ, ma bá' voo 'wáa sú̵'ú̵.

²⁴A̧m ɓɛ vu̵, ví sú̵g woo mam á̧ḿ, tée mɔ́ sú̵u̵d vu̵ hȩn ha"ı̵́ voo, u̵u̵ yu̵ vu̵ yúú á̧ḿ, tée nán 'waapád vú̵ń gaa moo ku̵u̵ pá'ad vu̵ yúú móólȩ́ yȩ ba moo vbáddɨ. Vú̵ń gaa ba mɔ́n duu dooká Múúsa woo vu̵ á̧ḿ.

²⁵Moo nán ı̵́ ku̵u̵ Yúúda pɛ́lı̵́ ma ku̵u̵ tii 'yɛ́ zó̧ó̧ voo Yesu woolı̵́ máa voo, vɔ́ ba'ad vu̵ ɗerwəl sú̵'ú̵, vɔ́ o̧d vu̵ hȩn kóó mbɔ́g máa á̧ḿ: u̵u̵ lá hȩn mɛm ku̵u̵ sə̧'ə̧d tayɨɨ lee vu̵ sá, u̵u̵ lá mɛm sá, u̵u̵ lá pú̵g sə́g vəgə́ sá, u̵u̵ gág hȩn sí̧i̧d kɔ́lı̵́ á̧ḿ.”

²⁶Pól ka ki máa, sú̵g laa kan nán ndaddú̵ pee vu̵, vu̵ sú̵g woo mam á̧ḿ ya̧g ka̧'a̧mé, ma vu̵ daa laa lig hȩn ha"ı̵́lı̵́, vu̵ o̧d nán hȩn ha"ı̵́: “Zá̧ga̧ mam woolı̵́ vóó a si̧' tée, vɔ́ń ha' hȩn ya vóó 'waapád.”

²⁷Bá' gúndɛm yȩ ka dɨ 'wáané máa, nán Yúúda ı̵́ ku̵u̵ yaa hág Aazíilí máa, vu̵ ho̧ Pól lig hȩn ha"ı̵́lı̵́, ma vu̵ fá̧á̧ dúú vu̵, vu̵ ma"o̧.

²⁸Vu̵ moo dɔg moo yúba, vu̵ o̧: “Nán Izraɛ́l vu̵, i maa vɔ́ yɛlı̵́! Nán ka baa pad nán vu̵ moo ɓı̵́d yúú zig Izraɛ́llı̵́, kan yúú debtere Múúsa woolı̵́, kan lig hȩn ha"ı̵́lı̵́ yɛlı̵́ á̧ḿ pee, wu̵ yɛ nɔ. Duu ɓɛ nán Gɛrɛ́g tóó, dɔd dɨ lig hȩn ha"ı̵́lı̵́, vi̧i̧ sı̵́ lig Tayɨɨ woo ú̵.”

²⁹Vu̵ moo moo yȩ, moo ku̵u̵ ho̧ Pól ka 'yȩm kan Trofím nán Ɛfɛ́ɛz tóó kaalı̵́ má nɔ, ma vu̵ taa Pól ba pa̧ŋ dɔddu̵ dɨ lig hȩn ha"ı̵́lı̵́.

³⁰Kaa nam 'waapád kan moo yȩ. Dúú vu̵ kɛ ɗug yaa ya 'waapád. Vu̵ ma' Pól, vu̵ woowu̵ vud la lig hȩn ha"ı̵́lı̵́, vu̵ tú̵'u̵ ya̧g dɔ́m vu̵ vaŋná vaŋná.

³¹Vu̵ hí̧í̧ bi nɔɔwo̧ də́ń nɔɔnée. Kolonɛ́l nán Róma voo ka ki Yerúsalem ba nam 'waapád máa,

³²fá̧á̧ só̧ó̧ze woo vu̵ kan ı̵́ nii só̧ó̧ze vu̵, vu̵ kɛ ɗug laa dúú pee voolı̵́. Dúú ku̵u̵ ho̧ kolonɛ́l kan só̧ó̧ze vu̵ la ná' máa, vu̵ duu gbɔ́n sı̵́ Pól né.

³³Kolonɛ́l séé ya Pól woolı̵́, o̧d só̧ó̧ze vu̵ u̵u̵ ga"u̵ kan ɗág idú, ma duu vi vu̵: “Nán yɛ nɔ́nná? Kɔ́ ȩná?”

³⁴A̧máa dúú vu̵ hí̧í̧ ya̧g kə́dkə́d. Kolonɛ́l gɛ moo woo pəgən dágá né sá̧ḿ, o̧d só̧ó̧ze u̵u̵ pa̧ŋ Pól la lig go̧ŋŋı̵́.

³⁵Sey Pól ka dɨ ɗáálı̵́ dɔg ya ya̧gníim ku̵u̵ yo̧o̧ yȩlȩ́ máa, só̧ó̧ze vu̵ gaŋŋɔ də́ń ganée, moo dúú vu̵u̵ bi vbiddu̵ kɔɔgná.

³⁶Dúú vu̵ 'waapád vu̵ moo dɔg moo yúba, vu̵ baa o̧: “I nɔɔwo̧ nɔɔnée!”

³⁷Ku̵u̵ dɨ Pól dɔnné la lig go̧ŋŋı̵́ máa, Pól o̧d kolonɛ́l: “Mí hí̧í̧ bi o̧d ví mooɨ.” Kolonɛ́l ka ki máa, vigi: “Mɔ́ ki ya̧g gɛrɛ́ggáa?

³⁸Móo nán Mísira tóó ka há̧á̧ tó̧' kɔɔg, ka pa̧ŋ kɛm vu̵ dɔd hó̧gó̧, fó̧ó̧ uzinɛɛre ndaddú̵ má nɔ pɛ́láa?”

³⁹Pól hí̧i̧du̵: “Mí míí nán Yúúdaɨ. Vu̵ ha̧a̧n kaa Társəlı̵́, hág Silisíilí. Mí waa kaa gbo̧o̧ȩ. Mí dȩm nag, a̧m gbɔn mí o̧d dúú yȩ vu̵ mooɨ.”

⁴⁰Kolonɛ́l pee o̧ddu̵: “A̧m o̧ la ú̵.” Ma Pól dii zu̵u̵ ya̧gníim fa̧a̧n ku̵u̵ yo̧o̧ máalȩ́. Gəd dúú vu̵ moo kan nag. Ku̵u̵ mbaa simná máa, Pól ka moo sɔd vu̵ kan ya̧g eebərə́ə, o̧: