Read Dii 1 Nán Koríńti vu̵ 1 Bible Online

1 Nán Koríńti vu̵ 1 - Dii bible

1 Nán Koríńti vu̵ 1

¹Mí Póllu̵, mí waa ba'ad Yesu Krístu woo, Tayɨɨ ka been kan hí̧í̧lí̧ woo yɛ nɔ. Vɔ́ sú̵g kan da ba ví kirtȩ́n Sostɛ́n, vóo ba'ad ví ɗerwəl yɛ,

²nán ı̵́ Tayɨɨ ka yee 'yɛ́ ví nán woo moo Yesu Krístu woolı̵́ kaa Koríńtilí yȩ nɔ. Vɔ́ ba'ad nán ı̵́ ku̵u̵ duu yɛ́g ı̵́ 'yɛ́lı̵́ Yesu Krístu woo ya 'waapád máa vu̵ á̧ḿ. Wu̵ ı̵́ 'yɛ́lı̵́ voo kan ı̵́ 'yɛ́lı̵́ baa ví á̧ḿ.

³Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

⁴Mí dȩn Tayɨɨ[1] nag nəən yúú víílí ní, moo zó̧ó̧ nán ka kɔ́d ví kan yɛ́g Yesu Krístu woo yȩ nɔ.

⁵Tayɨɨ pú̵ ví hȩn 'waapád, moo kíí nán Yesu Krístu woo máa vu̵ yu̵. Ví gaa moo Tayɨɨ moolȩ́, ví ki gaa á̧ḿ.

⁶Ya̧g du̵lı̵́ víí yúú Krístu woolı̵́ yȩ dii sı̵́ woo dəggú̵.

⁷Moo woo nɔ ma, hȩn pú̵lı̵́ Tayɨɨ woo ka hi̧' víílí na'a yȩ nɔ. Ɨ́ víí kíí dɨ ı̵́ 'yɛ́lı̵́ baa ví Yesu Krístu laalı̵́ yȩ, hȩn tóó geen ví sı̵́ né.

⁸Wú̵ń tíd ví néélȩ́ na'a há̧á̧ a ya̧ bá' sí̧'í̧d, moo nán tóó a gəd ví moo zá̧ga̧ ı̵́ 'yɛ́lı̵́ baa ví Yesu Krístu woolı̵́ sá.

⁹Tayɨɨ ta ya̧g buu ní; wu̵ bee ví moo i nuŋ hȩn biilí kɔ́ ı̵́ Waa bii Yesu Krístu ı̵́ 'yɛ́lı̵́ baa ví wɔgɔ á̧ḿ.

¹⁰Dan kirtȩ́n vu̵, mí o̧d ví kan yɛ́g ı̵́ 'yɛ́lı̵́ baa ví Yesu Krístu woo nɔ, i su̵g ya̧ggɨ; ya̧g víí a hı̵́'ı̵́n sá. Moo taalı̵́ víí a dágá, zó̧ó̧ 'yɛ́lı̵́ víí a dágá á̧ḿ.

¹¹A̧máa dan kirtȩ́n vu̵, nán tóó vu̵ kíi Kelowée woolı̵́ vu̵ o̧n moo fá̧né ba dɨ sa̧a̧m víílí.

¹²Hȩn káń bi o̧d ví máa, wu̵ yɛ nɔ. Nán tóó vu̵ o̧: “Vɔ́ vóó nán Pól woo vu̵ yu̵;” tóó vu̵ o̧ voo: “Vɔ́ vóó nán Apolóo woo vu̵ yu̵;” tóó vu̵ o̧: “Vɔ́ vóó nán Piɛ́r woo vu̵ yu̵;” tóó vu̵ daa o̧ voo: “Vɔ́ vóó nán Krístu woo vu̵ yu̵;”

¹³máa, Krístu yȩ'ȩn fó̧ó̧ sá'áa? Pól wu̵ nɔɔ moo víí la' vbagadáa? Ká vu̵ woo ví mam Tayɨɨ woo kan yɛ́g Pól woo naa?

¹⁴Zó̧ó̧ míí dȩ', moo mí woon nán tóó mam Tayɨɨ woo sa̧a̧m víílí ní, séý Kirípus vu̵ kan Gayúsdu̵.

¹⁵Tée nán tóó wú̵ń o̧n ba bin woon mam Tayɨɨ woo kan yɛ́g míí nu né.

¹⁶(Ee, mí woo Ɛstefána kan nán woo vu̵ á̧ḿ, a̧máa mí duu gaan sı̵́ nán tóó mín woonɔ mam Tayɨɨ woo ú̵ máa né.)

¹⁷Krístu ba'an mí míí moo mam Tayɨɨ woonée né, a̧máa moo a̧n pa moo to̧o̧ 'maŋŋɨ. Hí̧í̧ a̧n moo moo kan hȩn gaalı̵́ nánán voo nɔ sá á̧ḿ, moo nɔm Krístu woo la' vbagadı̵́ yȩ kan tii hȩn leene.

¹⁸Nán ı̵́ ku̵u̵ ti máa, vu̵ ki voo moo nɔm Yesu woo la' vbagadı̵́ yȩ kɔ́ ı̵́ hȩn ya̧ŋ wɔgɔ, a̧máa ı̵́ kaa duu ví baa hi̧naa sə́nné yɛ, ba gaa ví baa néélȩ́ Tayɨɨ woo ba du̵u̵lı̵́,

¹⁹moo debtere o̧: “Míń lı̵́d moo gaalı̵́ nán moo gaalı̵́ voo pȩ́ń, míń ho̧ moo gaalı̵́ nán kɛb voo hȩn leená.”

²⁰Nán moo gaalı̵́ dɨ téé? Nán moo Tayɨɨ tú"í dɨ téé? Tóó tée, nán moo fanné dɨ téé hágá yɛlı̵́lá? Tayɨɨ tii moo gaalı̵́ hágá yɛ hȩn ya̧ŋ sú̵'ú̵ náa?

²¹Nánán vu̵ taa ba bin gaa moo sú̵'ú̵, a̧máa vu̵ gaan moo Tayɨɨ kan kɛb ı̵́ woo yȩ né. Moo woo nɔ ma, Tayɨɨ mbɔ́g moo bi səd nán ı̵́ ku̵u̵ 'yɛ́ zó̧ó̧ voo yúú hȩn ya̧ŋ kóó pa yɛ vu̵lı̵́ ú̵.

²²Nán Yúúda vu̵ vi voo bi ho̧ hȩn sa̧ga̧ vu̵ pȩ́ń, bi 'yɛ́ zó̧ó̧ wu̵lı̵́, a̧máa nán Gɛrɛ́g vu̵ soo voo hȩn gaalı̵́ɨ.

²³Ma ı̵́ vóó, vɔ́ pa vóó moo Krístu woo ku̵u̵ ga"u̵ la' vbagadı̵́ yȩ nɔ. Moo woo há' nán Yúúda vu̵ Tayɨɨ duulí; nán ı̵́ ku̵u̵ Yúúda pɛ́lı̵́ máa, vu̵ ki voo kɔ́ ı̵́ hȩn ya̧ŋ wɔgɔ á̧ḿ.

²⁴A̧máa nán ı̵́ Tayɨɨ ka bee vu̵ máa, kóó u̵u̵ nán Yúúda, kóó u̵u̵ nán Yúúda pɛ́lı̵́ si̧', vu̵ ho̧ voo néélȩ́ Tayɨɨ woo, kan moo gaalı̵́ woo ba du̵u̵lı̵́.

²⁵Ma hȩn ya̧ŋ Tayɨɨ woo yȩ mba moo gaalı̵́ nánán voo ú̵. Hȩn Tayɨɨ woo ka née né yȩ, mba néélȩ́ nánán voo ú̵ á̧ḿ.

²⁶Dan kirtȩ́n vu̵, ı̵́ víí Tayɨɨ ka yee ví yȩ, i tə́g ho̧ lá ví, sa̧a̧m víílí máa, nán ı̵́ ku̵u̵ dɨ kan moo gaalı̵́ ı̵́ nánán voo máa, vu̵ ɓu̵u̵ né. Nán gbo̧o̧ vu̵ ɓu̵u̵ né, gbaŋ waa vu̵ ɓu̵u̵ né á̧ḿ.

²⁷A̧máa Tayɨɨ yee woo hȩn nán ku̵u̵ ho̧ kɔ́ ı̵́ hȩn ya̧ŋ wɔgɔ máa, moo sȩ́ḿ a kɔ́ nán moo gaalı̵́ vu̵ ú̵. Yee woo hȩn nán ku̵u̵ taa ba hȩn sɔmlɔ́gɔdɨ má nɔ, moo sȩ́ḿ a kɔ́ nán néélȩ́ vu̵ ú̵.

²⁸Yee woo nán ı̵́ pɛ́ḿ pɛ́lı̵́ waa vu̵, kan nán ı̵́ u̵u̵ ɓéé vu̵ máa vu̵, yee nán lee yȩ vu̵, moo bi tii nán gbo̧o̧ vu̵ hȩn leene.

²⁹Tayɨɨ kɔ́ hȩn yȩ moo kóó nɔ́nná a na' yúú tíŋ́ biilí sá.

³⁰A̧máa Tayɨɨ wu̵ su̵gu̵n ví kan Yesu Krístu, ma Krístu mbaa hȩn moo gaalı̵́ baa ví. Tayɨɨ to̧n kan ba ví moo woo nɔ, ba mbaa ví nán Tayɨɨ woo vu̵ yu̵, Krístu wu̵ pú̵ fó̧ó̧ woo moo sənné baa ví á̧ḿ

³¹kɔ́ ı̵́ debtere ka o̧ wɔgɔ, o̧: “Nán ı̵́ ka hí̧í̧ bi dəm hȩn kɔ́lı̵́ du̵u̵ tóó nɔ tée, a dəm yúú hȩn ı̵́ 'yɛ́lı̵́ ka kɔ́ yȩlȩ́.”