Read Dii NÁN RÓMA VɄ 8 Bible Online

NÁN RÓMA VɄ 8 - Dii bible

NÁN RÓMA VɄ 8

¹'Ya̧'a̧ yɛ máa, Tayɨɨ wú̵ń sə̧'ə̧n nán ı̵́ ku̵u̵ sú̵gú̵n kan Yesu Krístu woolı̵́ máa vu̵ moo né,

²moo yigid Tayɨɨ woo wu̵ pú̵ nán ku̵u̵ sú̵gú̵n kan Yesu Krístu woolı̵́ máa vu̵ vágád. Néélȩ́ woo wu̵ vun nag hȩn ɓı̵́d woolı̵́, kan nɔmmé á̧ḿ.

³Hȩn dáń baa ví ka sɛ́n dooká Múúsa woo vu̵ né yɛ, dooká yȩ vu̵ kan néélȩ́ tóó pɛ́lı̵́. A̧máa Tayɨɨ wu̵ kɔ́ hȩn woo. Ba' Waa dáń woo kɔ́ ı̵́ nán hȩn ɓı̵́d kɔ́lı̵́ tóó wɔgɔ moo hȩn ɓı̵́d baa ví nu. Tayɨɨ sə̧' moo ı̵́ yo̧go̧ yúú hȩn ɓı̵́d fó̧ó̧ baa vílí yɛlı̵́.

⁴Tayɨɨ kɔ́ hȩn yȩ moo hȩn dooká yȩ ku̵u̵ hí̧í̧ máa a kɔ́y fó̧ó̧ baa vílí, ı̵́ kaa duun ví hȩn dáń fó̧ó̧ baa vílí ní, a̧máa kaa duu ví yigid Tayɨɨ woo yɛ nɔ.

⁵Nán ı̵́ ku̵u̵ mbaa voo mbaalı̵́ ı̵́ nánán voo máa, vu̵ dii voo də́ń hȩn fó̧ó̧ nánán ka hí̧í̧ máa wu̵ kɔ́lı̵́. A̧máa nán ı̵́ ku̵u̵ mbaa voo mbaalı̵́ ı̵́ yigid Tayɨɨ woo máa, vu̵ dii voo hȩn ı̵́ yigid Tayɨɨ woo ka hí̧í̧ máa wu̵ kɔ́lı̵́.

⁶Hȩn dáń ı̵́ fó̧ó̧ ka hí̧í̧ máa, laan ba woo nɔmmé. A̧máa hȩn hí̧í̧lí̧ ı̵́ yigid Tayɨɨ woo máa, laan ba woo ya vágád Tayɨɨ woolı̵́, kan ya fó̧ó̧ ká̧'a̧dı̵́ á̧ḿ.

⁷Nán ı̵́ ku̵u̵ hí̧í̧ voo də́ń hȩn hí̧í̧lí̧ fó̧ó̧ nánánne máa, vu̵ nán maag Tayɨɨ woo vu̵ yu̵. Vu̵ duun dooká Tayɨɨ woo vu̵ né, vu̵ kan néélȩ́ kɔ́lı̵́ woo pɛ́lı̵́ á̧ḿ.

⁸Nán ı̵́ ku̵u̵ mbaa mbaalı̵́ nánán voo yȩ, vu̵ to̧o̧n Tayɨɨ né sá̧ḿ.

⁹A̧máa tow yigid Tayɨɨ woo a mbaa dɨ zó̧ó̧ víílí ú tée, víí ví mbaan mbaalı̵́ nánán voo nɔ né, ví mbaa mbaalı̵́ yigid Tayɨɨ woo nɔ. Nán tóó yigid Krístu woo a woolı̵́ pɛ́lı̵́ tée, nán yȩ nán woo nɔ pɛ́lı̵́ á̧ḿ.

¹⁰Tow Krístu a dɨ zó̧ó̧ víílí tée, fó̧ó̧ víí a nɔɔ moo hȩn ɓı̵́ddɨ si̧', yigid Tayɨɨ woo pa̧ŋ ya vágád dɨ víílí, mbɔ́g ví, moo Tayɨɨ to̧n kan ví sú̵'ú̵.

¹¹Yigid Tayɨɨ woo ka nim Yesu nɔmmé yȩ a wu̵ mbaa zó̧ó̧ víílí tée, wú̵ń kɔ́ fó̧ó̧ nɔm víí yȩ vú̵ń mbaa zá̧a̧d kan néélȩ́ yigid woo ka mbaa víílí yȩ kɔ́ ı̵́ ka nim Krístu nɔmmé yȩ wɔgɔ.

¹²Moo woo nɔ, dan kirtȩ́n vu̵, ba dɨ ví kan ɓooɨ. A̧máa ɓoo ı̵́ ka duu ba ví fó̧ó̧ baa vílí má nɔ pɛ́lı̵́. Ba duu ví hí̧í̧lí̧ woo sá,

¹³moo i mbaa mbaalı̵́ ı̵́ nánánne tée, víń dɨ nɔmme. A̧máa i nɔɔ ba'ad hȩn dáń víílí fó̧lȩ́ yȩ kan néélȩ́ yigid Tayɨɨ woo nɔ tée, víń nuŋ vágádú̵.

¹⁴Nán 'waapád ku̵u̵ duu yigid Tayɨɨ woo máa, vu̵ waa Tayɨɨ woo vu̵ yu̵,

¹⁵moo yigid kíí nuŋ yȩ, yigid ı̵́ ka tii ví gba'a má nɔ pɛ́lı̵́, wu̵ kɔ́n ví dú̵ú̵ né á̧ḿ. A̧máa ví nuŋ yigid Tayɨɨ ka tii ví waa Tayɨɨ woo yȩ vu̵ yu̵, wu̵ tú'ud ba ví, ma ba o̧d ví Tayɨɨ moo dɔg yúba: “Ábba!” (Ba'á!)

¹⁶Yigid Tayɨɨ woo aga wu̵ o̧d yigid baa ví ba ban ví waa Tayɨɨ woo vu̵ yu̵.

¹⁷Ba ví waa woo vu̵ yu̵, báń nuŋ ví hȩn yȩ"ȩ́ woo ka tad zig woo vu̵ ya̧g wu̵lı̵́ yȩ á̧ḿ. Báń nuŋŋɔ ví kan Krístu á̧ḿ. Tow aa sú̵g nuŋ ví hȩn ndɔ́gɔné kan Krístu tée, báń duu nuŋ ví na"ȩ́ kannɔ á̧ḿ ya gbaŋ waalı̵́ woolı̵́.

¹⁸Mí taa hȩn ndɔ́gɔné kaa dɨ ví nuní 'ya̧'a̧ yɛ yɛ, ba gú̵gú̵nɔ kan na"ȩ́ Tayɨɨ a dɨn ba ví tú"í yȩ né.

¹⁹Hȩn yɨmné Tayɨɨ woo vu̵ 'waapád, vu̵ 'yɛ́ zó̧ó̧ laa zá̧ga̧ Tayɨɨ a tú' waa woo vu̵ wu̵lı̵́ máa,

²⁰moo Tayɨɨ tii hȩn yɨmné yȩ vu̵ hȩn lee, a̧máa hȩn yȩ kɔ́y duun hí̧í̧lí̧ hȩn yɨmné voo né, moo Tayɨɨ wu̵ 'yɛ́ vu̵ ı̵́ yo̧go̧. A̧máa Tayɨɨ 'yɛ́ zó̧ó̧ woo,

²¹moo sey tóólı̵́ tée hȩn yɨmné vu̵ á̧ḿ, vú̵ń sə́d nag ı̵́ hȩn tunní ka buu vu̵ yȩ woolı̵́. Tée vú̵ń mbaa kan yúú voo, kan na"ȩ́, tée vú̵ń man kan waa Tayɨɨ woo vu̵.

²²Ba gaa ví 'ya̧'a̧ yɛ hȩn yɨmné 'waapád vu̵ dɨ ndɛlı̵́ɨ; hȩn dɨ vu̵ ndɔ́gɔné kɔ́ ı̵́ wakȩ́ȩ́ tóó ka dɨ waa ha̧a̧lȩ́ máa wɔgɔ.

²³A̧máa hȩn yɨmné hágá yɛ vu̵ dɨn ndɛlı̵́ vu̵ dágá né; ı̵́ kaa dəŋ nuŋ ví yigid Tayɨɨ woo yɛ, ba dɨ ví ndɛlı̵́ zó̧ó̧lȩ́ á̧ḿ, ba laa ví hȩn Tayɨɨ ka 'yɛ́d waa woo vu̵, a səd fó̧ó̧ baa ví wu̵lı̵́ á̧ḿ má nɔ.

²⁴Tayɨɨ ká səd ba ví sú̵'ú̵, a̧máa ba 'yɛ́ ví lá zó̧ó̧ wu̵lı̵́ á̧ḿ. Tow aa ho̧ ví hȩn kaa 'yɛ́ ví zó̧ó̧ wu̵lı̵́ yɛ sú̵'ú̵ tée, duu sı̵́ hȩn zó̧ó̧ 'yɛ́lı̵́ɨ pɛ́lı̵́. Nóo duu 'yɛ́ sı̵́ zó̧ó̧ yúú hȩn ka nuŋ máalȩ́lá?

²⁵A̧máa aa 'yɛ́ ví zó̧ó̧ yúú hȩn kaa nugun ví lá né máalȩ́ tée, ba ma' zó̧ó̧ laawu̵ ví laalı̵́ɨ.

²⁶Ba 'yɛ́n ví néélȩ́ ɓu̵u̵lı̵́ na'a né, ma yigid Tayɨɨ woo wu̵ dɨ ba ví maalȩ́ á̧ḿ, moo ba ɓá' ví Tayɨɨ gaan du̵u̵ na'a né. A̧máa yigid Tayɨɨ woo aga baa ɓá' Tayɨɨ kan ndɛlı̵́ ya̧gá̧ pɛ. Ndɛlı̵́ woo máa, ba vud o̧n né á̧ḿ.

²⁷Tayɨɨ ka ho̧ hȩn gaa la woo zó̧ó̧lȩ́ yȩ, gaa woo hȩn yigid ka hí̧í̧ bi ɓá"u̵ máa ó̧, moo yigid ɓá"u̵ yúú nán ı̵́ woo voolı̵́ kɔ́ ı̵́ Tayɨɨ ka hí̧í̧ wɔgɔ.

²⁸Ba gaa ví Tayɨɨ kɔ́ ba'ad moo hȩn 'waapád a du̵u̵d nán ku̵u̵ hí̧í̧wo̧ máa voo nɔ, nán ı̵́ ka yee bee vu̵ kɔ́ ı̵́ ka hí̧í̧ wɔgɔ má nɔ.

²⁹Nán Tayɨɨ ka dəŋ yee vu̵ máa, mbɔ́g moo yúú voolı̵́, moo u̵u̵ tii mbaa kɔ́ ı̵́ waa bii vu̵ wɔgɔ á̧ḿ, moo Waa bii a mbaa waa nii dúú ɓu̵u̵lı̵́ na'a yȩ voo nɔ.

³⁰Nán Tayɨɨ ka yee vu̵ yȩ, bee vu̵ á̧ḿ. Ɨ́ ka bee vu̵ yȩ, tii vu̵ ı̵́ to̧o̧g woo vu̵ á̧ḿ. Ɨ́ ka tii vu̵ ı̵́ to̧o̧g woo vu̵ yȩ, pú̵ vu̵ na"ȩ́ woo á̧ḿ.

³¹Báń duu o̧ ví sı̵́ tóó ȩná? Tayɨɨ máa, baa ví nu. Nóo wú̵ń kɔ́ moo kan ba vílá?

³²Há̧ga̧n ba ví Waa dáń woo né, a̧máa dɔddu̵ nɔmmé moo baa ví 'waapád. Tée wú̵ń su̵g hȩn pú̵ ba ví 'waapád kan Waa woo á̧ḿ; ı̵́ yo̧go̧ náa?

³³Nóo wú̵ń doo nán Tayɨɨ ka yee vu̵ yȩlá? Pɛ́lı̵́, moo Tayɨɨ wu̵ o̧ ba vu̵n kan moo pɛ́lı̵́.

³⁴Nóo wú̵ń sə̧'ə̧d vu̵ moolá? Pɛ́lı̵́, moo Yesu Krístu wu̵ nɔɔ, ma duu níḿ nɔmmé, mbaa dɨ ka' nag nánné dáŋ́ Tayɨɨ woolı̵́, dɨ Tayɨɨ ɓá"ı̵́ yúú baa vílí á̧ḿ.

³⁵Nóo wú̵ń hɨ'ɨn ba ví kan zó̧ó̧ nán Krístu woo yȩlá? Hȩn ndɔ́gɔné, kan zó̧ó̧ to̧"ȩ́, kan moo dunní vu̵, go̧o̧m vu̵, kan gíḿ, kan hȩn dú̵ú̵ zálı̵́, kan nɔm, vú̵ńnɔ hɨ'ɨn ba vía?

³⁶Debtere o̧: “Vu̵ nɔɔ vɔ́ zá̧ga̧ga̧ moo móó nɔ. Vu̵ kɔ́ vɔ́ kɔ́ ı̵́ mbee tóó ku̵u̵ pa̧ŋ vu̵ laan sə̧"ȩ́ máa wɔgɔ.”

³⁷A̧máa kóó ı̵́ yo̧go̧ si̧', ba mba ví hȩn dɔg wu̵lı̵́ 'waapád kan néélȩ́ ı̵́ ka hí̧í̧ ba ví yȩ woo nɔ.

³⁸Mí 'yɛ́ zó̧ó̧, hȩn a hɨ'ɨn ba ví kan zó̧ó̧ nán woo yȩ máa pɛ́lı̵́. Kóó nɔm, kóó mbaalı̵́ zá̧a̧d, kóó maleeka vu̵, kóó nán gbo̧o̧ woo tɛ́lá, kóó hȩn hȩn mbalı̵́ ı̵́ be"ı̵́ vu̵, kóó hȩn u̵u̵ dɨ mbaalı̵́ ɓəə yɛ, kan ı̵́ u̵u̵ dɨ yaalı̵́ yɔ́gɔ́ yȩ vu̵ á̧ḿ,

³⁹kóó hȩn ı̵́ be"ı̵́ vu̵, kan hȩn hágá yɛlı̵́ vu̵, kóó hȩn Tayɨɨ ka yɨb vu̵ 'waapád. Hȩn tóó dágá aga wú̵ń hɨ'ɨn ba ví kan zó̧ó̧ nán Tayɨɨ woo ka tú'un ba ví Yesu Krístu ı̵́ 'yɛ́lı̵́ baa ví woolı̵́ yȩ né.