Read Dii NÁN RÓMA VɄ 11 Bible Online

NÁN RÓMA VɄ 11 - Dii bible

NÁN RÓMA VɄ 11

¹Mí vi, yee Tayɨɨ ma zig woo Izraɛ́l sá'áa? Pɛ́lı̵́ sá̧ḿ! Mí míí nán Izraɛ́llɨ á̧ḿ. Mí Ibrahí̧í̧ma aa yéeɨ, zig Bɛnzamɛ́ŋ woolı̵́.

²Tayɨɨ man zig woo ká yeen tíŋ́ yȩ né. Ví gaa hȩn debtere ka o̧ máa ó̧ náa? Hȩn Elía ká gbɔ́d Tayɨɨ dam yúú Izraɛ́l woolı̵́ má nɔ. Ká o̧:

³“Ɨ́ 'yɛ́lı̵́ míí, vu̵ nɔɔ anábi móó vu̵, vu̵ bugu ya hȩn ha"ı̵́ móó vu̵ á̧ḿ. Kéé sı̵́ míw, mí dágá, ma vu̵u̵ bi nɔɔn á̧ḿ.”

⁴A̧máa Tayɨɨ hí̧i̧du̵: “Mí 'yɛ́ nán míí vu̵ dɨlı̵́ uzinɛɛre gúndɛm. Vu̵ nə'əyn voo tíŋ́ tayɨɨ Ba'ál woolı̵́ né.”

⁵Dɨ ı̵́ yo̧go̧ 'ya̧'a̧ yɛ á̧ḿ. Nán tóó Tayɨɨ ka yee vu̵ kan zó̧ó̧ nán woo máa, vu̵ kéé dɨlı̵́ waaná' á̧ḿ.

⁶Yee vu̵ kan zó̧ó̧ nán woo nɔ, a̧máa moo ba'ad voo nɔ pɛ́lı̵́. Kan ı̵́ yo̧go̧ pɛ́lı̵́ tée, zó̧ó̧ nán Tayɨɨ woo kan zó̧ó̧ nánne pɛ́lı̵́ á̧ḿ.

⁷Tée báń o̧ ví nɛ́nná? Hȩn Izraɛ́l ka soo máa, nugu ní. A̧máa séý nán ı̵́ Tayɨɨ ka yee vu̵ máa, vu̵u̵ nuŋ. Nán tóó voo máa, vu̵ kan néélȩ́ kilí woo pɛ́lı̵́

⁸kɔ́ ı̵́ debtere ka o̧ wɔgɔ, o̧: “Tayɨɨ nɔɔ vu̵ zó̧ó̧. Yə̧ə̧ vu̵ nɔ́ɔ́. Yú vu̵ tɔ́g há̧á̧ ya̧ zá̧ga̧ ɓəə yɔ.”

⁹Daavíd á̧ḿ o̧: “Hȩn lálı̵́ voo a tiid vu̵ sə́g vəgə́ɨ, kan ɓúy, u̵u̵ bád wu̵lı̵́, u̵u̵ nuŋ hȩn si̧'i̧ní wu̵lı̵́ á̧ḿ;

¹⁰nɔ́ɔ́ voo a yə̧ə̧ vu̵ la, u̵u̵ ho̧ sá. Ʉu̵ kúń mbaa wu̵lı̵́ káákáá á̧ḿ.”

¹¹Moo woo nɔ mí vi, nán Yúúda ku̵u̵ kɔ́ hȩn sɔd máa, vú̵ń ti la sı̵́ voo kəddaa? Pɛ́lı̵́ sá̧ḿ! A̧máa yúú hȩn kɔ́lı̵́ sɔnné voo yȩlȩ́, zig nán tóó vú̵ń sə́d, moo nán Yúúda u̵u̵ mood vu̵ sɨggɨ.

¹²A̧máa hȩn kɔ́lı̵́ sɔnné voo wu̵ kɔ́ ma, zig tóó vu̵ nuŋ hȩn naa Tayɨɨ woo. Nán Yúúda vu̵ tii hȩn lee moo zig nán tóó u̵u̵ nuŋ hȩn gbo̧o̧ Tayɨɨ woo á̧ḿ. A̧máa tow nán Izraɛ́l u̵u̵ fȩȩ moo Tayɨɨ woo 'waapád tée, zig tóó vú̵ń nuŋ hȩn gbo̧o̧ mba hȩnnáa?

¹³Nán ı̵́ kíí Yúúda pɛ́lı̵́ yȩ, mí hí̧í̧ bi o̧d ví moo tóó nɔ. Mí waa ba'ad ı̵́ Tayɨɨ ka ba'an la nán ı̵́ ku̵u̵ Yúúda pɛ́lı̵́ máa voolı̵́, ma zó̧ó̧ dȩ'ȩn yúú ba'ad míí yɛlı̵́.

¹⁴Tóó tée míń luu zó̧ó̧ sɨg moolȩ́ mɛm míí yȩ voo ı̵́ yo̧go̧, moo nán tóó sa̧a̧m voolı̵́ u̵u̵ sə́ddú̵.

¹⁵Sey Tayɨɨ ka ma nán Yúúda vu̵ máa, mbɔ́gɔd zig nán vu̵ 'waapád hi̧naa laalı̵́ woolı̵́ sú̵'ú̵. A̧máa a duu ɓɛ vu̵ tée, nán ı̵́ kú̵u̵ mbaa kɔ́ ı̵́ nɔm vu̵ wɔgɔ yȩ, vú̵ń duu níḿ á̧ḿ.

¹⁶Tow u̵u̵ dəŋ ha'ad Tayɨɨ beréd ka' tóó tée, beréd ı̵́ kéélı̵́ woo 'waapád Tayɨɨ woo nɔ á̧ḿ. Tow u̵u̵ ha'ad Tayɨɨ la' zágád tóó tée, la' woo kan 'mɛ́ŋ́ woo á̧ḿ, woo nɔ.

¹⁷Zig Izraɛ́l mbaa kɔ́ ı̵́ la' kúḿ ku̵u̵ ndag babbı̵́ máa wɔgɔ. Nán tóó ka ndag la' lálı̵́ woo, ma ka sə̧'ə̧ nag woo tóó vu̵, ka la sə̧'ə̧ la' nag tóó vu̵ hó̧g tíŋ́, ka pa̧ŋa bé'e vu̵ la' yȩlȩ́ tée, la' ku̵u̵ bé' yȩ nuŋ hȩn ha'an sı̵́ zágád la' tóó yȩ woolı̵́ ú̵. Ɨ́ móó káḿ nán Yúúda pɛ́lı̵́ yȩ, mɔ́ man kan la' tóó ku̵u̵ du̵ ya hó̧gó̧, ku̵u̵ bé' ha' la' kúḿmí yȩ nɔ.

¹⁸Moo woo nɔ, a̧m ho̧ la' nag ku̵u̵ sə̧'ə̧ gbɔ vu̵ yȩ hȩn leená sá, moo la' nag wu̵ tín zágád né, a̧máa la' zágád wu̵ tíd la' nag vu̵.

¹⁹Tóó tée mɔ́ń o̧: “Ká vu̵n sə̧'ə̧ la' nag yȩ vu̵ gbóo sı̵́ voo ú̵, moo bi bé'én mí yagalı̵́ náa?”

²⁰Moo yȩ́ńne. Tayɨɨ sə̧'ə̧ vu̵, moo vu̵ 'yɛ́n zó̧ó̧ voo woolı̵́ né. Móo fȩȩ ya mbaalı̵́ woo mbaa, moo káḿ 'yɛ́ zó̧ó̧ móó woolı̵́ má nɔ. A̧m gág yúú na"ȩ́ȩ! A̧m ndɔg Tayɨɨ la ú̵!

²¹Nán Yúúda vu̵u̵ la' nag də́ń kəd, a̧máa tow Tayɨɨ a tu̵ 'yɛ́n vu̵ kə́d né tée, mɔ́ á̧ḿ, Tayɨɨ wú̵ń tu̵ 'yɛ́n mɔ́ kə́d né á̧ḿ.

²²A̧m ho̧ gaa Tayɨɨ ka kɔ́d nán ba'ad woo vu̵ zó̧ó̧ nán ma, ka duu pi kan vu̵ yȩ nɔ. Pi kan nán ku̵u̵ kɔ́ hȩn ɓı̵́d máa vu̵ yu̵, a̧máa ı̵́ móó máa, to̧o̧m sı̵́ móó to̧o̧ȩ. Tée a̧m mbaa zó̧ó̧ nán woo yɛlı̵́, moo kan hee gbɔm kɔ́ ı̵́ la' nag wɔgɔ á̧ḿ.

²³Tow nán Yúúda u̵u̵ gbɔ moo faalı̵́ voo yȩ tée, Tayɨɨ wú̵ń duu ya bé'e vu̵ ya mbaalı̵́ voo ká yȩlȩ́, moo wu̵ dɨ kan néélȩ́ duu ɓee bé'e vu̵ wu̵lı̵́.

²⁴Ɨ́ móó káḿ nán Yúúda pɛ́lı̵́ yȩ, mɔ́ móó la' ı̵́ ku̵u̵ sə̧' ya hó̧g tíŋ́ má nɔ. Tayɨɨ sə̧' ya bé'em móó la' kúḿ babbı̵́ yȩlȩ́ bé"ı̵́ɨ. Nán Yúúda máa vu̵ vúd la' zágád yȩlȩ́; bé'ené voo duu təən sı̵́ né.

²⁵Dan kirtȩ́n vu̵, mí hí̧í̧ i gaa moo yȩ́ń ı̵́ tóó ka yú̵g má nɔ, moo i taa ba bin nán kɛbbɨ sá. Moo sú̵u̵ wu̵ yɛ nɔ, Tayɨɨ kɔ́ hȩn tóó, ma nán Izraɛ́l ka' tóó vu̵ kan néélȩ́ zó̧ó̧ voo 'yɛ́lı̵́ woolı̵́ pɛ́lı̵́, há̧á̧ a ya̧ zig tóó vu̵ 'waapád u̵u̵ dɔ́ gbaŋ waalı̵́ woolı̵́ pȩ́ń.

²⁶Tée zig Izraɛ́l vú̵ń sə́d 'waapád kɔ́ ı̵́ debtere ka o̧ wɔgɔ: “Nán hȩn sənné wú̵ń yaa kaa Sió̧ŋŋı̵́. Wú̵ń ɓɛ zó̧ó̧ ɓı̵́d zig Yaakúbu woo vu̵ luu.

²⁷Ya̧g káń tad vu̵ máa wu̵ yȩ nɔ, sey a̧n vud hȩn ɓı̵́d voo vu̵ tɛ́ nɔ.”

²⁸Sey nán Yúúda ku̵u̵ ma moo to̧o̧ 'maŋ máa, vu̵ tii nán maag Tayɨɨ woo vu̵ moo víí nu. A̧máa Tayɨɨ ká yee vu̵, ma hí̧í̧ vu̵ moo aa yée voo voo nɔ,

²⁹moo Tayɨɨ pú̵ hȩn tée duu ɓɛn né; ka bee nán tée duu tiin ya̧g né.

³⁰Ká ví kin Tayɨɨ tɔ́g né á̧ḿ, a̧máa 'ya̧'a̧ yɛ ví nuŋ zó̧ó̧ nán Tayɨɨ woo sú̵'ú̵ moo nán Yúúda ku̵u̵ kinnɔ tɔ́g né má nɔ.

³¹Ɨ́ voo á̧ḿ, 'ya̧'a̧ yɛ vu̵ kin Tayɨɨ tɔ́g né, moo Tayɨɨ a ho̧ gíḿ gaad ví ú, a̧máa moo u̵u̵ nuŋ zó̧ó̧ nán yȩ wu̵lı̵́ á̧ḿ.

³²Tayɨɨ tii nán vu̵ 'waapád nán ki tɔ́g sáɨ, moo bi tú'ud vu̵ zó̧ó̧ nán bii 'waapád wu̵lı̵́.

³³Hȩn naa vu̵ hi̧' dɨ Tayɨɨ woolı̵́! Kɛb woo, kan moo gaalı̵́ woo vu̵ ɓu̵u̵ wa̧a̧níi! Nóo wú̵ń tii moo mbɔ́ggı̵́ woo o̧lá? Nóo wú̵ń ki hȩn ka mbɔ́g yȩ mbagalá?

³⁴Debtere o̧: “Nóo gaa moo taalı̵́ ı̵́ 'yɛ́lı̵́ baa ví woolá? Nóo wú̵ń tú'udu̵ moolá?

³⁵Nóo dəŋ pú̵ Tayɨɨ hȩn ma, Tayɨɨ ka duu vȩ' sú̵ú̵wu̵ yalá?”

³⁶Hȩn 'waapád yaa woolı̵́; hȩn 'waapád mbaa moo woo nɔ; hȩn 'waapád woo nɔ. Ba na' ví wu̵ yu̵ há̧á̧ káákáá! Aamɛ́n.