Read Dii NÁN RÓMA VɄ 7 Bible Online

NÁN RÓMA VɄ 7 - Dii bible

NÁN RÓMA VɄ 7

¹Dan kirtȩ́n vu̵, ví gaa moo káń dɨd ví o̧lȩ́ yɛ vu̵ sú̵'ú̵, moo ví gaa dooká vu̵ sú̵'ú̵ á̧ḿ. Dooká máa néélȩ́ voo dɨ yúú nán ka mbaa lá zá̧a̧d máa woolı̵́.

²Tow, wakȩ́ȩ́ ka éé wə̧ə̧ tée, dooká vu̵ táń vu̵ kan wə̧ə̧ sú̵'ú̵, sey wə̧ə̧ ka mbaa lá zá̧a̧dná téelı̵́. A̧máa wə̧ə̧ ka nɔɔ sú̵'ú̵ tée, dooká vu̵ duu tan sı̵́ wakȩ́ȩ́ yȩ né.

³A̧máa wə̧ə̧ ka nɔɔ ná né pȩ́ń, ka la éé wə̧ə̧ tóó tée, vu̵ beewu̵ wakȩ́ȩ́ ɓáa kɔ́lı̵́ɨ. A̧máa wə̧ə̧ ka nɔɔ sú̵'ú̵ tée, dooká vu̵ o̧n moo tóó yúú woolı̵́ né. A la éé wə̧ə̧ tóó tée, kɔ́n ɓáaɨ né á̧ḿ.

⁴Ví á̧ḿ, dan kirtȩ́n vu̵, ví mbaa nɔmná yúú dooká Múúsa woo vu̵lı̵́, moo ví sú̵g kan fó̧ó̧ Krístu woo, moo bi mbaad nán tóó nɔ. 'Ya̧'a̧ yɛ, ví mbaad ı̵́ ka níḿ nɔmmé máa sú̵'ú̵, moo aa kɔ́d ví Tayɨɨ ba'ad ka hí̧í̧ má nɔ.

⁵Sey káa mbaa ví lá mbaalı̵́ ı̵́ hí̧í̧lí̧ nánán voo máa, dooká vu̵ sȩn moo taalı̵́ ɓı̵́d fó̧ó̧, ma hȩn ɓı̵́d baa kɔ́ ba'ad fó̧ó̧ baa vílí 'waapád, baa pa̧ŋ laan ba ví nɔmmé.

⁶A̧máa 'ya̧'a̧ yɛ, dooká duu za'an ba ví ní, moo ba nɔɔ ví, ba hı̵́'ı̵́n ví kan hȩn ka tú̵' ba ví pee sú̵'ú̵. Báń kɔ́d ví Tayɨɨ ba'ad kan hi̧naa 'maŋ tóó, kan néélȩ́ yigid Tayɨɨ woo nɔ, a̧máa kan hi̧naa see dooká voo nɔ pɛ́lı̵́.

⁷Tée báń o̧ ví nɛ́nná? Dooká máa vu̵ hȩn ɓı̵́ddaa? Pɛ́lı̵́ sá̧ḿ! A̧máa dooká vu̵u̵ tú'un hȩn yɛ ba hȩn ɓı̵́ddɨ. Moo yȩ́ńne, dooká kan o̧n: “A̧m ha' zó̧ó̧ hȩn dam woolı̵́ sá” né tée, ka míń gaan zó̧ó̧ ha"ı̵́ máa ba hȩn ɓı̵́ddɨ né.

⁸Hȩn ɓı̵́d ka duu dooká yȩ máa, nuŋ hi̧naa wu̵lı̵́, ma pú̵n moo taalı̵́ zó̧ó̧lȩ́ moo zó̧ó̧ ha"ı̵́ hȩn dan voolı̵́. Dooká yȩ kan pɛ́lı̵́ tée, hȩn ɓı̵́d kan mbaa né á̧ḿ.

⁹Sey káń kin ná dooká vu̵ né máa, mí mbaa zá̧a̧dná. A̧máa káń ki dooká vu̵ sú̵'ú̵ tée, hȩn ɓı̵́d nuŋ sı̵́ néélȩ́ ó̧,

¹⁰ma mí tii nɔɔ zó̧ó̧ míílí̧. Dooká kan pa̧ŋ fó̧ó̧ míí laan ya vágádı̵́ máa, tii pa̧ga̧n laan ya nɔmmé,

¹¹moo hȩn ɓı̵́d nuŋ sı̵́ hi̧naa wu̵lı̵́ ú̵, zo'on kan dooká vu̵, ma duu nɔɔn zó̧ó̧ míílí̧ kan dooká yȩ vu̵ á̧ḿ.

¹²Moo woo nɔ, dooká Múúsa woo vu̵ hȩn Tayɨɨ woo nɔ. Moo Tayɨɨ woo vu̵ tú' hȩn hí̧í̧lí̧ Tayɨɨ woo vu̵ du̵u̵ ú̵ á̧ḿ.

¹³Hȩn ka du̵u̵ máa tii nɔɔn sá'áa? Pɛ́lı̵́ sá̧ḿ, a̧máa hȩn ɓı̵́d wu̵ pa̧ŋ nɔm yaan. Aga tú' hȩn dáń bii ba hȩn ɓı̵́ddɨ, ɓɛ hȩn du̵u̵ kɔ́n ba'ad wu̵lı̵́, ma nɔɔn. Dooká vu̵ vud hȩn ɓı̵́d fó̧ó̧ tú' ba hȩn ɓı̵́ddɨ kəd.

¹⁴Ba gaa ví dooká máa, vu̵ vúd Tayɨɨ woolı̵́, a̧máa ı̵́ míí máa, mí nánánne, hȩn ɓı̵́d buun sú̵'ú̵.

¹⁵Mí kin hȩn kɔ́lı̵́ míí ní á̧ḿ, moo mí kɔ́n hȩn káń hí̧i̧n má nɔ né, mí tii kɔ́ hȩn ı̵́ káń máń vu̵ máa mɛ́ń.

¹⁶Hȩn káń kɔ́ vu̵ yɛ, a̧n ma vu̵ tée, mí gaa dooká máa vu̵ du̵u̵ ú̵.

¹⁷Moo woo nɔ ma, hȩn káń kɔ́ yɛ, míi kɔ́n né, a̧máa hȩn ɓı̵́d ka mbaa míílí̧ yɛ wu̵ kɔ́.

¹⁸Mí gaa hȩn du̵u̵ tóó míílí̧ pɛ́lı̵́, moo fó̧ó̧ míí fó̧ó̧ nánánne. Kóó hí̧í̧lí̧ hȩn du̵u̵ kɔ́lı̵́ a dɨ zó̧ó̧ míílí̧ si̧', mí kan néélȩ́ kɔ́lı̵́ woo pɛ́lı̵́ á̧ḿ,

¹⁹moo mí kɔ́n hȩn du̵u̵ káń hí̧i̧n kɔ́lı̵́ máa né, a̧máa mí tii kɔ́ hȩn ɓı̵́d káń sɛ́n né má nɔ.

²⁰Tow a̧n kɔ́ hȩn káń sɛ́nnɔ né má nɔ tée, míi kɔ́n né, a̧máa hȩn ɓı̵́d ka mbaa míílí̧ yɛ wu̵ kɔ́.

²¹Mí ho̧ hȩn ı̵́ tóó yɛ; sey káń hí̧í̧ bi kɔ́ hȩn du̵u̵ɨ tée, taalı̵́ tóó tii laan mí ya hȩn ɓı̵́d kɔ́lı̵́lı̵́.

²²Zó̧ó̧ míílí̧ máa, mí hí̧í̧ bi duu dooká Tayɨɨ woo vu̵ yu̵.

²³A̧máa mí ho̧ hȩn tóó zó̧ó̧ míílí̧ á̧ḿ, wu̵ kɔ́ sɨɨ kan moo taalı̵́ míí. Ma hȩn yȩ tú̵' 'yɛ́n gba'a hȩn ɓı̵́d woo ka dɨ zó̧ó̧ míílí̧ yɛ.

²⁴Wáý! Gíḿ gbo̧o̧ tóó naá! Hȩn fó̧ó̧ míílí̧ ka dɨn pa̧né laan ya nɔmmé yɛ, nóo wú̵ń sənná?

²⁵Mí dȩn míí Tayɨɨ nag kan yɛ́g Yesu Krístu ı̵́ 'yɛ́lı̵́ baa ví woo nɔ! Moo woo nɔ ma, zó̧ó̧ míílí̧ mí dɨ míí ba'ad dooká Tayɨɨ woo kɔ́lı̵́ ı̵́ yo̧go̧, a̧máa hȩn tóó zó̧ó̧ míílí̧ wu̵ 'yɛ́n gba'a hȩn ɓı̵́d woo.