Read Dii NÁN RÓMA VɄ 3 Bible Online

NÁN RÓMA VɄ 3 - Dii bible

NÁN RÓMA VɄ 3

¹Mbaalı̵́ nán Yúúda máa wu̵ du̵u̵ mba hȩnna? Do̧ŋ dɔ́lı̵́ wu̵ hȩn gbo̧o̧a̧a̧?

²Ee, hȩn gbo̧o̧ȩ, yúú hȩn 'waapáddı̵́. Də́ń kəd máa, Tayɨɨ 'yɛ́ moo woo vu̵ dɨ nán Yúúda voolı̵́ nagá.

³Báń o̧ ví nɛ́nná? Nán Yúúda tóó u̵u̵ buu ya̧g talı̵́ voo tée, ya̧g talı̵́ Tayɨɨ woo wú̵ń tii hȩn lee áa?

⁴Pɛ́lı̵́ sá̧ḿ! Kóó nán 'waapád a mbaa nán vbáddɨ si̧', Tayɨɨ moo woo moo yȩ́ńne kɔ́ ı̵́ debtere Tayɨɨ ka o̧ wɔgɔ, o̧: “Mɔ́ń mbaa kan moo yȩ́ń ya moo fannélȩ́; kóó nán u̵u̵ doomɔ́ si̧', moo móó to̧o̧ ó̧.”

⁵A̧máa hȩn ɓı̵́d máa kaa kɔ́ ví yɛ, Tayɨɨ a nuŋ na"ȩ́ wu̵lı̵́ tée, báń o̧ ví nɛ́nná? Tayɨɨ a si̧'i̧d ba ví tée, kɔ́ hȩn kə̧ə̧gaa? (Mí vi moo kɔ́ ı̵́ nánán ku̵u̵ baa vi ví máa wɔgɔ.)

⁶Pɛ́lı̵́ sá̧ḿ! Tayɨɨ kan kɔ́ hȩn kə̧ə̧gɨ tée, kan sə̧' moo yúú nánán voolı̵́ nɛ́nná?

⁷A̧máa moo yȩ́ń Tayɨɨ woo a ɓu̵u̵ mba moo vbád míí vu̵, moo a nuŋ na"ȩ́ wu̵lı̵́ tée, moo ȩn ka sə̧' moo yúú míílí̧ kɔ́ ı̵́ nán hȩn ɓı̵́d kɔ́lı̵́ wɔgɔlá?

⁸Moo ȩn kaa o̧n ví ba kɔ́ ví hȩn ɓı̵́d tée, hȩn du̵u̵ a yaanɔ nélá? Nán tóó u̵u̵ bi o̧n moo ɓı̵́ddɨ tée, vu̵ gən mooɨ. Nán yȩ Tayɨɨ wú̵ń sə̧' moo yúú voolı̵́, vu̵ maa ba sə̧'ə̧d vu̵ moo ó̧!

⁹Báń o̧ ví nɛ́nná? Ɨ́ vóó nán Yúúda vu̵, vɔ́ mba zig tóó vu̵ áa? Pɛ́lı̵́ sá̧ḿ! Mí tú'ud ví sú̵'ú̵, nán Yúúda vu̵, kan nán tóó vu̵ 'waapád, hȩn ɓı̵́d wu̵ pi̧i̧ vu̵

¹⁰kɔ́ ı̵́ debtere ka o̧ wɔgɔ, o̧: “Nán ba ka kɔ́ hȩn hí̧í̧lí̧ Tayɨɨ woo máa, ba pɛ́lı̵́, kóó dágá aga.

¹¹Nán moo taalı̵́ pɛ́lı̵́. Nán tóó soon Tayɨɨ né.

¹²Ya voo 'waapád vu̵ ti sı̵́ hi̧naa laalı̵́ Tayɨɨ woolı̵́ ú̵. Vu̵ kɔ́n hȩn du̵u̵ tóó né, kóó nán dágá aga.

¹³Ya̧g voo mbaa wəə kɔ́ ı̵́ bɛ́ɛ́g tə́əd tóó wɔgɔ. Ya̧g voo baa zo' woo hȩnne. Moo ka vúd ya̧g voolı̵́ máa, mbaa kɔ́ ı̵́ nɔŋ bɨɨg wɔgɔ.

¹⁴Vu̵ ga' voo naggɨ, vu̵ moo moo ɓı̵́d mɛ́ń.

¹⁵Vu̵ kɛ ɗug vaŋná, moo nɔm nɔɔnée.

¹⁶Ya 'yȩ́ȩm voo 'waapád, vu̵ lı̵́d hȩn duu wu̵lı̵́. Vu̵ kɔ́ hȩn hág tunní vu̵.

¹⁷Vu̵ gaan voo hi̧naa to̧o̧g né.

¹⁸Vu̵ ndɔgɔn voo Tayɨɨ né sá̧ḿ.”

¹⁹Ba gaa ví hȩn dooká Múúsa woo ku̵u̵ o̧ máa 'waapád, o̧d nán ı̵́ ku̵u̵ duu dooká yȩ vu̵ moo, u̵u̵ 'yɛ́ ya̧g moo hí̧í̧lí̧ sá. Dooká yȩ o̧ á̧ḿ, nán 'waapád vu̵ maa Tayɨɨ ba a si̧'i̧d vu̵ ú̵,

²⁰moo nán tóó ba kɔ́ hȩn dooká Múúsa woo ku̵u̵ o̧ yɛ, ma ba to̧n kan Tayɨɨ máa ba pɛ́lı̵́. Dooká yȩ vu̵ tú'ud nán vu̵ hȩn dágá, wu̵ yɛ nɔ, tú'ud vu̵ ba u̵u̵ gaa ba bin nán hȩn ɓı̵́d kɔ́lı̵́ vu̵ yu̵.

²¹A̧máa 'ya̧'a̧ yɛ Tayɨɨ tú'ud ba ví hi̧naa to̧nné kannɔ sú̵'ú̵. Hi̧naa yȩ, moo kaa duu ví dooká Múúsa woo vu̵ má nɔ pɛ́lı̵́. Debtere Múúsa woo vu̵, kan debtere anábi voo vu̵, vu̵ o̧ moo yúú woolı̵́ sú̵'ú̵.

²²Tayɨɨ to̧n kan nán ku̵u̵ 'yɛ́ zó̧ó̧ voo Yesu Krístu woolı̵́ máa vu̵ yu̵. Nán ku̵u̵ 'yɛ́ zó̧ó̧ voo woolı̵́ máa, vu̵ to̧n kan Tayɨɨ 'waapád. Tayɨɨ səgən nán tóó né,

²³moo nán 'waapád vu̵ kɔ́ hȩn ɓı̵́d, na"ȩ́ Tayɨɨ woo voolı̵́ pɛ́lı̵́.

²⁴A̧máa Tayɨɨ to̧n kan vu̵ té', kan zó̧ó̧ nán woo, yúú ba'ad Yesu Krístu woo ka səd nán vu̵ yȩlȩ́.

²⁵Tayɨɨ dɔddu̵ la nɔmmé moo bi kéé hȩn ɓı̵́d nán ku̵u̵ 'yɛ́ zó̧ó̧ woolı̵́ yȩ voo gbɔ yúú nɔm woo yȩlȩ́. Tayɨɨ kɔ́ ı̵́ yo̧go̧ moo bi tú' ba bin kɔ́ hȩn yagalı̵́. Ká tíŋ́ máa, Tayɨɨ ma' zó̧ó̧, ká si̧'i̧n nán vu̵ moo hȩn ɓı̵́d voo né. A̧máa 'ya̧'a̧ yɛ tú' ba bíń to̧n kan nán vu̵ nɛ́nná, moo hí̧í̧ bi kɔ́ hȩn yȩ́ń, bi tii nán ı̵́ ku̵u̵ 'yɛ́ zó̧ó̧ voo Yesu woolı̵́ máa vu̵ ı̵́ to̧o̧g bii á̧ḿ.

²⁷Hi̧naa tóó moo nán u̵u̵ duu na' yúú wu̵lı̵́ máa dɨláa? Pɛ́lı̵́, kóó dágá aga. Moo ȩná? Moo ku̵u̵ kid dooká Múúsa woo vu̵ tɔ́g má naa? Pɛ́lı̵́ á̧ḿ, a̧máa moo ku̵u̵ 'yɛ́ zó̧ó̧ voo Yesu woolı̵́ má nɔ,

²⁸moo vɔ́ taa vóó, Tayɨɨ ba to̧n kan nán yúú zó̧ó̧ 'yɛ́lı̵́ woolı̵́, a̧máa moo ka kid dooká Múúsa woo vu̵ yu̵ tɔ́g má nɔ pɛ́lı̵́.

²⁹Tóó tée Tayɨɨ wú̵ń mbaa də́ń Tayɨɨ nán Yúúda voo nɔ kəddaa? Woo Tayɨɨ zig tóó voo pɛ́láa? Də́ń máa, Tayɨɨ voo nɔ á̧ḿ,

³⁰moo Tayɨɨ dɨ dágá. Wú̵ńnɔ tii nán Yúúda vu̵ ı̵́ to̧o̧g woo vu̵ yúú zó̧ó̧ 'yɛ́lı̵́ voolı̵́, kan nán ı̵́ ku̵u̵ Yúúda pɛ́lı̵́, ku̵u̵ 'yɛ́ zó̧ó̧ voo woolı̵́ máa vu̵ á̧ḿ.

³¹Hȩn woo tú' ban na'ad ví dooká Múúsa woo vu̵ gbɔ sá'áa? Ɨ́ yo̧go̧ pɛ́lı̵́ á̧ḿ! Ba kɔ́ ví moo dooká yȩ u̵u̵ mbaa yagalı̵́.