Read Dii 1 Nán Koríńti vu̵ 14 Bible Online

1 Nán Koríńti vu̵ 14 - Dii bible

1 Nán Koríńti vu̵ 14

¹I soo zó̧ó̧ nán wu̵ mba, kan hȩn yigid Tayɨɨ woo ka pú̵ máa vu̵ á̧ḿ. A̧máa i soo moo Tayɨɨ moolȩ́ wu̵ mba,

²moo nán ku̵u̵ moo moo kan ya̧g tóó kə́dkə́d máa, vu̵ moon nán vu̵ yu̵ né, a̧máa vu̵ mood Tayɨɨɨ, moo nán vu̵ baa kin ní. Yigid Tayɨɨ woo wu̵ 'yɛ́d vu̵ moo yú̵ggı̵́ yȩ vu̵ ı̵́ yo̧go̧ ya̧gá̧.

³A̧máa nán ı̵́ ka moo moo Tayɨɨ woo máa, o̧d woo nánán vu̵ moo u̵u̵ 'yɛ́ zó̧ó̧ voo Tayɨɨ woolı̵́ laa tíŋ́, bi zigid vu̵ zó̧ó̧, bi ka̧' vu̵ zó̧ó̧ á̧ḿ.

⁴Nán ı̵́ ka moo woo ya̧g tóó kə́d máa, aga du̵u̵d woo fó̧ó̧ woo nɔ; a̧máa nán ka moo moo Tayɨɨ woo máa, du̵u̵d woo nán sú̵ggı̵́ vu̵ yu̵ 'waapád.

⁵Mí hí̧í̧ ya víí 'waapád ka víń moo ya̧g tóó kə́dkə́d vu̵ ú̵, a̧máa mí hí̧í̧ ka víń moo moo Tayɨɨ woo wu̵ mba. Nán ı̵́ ka moo moo máa, wu̵ kɔ́ ba'ad du̵u̵ mba ı̵́ ka moo ya̧g tóó kə́dkə́d yȩ; a̧máa nán tóó a tii moo ya̧g tóó kə́d yȩ ó̧ tée, wú̵ń du̵u̵d nán sú̵ggı̵́ vu̵ ú̵.

⁶Dan kirtȩ́n vu̵, mí vi ví yee a̧n laa víílí, a̧n bé'ed ví ya̧g tóó kə́d wu̵ moolȩ́, i kin ní, nán tóó a tii moo woo vu̵ o̧n ví ní á̧ḿ tée, ȩn wú̵ń du̵u̵d vílá? A̧máa a̧n vud moo yú̵ggı̵́ tóó o̧d ví, a̧n tú'ud ví hȩn káń gaa, a̧n o̧d ví moo Tayɨɨ woo, a̧n tú'ud ví hȩn tóó tée, wú̵ń du̵u̵d víw.

⁷Tée ba gú̵gú̵n ví hȩn yȩ vu̵ kan lɨtɨɨd, kan ko̧ŋ vu̵ yu̵. Tow nán tóó a úú lɨtɨɨd a vun yéé woo né, a wa̧a̧ ko̧ŋ vun yéé woo né tée, dəŋ née víń ki gaalá?

⁸Tóó tée, nán ga̧' sɨɨ úúlí tóó a úú vun dɔg yɛ́g woo né tée, nóo wú̵ń mbɔ́g hȩn sɨɨlá?

⁹Moo kíí moowo̧ ya̧g tɔgɔtɔ́gɔná tée, vú̵ń dəŋ née kilá? Tée víń o̧ gbɔnna dɨ sápéémé náa?

¹⁰Ya̧g vu̵ dɨ kə́dkə́d hágá yɛlı̵́, a̧máa ya̧g tóó vu̵n moo nán ba kin do̧do̧o̧ woo né máa pɛ́lı̵́.

¹¹Tow a̧n kin ya̧g ku̵u̵ moon mí moo wu̵lı̵́ yȩ né tée, nán yȩ mbaan sı̵́ nán ki ya̧g sá ú̵; mí á̧ḿ, míń mbaadu̵ nán ki ya̧g sáɨ.

¹²Ví á̧ḿ, hȩn yigid Tayɨɨ woo ka pú̵, kíí dɨ soolı̵́ yȩ, i soo hȩn ı̵́ u̵u̵ kɔ́ zó̧ó̧ 'yɛ́lı̵́ nán sú̵ggı̵́ voo a laa tíŋ́ tíŋ́ máa, a wu̵ ɓu̵u̵.

¹³Moo woo nɔ, nán ka moo ya̧g tóó kə́d tée, a vi Tayɨɨ a tii moo ya̧g yȩ pú̵ nánán vu̵ á̧ḿ.

¹⁴Káń dɨd Tayɨɨ moo o̧lȩ́ kan ya̧g tóó kə́d tée, zó̧ó̧ míí baa o̧ddu̵ moo, a̧máa mí ki do̧do̧o̧ woo gaa né á̧ḿ.

¹⁵Yee tée mín kɔ́ nɛ́nná? Míi bi o̧d Tayɨɨ moo zó̧ó̧ míílí̧, a̧máa míń o̧ddu̵ moo woo ha̧d á̧ḿ. Míi bi bee yéé na' Tayɨɨ zó̧ó̧ míílí̧, a̧máa mí hí̧í̧ bi ki moo yéé káń bee vu̵ yɛlı̵́ á̧ḿ.

¹⁶Tow a̧m dȩn Tayɨɨ nag zó̧ó̧ móólȩ́ ı̵́ yo̧go̧, nán lee tóó ka dɨ ya sú̵ggı̵́ yȩlȩ́, a kin ní tée, wú̵ń dəŋ née hí̧í̧: “Aamɛ́n” yúú moo yȩlȩ́lá?

¹⁷Kóó a̧m dȩn Tayɨɨ nag du̵u̵ na'a si̧', zó̧ó̧ 'yɛ́lı̵́ woo wú̵ń laan tíŋ́ né.

¹⁸Mí dȩn Tayɨɨ nag, moo mí moo ya̧g yȩ vu̵ mba ví 'waapád.

¹⁹A̧máa ya sú̵ggı̵́lı̵́ tée, mí hí̧í̧ bi moo moo tú"í ı̵́ nán u̵u̵ ki máa yə̧ŋ nɔ́nɔ́, wu̵ mba a̧n dáb moo uzinɛɛre kan ya̧g tóó kə́d vu̵ má nɔ.

²⁰Dan kirtȩ́n vu̵, i taa moo kɔ́ ı̵́ náásá̧ŋ́ vu̵ wɔgɔ sá, a̧máa yúú hȩn ɓı̵́d kɔ́lı̵́lı̵́ máa, i mbaa kɔ́ ı̵́ náásá̧ŋ́ waa vu̵ wɔgɔ. Yúú moo taalı̵́lı̵́ máa, i taa taalı̵́ ı̵́ nii waaɨ.

²¹Hȩn debtere ka o̧ máa wu̵ yɛ nɔ; ı̵́ 'yɛ́lı̵́ o̧: “Míń ɓɛ ya̧g gáá voo, míń moo kan ya̧g gáá tóó voo vu̵, míń o̧d zig míí yɛ moo, a̧máa kóó ı̵́ yo̧go̧ si̧', vú̵ń kin mí tɔ́g né.”

²²Moo woo nɔ, moo moolȩ́ kan ya̧g tóó kə́d máa, o̧n nán zó̧ó̧ 'yɛ́lı̵́ vu̵ moo né, a̧máa o̧d nán gaa Tayɨɨ sá vu̵ yu̵ moo. Moo Tayɨɨ moolȩ́ máa, kɔ́n woo nán gaa Tayɨɨ sá vu̵ hȩn tóó né, séý kɔ́d nán zó̧ó̧ 'yɛ́lı̵́ vu̵ yu̵.

²³Tow nán kirtȩ́n u̵u̵ sú̵g ya dágá, ya voo 'waapád, u̵u̵ moo ya̧g tóó vu̵ kə́dkə́d, nán lee tóó, tóó tée nán gaa Tayɨɨ sá tóó a maa vu̵ wu̵lı̵́ tée, wú̵ń o̧ ba vu̵n ya̧ŋŋɨ. Ɨ́ yo̧go̧ náa?

²⁴A̧máa tow ya víí 'waapád i moo moo Tayɨɨ, nán gaa Tayɨɨ sá, tóó tée, nán lee tóó a dɔ́ ya víílí, a ki tée, wú̵ń ki moo tú"í tóó yúú hȩn ɓı̵́d woo vu̵lı̵́,

²⁵tée aga wú̵ń ho̧ gaa moo taalı̵́ woo ka yu̵g vu̵ zó̧ó̧lȩ́ yȩ, wú̵ń lígí taa moo, wú̵ń na' Tayɨɨ o̧: “Moo yȩ́ńne, Tayɨɨ dɨ víílí sa̧a̧mé.”

²⁶Dan kirtȩ́n vu̵, yee báń kɔ́ ví nɛ́nná? Kíí dɨ sú̵ggı̵́ tée, nán tóó a bee woo yéé, tóó a tú' woo moo, tóó a vud moo yú̵ggı̵́ Tayɨɨ woo o̧. Nánán tóó a moo woo ya̧g tóó kə́d kaa kin ní máa, tée nánán tóó a tii woo moo woo. Hȩn yȩ u̵u̵ kɔ́y moo nán sú̵ggı̵́ u̵u̵ 'yɛ́ zó̧ó̧ voo néélȩ́ na'a Yesu woolı̵́.

²⁷Tow nán tóó ku̵u̵ bi moo ya̧g tóó kə́dkə́ddɨ tée, u̵u̵ moo fó̧ó̧ idú, tóó tée ta̧a̧nɔ́, u̵u̵ moo moo dágá dágá tée, nán tóó a tii moo voo duu wu̵lı̵́ á̧ḿ.

²⁸Nán moo tiiní ka pɛ́lı̵́ tée, nán ka hí̧í̧ bi moo ya̧g tóó kə́d yȩ a mbaa ya sú̵ggı̵́lı̵́ simná, tóó tée a o̧d Tayɨɨ moo zó̧ó̧ woolı̵́.

²⁹Ɨ́ moo Tayɨɨ moolȩ́ voo máa, fó̧ó̧ idú, kóó fó̧ó̧ ta̧a̧nɔ́ si̧', vú̵ń moo moo, a̧máa nán tóó u̵u̵ taa moo yúú moo voo yȩlȩ́.

³⁰Tow nán tóó ka dɨ moo Tayɨɨ moolȩ́, ma yigid Tayɨɨ woo a pú̵ daga tóó moo tée, ı̵́ tíŋ́ yȩ a tii mbaa simná.

³¹Ya víí 'waapád, i moo moo Tayɨɨ fó̧ó̧ dágá dágá tée, du̵u̵ ú̵, moo nán 'waapád u̵u̵ kúgú moo Tayɨɨ wu̵lı̵́, u̵u̵ ki moo zó̧ó̧ ziginí wu̵lı̵́ á̧ḿ.

³²Nán moo Tayɨɨ moolȩ́ u̵u̵ kid fó̧ó̧ voo vu̵ tɔ́g,

³³moo Tayɨɨ hí̧í̧ aa mbaa ví kan ya̧g kə́dkə́d sá, a̧máa aa to̧n ví ú. Ya sú̵ggı̵́ zig Tayɨɨ woo voolı̵́ 'waapád vu̵ kɔ́ hȩn tóó vu̵,

³⁴vu̵ o̧ wakȩ́ȩ́ ba u̵u̵ mbaa simná sey sú̵ggı̵́lı̵́; vu̵n voo kan néélȩ́ moo o̧lȩ́ wu̵lı̵́ pɛ́lı̵́, u̵u̵ ki voo tɔ́ggɨ kɔ́ ı̵́ debtere Múúsa woo ka o̧ máa wɔgɔ á̧ḿ.

³⁵Ku̵u̵ hí̧í̧ hȩn tóó gaalı̵́ tée, u̵u̵ vi wə̧ə̧ dáń voo vu̵ ligí. Wakȩ́ȩ́ ba u̵u̵ moo moo sa̧a̧m nán sú̵ggı̵́ voolı̵́ tée, ba maa né.

³⁶Moo Tayɨɨ yɛ ká dəŋ vúd ya vííláa? Tóó tée, ya̧ də́ń víílí dágá ya̧a̧?

³⁷Tow nán tóó a taa bin anábiɨ, tóó tée, bin dɨ kan hȩn tóó yigid Tayɨɨ ka pú̵gu̵ yȩlȩ́ tée, a gaa moo káń bíńda ba'ad ví yɛ ba dooká ı̵́ 'yɛ́lı̵́ Yesu woo nɔ.

³⁸Tow nán tóó a sɛ́n kilí ní tée, i kiddu̵ tɔ́g sá á̧ḿ.

³⁹Moo woo nɔ dan kirtȩ́n vu̵, i soo moo Tayɨɨ moolȩ́ kan zó̧ó̧ víí 'waapád, a̧máa i há' nán ku̵u̵ moo ya̧g tóó kə́dkə́d máa vu̵ sá á̧ḿ.

⁴⁰Tée i kɔ́ hȩn ı̵́ ka maa kɔ́lı̵́ 'waapád má nɔ, i moo moo dágá dágá á̧ḿ.