Read Dii NÁN RÓMA VɄ 16 Bible Online

NÁN RÓMA VɄ 16 - Dii bible

NÁN RÓMA VɄ 16

¹Mí bíńda ví moo i fȩȩ da ba ví kirtȩ́n Febée ká kɔ́ ba'ad dɨ sa̧a̧m nán sú̵ggı̵́ voolı̵́ kaa Sa̧ŋkeréelı̵́.

²I fȩȩwo̧ kan yɛ́g ı̵́ 'yɛ́lı̵́ woo kɔ́ ı̵́ zig Tayɨɨ woo ku̵u̵ baa kɔ́ máa wɔgɔ. Ka hí̧í̧ hȩn víílí tée, i pú̵gu̵ la ú̵. Aga baa pú̵ nán ɓu̵u̵lı̵́ na'a vu̵ hȩn, pú̵n á̧ḿ.

³I vá' Prisíl, kan Akíla, dan ba'ad Yesu Krístu woo kɔ́lı̵́ yȩ vu̵ á̧ḿ.

⁴Zaa ka vu̵n nɔɔ moo míílí̧ ó̧. Míi dȩn vu̵ nag mí dágá né, a̧máa nán sú̵ggı̵́ ı̵́ ku̵u̵ Yúúda pɛ́lı̵́ hág tóó vu̵lı̵́ ɓu̵u̵lı̵́ na'a máa, vu̵ dȩn vu̵ nag á̧ḿ.

⁵I vá' nán sú̵ggı̵́ ku̵u̵ baa sú̵g voolı̵́ ligí máa vu̵ á̧ḿ. I vá'an ı̵́ hí̧í̧lí̧ míí Epáýnɛd ka dəŋ 'yɛ́ zó̧ó̧ woo Krístu woolı̵́ hág Aazíilí yȩ wu̵lı̵́.

⁶I vá' Maaríi ka kɔ́d ví ba'ad na'a yȩ á̧ḿ.

⁷I vá' Andoníkus kan Zunía, nán míí kú̵u̵ su̵g dɔd vɔ́ lig púúsinalȩ́ yȩ vu̵ wu̵lı̵́ á̧ḿ. Yɛ́g voo kiy ɓu̵u̵lı̵́ na'a sa̧a̧m waa ba'ad Yesu woo voolı̵́. Ká vu̵u̵ tii nán Krístu woo ɓə́ən tíŋ́.

⁸I vá'an dan gboo Ampilás, nán ı̵́ 'yɛ́lı̵́ woo yȩ wu̵lı̵́.

⁹I vá' Uribɛ́n, da vɔ́ ı̵́ ba'ad kɔ́lı̵́ Krístu woolı̵́ yȩ wu̵lı̵́, kan ı̵́ hí̧í̧lí̧ míí Estakíi á̧ḿ.

¹⁰I vá' Apelɛ́d, ka kɔ́ ba'ad yȩ́ń Krístu woo yȩ wu̵lı̵́. I vá' nán kíi Aritobúl woolı̵́ vu̵ á̧ḿ.

¹¹I vá' Herodió̧ŋ, mɛm míí yȩ wu̵lı̵́. I vá' nán kíi Naasíd woolı̵́ ı̵́ ku̵u̵ 'yɛ́ zó̧ó̧ voo ı̵́ 'yɛ́lı̵́ Yesu woolı̵́ máa vu̵ á̧ḿ.

¹²I vá' Tirifɛ́n vu̵ kan Tirifód, ku̵u̵ kɔ́d ı̵́ 'yɛ́lı̵́ ba'ad du̵u̵lı̵́ na'a yȩ, kan ı̵́ hí̧í̧lí̧ míí Perezíd ka kɔ́d ı̵́ 'yɛ́lı̵́ ba'ad na'a yȩ á̧ḿ.

¹³I vá' Rufúu, ı̵́ 'yɛ́lı̵́ ka yeewu̵ yȩ wu̵lı̵́, kan na' woo, ka mbaa kɔ́ ı̵́ na' míí wɔgɔ yȩ á̧ḿ.

¹⁴I vá' Asiŋkiríd, kan Filegɔ́ŋ, kan Hɛrɛmɛ́d, kan Patobád, kan Hɛrɛmád, kan dan kirtȩ́n tóó ku̵u̵ mbaa kan vu̵ máa vu̵ á̧ḿ.

¹⁵I vá' Filológ, kan Zulíi, kan Nɛrée kan daa kȩ́ȩ́, kan Olipáa, kan nán Tayɨɨ woo tóó ku̵u̵ sú̵g mbaa kan vu̵ máa á̧ḿ.

¹⁶I vá'án ya víílí kɔ́ ı̵́ dag sá̧ŋ́ vu̵ wɔgɔ, i ka pí̧í̧n ya zó̧ó̧lȩ́. Nán sú̵ggı̵́ Krístu woo vu̵ 'waapád vu̵ vá' ví wu̵lı̵́ á̧ḿ.

¹⁷Dan kirtȩ́n vu̵, mí o̧d ví, i gág kan nán ku̵u̵ hɨ' ya̧g, ku̵u̵ kɔ́ nán zó̧ó̧ 'yɛ́lı̵́ tóó ku̵u̵ kéé moo ku̵u̵ tú'ud ví tíŋ́ yȩ gbɔ máa vu̵ ú̵. I ya̧ dáŋ́ voolı̵́ sá,

¹⁸moo nán ı̵́ yo̧go̧ yȩ vu̵ kɔ́n ı̵́ 'yɛ́lı̵́ Krístu wu̵ ba'ad né, a̧máa aga vu̵ taa séý hȩn lálı̵́ voo nɔ. Vu̵ to̧o̧ ya̧g, vu̵ na' nán vu̵, vu̵ zo' nán moo taalı̵́ waaná' vu̵.

¹⁹A̧máa ı̵́ víí, nán 'waapád vu̵ gaa ví, kíí kid ı̵́ 'yɛ́lı̵́ Yesu tɔ́g yȩ ó̧. Zó̧ó̧ dȩ'ȩn yúú víílí ú, a̧máa mí hí̧í̧ i gaa hȩn du̵u̵ kɔ́lı̵́ dȩ"ȩ́ na'a; hȩn ɓı̵́d kɔ́lı̵́ a mbaad ví kɔ́ ı̵́ hȩn kı̵́b víí wɔgɔ.

²⁰Tayɨɨ ı̵́ ka pú̵ ká̧'a̧d yȩ, wú̵ń há̧á̧ sɔgɔd Seeɗán tíŋ́ víílí. Zó̧ó̧ nán ı̵́ 'yɛ́lı̵́ baa ví Yesu woo a mbaa kan ví ú.

²¹Dan ba'ad Timɔtée vá' ví wu̵lı̵́. Nán míí Lusíw, kan Yasó̧n, vu̵ kan Sosipatɛ́ɛr, vu̵ vá' ví wu̵lı̵́ á̧ḿ.

²²Ɨ́ míí, Teretíwu̵, káń bíńda ɗerwəl yɛ, mí vá' ví kan yɛ́g ı̵́ 'yɛ́lı̵́ baa ví woo nɔ.

²³Gayús, káń dɔ́ woolı̵́, nán kirtȩ́n ku̵u̵ baa sú̵g woolı̵́ yɛ, vá' ví wu̵lı̵́. Ɛrás, ı̵́ sɨɨde kaa tu̵lı̵́ yɛ vu̵ kan da vɔ́ kirtȩ́n Karatús, vu̵ vá' ví wu̵lı̵́ á̧ḿ. [

²⁴Zó̧ó̧ nán ı̵́ 'yɛ́lı̵́ baa ví Yesu Krístu woo a mbaa kan ví 'waapád, aamɛ́n.]

²⁵Ba na' ví Tayɨɨɨ! Wu̵ sȩn ví fó̧ó̧ kan néélȩ́ woo kan moo to̧o̧ 'maŋ káń pa yúú Yesu Krístu woolı̵́ yȩlȩ́. Tayɨɨ tú'ud ba ví hȩn ka mbɔ́g máa sú̵'ú̵. Ká mbɔ́g hȩn woo yu̵g ɗii sú̵'ú̵,

²⁶a̧máa 'ya̧'a̧ yɛ tú' hȩn woo la zo"ı̵́ debtere anábi voolı̵́, o̧ kɔ́ ı̵́ Tayɨɨ ı̵́ káákáá ka pa moo o̧ wɔgɔ. Tée zig nán 'waapád u̵u̵ 'yɛ́ zó̧ó̧ woolı̵́, u̵u̵ kiddu̵ tɔ́ggɨ.

²⁷Tayɨɨ wu̵ ı̵́ hȩn gaalı̵́ dágá. Ba na' ví wu̵ yu̵ yúú Yesu Krístu woolı̵́ há̧á̧ káákáá, aamɛ́n.