Read Dii 1 Nán Koríńti vu̵ 15 Bible Online

1 Nán Koríńti vu̵ 15 - Dii bible

1 Nán Koríńti vu̵ 15

¹Dan kirtȩ́n vu̵, mí hí̧í̧ i duu ta'ad moo to̧o̧ 'maŋ ká mí tú'ud ví, kíí 'yɛ́ zó̧ó̧ víí wu̵lı̵́, kíí nda doo wu̵lı̵́ yȩ nɔ.

²I duu moo woo kɔ́ ı̵́ káń tú'ud ví yȩ wɔgɔ tée, víń sə́ddú̵. A pɛ́lı̵́ tée, zó̧ó̧ 'yɛ́lı̵́ víí tii sı̵́ hȩn lee ú̵.

³Mí dəŋ tú'ud ví moo gbo̧o̧ ku̵u̵ tú'un yɛ nɔ: Krístu nɔɔ moo hȩn ɓı̵́d baa ví kɔ́ ı̵́ debtere ká o̧ wɔgɔ.

⁴Vu̵ dɔddu̵ bɛ́ɛ́gı̵́, bá' idú, ta̧a̧nɔ́ woo máa, Krístu níḿ nɔmmé kɔ́ ı̵́ debtere ká o̧ máa wɔgɔ á̧ḿ,

⁵tú'ud Piɛ́r fó̧ó̧. Pig woolı̵́ máa, tú'ud waa ba'ad woo vu̵, ya voo wa̧nɓó' zu̵u̵ idú á̧ḿ.

⁶Duu tú'ud waa duulí woo vu̵ fó̧ó̧, vu̵ mba fó̧ó̧ tȩmɛre nɔ́nɔ́ ó̧. Nán tóó sa̧a̧m voolı̵́ vu̵ nɔɔ sú̵'ú̵, a̧máa tóó ɓu̵u̵lı̵́ na'a vu̵ nɔɔ ná né.

⁷Pig woo máa, duu tú'ud daa sá̧ŋ́ Yaakúbu fó̧ó̧, duu tú'ud waa ba'ad vu̵ 'waapád fó̧ó̧ á̧ḿ.

⁸A̧máa pig voolı̵́ 'waapád máa, Krístu duu tú'un fó̧ó̧ á̧ḿ, ma mí mbaa kɔ́ ı̵́ waa zú̵nné[4] tóó wɔgɔ,

⁹moo waa ba'ad Yesu woo vu̵ 'waapád vu̵ na' mbannɔ́. Mí maa ka vu̵n been mí míí waa ba'ad né á̧ḿ, moo ká mí duun nán sú̵ggı̵́ Tayɨɨ woo vu̵ kan mooɨ.

¹⁰A̧máa moo zó̧ó̧ nán Tayɨɨ woo nɔ, ma káń mbaa ná' yɛ nɔ. Zó̧ó̧ nán woo tiin hȩn lee míílí̧ ní, a̧máa mí kɔ́ ba'ad mba waa ba'ad Yesu woo tóó vu̵ 'waapád. Aga míi kɔ́n né, Tayɨɨ wu̵ maan kan zó̧ó̧ nán woo.

¹¹Moo woo nɔ, kóó fó̧ó̧ míí, kóó waa ba'ad tóó vu̵, vɔ́ baa pa moo ı̵́ yo̧go̧, ma ví 'yɛ́ zó̧ó̧ víí wu̵lı̵́ á̧ḿ.

¹²Vɔ́ pa moo o̧ Krístu ba níḿ sı̵́ nɔmmé ó̧. Ma moo ȩn nán tóó víílí sa̧a̧mé vu̵ o̧ nímní nɔmmé ban pɛ́lı̵́lá?

¹³Tow nímní nɔmmé kan pɛ́lı̵́ tée, Krístu kan ním nɔmmé né á̧ḿ.

¹⁴Tow Krístu a ním nɔmmé né tée, moo tú"í vóó tii sı̵́ hȩn lee ú̵, moo zó̧ó̧ 'yɛ́lı̵́ víí tii sı̵́ hȩn leeɨ á̧ḿ.

¹⁵Tée ya̧g du̵lı̵́ vóó yúú Tayɨɨ woolı̵́ yɛ, vbáddɨ á̧ḿ, moo vɔ́ du̵ ya̧g o̧ Tayɨɨ ba nim Krístu nɔmmé sú̵'ú̵. Tow nán nɔm ka vu̵n ním nɔmmé né tée, Tayɨɨ kan nimmɔ né á̧ḿ.

¹⁶Nán ka vu̵n ním nɔmmé né tée, Krístu á̧ḿ kan ním né.

¹⁷Tow Krístu kan ním nɔmmé né tée, moo zó̧ó̧ 'yɛ́lı̵́ víí kan tii sı̵́ hȩn lee ú̵, tée hȩn ɓı̵́d víí ka vu̵n 'wáa ná né á̧ḿ.

¹⁸Tée nán ı̵́ ku̵u̵ duu Krístu nɔɔn zu̵u̵ wu̵lı̵́ máa, vu̵ ti la té' á̧ḿ.

¹⁹Tow zó̧ó̧ 'yɛ́lı̵́ baa ví Krístu woolı̵́ yɛ, aa 'yɛ́ ví də́ń moo mbaalı̵́ baa ví hágá yɛlı̵́ɨ tée, baa mba ví nán tóó vu̵ kan gíḿ 'waapád.

²⁰A̧máa Krístu dəŋ níḿ sı̵́ nɔmmé ó̧, tée ba gaa ví nán nɔm tóó vú̵ń níḿ nɔmmé á̧ḿ,

²¹moo nɔm ká yaa moo nán dágá woo nɔ, a̧máa nímní nɔmmé duu yaa moo nán dágá woo nɔ á̧ḿ.

²²Nán 'waapád vu̵ nɔɔ moo Adamú woo nɔ. Máa nán nɔm 'waapád vú̵ń nuŋ vágád moo Krístu woo nɔ á̧ḿ,

²³a̧máa kóó nɔ́nná vú̵ń níḿ kan saŋ, kan saŋ: Krístu wu̵ dəŋ níḿ; pig woolı̵́, sey Krístu a vȩ́' ya tée, nán woo vu̵ vú̵ń níḿ á̧ḿ.

²⁴Tée, bá' sí̧'í̧d wú̵ń ya̧: Krístu wú̵ń tud gbaŋ waalı̵́ tóó vu̵, kan nán gbo̧o̧ tóó vu̵, kan hȩn mbalı̵́ tóó vu̵ 'waapád. Wú̵ń duu ɓɛ gbaŋ waalı̵́ woo 'yɛ́d Ba'á Tayɨɨ nagá,

²⁵moo Krístu wú̵ń mbaa gbanii, há̧á̧ a 'yɛ́ ı̵́ maag woo vu̵ 'waapád u̵u̵ mbaa hȩn doo 'ná'ané woo pȩ́ń.

²⁶Hȩn maag sí̧'í̧d woo a tud máa nɔmme,

²⁷moo debtere o̧: “Tayɨɨ wú̵ń kɔ́ hȩn 'waapád vú̵ń kə̧ə̧ doo woolı̵́.” A̧máa sey ka o̧ “hȩn 'waapád” yɛ, Tayɨɨ wú̵ńnɔ kə̧ə̧n doo voolı̵́ né, wú̵ń kɔ́ hȩn u̵u̵ kə̧ə̧ doo Krístu woolı̵́.

²⁸Sey hȩn 'waapád u̵u̵ nə'əy tíŋ́ Krístu woolı̵́ tée, Waa aga wú̵ń nə'əy tíŋ́ Tayɨɨ ı̵́ ka kɔ́ hȩn 'waapád ku̵u̵ nə'əy tíŋ́ woolı̵́ yȩ woolı̵́ á̧ḿ. Tée Tayɨɨ wú̵ń waa gbaŋ yúú hȩn 'waapáddı̵́.

²⁹I taa moo nán ı̵́ ku̵u̵ woo mam Tayɨɨ kan yéé nán nɔm voo má nɔ. Tow nán u̵u̵ ním nɔmmé né tée, moo ȩn nán yȩ vu̵ woo mam Tayɨɨ kan yéé nán nɔm voo á̧ḿ máalá̧? Tée vú̵ń nuŋ ȩná?

³⁰Ɨ́ baa ví máa, moo ȩn kaa dɔd ví baa yúú hȩn dú̵ú̵ zálı̵́ vu̵lı̵́ zá̧ga̧ 'waapád yɛlá?

³¹Dan kirtȩ́n vu̵, mí baa sɔ́d də́ń nɔmmé zá̧ga̧ 'waapád. Mí na' yúú míí yúú víílí yúú Yesu Krístu ı̵́ 'yɛ́lı̵́ baa ví woolı̵́.

³²Kóó ka míń kɔ́ ya̧g kan kəə vu̵ yɛlı̵́ kaa Ɛfɛ́ɛzlı̵́ kɔ́ ı̵́ nánán tóó ku̵u̵ baa kɔ́, bi nuŋ hȩn wu̵lı̵́ máa wɔgɔ si̧', ȩn kan du̵u̵n wu̵lı̵́lá? Tow nímní nɔmmé a pɛ́lı̵́ tée, “Ba lá ví hȩn ɓəə, ba zɔ ví hȩn, moo yɔ́gɔ́ báń nɔɔ ví sú̵'ú̵,” kɔ́ ı̵́ nán tóó ku̵u̵ taa wɔgɔ.

³³Zó̧ó̧ a zo' ví moo sá: “Dag gboo ɓı̵́d vu̵ lı̵́d mbaalı̵́ du̵u̵ baa á̧ḿ.”

³⁴I gbɔ hȩn ɓı̵́d kɔ́lı̵́, ví tii ya Tayɨɨ woolı̵́ kəd. Nán tóó vu̵ sa̧a̧m víílí vu̵ gaan Tayɨɨ né. Mí o̧d ví hȩn yȩ, sȩ́ḿ a kɔ́ ví ú.

³⁵A̧máa nán tóó vú̵ń vi: “Nɔm u̵u̵ níḿ tée, vú̵ń mbaa nɛ́nná? Vú̵ń yaa kan fó̧ó̧ ı̵́ tɛ́lá?”

³⁶Mɔ́ ya̧ŋŋɨ! Nán ka ba hȩn pȩ́ń, hȩn woo ka bugu ní tée, yɛ́gɛ né á̧ḿ.

³⁷Hȩn nán ka ba máa, ba də́ń hȩn yȩ́ńne, tóó tée tú̵d yȩ́ńne, a̧máa ban tág tú̵ddɨ né.

³⁸A̧máa Tayɨɨ kɔ́gɔ tá̧', na' kɔ́ ı̵́ ka hí̧í̧ wɔgɔ. Aga pú̵ hȩn yȩ́ń vu̵ tág dáń voo.

³⁹Hȩn zá̧a̧d 'waapád vu̵ mbaan fó̧ó̧ yo̧go̧ dágáɨ né. Nánán vu̵ dɨ kan yo̧go̧ ı̵́ voo kə́d, ı̵́ pú̵g voo dɨ kə́d, ı̵́ nɔ́g waa voo dɨ kə́d, ı̵́ ze' voo dɨ kə́d á̧ḿ.

⁴⁰Fó̧ó̧ ı̵́ be"ı̵́ vu̵ dɨlı̵́, ı̵́ hágá yɛlı̵́ vu̵ dɨlı̵́ á̧ḿ. Ɨ́ be"ı̵́ vu̵ dɨ kan túlí ı̵́ voo, ı̵́ hágá yɛlı̵́ vu̵ dɨ kan fó̧ó̧ ı̵́ voo kə́d.

⁴¹Zá̧ga̧ dɨ kan túlí ı̵́ woo kə́d, sȩȩ dɨ kan ı̵́ woo kə́d, zoo waa vu̵ dɨ kan túlí ı̵́ voo vu̵ kə́dkə́d á̧ḿ.

⁴²Nán u̵u̵ níḿ nɔmmé tée, vú̵ń mbaa dɨ ı̵́ yo̧go̧ á̧ḿ. Ku̵u̵ dɔd nán hágá tée, mbaa nɔmná; sey a níḿ nɔmmé tée, wú̵ń duu nɔɔn sı̵́ né.

⁴³Ku̵u̵ dɔddu̵ hágá tée, mbaa gíḿná, kan néélȩ́ pɛ́lı̵́. A̧máa sey a níḿ tée, wú̵ń mbaa sı̵́ gáálı̵́ na'a, néélȩ́ na'a á̧ḿ.

⁴⁴Sey ku̵u̵ dɔd nɔm hágá tée, vu̵ dɔd fó̧ó̧ yo̧go̧ȩ, a̧máa sey a níḿ nɔmmé tée, fó̧ó̧ woo wú̵ń mbaa mbaalı̵́ ı̵́ yigid Tayɨɨ woo ka pú̵gu̵ má nɔ. Fó̧ó̧ yo̧go̧ dɨlı̵́, ma fó̧ó̧ ı̵́ yigid ka pú̵ máa dɨlı̵́ á̧ḿ.

⁴⁵Debtere o̧: “Tayɨɨ mbɔ́g Adamú ı̵́ dəné woo, wu̵ nánán, pú̵gu̵ vágád,” a̧máa Adamú ı̵́ sí̧'í̧d[5] woo, wu̵ yigid ı̵́ ka pú̵ nánán vu̵ vágád má nɔ.

⁴⁶Fó̧ó̧ ı̵́ yigid woo wu̵ dəŋ yaan tíŋ́ né, a̧máa fó̧ó̧ yo̧go̧ wu̵ dəŋ yaa, ma fó̧ó̧ ı̵́ yigid yaa lá woo pigim.

⁴⁷Nán ı̵́ dəné woo máa, Tayɨɨ mbɔ́ggu̵ kan háddɨ; ı̵́ idú woo vúd dɨ woo be"ı̵́.

⁴⁸Nán ı̵́ ku̵u̵ dɨ voo hágá yɛlı̵́ máa, vu̵ man voo kan ı̵́ Tayɨɨ ka mbɔ́g kan hád má nɔ; nán ı̵́ ku̵u̵ mbaa be"ı̵́ máa, vu̵ man voo kan ı̵́ ka zu̵u̵ be"ı̵́ má nɔ.

⁴⁹Ba man ví kan nán ı̵́ Tayɨɨ ka mbɔ́ggu̵ kan hád má nɔ. Tée báń man ví kan ı̵́ ka dɨ be"ı̵́ máa á̧ḿ.

⁵⁰Dan kirtȩ́n vu̵, hȩn káń bi o̧d ví máa, wu̵ yɛ nɔ. Fó̧ó̧ yo̧go̧ wú̵ń dɔ́n woo gbaŋ waalı̵́ Tayɨɨ woolı̵́ né. Hȩn ı̵́ ka mbaa woo nɔmná yɛ wú̵ń mbaan woo káákáá né á̧ḿ.

⁵¹I ki ú, mí tú'ud ví hȩn tóó ka yú̵g má nɔ. Báń nɔɔn ví 'waapád né. A̧máa sey u̵u̵ úú ga̧' sí̧'í̧d woo tée, báń tii ví fó̧ó̧ vaŋná kɔ́ ı̵́ mam nímní wɔgɔ. Vú̵ń úú ga̧', nán nɔm vú̵ń níḿ mbaa káákáá; báń tii ví fó̧ó̧ baa ví 'waapád á̧ḿ.

⁵²

⁵³Tée fó̧ó̧ ı̵́ ku̵u̵ baa mbaa né máa, séý vú̵ń tii fó̧ó̧ ı̵́ a mbaa máa. Fó̧ó̧ ı̵́ ku̵u̵ mbaa nɔmná máa, séý vú̵ń tii fó̧ó̧ ı̵́ a nɔɔ né máa.

⁵⁴Sey fó̧ó̧ ı̵́ ku̵u̵ mbaa né, ku̵u̵ mbaa nɔmná máa, u̵u̵ tii fó̧ó̧ ı̵́ ka mbaa, ka nɔɔ né máa tée, hȩn ku̵u̵ bíńda debterelı̵́ máa dɔ́ sı̵́ sé' woolı̵́ ú̵, o̧: “Vu̵ tud sı̵́ nɔmmɔ́!”

⁵⁵“Nɔm, hȩn mbalı̵́ móó pee dɨ tɛ́lá? Nɔm, táa móó pee dɨ tɛ́lá?”

⁵⁶Táa nɔm woo wu̵ hȩn ɓı̵́d kɔ́lı̵́ɨ. Hȩn ka tii hȩn ɓı̵́d kɔ́lı̵́ hȩn gbo̧o̧ máa, wu̵ dooká Múúsa woo nɔ.

⁵⁷A̧máa ba dȩn ví Tayɨɨ nag; wu̵ pú̵ ba ví hȩn mbalı̵́ yúú ba'ad ı̵́ 'yɛ́lı̵́ baa ví Yesu Krístu woolı̵́.

⁵⁸Moo woo nɔ, dan kirtȩ́n vu̵, ı̵́ hí̧í̧lí̧ míí vu̵, i nda doo, ví dii néélȩ́ na'a, i nam sá sá̧ḿ. I pi zó̧ó̧, ví kɔ́ ba'ad ı̵́ 'yɛ́lı̵́ Yesu woo sey 'waapád, moo ví gaa ba'ad víí kíí kɔ́d ı̵́ 'yɛ́lı̵́ baa ví wu̵lı̵́ yɛ ba ba'ad leeɨ pɛ́lı̵́.