Read Dii 1 Nán Koríńti vu̵ 12 Bible Online

1 Nán Koríńti vu̵ 12 - Dii bible

1 Nán Koríńti vu̵ 12

¹Dan kirtȩ́n vu̵, mí hí̧í̧ i duu taa hȩn ı̵́ yigid Tayɨɨ woo ka pú̵ ba ví máa vu̵ yu̵.

²Ví gaa ká kíi mbaa lá nán gaa Tayɨɨ sá vu̵ máa, ví gbɔ fó̧ó̧ víí vu̵ woo ví laan ba'ad tayɨɨ mbɔ́ggı̵́ kpo̧o̧gná yȩ voolı̵́.

³Moo woo nɔ mí baa tú'ud ví moo, o̧ nán ı̵́ yigid Tayɨɨ woo ka moo moo woolı̵́ ya̧gá̧ tée, ga'an Yesu nag né sá̧ḿ. Nán tóó wú̵ń o̧n: “Yesu wu̵ ı̵́ 'yɛ́lı̵́ míí!” ní á̧ḿ, séý yigid Tayɨɨ woo wú̵ńnɔ o̧ddu̵.

⁴Yigid Tayɨɨ woo dɨ dágá, a̧máa hȩn yȩ"ȩ́ woo dɨ kə́dkə́d.

⁵Ba'ad vu̵ dɨ kə́d, a̧máa ı̵́ 'yɛ́lı̵́ dɨ dágá.

⁶Á̧á̧ ba'ad kɔ́lı̵́ vu̵ dɨ kə́dkə́d, a̧máa Tayɨɨ dágá yȩ, wu̵ kɔ́ hȩn yȩ vu̵ 'waapád.

⁷Yigid Tayɨɨ woo wu̵ pú̵ kóó nɔ́nná hȩn tóó, moo hȩn yȩ a du̵u̵d nán vu̵ 'waapád.

⁸Yigid woo pú̵ nán tóó woo moo nɔ́ɔ́ 'wɔ́lı̵́; yigid dágá yȩ wu̵ pú̵ nán tóó woo moo hȩn gaalı̵́.

⁹Yigid dágá yȩ wu̵ pú̵ nán tóó woo zó̧ó̧ 'yɛ́lı̵́ moo Tayɨɨ woolı̵́; yigid dágá 'nɛ́ŋ́ yȩ pú̵ nán tóó woo néélȩ́ nán ho̧o̧ vu̵ za̧a̧né.

¹⁰Yigid yȩ pú̵ nán tóó woo hȩn sa̧ga̧ kɔ́lı̵́. Kɔ́ nán tóó woo moo anábi moolȩ́. Kɔ́ nán tóó a ho̧ woo yigid vu̵ səgənɔ́. Pú̵ nán tóó woo ya̧g tóó vu̵ kə́dkə́d moolȩ́; pú̵ nán tóó woo moo woo vu̵ tiiní.

¹¹Yigid dágá 'nɛ́ŋ́ yȩ wu̵ pú̵ hȩn yȩ vu̵ 'waapád; pú̵ kóó nɔ́nná hȩn kə́dkə́d kɔ́ ı̵́ ka hí̧í̧ wɔgɔ.

¹²Fó̧ó̧ nánán woo dɨ dágá, a̧máa fó̧ó̧ ka' tóó vu̵ du̵u̵lı̵́ kə́dkə́d. Kóó fó̧ó̧ ka' tóó u̵u̵ ɓu̵u̵ wu̵lı̵́ ú̵ si̧', fó̧ó̧ dágáɨ. Krístu mbaa dɨ ı̵́ yo̧go̧ á̧ḿ,

¹³moo ya baa ví 'waapád, ba woo ví mam Tayɨɨ woo yigid dágá yȩ woolı̵́. Ba nuŋ ví yigid dágá yȩ zó̧ó̧ baa vílí, moo aa mbaa ví fó̧ó̧ dágáɨ ya baa ví 'waapád, kóó nán Yúúda, kóó nán ı̵́ ku̵u̵ Yúúda pɛ́lı̵́, kóó gba'a, kóó nán go'oy vəg lee vu̵ á̧ḿ.

¹⁴Dɨ ı̵́ yo̧go̧, fó̧ó̧ 'yɛ́n fó̧ó̧ ka' dágá né, a̧máa vu̵ du̵u̵lı̵́ kə́dkə́d.

¹⁵Doo a moo: “Káń nag pɛ́lı̵́ yɛ, mí fó̧ó̧ ka' tóó nɔ pɛ́lı̵́” tée, doo yȩ fó̧ó̧ ka"ɨ pɛ́lı̵́ gínáa?

¹⁶Tɔ́g a moo: “Káń nɔ́ɔ́e pɛ́lı̵́ yɛ, mí fó̧ó̧ ka' tóó nɔ pɛ́lı̵́” tée, tɔ́g yȩ fó̧ó̧ ka"ɨ pɛ́lı̵́ gínáa?

¹⁷Tow fó̧ó̧ 'waapád kan maa nɔ́ɔ́ mɛ́ń tée, kan kin moo kan ȩná? Fó̧ó̧ 'waapád kan maa tɔ́g mɛ́ń tée, kan kin hȩn sa̧g kan ȩná?

¹⁸A̧máa Tayɨɨ 'yɛ́ fó̧ó̧ ka' vu̵ fó̧lȩ́ 'waapád kɔ́ ı̵́ ka hí̧í̧ wɔgɔ.

¹⁹Ya voo 'waapád ka vu̵n dɨ fó̧ó̧ ka' dágáɨ tée, fó̧ó̧ kan dɨ téé?

²⁰Ma fó̧ó̧ ka' vu̵ dɨ fó̧lȩ́ kə́dkə́d, a̧máa fó̧ó̧ dɨ dágá.

²¹Nɔ́ɔ́ wú̵ń o̧n nag: “Ka mɔ́ń pɛ́lı̵́ si̧'” né. Yúú wú̵ń o̧n doo: “Ka mɔ́ń pɛ́lı̵́ si̧'” né á̧ḿ.

²²Fó̧ó̧ ka' tóó fó̧ó̧ baa vílí vu̵ née né. Kóó ı̵́ yo̧go̧ si̧', vu̵ maan luuní né sá̧ḿ!

²³Hȩn ı̵́ kaa taa ví fó̧ó̧ baa vílí ba vu̵n hȩn sȩ́ḿme yȩ, ba 'yɛ́ ví vu̵ yu̵ hȩn gbo̧o̧ mba. Fó̧ó̧ ka' ı̵́ kaa yu̵g vu̵ ví yȩ, ba tu̵ vu̵ ví dȩ"ȩ́ na'a.

²⁴Ba tu̵ vu̵ ví mba fó̧ó̧ ka' tóó ku̵u̵ maan yu̵ggı̵́ né máa vu̵ á̧ḿ. Tayɨɨ mbɔ́g sı̵́ fó̧ó̧ baa ví, moo hȩn ku̵u̵ maa yu̵ggı̵́ máa, ba aa tu̵ vu̵ ví mba á̧ḿ,

²⁵moo fó̧ó̧ a hı̵́'ı̵́n sá, moo fó̧ó̧ ka' 'waapád fó̧lȩ́, kóó ı̵́ tɛ́lá, a gaa fó̧ó̧ ka' daga woo tu̵lı̵́ɨ.

²⁶Tow fó̧ó̧ ka' tóó ka nuŋ hȩn ndɔ́gɔné tée, ka' tóó vu̵ ki hȩn ndɔ́gɔné woo á̧ḿ. Tow ka' dágá ka nuŋ na"ȩ́ tée, zó̧ó̧ dȩ' fó̧ó̧ ka' tóó vu̵ 'waapád.

²⁷Ya víí 'waapád, ví fó̧ó̧ Krístu woo nɔ, kóó nɔ́nná mbaa ka' fó̧ó̧ ı̵́ woolı̵́.

²⁸Moo woo nɔ Tayɨɨ dəŋ 'yɛ́ waa ba'ad Yesu woo vu̵ nán sú̵ggı̵́ voolı̵́ sa̧a̧mé. Idú woo anábi vu̵. Ta̧a̧nɔ́ woo akaw moo Tayɨɨ tú"í vu̵. Pig woo Tayɨɨ duu 'yɛ́ nán hȩn sa̧ga̧ kɔ́lı̵́ vu̵, kan nán ho̧o̧ za̧a̧né vu̵, kan nán ı̵́ ku̵u̵ baa maa daga vu̵, kan nán moo mbɔ́ggı̵́ vu̵, kan nán ku̵u̵ moo moo kan ya̧g tóó kə́dkə́d vu̵ á̧ḿ.

²⁹Nán 'waapád vu̵ waa ba'ad vu̵ yaa? Kóó anábi vu̵ yaa? Kóó akaw vu̵ yaa? Pɛ́lı̵́! Nán 'waapád vu̵u̵ nugun néélȩ́ hȩn sa̧ga̧ kɔ́lı̵́ né,

³⁰kóó nán ho̧o̧ vu̵ za̧a̧né, kóó ya̧g tóó kə́dkə́d vu̵ moolȩ́, kóó moo woo vu̵ tiiní.

³¹A̧máa i soo hȩn yigid Tayɨɨ woo ka pú̵ yȩ ó̧, ı̵́ ku̵u̵ mba hȩn máa vu̵ yu̵. Tée míń duu tú'ud ví hi̧naa tóó ka mba ı̵́ yɛ vu̵ máa 'waapád á̧ḿ.