Read Dii 1 Nán Koríńti vu̵ 13 Bible Online

1 Nán Koríńti vu̵ 13 - Dii bible

1 Nán Koríńti vu̵ 13

¹Kóó a̧n moo ya̧g nánán voo, kan ya̧g maleeka voo nɔ á̧ḿ si̧', a̧máa tow a̧n kan zó̧ó̧ nán pɛ́lı̵́ tée, moo míí vu̵ mbaa kɔ́ ı̵́ ku̵u̵ wa̧a̧ dɛn, ku̵u̵ wa̧a̧ kan wa̧n waa wɔgɔ.

²Kóó a̧n mbaa anábi, a̧n gaa hȩn yú̵ggı̵́ vu̵, kan hȩn tóó vu̵ 'waapád, a̧n nuŋ zó̧ó̧ 'yɛ́lı̵́ gbo̧o̧ ba'a moo gu̵u̵ luuní ú̧ si̧', a̧máa tow a̧n kan zó̧ó̧ nán pɛ́lı̵́ tée, mí hȩn leeɨ.

³Kóó a̧n yȩ' hȩn míí vu̵ 'waapád pú̵ nán vu̵ la té', a̧n pú̵ fó̧ó̧ míí moo a̧nné vɛlı̵́ si̧', a̧máa tow a̧n kan zó̧ó̧ nán pɛ́lı̵́ tée, hȩn tóó wú̵ń du̵u̵n mí wu̵lı̵́ né sá̧ḿ.

⁴Nán zó̧ó̧ nán kɔ́lı̵́ máa, du̵u̵ ú̵, ma' zó̧ó̧, sú̵n zó̧ó̧ né, zugun haa né, na'an yúú né á̧ḿ.

⁵Nán zó̧ó̧ nán kɔ́n hȩn sȩ́ḿ né, kɔ́n ɓı̵́d né, kɔ́n zó̧ó̧ yȩ́ȩ́ né, 'yɛ́n mbíim zó̧ó̧lȩ́ né á̧ḿ.

⁶Nán zó̧ó̧ nán kɔ́lı̵́ dȩ'ȩn zó̧ó̧ yúú hȩn ɓı̵́ddı̵́ né á̧ḿ, a̧máa zó̧ó̧ woo dȩ' yúú moo yȩ́ńné.

⁷Nán zó̧ó̧ nán kɔ́lı̵́ máa, zi̧i̧ zó̧ó̧, fȩȩ moo, 'yɛ́ zó̧ó̧ woo pád Tayɨɨ woolı̵́, ma' zó̧ó̧ yúú hȩn 'waapáddı̵́.

⁸Zó̧ó̧ nán mbaa woo káákáá. Moo anábi voo vú̵ń 'wáa sey tóólı̵́. Ya̧g kə́dkə́d moolȩ́ vu̵ á̧ḿ vú̵ń sí̧"ú̧. Moo moo gaalı̵́ wú̵ń sí̧' á̧ḿ,

⁹moo ba gaan ví hȩn 'waapád né, ba moon ví moo Tayɨɨ woo 'waapád né á̧ḿ, ka' tóó vu̵ kéé du̵u̵lı̵́ sey 'waapád.

¹⁰A̧máa bá' hȩn a dɔ́ sé' woolı̵́ a ya̧ tée, hȩn ı̵́ ka dɔ́n sé"ı̵́ né máa, wú̵ń 'wáa ú̵.

¹¹Sey káń mbaa lá náásá̧ŋ́ŋı̵́ máa, mí moo moo, mí hí̧í̧ hȩn náásá̧ŋ́ŋɨ, mí taa moo náásá̧ŋ́ná á̧ḿ. A̧máa káń na' sú̵'ú̵ máa, mí gbɔ sı̵́ hȩn náásá̧ŋ́ voo ú̵.

¹²Hȩn kaa ho̧ ví 'ya̧'a̧ yɛ máa, ho̧lȩ́ woo dȩ'ȩ né, mbaa kɔ́ ı̵́ fó̧ó̧ tóó daadugeelı̵́ wɔgɔ, hi̧mhi̧'ná. A̧máa sey tóólı̵́ tée, báń ho̧ ví Tayɨɨ nɔ́ɔ́ kan nɔ́ɔ́. 'Ya̧'a̧ yɛ máa, mí gaa hȩn 'waa ná né, a̧máa sey tóólı̵́ tée, míń gaa hȩn 'waa sı̵́ pád kɔ́ ı̵́ Tayɨɨ ka gaan yɛ wɔgɔ ú̵.

¹³'Ya̧'a̧ yɛ máa, hȩn ta̧a̧nɔ́ vu̵u̵ mbaa: zó̧ó̧ 'yɛ́lı̵́ Tayɨɨ woolı̵́, zó̧ó̧ 'yɛ́lı̵́ yúú hȩn Tayɨɨ ka pú̵ máalȩ́, kan zó̧ó̧ nán; a̧máa hȩn ı̵́ ka mba daga vu̵ máa, wu̵ zó̧ó̧ nánne.