Read Dii NÁN RÓMA VɄ 12 Bible Online

NÁN RÓMA VɄ 12 - Dii bible

NÁN RÓMA VɄ 12

¹Dan kirtȩ́n vu̵, mí hí̧í̧ bi o̧d ví, Tayɨɨ ka tú'ud ba ví zó̧ó̧ nán woo ı̵́ yo̧go̧ yȩ, ví á̧ḿ, i ɓɛ fó̧ó̧ víí ha' zá̧a̧dná kɔ́ ı̵́ hȩn ha"ı̵́ wɔgɔ. Fó̧ó̧ víí pád a Tayɨɨ woo nɔ, tée wú̵ń to̧o̧du̵. Ba'ad i kɔ́ddu̵ də́ń kəd máa, wu̵ yȩ nɔ.

²Tée i 'yȩ́ŋ́ mbaalı̵́ nán góó yɛ voo sá, a̧máa i gbɔ Tayɨɨ a tii moo taalı̵́ víí vu̵ 'waa la pád, tée víń gaa hȩn hí̧í̧lí̧ woo, ka du̵u̵, ka to̧o̧du̵, ka du̵u̵ si̧' la gbug yȩ á̧ḿ.

³Mí dɨd ví o̧lȩ́ 'waapád kan néélȩ́ Tayɨɨ woo ka pú̵n kan zó̧ó̧ nán woo yɛ nɔ, kóó nɔ́nná a zuŋ haa té' sá. A na' yúú sá, a̧máa a taa də́ń néélȩ́ Tayɨɨ ka pú̵gu̵ yúú zó̧ó̧ 'yɛ́lı̵́ woolı̵́ yȩ nɔ.

⁴Ba dɨ ví kan fó̧ó̧ vu̵ kə́dkə́d fó̧ó̧ baa vílí. Ya voo 'waapád vu̵ dɨ kan ba'ad kə́kə́d á̧ḿ.

⁵Ba ví á̧ḿ, kóó aa ɓu̵u̵ ví ú si̧', ba dɨ ví fó̧ó̧ dágá Yesu Krístu woolı̵́. Ba sú̵g mbaa ví fó̧ó̧ dágáɨ kɔ́ ı̵́ fó̧ó̧ tóó ku̵u̵ sú̵g mbaa fó̧ó̧ dágá woolı̵́ máa wɔgɔ.

⁶Tayɨɨ pú̵ ba ví néélȩ́ kə́dkə́d, ba ɓɛ kɔ́n ví ba'ad wu̵lı̵́ kɔ́ ı̵́ ka pú̵ ba ví leená yɛ wɔgɔ. Tow nán tóó Tayɨɨ a pú̵gu̵ woo moo anábi wu̵ moolȩ́ tée, a moo kan zó̧ó̧ 'yɛ́lı̵́ɨ.

⁷Tow a pú̵ nán tóó woo néélȩ́ moo a gbá̧' nán gíḿ vu̵ yu̵ tée, a gbá̧' vu̵ ú̵. A pú̵ nán tóó woo néélȩ́ moo moo woo wu̵ tú"í tée, a tú' la ú̵.

⁸A pú̵ nán tóó woo néélȩ́ moo a zigid daga vu̵ zó̧ó̧ȩ tée, a zigid vu̵ la ú̵. A pú̵ nán tóó woo néélȩ́ moo hȩn yȩ"ȩ́ȩ tée, a kɔ́ kan zó̧ó̧ woo 'waapád. Nán ı̵́ ka dii ba'ad tée, a pi la zó̧ó̧ wu̵lı̵́. Nán ka kɔ́ ba'ad zó̧ó̧ nán tée, a kɔ́ kan zó̧ó̧ dȩ"ȩ́ȩ.

⁹Zó̧ó̧ nán a vȩ́' pigim sá. I máń hȩn ɓı̵́ddɨ; i sȩgȩ víí hȩn du̵u̵ wu̵ kɔ́lı̵́.

¹⁰I hí̧ń hí̧nní dag sá̧ŋ́ŋɨ ya víílí; i ná'án ya víílí ú.

¹¹I sȩn fó̧ó̧ la ú̵, i kɔ́ zu̵b sá. I pi zó̧ó̧ kɔ́d ı̵́ 'yɛ́lı̵́ baa ví ba'adɨ.

¹²I dȩ' zó̧ó̧ yúú zó̧ó̧ 'yɛ́lı̵́ víílí la ú̵. I ma' zó̧ó̧ ya hȩn ndɔ́gɔné vu̵lı̵́ la ú̵. I ɓá' Tayɨɨ bə́' bə́'.

¹³Nán tóó ka hí̧í̧ hȩn víílí sa̧a̧mé tée, i su̵g ya̧g maawo̧. Gáá ku̵u̵ yaa víílí tée, i fȩȩ vu̵ du̵u̵ na'a.

¹⁴Nán ku̵u̵ duun ví kan moo tée, i bag vu̵ víí hȩnne, a̧máa i ga'ad vu̵ nag sá.

¹⁵I sú̵g dȩ' zó̧ó̧ kan nán ı̵́ ku̵u̵ dɨ zó̧ó̧ dȩ"ȩ́ máa vu̵ á̧ḿ; i sú̵g ká̧ŋ́ kan nán ku̵u̵ dɨ ká̧ń máa vu̵ á̧ḿ.

¹⁶I to̧n ya víílí ú. I na' yúú sá. I soo na"ȩ́ sá á̧ḿ, a̧máa i nə' víí yúúi. I 'yɛ́ fó̧ó̧ víí nán kɛb sá.

¹⁷I sú̵ú̵ hȩn ɓı̵́d kan hȩn ɓı̵́d sá. I taa moo, ví kɔ́d nán vu̵ hȩn du̵u̵ 'waapád.

¹⁸Hȩn ka maa vín kɔ́ pȩ́ń, vín to̧n kan nán vu̵ 'waapád tée, i kɔ́ la ú̵.

¹⁹Dan gboo vu̵, nán ka kɔ́d ví hȩn ɓı̵́d tée, aga i duu sú̵ú̵wu̵ kan hȩn ɓı̵́d sá, a̧máa i gbɔ Tayɨɨ a wu̵ si̧'i̧du̵, moo ı̵́ 'yɛ́lı̵́ Tayɨɨ o̧ debterelı̵́: “Míńnɔ vȩ' hȩn ɓı̵́d nán voo sú̵ú̵ vu̵.”

²⁰Duu o̧: “Go̧o̧m ka ya̧ nán maag móó tée, a̧m pú̵gu̵ hȩn lálı̵́ la ú̵; mam ka 'wɔddu̵ tée, a̧m pú̵gu̵ mam zɔlı̵́ la ú̵ á̧ḿ, moo a̧m kɔ́ ı̵́ yo̧go̧ tée, mbaa kɔ́ ı̵́ káḿ gbɔddu̵ sȩ́ḿ nɔ́lȩ́ sú̵'ú̵[5] zu wɔgɔ.”

²¹Hȩn ɓı̵́d a mbam sá; a̧máa a̧mmɔ mbaga kan hȩn du̵u̵ kɔ́lı̵́.