Read Dii NÁN RÓMA VɄ 6 Bible Online

NÁN RÓMA VɄ 6 - Dii bible

NÁN RÓMA VɄ 6

¹Tée báń o̧ ví nɛ́nná? Ba kɔ́ ví hȩn ɓı̵́d laa tíŋ́ tíŋ́ moo Tayɨɨ a kɔ́ zó̧ó̧ nán gbo̧o̧ ba'aa?

²Ɨ́ yo̧go̧ pɛ́lı̵́ sá̧ḿ! Ba mbaa ví sı̵́ nɔmná yúú hȩn ɓı̵́ddı̵́ ú̵, ma báń duu dəŋ née mbaa ví kan hȩn ɓı̵́ddá?

³Ba woo ví mam Tayɨɨ moo bi sú̵g mbaa ví kan Yesu Krístu wu̵ máa, ví gaa náa? Kaa woo ví mam Tayɨɨ máa, ba sú̵g nɔɔ ví kannɔ sú̵'ú̵.

⁴Kaa woo ví mam Tayɨɨ máa, ba sú̵g dɔ́ ví kannɔ bɛ́ɛ́gı̵́ sú̵'ú̵, moo kaa sú̵g nɔɔ ví kannɔ yȩ nɔ. Yesu ka níḿ sı̵́ nɔmmé kan nag gbaŋ Ba'á Tayɨɨ woo ú̵ máa, ba ví á̧ḿ, báń mbaa ví mbaalı̵́ 'maŋŋɨ.

⁵Kaa sú̵g nɔɔ ví kannɔ kɔ́ ı̵́ ka nɔɔ wɔgɔ yɛ, báń sú̵g níḿ ví kannɔ kɔ́ ı̵́ ka níḿ yɛ wɔgɔ á̧ḿ.

⁶Ba gaa ví du̵u̵lı̵́ na'a; mbaalı̵́ káa mbaa ví tíŋ́ máa, vu̵ su̵g ga' ba ví sı̵́ kan Krístu á̧ḿ la' vbagadı̵́ ú̵, moo Tayɨɨ a tud mbaalı̵́ ɓı̵́d baa ví yɛ, moo aa duu mbaa ví sı̵́ gba'a hȩn ɓı̵́d woo sá,

⁷moo nán ka nɔɔ tée, hȩn ɓı̵́d kan néélȩ́ tóó yúú woolı̵́ pɛ́lı̵́.

⁸Kaa nɔɔ ví kan Krístu á̧ḿ yɛ, ba 'yɛ́ ví zó̧ó̧ báń nuŋ ví vágád kannɔ á̧ḿ.

⁹Ba gaa ví sey Krístu ka níḿ sı̵́ nɔmmé ó̧ máa, ba gaa ví á̧ḿ, ba sı̵́ń duu nɔɔn sı̵́ né. Nɔm sı̵́ kan néélȩ́ yúú woolı̵́ pɛ́lı̵́.

¹⁰Nɔm woo yȩ hɨ'ɨn vu̵ kan hȩn ɓı̵́d do' dágá kəd, a̧máa mbaalı̵́ woo ı̵́ 'ya̧'a̧ yɛ sı̵́ mbaalı̵́ ı̵́ Tayɨɨ woo nɔ.

¹¹Ví á̧ḿ kíí sú̵gú̵n kan Yesu Krístu yȩ, i nɔɔ gbɔ hȩn ɓı̵́d tée, fó̧ó̧ víí a mbaad Tayɨɨɨ.

¹²Moo woo nɔ, hȩn ɓı̵́d víí a duu waa gbaŋ fó̧ó̧ víílí sá (víń dɨ nɔmme), i kid hȩn hí̧í̧lí̧ fó̧ó̧ tɔ́g sá á̧ḿ.

¹³I 'yɛ́ fó̧ó̧ víí ka' tóó moo hȩn ɓı̵́d kə́dkə́d kɔ́lı̵́ sá. A̧máa i ɓɛ fó̧ó̧ víí pú̵ Tayɨɨ kɔ́ ı̵́ nán ka níḿ ya nɔmmé máa wɔgɔ. I dɔd yúú víí 'waapád ba'ad woolı̵́; fó̧ó̧ víí u̵u̵ mbaa kɔ́ ı̵́ hȩn ba'ad wɔgɔ; i kɔ́ ba'ad a to̧o̧d Tayɨɨ wu̵lı̵́ á̧ḿ.

¹⁴A̧máa hȩn ɓı̵́d a duu mba ví sá, moo dooká Múúsa woo vu̵ buun ví sı̵́ né, a̧máa Tayɨɨ 'yɛ́ ví sı̵́ kan zó̧ó̧ nán woo nɔ.

¹⁵Tée kɔ́ nɛ́nná? Báń kɔ́ ví hȩn ɓı̵́d moo kaa duun ví sı̵́ dooká Múúsa woo vu̵ né, a̧máa kaa mbaa ví sı̵́ kan zó̧ó̧ nán Tayɨɨ woo yȩ naa? Ɨ́ yo̧go̧ pɛ́lı̵́ sá̧ḿ!

¹⁶Ví gaa kaa dɔ́ ba'ad nán tóó woolı̵́ tée, ba ta ya̧g ba bíń kiddu̵ tɔ́ggú̵, ba bíń tii gba'a woo ú̵ náa? Máa, tóó tée hȩn ɓı̵́d wu̵ pa̧ŋ ba laan nɔmmé, tóó tée tɔ́g kilí wu̵ pa̧ŋ ba laan, ma ba kɔ́ hȩn hí̧í̧lí̧ Tayɨɨ woo.

¹⁷A̧máa ba na' ví Tayɨɨɨ. Ɨ́ víí kíí mbaa gba'a hȩn ɓı̵́d woo máa, ví ya duu hȩn tú"í ku̵u̵ tú'ud ví yȩ kan zó̧ó̧ víí 'waapád sú̵'ú̵.

¹⁸Ví sə́d sı̵́ víí hȩn ɓı̵́ddı̵́ ú̵, ví tii sı̵́ gba'a moo hȩn hí̧í̧lí̧ Tayɨɨ woo kɔ́lı̵́ ú̵.

¹⁹Mí moo kɔ́ ı̵́ nánán wɔgɔ, moo fó̧ó̧ víí kan néélȩ́ ɓu̵u̵lı̵́ na'a pɛ́lı̵́. Ká tíŋ́ máa, ví dɔ́ ba'ad hȩn sí̧i̧d kɔ́lı̵́ kan zó̧ó̧ víí 'waapád, ví kɔ́ hȩn ɓı̵́d, ví ŋgó̧o̧d Tayɨɨ tɔ́g á̧ḿ. A̧máa 'ya̧'a̧ yɛ máa, séý i kɔ́ ba'ad Tayɨɨ woo kan zó̧ó̧ víí 'waapád á̧ḿ, moo i kɔ́ ba'ad hȩn hí̧í̧lí̧ Tayɨɨ woo nɔ.

²⁰Sey kíi mbaa lá gba'a hȩn ɓı̵́d woo máa, ví sə́d sı̵́ hȩn hí̧í̧lí̧ Tayɨɨ woo kɔ́lı̵́ ú̵.

²¹Sey woo máa, ví nuŋ hȩn yȩ́ń woo ȩná? 'Ya̧'a̧ yɛ ví ho̧ gaa ma, ma sȩ́ḿ kɔ́ ví sú̵'ú̵ náa? Ba'ad woo pa̧ŋ ba laan nɔmmé!

²²A̧máa 'ya̧'a̧ yɛ máa, ví sə́d sı̵́ mbaalı̵́ gba'a hȩn ɓı̵́d woo ú̵, ví sı̵́ gba'a Tayɨɨ woo vu̵ yu̵. Ví kɔ́ ba'ad, víń tii mbaa kɔ́ ı̵́ Tayɨɨ ka mbaa yȩ wɔgɔ. Sí̧'í̧d woo máa, vágád káákáá Tayɨɨ woolı̵́ɨ,

²³moo hȩn ɓı̵́d sú̵ú̵ ba woo kan nɔmme, a̧máa hȩn Tayɨɨ ka pú̵ ba té' máa wu̵ vágád káákáá woolı̵́ kan yɛ́g Yesu Krístu ı̵́ 'yɛ́lı̵́ baa ví woo nɔ.