Read Dii NÁN RÓMA VɄ 4 Bible Online

NÁN RÓMA VɄ 4 - Dii bible

NÁN RÓMA VɄ 4

¹Vɔ́ń o̧ vóó née yúú a vɔ́ yée Ibrahí̧í̧ma woolı̵́lá? Ibrahí̧í̧ma nánánne á̧ḿ. Máa ká nuŋ ȩná?

²Tayɨɨ kan to̧n kannɔ moo ba'ad du̵u̵ woo ka kɔ́ má nɔ tée, kan dəm fó̧ó̧ woo ú̵. A̧máa dəm fó̧ó̧ woo tíŋ́ Tayɨɨ woolı̵́ né.

³Debtere o̧: “Ibrahí̧í̧ma ká 'yɛ́ zó̧ó̧ woo Tayɨɨ woolı̵́, ma Tayɨɨ ho̧ zó̧ó̧ 'yɛ́lı̵́ woo, 'yɛ́gɛ nán to̧o̧g woo.”

⁴Nán ka kɔ́ ba'ad, ma ka nuŋ hȩn sú̵ú̵lı̵́ wu̵lı̵́ máa, vu̵ o̧n hȩn woo ba hȩn pú̵lı̵́ té"ɨ né; vu̵ o̧ nán yȩ ba maa hȩn sú̵ú̵lı̵́ woo nuníi.

⁵A̧máa nán tóó ka kɔ́n ba'ad né, ka 'yɛ́ zó̧ó̧ woo Tayɨɨ woolı̵́, Tayɨɨ ka mbɔ́g moo kan zó̧ó̧ to̧o̧ yúú nán ku̵u̵ duunɔ né máa, Tayɨɨ ho̧ zó̧ó̧ 'yɛ́lı̵́ nán yȩ woo, ma 'yɛ́gɛ nán to̧o̧g woo.

⁶Moo woo nɔ Daavíd moo moo zó̧ó̧ dȩ"ȩ́ yúú nán tóó Tayɨɨ ka ho̧ zó̧ó̧ 'yɛ́lı̵́ woo, ma ka tiiwu̵ nán to̧o̧g woo máalȩ́ ı̵́ yo̧go̧, o̧:

⁷“Du̵u̵d nán ı̵́ Tayɨɨ ka kéé hȩn kə̧ə̧g kɔ́lı̵́ voo gbɔ sú̵'ú̵, ma ka na'ad hȩn ɓı̵́d voo gbɔ la má nɔ.

⁸Du̵u̵d nán ı̵́ ı̵́ 'yɛ́lı̵́ Tayɨɨ ka tiinɔ píg né má nɔ!”

⁹Hȩn zó̧ó̧ dȩ"ȩ́ yȩ mbaad də́ń nán ı̵́ ku̵u̵ dɔ́ do̧ŋ máa vu̵ yu̵ dágá kəddaa? Mbaad nán ı̵́ ku̵u̵ dɔ́n do̧ŋ né máa vu̵ á̧ḿ náa? Ba vɔ́n há̧á̧ o̧: “Tayɨɨ ho̧ zó̧ó̧ 'yɛ́lı̵́ Ibrahí̧í̧ma woo, ma 'yɛ́gɛ nán to̧o̧g.”

¹⁰A̧máa hȩn woo ká kɔ́y zag ndɛnná? Ká kɔ́y pig Ibrahí̧í̧ma ka dɔ́ do̧ŋ máa láa? Tóó tée, kɔ́y pȩ́ń, ya dɔ́ do̧ŋ pigimaa? A̧máa dəŋ kɔ́y pȩ́ń, ya dɔ́ do̧ŋ pigim.

¹¹Ibrahí̧í̧ma baa ya dɔ́ sı̵́ woo do̧ŋ pigim sá̧á̧, moo hȩn a tú' Tayɨɨ ba tii sı̵́ nán zaga yȩ nán to̧o̧g woo yúú zó̧ó̧ 'yɛ́lı̵́ woolı̵́ ú̵. Moo woo nɔ Ibrahí̧í̧ma mbaa ba' nán zó̧ó̧ 'yɛ́lı̵́ ku̵u̵ dɔ́n do̧ŋ né máa voo 'waapád, ma Tayɨɨ 'yɛ́ vu̵ nán to̧o̧g woo vu̵.

¹²Ibrahí̧í̧ma mbaa ba' nán ku̵u̵ dɔ́ do̧ŋ máa voo nɔ á̧ḿ, nán ı̵́ ku̵u̵ dɔ́n do̧ŋŋɨ dágá né, a̧máa ku̵u̵ 'yɛ́ zó̧ó̧ voo Tayɨɨ woolı̵́ kɔ́ ı̵́ Ibrahí̧í̧ma ka 'yɛ́ ma, ka ya dɔ́ do̧ŋ pigim máa wɔgɔ.

¹³Tayɨɨ ká tad Ibrahí̧í̧ma ya̧g, kan zig woo, ba vú̵ń ɓɛ hág kɔ́ ı̵́ hȩn gaga wɔgɔ. Tayɨɨ ká tan ya̧g yȩ, moo Ibrahí̧í̧ma ba duu dooká Tayɨɨ woo vu̵ yu̵ máa pɛ́lı̵́, a̧máa moo ka 'yɛ́gɛ nán to̧o̧g woo yúú zó̧ó̧ 'yɛ́lı̵́ woolı̵́ má nɔ.

¹⁴Tow nán ı̵́ ku̵u̵ duu dooká Tayɨɨ woo vu̵ máa, ka vu̵nnɔ ɓɛ hág kɔ́ ı̵́ hȩn gaga wɔgɔ tée, zó̧ó̧ 'yɛ́lı̵́ voo kan mbaa hȩn leená. Ya̧g talı̵́ Tayɨɨ woo kan hȩn za̧a̧ tóó nɔ pɛ́lı̵́ á̧ḿ.

¹⁵Moo dooká Tayɨɨ woo vu̵ pa̧ŋ voo zó̧ó̧ yȩ́ȩ́ Tayɨɨ woo nɔ. A̧máa ya dooká ku̵u̵ wu̵lı̵́ pɛ́lı̵́ máa, hȩn ɓı̵́d kɔ́lı̵́ sı̵́ wu̵lı̵́ pɛ́lı̵́ á̧ḿ.

¹⁶Moo woo nɔ ma, Tayɨɨ ká ta ya̧g yúú zó̧ó̧ 'yɛ́lı̵́lı̵́, moo bi pú̵ hȩn woo leená té'. Tée báń mbaa ví waa Ibrahí̧í̧ma woo vu̵ 'waapád, nán ku̵u̵ duu dooká Tayɨɨ woo vu̵ máa voo nɔ dágá pɛ́lı̵́, a̧máa nán ı̵́ ku̵u̵ 'yɛ́ zó̧ó̧ voo woolı̵́ kɔ́ ı̵́ Ibrahí̧í̧ma wɔgɔ máa á̧ḿ. Ibrahí̧í̧ma wu̵ ba' nán zó̧ó̧ 'yɛ́lı̵́ baa ví 'waapád,

¹⁷kɔ́ ı̵́ debtere ká o̧ máa wɔgɔ, o̧: “Mí 'yɛ́m ba' zig nán voo vu̵ ɓu̵u̵lı̵́ na'a.” Tíŋ́ Tayɨɨ woolı̵́ máa, ba ví waa Ibrahí̧í̧ma woo vu̵ yu̵, moo Ibrahí̧í̧ma ka 'yɛ́ zó̧ó̧ woo Tayɨɨ woolı̵́ má nɔ, Tayɨɨ ka nim nán vu̵ nɔmmé, ka bee hȩn ı̵́ ku̵u̵ pɛ́lı̵́ máa vu̵, vu̵ tii mbaa wu̵lı̵́ á̧ḿ.

¹⁸Ibrahí̧í̧ma ká fȩȩ moo Tayɨɨ woo, kóó ka ho̧n hȩn zó̧ó̧ 'yɛ́lı̵́ tóó né yȩ nɔ si̧'. 'Yɛ́ zó̧ó̧ Tayɨɨ woolı̵́ ma tii “ba' zig nán voo vu̵ ɓu̵u̵lı̵́ na'a” kɔ́ ı̵́ Tayɨɨ ka o̧ddu̵ máa wɔgɔ, o̧: “Zig móó wú̵ń ɓu̵u̵ ı̵́ yo̧go̧” á̧ḿ.

¹⁹Zaa ve' Ibrahí̧í̧ma woo kan ya̧ sı̵́ tȩmɛre ú̵. Kóó ka taa zaa ba bíń nɔɔ sú̵'ú̵, Sára á̧ḿ, ka maa ba duu ha̧a̧n sı̵́ waa né yȩ nɔ si̧', zó̧ó̧ 'yɛ́lı̵́ Ibrahí̧í̧ma woo 'wáa né.

²⁰Ibrahí̧í̧ma 'yɛ́ zó̧ó̧ woo ya̧g talı̵́ Tayɨɨ woo yȩlȩ́, faan moo né á̧ḿ, a̧máa na' Tayɨɨ, zó̧ó̧ 'yɛ́lı̵́ woo tii sȩ́ń sȩ́nné mɛ́ń.

²¹'Yɛ́ zó̧ó̧ hȩn Tayɨɨ ká ka ta ya̧g wu̵lı̵́ 'waapád yȩ ban kɔ́yyú̵.

²²Moo woo nɔ ma, “Tayɨɨ 'yɛ́ Ibrahí̧í̧ma nán to̧o̧g woo.”

²³A̧máa moo ku̵u̵ bíńda: “Tayɨɨ ka 'yɛ́gɛ nán to̧o̧g woo” yɛ, vu̵ bíńda vu̵ moo Ibrahí̧í̧ma woo nɔ dágá né.

²⁴Vu̵ bíńda hȩn yɛ vu̵ moo baa ví á̧ḿ, ı̵́ kaa to̧n ví kan Tayɨɨ, kaa 'yɛ́ ví zó̧ó̧ Tayɨɨ ka nim ı̵́ 'yɛ́lı̵́ baa ví Yesu nɔmmé yȩ woo nɔ.

²⁵Ká vu̵ nɔɔ Yesu moo hȩn kɔ́lı̵́ sɔnné baa ví nu, ma Yesu duu níḿ, moo aa to̧n vi kan Tayɨɨɨ.