Read Dii Debtere ba'ad waa ba'ad voo nɔ 27 Bible Online

Debtere ba'ad waa ba'ad voo nɔ 27 - Dii bible

Debtere ba'ad waa ba'ad voo nɔ 27

¹Sey ku̵u̵ mbɔ́g moo Pól a laa hág Italíilí kan nɛ́ŋ́ŋɨ máa, vu̵ ɓɛgɛ kan púúsina tóó vu̵, vu̵ pú̵ ı̵́ nii só̧ó̧ze tóó ku̵u̵ beewu̵ Zulús máa, ka dɨ kan hú' só̧ó̧ze tóó ku̵u̵ beewu̵ “ı̵́ gbanii woo” má nɔ.

²Ma vɔ́ dɔ́ nɛ́ŋ́ nán Adramíd voo tóólı̵́, ká dɨ laalı̵́ hág Aazíi ka' tóólı̵́. Vɔ́ laa kan Aristáar nán Masedo̧wá̧n tóó ka mbaa kaa Tesaloníilí̧ máa á̧ḿ.

³Ya̧g ka̧'a̧m woo máa, vɔ́ ya̧ la kaa Sidɔ́ŋŋı̵́. Ma Pól hí̧í̧ bi la ho̧ daga gboo vu̵, bi nuŋ hȩn tóó voolı̵́. Zulús pee kɔ́ddu̵ zó̧ó̧ nán, o̧ddu̵ a laa la ú̵.

⁴Kóó duu lúú wu̵lı̵́ máa, vɔ́ yóó duu ka' mam bam Kíipərəlı̵́, ya sápéém ka ɓu̵u̵n wu̵lı̵́ na'a né máalȩ́, moo sápéém ká yaad vɔ́ dɨ tíŋ́.

⁵Vɔ́ ya̧a̧ duu bə́' dáŋ́ hág Silisíilí, kan Pa̧mfilíi, ma vɔ́ daa ya̧ la kaa Míralı̵́, hág Lisíilí; vɔ́ sí zu̵u̵ nɛ́ŋ́ŋı̵́ wu̵lı̵́.

⁶Ɨ́ nii só̧ó̧ze pee nuŋ nɛ́ŋ́ tóó wu̵lı̵́, yaa diga kaa gbaŋ Alegza̧ŋnderíilí, dɨ laalı̵́ hág Italíilí, ma ı̵́ nii só̧ó̧ze pee mbɔ́g moo vɔ́ dɔ́ wu̵lı̵́.

⁷Vɔ́ lúú wu̵lı̵́, vɔ́ baa 'yȩm kan nɛ́ŋ́ sá̧á̧sá̧á̧, bá' ɓu̵u̵lı̵́ na'a, moo sápéém há' vɔ́ laalı̵́ tíŋ́ á̧ḿ. Vɔ́ kəə ha̧a̧g ná', ma vɔ́ ya̧ dáŋ́ kaa Kiníddí. Vɔ́ daa sə̧' duu kan nɛ́ŋ́ ka' tóólı̵́, ya sápéém ka ɓu̵u̵n wu̵lı̵́ na'a né máalȩ́, vɔ́ la vúd mam bam Kerɛ́ddı̵́ Salmɔníilí.

⁸'Yȩ́m ka təə vɔ́ máa, vɔ́ duu ka' ya̧g nɛ'ɛmé; ma vɔ́ la ya̧ ya tóó ku̵u̵ beewu̵ “Ya nɛ́ŋ́ ɗaané du̵u̵” máalȩ́, dáŋ́ kaa Laséelı̵́.

⁹Kóó səə hi̧naalȩ́ na'a máa, vɔ́ ndɔg laalı̵́ tíŋ́, moo vɔ́ gaa sápéém gbo̧o̧ ban dɨ yaalı̵́ɨ, moo bá' hȩn lálı̵́ kȩȩlȩ́ nán Yúúda voo ya̧a̧ sú̵'ú̵ á̧ḿ. Ma Pól o̧d vu̵ moo yɛ, o̧:

¹⁰“Baa vu̵, mí ho̧ 'yȩ́m baa ví yɛ wú̵ń təə ú̵. Nɛ́ŋ́ kan hȩn gané vú̵ń lı̵́d, báń nɔɔ ví 'waa á̧ḿ máalá̧!”

¹¹A̧máa ı̵́ nii só̧ó̧ze pee 'yɛ́ sı̵́ zó̧ó̧ gbaŋ nɛ́ŋ́ yú̵ú̵lı̵́ woolı̵́, kan ı̵́ nɛ́ŋ́ aga woolı̵́ á̧ḿ, a̧máa 'yɛ́n sı̵́ zó̧ó̧ moo Pól woo ba o̧n yȩlȩ́ né.

¹²Ya nɛ́ŋ́ ɗaané woo ka du̵u̵n nɛ́ŋ́ ga"ı̵́ wu̵lı̵́ bá' sápéémé né máa, nán tóó vu̵ ɓu̵u̵lı̵́ na'a nɛ́ŋ́ tíŋ́ vu̵ mbɔ́g moo, bi lúú laa tíŋ́, bi soo hi̧naa bi dɔgga mbaa kaa Feníggí, ya nɛ́ŋ́ ɗaané tóólı̵́, mam bam Kerɛ́d peelı̵́, bi la mbaa wu̵lı̵́ sey ho̧o̧mé. Ya nɛ́ŋ́ ɗaané yȩ ká 'yɛ́ la nɔ́ɔ́ dɨ ka' mam waalı̵́.

¹³Sápéém waa tóó ka yaa ka' mam wázammé máa, vu̵ taa voo ba bíń 'waa 'yȩ́m bii kɔ́ ı̵́ ku̵u̵ mbɔ́g wɔgɔ, ma vu̵ bé' zaŋ nɛ́ŋ́ ga"ı̵́ buuní, vu̵ lúú, vu̵ duu ya̧g nɛ'ɛm mam bam Kerɛ́ddı̵́.

¹⁴A̧máa kóó laa tíŋ́ waaná' máa, sápéém gbo̧o̧ tóó la yaa vaŋná ka' mam gbɔ́zammé, sí zu̵u̵ gu̵u̵lı̵́ mam bam peelı̵́.

¹⁵Ndaa nɛ́ŋ́ vȩ' la pigim, kɛb tóó vu̵n kɔ́ ma, ba mba sápéém yȩ máa pɛ́lı̵́. Vu̵ gbɔd mam fó̧ó̧, gaŋ vɔ́ laan.

¹⁶Daa duun vɔ́ mam bam tóólı̵́ Kolóódalı̵́, ma vɔ́ gu̵g kɨ sápéém wu̵lı̵́. Vɔ́ kəə ha̧a̧g ná', ma vɔ́ gaŋ nɛ́ŋ́ waa

¹⁷dɔd nɛ́ŋ́ gbo̧o̧lȩ́. Vu̵ vbáa nɛ́ŋ́ gbo̧o̧ yȩ kan zaŋ moo a lı̵́d sá. Vu̵ ndɔg ba bíń la zuguy hád sagad hág Sírtəlı̵́ á̧ḿ; moo woo nɔ vu̵ mbɔ́g hȩn tóó ta pig nɛ́ŋ́ŋı̵́, moo sápéém a gaŋ laan bi há̧ná sá, a̧máa sápéém baa gaŋ vɔ́ laan vóó ı̵́ yo̧go̧.

¹⁸Sápéém baa pɛ, mam nam ɓu̵u̵lı̵́ na'a há̧á̧ ha̧a̧ há̧á̧ ha̧a̧; ya̧g ka̧'a̧mé máa, vu̵ dəŋ gaŋ hȩn gané tóó vu̵ gbóo zu̵u̵ mammé.

¹⁹Bá' idú, ta̧a̧nɔ́ woo máa, aga vu̵ hə̧ə̧ hȩn ba'ad voo vu̵ nɛ́ŋ́ŋı̵́ gbóo zu̵u̵ mammé á̧ḿ.

²⁰Vɔ́ duu ho̧n sı̵́ zá̧ga̧ kan zoo waa vu̵ né á̧ḿ bá' ɓu̵u̵lı̵́ na'a; sápéém gbo̧o̧ pee pɛ mbaa woo wu̵lı̵́ ı̵́ yo̧go̧. Mam nam du̵u̵n də́ń né, zó̧ó̧ sú̵d vɔ́ la yɨd, vɔ́ taa ba bíń duu sə́n sı̵́ né.

²¹Ku̵u̵ lán hȩn né bá' ɓu̵u̵lı̵́ na'a máa, Pól lúú dii dɔg yúba, o̧d vu̵: “Baa vu̵, ba ka víń ki moo míí ú̧ tée, ka ban lúun ví ya Kerɛ́ddı̵́ né, tée ka ban ho̧n ví moo gbo̧o̧, ka ban tun ví hȩn na'a ı̵́ yo̧go̧ né á̧ḿ.

²²A̧máa 'ya̧'a̧ yɛ máa, mí vi ví i ndag la sı̵́ zó̧ó̧ȩ, moo nán dágá aga wú̵ń nɔɔ né, a̧máa séý nɛ́ŋ́ wú̵ńnɔ lı̵́d dágá.

²³Vid ɓəə yɛ maleeka Tayɨɨ míí káń kɔ́ddu̵ ba'ad yɛ woo, yaa míílí̧,

²⁴o̧n: ‘Pól, a̧m kɔ́ dú̵ú̵ sá. Mɔ́ń la dii tíŋ́ gbanii nán Róma voo woolı̵́ pȩ́ń; Tayɨɨ wú̵ń kɔ́m zó̧ó̧ nán, wú̵ń tu̵ nán kíí yaa kan vu̵ nɛ́ŋ́ŋı̵́ yɛ vu̵ á̧ḿ.’

²⁵Moo woo nɔ, baa vu̵, mí o̧d ví, i ndag zó̧ó̧ la ú̵! Mí 'yɛ́ zó̧ó̧ míí dɨ Tayɨɨ woolı̵́, wú̵ń kɔ́ hȩn ka o̧n yɛ ú̵.

²⁶A̧máa nɛ́ŋ́ wú̵ń lı̵́d ba ví mam bam tóólı̵́ ú̵.”

²⁷Sápéém ka baa gaŋ vɔ́ laan sa̧a̧m mam gbo̧o̧ Mediteranɛ́ɛlȩ́ ı̵́ yo̧go̧o̧o̧ há̧á̧ bá' wa̧nɓó' zu̵u̵ ta̧a̧nɔ́, zu̵u̵ ndaddú̵ woo vid sa̧a̧mé máa, nán nɛ́ŋ́ yȩ vu̵ taa ba vɔ́n ya̧ sı̵́ hággú̵.

²⁸Ma vu̵ gú̵g mam, vu̵ ho̧ súlí woo dɨ mɛ́ɛtər vo' ta̧a̧nɔ́ zu̵u̵ gúndɛm. Vu̵ duu séé la tíŋ́ waaná', vu̵ duu gú̵g ho̧, vu̵ nuŋ dɨ mɛ́ɛtər gbɛg zu̵u̵ ka'andaddú̵.

²⁹Vu̵ ndɔg nɛ́ŋ́ ban zuguy 'yɛgɛlı̵́, ma vu̵ gáŋ́ hȩn nɛ́ŋ́ ga"ı̵́ vu̵ ndaddú̵, vu̵ paga vu̵ zu̵u̵ mammé nɛ́ŋ́ pigim, ma vɔ́ dii laa ya túlí wu̵lı̵́.

³⁰Nán ba'ad nɛ́ŋ́ tóó vu̵ hí̧í̧ bi lúú ɗuggi á̧ḿ; vu̵ sid nɛ́ŋ́ waa pee zu̵u̵ mammé, vu̵ kɔ́ kɔ́ ı̵́ ku̵u̵ laa hȩn nɛ́ŋ́ ga"ı̵́ paggı̵́ mig nɛ́ŋ́ŋı̵́ wɔgɔ.

³¹A̧máa Pól duu o̧d ı̵́ nii só̧ó̧ze pee moo kan só̧ó̧ze vu̵ á̧ḿ, o̧: “Tow nán yȩ u̵u̵ mbaan nɛ́ŋ́ gbo̧o̧ yɛlı̵́ né tée, víń gbɔ sɔ́n dágá aga né.”

³²Ma só̧ó̧ze vu̵ sə̧' zaŋ vu̵n ta nɛ́ŋ́ waalı̵́ pee, vaŋná nɛ́ŋ́ waa daa ka la.

³³Dam yɔ́ggı̵́ máa, Pól bee vu̵ ya 'waapád, o̧d vu̵ moo hȩn lálı̵́, o̧: “I ho̧, ba gbəə mbaa ví bá' wa̧nɓó' zu̵u̵ ndaddú̵ wu̵ ɓəə yɛ nɔ. Ví lán hȩn né á̧ḿ.

³⁴Ma mí hí̧í̧ bi o̧d ví i lá hȩn la ú̵, tée víń sə́d. A̧máa nán tóó yúú hú̧' woo wú̵ń to̧'o̧y pɛn dágá aga né á̧ḿ.”

³⁵Sey Pól ka o̧ moo yȩ gəd la ná' máa, ɓɛ beréd, dȩn Tayɨɨ nag, yɨ zu̵u̵, ma bé' lálı̵́ nɔ́ɔ́ voolı̵́.

³⁶Nán 'waapád vu̵ ho̧, vu̵ zi̧i̧ zó̧ó̧ lá hȩn la ı̵́ yo̧go̧.

³⁷Ká vɔ́ dɨ nɛ́ŋ́ yȩlȩ́, fó̧ó̧ tȩmɛre idú kan fó̧ó̧ vo' gúndɛm zu̵u̵ gúú.

³⁸Sey ku̵u̵ lá hȩn 'waa máa, vu̵ gáŋ́ tú̵d, vu̵ gbóo zu̵u̵ mammé, moo a zi̧i̧ nɛ́ŋ́ŋı̵́ sá.

³⁹Ya̧g ka̧'a̧m ka tú máa, nán ba'ad nɛ́ŋ́ŋı̵́ vu̵ gaan ya ku̵u̵ diin wu̵lı̵́ yȩ né, a̧máa vu̵ ho̧ ya nduguyní tóó, kan hád sagad wu̵lı̵́ á̧ḿ, ma vu̵ mbɔ́g moo u̵u̵ pa̧ŋ nɛ́ŋ́ laan ya yȩlȩ́.

⁴⁰Vu̵ buu zaŋ nɛ́ŋ́ ga"ı̵́ pee vu̵ gbóo la mam gbo̧o̧lȩ́ wu̵lı̵́ á̧ḿ. Vu̵ buu zaŋ faan gbo̧o̧ nɛ́ŋ́ yú̵ú̵lı̵́ pee vu̵ gbóo, vu̵ ɓɛ sa̧a̧m sápéém fȩȩlȩ́ ta yúú nɛ́ŋ́ peelı̵́, vu̵ líí la ya hád sagad peelı̵́.

⁴¹A̧máa nɛ́ŋ́ la zuguy hád sagadı̵́, nɛ́ŋ́ mig gá'ád mbaa la wu̵lı̵́, mam baa nam woo nɛ́ŋ́ zam, ma nɛ́ŋ́ bé' haané.

⁴²Só̧ó̧ze ku̵u̵ ho̧ ná' máa, vu̵ hí̧í̧ bi nɔɔ púúsina pee vu̵ ú̵, moo ba ka vu̵n pee mam lúú ɗuggi.

⁴³A̧máa ı̵́ nii só̧ó̧ze hí̧í̧ bi səd Póllú̵, há' vu̵, o̧ nán ku̵u̵ gaa mam máa, u̵u̵ dəŋ pee mam la mbaa ɓá"ı̵́, tée

⁴⁴nán tóó u̵u̵ duu vúd voo, u̵u̵ mbaa voo yúú nɛ́ŋ́ kpə́ə vu̵lı̵́, tóó u̵u̵ mbaa voo yúú la' ye'e vu̵lı̵́. Vu̵ kɔ́ ı̵́ yo̧go̧, ma nán 'waapád vu̵ sə́d 'waa dɔg hə́ḿ, ɓá"ı̵́.