Read Dii Debtere ba'ad waa ba'ad voo nɔ 8 Bible Online

Debtere ba'ad waa ba'ad voo nɔ 8 - Dii bible

Debtere ba'ad waa ba'ad voo nɔ 8

¹Nɔm Itȩ́n woo to̧o̧d Sól á̧ḿ. Zá̧ga̧ woo, vu̵ dəŋ sı̵́ nán sú̵ggı̵́ vu̵ dunní kan moo gbo̧o̧ ba'a kaa Yerúsalemmé wu̵lı̵́. Nán sú̵ggı̵́ vu̵ 'waapád vu̵ hɨ'ɨ la hág Yúúdalı̵́, kan hág Samaríi á̧ḿ. Séý waa ba'ad Yesu woo vu̵u̵ kéé mbaa Yerúsalemmé.

²Nán moo Tayɨɨ duulí tóó vu̵ dɔd Itȩ́n, vu̵ ká̧ŋ́ yúú nɔm woo yȩlȩ́ du̵u̵n də́ń né.

³A̧máa Sól ta woo sii, bi tud nán sú̵ggı̵́ vu̵ yu̵. Dɔ́ duu kíilí kíilí, má'a nán sú̵ggı̵́ vu̵, wayée kan wakȩ́ȩ́ vu̵ á̧ḿ, la tú̵' vu̵ lig púúsinalȩ́.

⁴Nán vu̵n hɨ'ɨ pee, vu̵ 'yȩ́ḿ duu kaalı̵́ kaalı̵́, vu̵ pa moo to̧o̧ 'maŋ wu̵lı̵́.

⁵Filíb nán hȩn yȩ"ȩ́ pee daa laa kaa Samaríilí, baa pad nán kaa yȩ vu̵ moo, ı̵́ nán sənné ba yaa sú̵'ú̵.

⁶Dúú vu̵ 'waapád vu̵ 'yɛ́ tɔ́g yúú moo tú"í woo yȩlȩ́, moo vu̵ ki, vu̵ ho̧ hȩn sa̧ga̧ kɔ́lı̵́ woo vu̵ á̧ḿ.

⁷Vu̵ ho̧ hȩn hó̧g vu̵ vúd fó̧ó̧ nánán voolı̵́ ɓu̵u̵lı̵́ na'a kan wa̧ya̧g gbo̧o̧ ba'a; nán kpee vu̵ kan nán gbu̵u̵g kȩ́'ȩ vu̵ 'yȩm.

⁸Moo woo nɔ nán kaa yȩ vu̵ nuŋ zó̧ó̧ dȩ"ȩ́ gbo̧o̧ ba'a.

⁹Nán tóó ká dɨ woo kaa yȩlȩ́, yéé woo Simɔ́ŋ. Ká gbaŋ ganne, kɔ́ la nán Samaríi vu̵ ɓá', o̧ ba bin nán gbo̧o̧ȩ.

¹⁰Náásaa kan ı̵́ nii vu̵ hí̧í̧wo̧ wa̧a̧níi, vu̵ baa o̧: “Nán yȩ, nán néélȩ́ Tayɨɨ woo nɔ á̧ḿ; dɨ kan néélȩ́ gbo̧o̧ woolı̵́ fó̧lȩ́.”

¹¹Vu̵ hí̧í̧wo̧ mbaa ná', moo baa kɔ́d vu̵ hȩn sa̧ga̧ kan néélȩ́ woo yȩ ɗii sú̵'ú̵.

¹²A̧máa nán ku̵u̵ fȩȩ moo to̧o̧ 'maŋ Filíb ka pa, moo gbaŋ waalı̵́ Tayɨɨ woo, kan moo Yesu Krístu woo yȩ máa, vu̵ woo vu̵ mam Tayɨɨ, wayée vu̵ kan wakȩ́ȩ́ vu̵ á̧ḿ.

¹³Simɔ́ŋ pee á̧ḿ, fȩȩ moo Tayɨɨ. Vu̵ woowu̵ mam Tayɨɨ. Ya mbaa dáŋ́ Filíb woolı̵́. Ka ho̧ hȩn sa̧ga̧ gbo̧o̧ Filíb ka dɨ kɔ́lı̵́ kə́dkə́d yȩ máa, la"u̵ la fid.

¹⁴Waa ba'ad ı̵́ ku̵u̵ mbaa Yerúsalemmé, ku̵u̵ ki nán Samaríi ba vu̵n fȩȩ sı̵́ moo Tayɨɨ ú̵ máa, vu̵ ba'ad vu̵ Piɛ́r kan Yoohá̧na.

¹⁵Ku̵u̵ ya̧ kaa Samaríilí máa, vu̵ ɓá' Tayɨɨ yúú nán moo fȩȩlȩ́ yȩ voolı̵́, moo u̵u̵ nuŋ yigid Tayɨɨ woo nɔ,

¹⁶moo kóó nán dágá aga voolı̵́ sa̧a̧mé nugu ná yigid Tayɨɨ woo né, vu̵ woo vu̵ də́ń mam Tayɨɨ kan yɛ́g ı̵́ 'yɛ́lı̵́ Yesu woo nɔ.

¹⁷Piɛ́r vu̵ kan Yoohá̧na vu̵ ha'ad vu̵ nag yúlí, ma vu̵ nuŋ yigid Tayɨɨ woo.

¹⁸Simɔ́ŋ pee ka ho̧ nán vu̵n nuŋ yigid Tayɨɨ woo kan nag ha"ı̵́ɨ máa, pú̵ Piɛ́r vu̵ sɨɨde kan Yoohá̧na,

¹⁹vi vu̵: “I pú̵n néélȩ́ yȩ, moo a̧n ha'ad nán tóó nag yúlí tée, a nuŋ yigid Tayɨɨ woo á̧ḿ.”

²⁰A̧máa Piɛ́r ka ki ı̵́ yo̧go̧ máa, hí̧i̧du̵: “I sú̵g lı̵́d la kan sɨɨde móó sú̵u̵ á̧ḿ, moo mɔ́ taa móó ba ban hɨn hȩn Tayɨɨ woo ka pú̵ té' máa kan sɨɨdeɨ.

²¹Hȩn woo mɔ́ń nugun ka' ı̵́ móó wu̵lı̵́ waaná' aga né; mɔ́ maan nuní né á̧ḿ, moo mɔ́ 'yɛ́n zó̧ó̧ Tayɨɨ woolı̵́ dágá né.

²²Moo woo nɔ, a̧m gbɔ moo ɓı̵́d taalı̵́ móó yȩ, a̧m ɓá' ı̵́ 'yɛ́lı̵́ Tayɨɨ yúú moo taalı̵́ móó yȩlȩ́. Tóó tée wú̵ń kéé hȩn ɓı̵́d móó gbɔ ú̵.

²³Moo mí ho̧ mɔ́ dɨ kan zó̧ó̧ hȩn hı̵́ı̵́lı̵́ gbo̧o̧ ba'a móólȩ́ zó̧ó̧lȩ́; buum sı̵́ gba'a ú̵ á̧ḿ.”

²⁴Ma Simɔ́ŋ duu vi Piɛ́r vu̵ kan Yoohá̧na: “I ɓá' ı̵́ 'yɛ́lı̵́ Tayɨɨ yúú míílí̧ á̧ḿ, moo hȩn kíí o̧n yȩ a kɔ́n sá.”

²⁵Waa ba'ad Yesu woo yȩ ku̵u̵ du̵ ya̧g 'waa yúú ı̵́ 'yɛ́lı̵́ woolı̵́ sú̵'ú̵ máa, vu̵ pa moo to̧o̧ 'maŋ duu kaa nán Samaríi voolı̵́ ɓu̵u̵lı̵́ na'a, ma vu̵ daa vȩ́' dɔg Yerúsalemmé.

²⁶Maleeka ı̵́ 'yɛ́lı̵́ woo tóó ya o̧d Filíb pee: “A̧m lúú, mɔ́ laa ka' mam wázammé, hi̧naa ka sí zu̵u̵ Yerúsalemmé, ka laa kaa Gazáalı̵́ yȩlȩ́. Hi̧naa woo ká ya̧a̧ duu dɨ hó̧g kȩŋŋı̵́.”

²⁷Filíb ka lúú dɔg, ka daa laa, ka ya̧ la hi̧naa peelı̵́ máa, kan kan nán Ɛtopíi tóó, nán so̧o̧ȩ, ká nán gbo̧o̧ tóó ka tu̵d Kandád gbanii wakȩ́ȩ́ nán Ɛtopíi voo hȩn naa woo vu̵ má nɔ. Ká yaa Yerúsalemmé moo Tayɨɨ na"ȩ́ȩ.

²⁸Nán yȩ dɨ la vȩ́"ȩ́ hág woolı̵́, mbaa yúú kɨɨkı̵́ı̵́ woolı̵́, ma go'oy woowu̵, baa záŋ́ga hȩn debtere anábi Esáya woolı̵́.

²⁹Ma yigid Tayɨɨ woo o̧d Filíb: “A̧m séé la dáŋ́ kɨɨkı̵́ı̵́ yȩlȩ́.”

³⁰Filíb ka kɛ ɗug séé la máa, baa ki hȩn nán Ɛtopíi ba záŋ́ga pee. Filíb vigi: “Ví ki hȩn kíí záŋ́ga yȩ á̧a̧?”

³¹Nán pee hí̧i̧du̵: “Nán tóó a tú'un mí moo woo né tée, míń dəŋ née kilá?” Ma bee Filíb a ɗáá mbaa ya dáŋ́ biilí.

³²Hȩn ká záŋ́ga sú̵u̵ wu̵ yɛ nɔ: “Mbaa kɔ́ ı̵́ mbee tóó ku̵u̵ laanɔ ya sə̧"ȩ́lȩ́ máa wɔgɔ. Mbaa simná kɔ́ ı̵́ mbee waa tóó ku̵u̵ dɨgɨ gu̵d sə̧'ə̧né[3] máa wɔgɔ. Kuun ya̧g né sá̧ḿ.

³³Vu̵ igidu̵, vu̵ sə̧'ə̧nɔ moo yȩ́ń né á̧ḿ. Nóo wú̵ń pa'a moo yúú aa waa woo voolı̵́lá? Moo vu̵ luuwu̵ sı̵́ hágá yɛlı̵́ ú̵.”

³⁴Nán pee ka záŋ́ga 'waa máa, vi Filíb: “Mí dȩm naggɨ, a̧m o̧nnɔ́. Anábi o̧ moo yɛ yúú nóo woolı̵́lá? Tóó tée aga o̧ fó̧ó̧ woo naa? Kóó yúú nán tóó wooláa?”

³⁵Ma Filíb duu ka moo yȩ tú'udu̵, dəŋ kan moo anábi woo yȩ vu̵, o̧ddu̵ moo to̧o̧ 'maŋ yúú Yesu woolı̵́.

³⁶Ku̵u̵ dɨ 'yȩ́mné la zaa máa, vu̵ ya̧ la mam tóólı̵́, ma nán pee vi Filíb: “Mam wu̵ yɛ nɔ. Hȩn a há'an mam Tayɨɨ woolı̵́ máa dɨláa?” [

³⁷Filíb hí̧i̧du̵: “Tow a̧m fȩȩ moo yȩ kan zó̧ó̧ móó 'waapáddú̵ tée, mɔ́ń woo ú̵.” Ma nán pee duu o̧: “Mí fȩȩ sú̵'ú̵. Yesu Krístu Waa Tayɨɨ woo nɔ.”]

³⁸O̧d nán kɨɨkı̵́ı̵́ paané ba a dii kɨɨkı̵́ı̵́ ú̵. Filíb vu̵ dɔ́ zu̵u̵ kan baa pee mammé. Filíb woowu̵ mam Tayɨɨ.

³⁹Sey ku̵u̵ vúd dɔg mammé máa, yigid ı̵́ 'yɛ́lı̵́ woo ya sad Filíb lúun. Nán pee duu ho̧nnɔ sı̵́ né. Aga ɓɛ hi̧naa ı̵́ woo daa ka la kan zó̧ó̧ dȩ"ȩ́.

⁴⁰Filíb la gbɔ vúd woo kaa Azóddı̵́. Ma pa moo to̧o̧ 'maŋ pú̵d la tíŋ́ tíŋ́ kaa tóó vu̵lı̵́ 'waapád, há̧á̧ ya̧ kaa Sezaréelı̵́ á̧ḿ.