Read Dii Debtere ba'ad waa ba'ad voo nɔ 4 Bible Online

Debtere ba'ad waa ba'ad voo nɔ 4 - Dii bible

Debtere ba'ad waa ba'ad voo nɔ 4

¹Piɛ́r vu̵ kan Yoohá̧na ku̵u̵ dɨd dúú yȩ vu̵ moo o̧lȩ́ ı̵́ yo̧go̧ máa, nán hȩn ha"ı̵́ vu̵ yaa kan ı̵́ nii só̧ó̧ze ı̵́ lig hȩn ha"ı̵́ voo kan nán sadukée vu̵ á̧ḿ.

²Zó̧ó̧ ví̧i̧ vu̵ yúú moo Piɛ́r ku̵u̵ tú' yȩlȩ́, moo vu̵ baa o̧d dúú vu̵ Yesu ba níḿ nɔmmé sú̵'ú̵.

³Vu̵ ma' Piɛ́r vu̵ kan Yoohá̧na la tú̵' lig púúsinalȩ́ há̧á̧ ya̧g ka̧'a̧m ba a tú wu̵lı̵́, moo mɛn ká kɔ́ sú̵'ú̵.

⁴A̧máa nán ɓu̵u̵lı̵́ na'a ku̵u̵ ki moo yȩ máa, vu̵ fȩȩwo̧. Vu̵ wá' nán zó̧ó̧ 'yɛ́lı̵́ Tayɨɨ woolı̵́ vu̵, zaa wayée ka vu̵n ya̧ fó̧ó̧ uzinɛɛre nɔ́nɔ́ ú̵.

⁵Ya̧g ka̧'a̧m woolı̵́ máa, ı̵́ nii voo vu̵ kan ı̵́ nii Yúúda vu̵ kan nán moo Tayɨɨ tú"í vu̵, vu̵ sú̵g Yerúsalemmé,

⁶kan ı̵́ nii hȩn ha"ı̵́ Ána, kan Káýfa kan Yoohá̧na kan Alegzá̧ŋndərə kan zig ı̵́ nii hȩn ha"ı̵́ woo vu̵ 'waapád,

⁷vu̵ pa̧ŋ waa ba'ad Yesu woo yȩ vu̵ yaan tíŋ́ voolı̵́, vu̵ vi vu̵: “Ví za̧a̧ ho̧o̧ kan néélȩ́ nóo woolá? Kóó kan yɛ́g nóo woolá?”

⁸Yigid Tayɨɨ woo ka dɔ́ hi̧' Piɛ́r woolı̵́ máa, hí̧i̧d vu̵: “Ɨ́ víí, ı̵́ nii vu̵ kan ı̵́ nii Yúúda vu̵ á̧ḿ,

⁹kóó kɔ́d nán kpee yȩ hȩn du̵u̵ yȩ, ví vi vɔ́, dəŋ née nán yɛ ho̧o̧ woo ka ka̧"o̧ lá yȩ naa?

¹⁰Séý i gaa ya víí 'waapád, zig Izraɛ́l a gaa á̧ḿ, nán yɛ dii tíŋ́ víílí, hȩn tóó kɔ́nnɔ sı̵́ né yɔ. Hȩn woo kɔ́y kan yɛ́g Yesu Krístu nán Naazaréd woo nɔ, nán ı̵́ kíí ga"u̵ la' vbagadı̵́ pȩ́ń, Tayɨɨ ka duu nimmɔ nɔmmé pee nɔ.

¹¹Yesu, ‘Wu̵ 'yɛgɛ nán hȩn yo̧o̧lȩ́ kíí ma gbɔ má nɔ, wu̵ duu tii 'yɛgɛ ndam’ kɔ́ ı̵́ debtere ka o̧ wɔgɔ.

¹²Wu̵ ı̵́ nán sənné dágá 'nɛ́ŋ́, moo Tayɨɨ ba 'yɛ́d nán tóó yɛ́g hágá yɛlı̵́ moo a sə́d ví wu̵lı̵́ máa pɛ́lı̵́, séý wu̵ yu̵.”

¹³Ɨ́ nii moo sə̧"ȩ́ pee ku̵u̵ ho̧ néélȩ́ Piɛ́r voo kan Yoohá̧na máa, kɔ́ vu̵ la ɓá'. Vu̵ ho̧ voo vu̵n nán lee vu̵ yu̵, vu̵n gaan hȩn né á̧ḿ. A̧máa vu̵ gaa ká ba vu̵n sú̵g 'yȩ́ḿ kan Yesu á̧ḿ.

¹⁴A̧máa vu̵ ho̧ nán ho̧o̧ ba ka̧"o̧ pee ka mbaa dáŋ́ voolı̵́ á̧ḿ máa; vu̵ gaan hȩn u̵u̵ hí̧i̧n vu̵ sı̵́ né á̧ḿ.

¹⁵Ma ı̵́ nii moo sə̧"ȩ́ pee vu̵ o̧d Piɛ́r vu̵ kan Yoohá̧na ba u̵u̵ vúd la lig moo sə̧"ȩ́lȩ́. Ku̵u̵ vúd la máa, ı̵́ nii moo sə̧"ȩ́ vu̵ ó̧ń ya voolı̵́:

¹⁶“Yee báń kɔ́ ví née kan nán yȩ vu̵lá? Moo nán Yerúsalem vu̵ 'waapád vu̵ gaa hȩn sa̧ga̧ Piɛ́r ku̵u̵ kɔ́ yȩ sú̵'ú̵. Báń dəŋ née su̵u̵ ví ya̧ggá?

¹⁷A̧máa ba há' vu̵ ví kɔɔgná u̵u̵ tú' moo kan yɛ́g nán yȩ woo sá sá̧ḿ, moo moo woo yȩ kan kiy laa tíŋ́ tíŋ́ sa̧a̧m zig nán yȩ voolı̵́.”

¹⁸Ku̵u̵ duu bee Piɛ́r vu̵ dɔd ya máa, vu̵ há' vu̵ ba u̵u̵ duu pa moo Yesu woo yȩ sá sá̧ḿ, kóó tú"í á̧ḿ.

¹⁹A̧máa Piɛ́r vu̵ kan Yoohá̧na vu̵ hí̧i̧d vu̵: “Aga i taa la ú̵. Tíŋ́ Tayɨɨ woolı̵́ máa, maa oo kid víw tɔ́ggaa, kóó oo kid Tayɨɨ aa?

²⁰A̧máa ı̵́ vóó máa, hȩn kóó ho̧ kan nɔ́ɔ́ vóó kan moo kóó ki kan tɔ́g vóó máa, vɔ́ń gbɔn tú"í ní.”

²¹Ma ı̵́ nii moo sə̧"ȩ́ pee vu̵ duu sée vu̵, ma vu̵ daa vud vu̵ gbɔ la. Vu̵ nugun hi̧naa tóó u̵u̵ si̧'i̧n vu̵ wu̵lı̵́ né á̧ḿ, moo nán 'waapád vu̵ na' Tayɨɨ yúú hȩn ka kɔ́y yȩlȩ́.

²²Nán ku̵u̵ za̧a̧wo̧ yȩ, ve' ha̧a̧lȩ́ woo mba sı̵́ ve' vo' ndaddú̵ ú̵.

²³Sey ı̵́ nii pee ku̵u̵ gbɔ vu̵ la ná' máa, Piɛ́r vu̵ kan Yoohá̧na vu̵ daa laa daga voolı̵́, vu̵ pá'ad vu̵ moo gbanaa hȩn ha"ı̵́ vu̵ kan ı̵́ nii Yúúda vu̵n o̧d vu̵ pee.

²⁴Daga pee ku̵u̵ ki moo yȩ máa, ya voo 'waapád vu̵ sú̵g o̧d Tayɨɨ moo ná': “Ɨ́ 'yɛ́lı̵́ vóó, móo yɨb be' kan hág kan mam kan hȩn 'waapád ku̵u̵ dɨ tíŋ́ woolı̵́.

²⁵Móo o̧d nán ba'ad móó a vɔ́ yée Daavíd moo kan yigid móó, ma Daavíd o̧: ‘Moo ȩn zig nán yȩ vu̵ dáb moo kan yúú na"ȩ́lá? Moo ȩn vu̵ yá̧ḿ hȩn leená té"á?

²⁶Gbanaa hágá yɛ vu̵ nda doo moo sɨɨ kɔ́lı̵́, vu̵ sú̵g kan ı̵́ nii voo vu̵ ya dágá, bi kɔ́ sɨɨ kan ı̵́ 'yɛ́lı̵́ Tayɨɨ kan ı̵́ ká woowu̵ mam gbaŋ yȩ[2] nɔ.’

²⁷“Moo yȩ́ńne, Heeród vu̵ sú̵g kan Pó̧ŋ́tí Pilád yúú nán ba'ad móó Yesu ı̵́ káḿ woowu̵ mam gbaŋ yȩ woolı̵́, vu̵ sú̵g kaa gbaŋ yɛlı̵́ kan gáá vu̵ kan zig Izraɛ́l á̧ḿ.

²⁸Dɨ ı̵́ yo̧go̧, vu̵ kɔ́ hȩn káḿ mbɔ́g moo 'waa yúú woolı̵́ gbó̧ŋ́ na'a máa á̧ḿ sú̵'ú̵.

²⁹“'Ya̧'a̧ yɛ máa, ı̵́ 'yɛ́lı̵́ vóó, a̧m ki hȩn séené máa ku̵u̵ sée vɔ́ yɛ ú̵. Vɔ́ vóó nán ba'ad móó vu̵ yu̵. A̧m pú̵ vɔ́ néélȩ́, oo tú' moo móó kan zó̧ó̧ vóó 'waapád.

³⁰A̧m yo̧o̧ nag móó, mɔ́ za̧a̧ ho̧o̧ vu̵, mɔ́ kɔ́ hȩn sa̧ga̧ vu̵ kan hȩn zálı̵́ tóó vu̵ kə́dkə́d, kan yɛ́g nán ba'ad móó Yesu woo nɔ.”

³¹Ku̵u̵ o̧d Tayɨɨ moo 'waa máa, ya vu̵n sú̵g wu̵lı̵́ pee nam, yigid Tayɨɨ woo ya hi̧' voolı̵́ 'waapád, ma vu̵ bé' moo Tayɨɨ tú"í kan zó̧ó̧ voo 'waapád.

³²Dúú ku̵u̵ 'yɛ́ zó̧ó̧ Tayɨɨ woolı̵́ 'waapád vu̵ sú̵g, vu̵ 'yɛ́ zó̧ó̧ ya dágá, kan moo taalı̵́ dágá. Nán dágá aga o̧n hȩn naa bii ba hȩn dáń bii nu ní, a̧máa hȩn 'waapád ku̵u̵ 'yɛ́ máa, tii sı̵́ hȩn zo"ɨ.

³³Waa ba'ad Yesu woo yȩ vu̵ nuŋ néélȩ́ ɓu̵u̵lı̵́ na'a, vu̵ du̵ ya̧g yúú nímní ı̵́ 'yɛ́lı̵́ Yesu woo nɔmmé yȩlȩ́. Tayɨɨ bag vu̵ hȩn 'waapád.

³⁴Nán gíḿ sa̧a̧m voolı̵́ pɛ́lı̵́. Vu̵ baa gí hȩn ku̵u̵ 'yɛ́ máa, bab kan lig, vu̵ pa̧ŋ sɨɨde woo vu̵ yaan,

³⁵vu̵ 'yɛ́ waa ba'ad Yesu woo voolı̵́ nagá, ma vu̵ yȩ'; kóó nɔ́nná nuŋ hȩn ka maawo̧ nuní máa wu̵lı̵́.

³⁶Nán tóó ká du̵u̵lı̵́, yéé woo Yu̵u̵séfu. Waa ba'ad Yesu woo vu̵ ha'adu̵ yéé tóó Baanábas (yéé woo tú' “Baa zó̧ó̧ ziginí”). Ká dɨ zig Levíd woolı̵́, yaa hág Kíipərəlı̵́.

³⁷Yu̵u̵séfu sú̵u̵ gí bab woo, pa̧ŋ sɨɨde woo ya 'yɛ́ waa ba'ad Yesu woo voolı̵́ nagá.