Read Dii 1 Nán Koríńti vu̵ 16 Bible Online

1 Nán Koríńti vu̵ 16 - Dii bible

1 Nán Koríńti vu̵ 16

¹Moo hȩn su̵ggı̵́ ba'ad nán Tayɨɨ woo vu̵ Yerúsalemmé máa, i kɔ́ kɔ́ ı̵́ káń o̧d nán sú̵ggı̵́ hág Galáddı̵́ vu̵ máa wɔgɔ.

²Zá̧ga̧ aladdı̵́ tée, kóó nɔ́nná a mbɔ́g hȩn ka maa pú̵lı̵́ máa 'yɛ́ woolı̵́ ligí, moo a̧n ya̧ sú̵'ú̵ tée, i duu su̵g sı̵́ hȩn sá.

³A̧n ya̧ sú̵'ú̵ tée, víń yee nán tóó vu̵ moo u̵u̵ pa̧ŋ hȩn pú̵lı̵́ víí yȩ dɔgɔn Yerúsalemmé; míń pú̵ vu̵ ɗerwəl nagá, vú̵ń pa̧ŋ kan hȩn i ba'ad vu̵ máa á̧ḿ.

⁴Tóó tée, a maa a̧n dɔg kan fó̧ó̧ míí nu tée, vɔ́ń sú̵g dɔg á̧ḿ.

⁵A̧n ya̧a̧ duu hág Masedo̧wá̧nné tée, míń daa laa víílí. (Masedo̧wá̧nné máa, míń ya̧a̧ ya̧a̧lȩ́ȩ.)

⁶Míń la səə víílí, tóó tée míń səə wu̵lı̵́ sey ho̧o̧mé á̧ḿ. Tée víń ba' diina ya a̧n dɨ laalı̵́ máalȩ́,

⁷moo mí hí̧í̧ bi duu dii ho̧n ví la ná', tée bi daa ya̧a̧ né, a̧máa mí hí̧í̧ bi mbaa víílí waaná' pȩ́ń, Tayɨɨ a hí̧í̧ ú̧ tɛ́ nɔ.

⁸Mí hí̧í̧ mbaalı̵́ kaa Ɛfɛ́ɛzlı̵́ yɛlı̵́ há̧á̧ a ya̧ mam vúnní Páŋ́tékósta pȩ́ń,

⁹moo mí nuŋ hi̧naa ba'ad gbo̧o̧ kɔ́lı̵́ yɛ laan tíŋ́ tíŋ́; nán maag vu̵ ɓu̵u̵ yɛlı̵́ á̧ḿmɔ́.

¹⁰Timɔtée a ya̧ víílí tée, i fȩȩwo̧ du̵u̵ na'a, moo Timɔtée kɔ́ ba'ad ı̵́ 'yɛ́lı̵́ Yesu woo man kan mí kííd.

¹¹Nán tóó a ɓééwu̵ sá, a̧máa i maawo̧, 'yȩ́ȩm woo a laa tíŋ́ du̵u̵lı̵́ na'a, tée wú̵ń vȩ́' maan ya, moo vɔ́ dɨgɨ laalı̵́ kan nán kirtȩ́n tóó vu̵ á̧ḿ.

¹²Yúú dan kirtȩ́n Apolóo woolı̵́ máa, mí baa o̧ddu̵ u̵u̵ sú̵g laa víílí kan nán kirtȩ́n tóó vu̵ á̧ḿ, a̧máa sɛ́n laalı̵́ 'ya̧'a̧ yɛ né sá̧ḿ. A̧máa sey tóólı̵́ tée wú̵ń nuŋ hi̧naa laalı̵́ dɨlı̵́.

¹³I nə sá, i nda doo yúú zó̧ó̧ 'yɛ́lı̵́ víí yȩlȩ́, i kɔ́ ba'ad kɔ́ ı̵́ wayée vu̵ wɔgɔ, i sȩn fó̧ó̧ la ú̵.

¹⁴Kíí dɨ hȩn kɔ́lı̵́ tée, i kɔ́ 'waapád kan zó̧ó̧ nánne.

¹⁵Dan kirtȩ́n vu̵, ví gaa kíi Ɛstefána woo; wu̵ dəŋ duu moo Tayɨɨ tíŋ́ hág Akáyyı̵́, ma vu̵ kɔ́d nán Tayɨɨ woo vu̵ ba'ad kan zó̧ó̧ voo 'waapád. Mí o̧d vi,

¹⁶i kid nán ı̵́ yo̧go̧ yȩ vu̵ tɔ́g, kan nán ı̵́ ku̵u̵ pi zó̧ó̧ maa vu̵ ba'ad máa vu̵ á̧ḿ.

¹⁷Zó̧ó̧ míí dȩ', moo Ɛstefána ku̵u̵ yaa kan Footunátu, kan Akáýkus vu̵ yɛ nɔ. Ku̵u̵ yaa máa, mí mbaa kɔ́ ı̵́ káń mbaa dɨ víílí wɔgɔ,

¹⁸moo vu̵ sȩn mí fó̧ó̧ kɔ́ ı̵́ kú̵u̵ sȩn ví máa wɔgɔ. Tée nán ı̵́ yo̧go̧ yȩ, i dəm vu̵ ú̵.

¹⁹Nán sú̵ggı̵́ hág Aazíilí vu̵ vá' ví wu̵lı̵́. Akíla vu̵ kan Prisíl vu̵ sú̵g kan nán sú̵ggı̵́ kíi voolı̵́ vu̵, vu̵ vá' ví wu̵lı̵́; vu̵ faa vá' ví kan yɛ́g ı̵́ 'yɛ́lı̵́ baa ví woo nɔ.

²⁰Nán kirtȩ́n yɛlı̵́ vu̵, vu̵ vá' ví 'waapád. I vá'án ya víílí kɔ́ ı̵́ dag sá̧ŋ́ vu̵ wɔgɔ, i ka pí̧í̧n ya zó̧ó̧lȩ́.

²¹Mí Póllu̵. Míi bíńda kan nag míí yɛ nɔ: Míi vá' ví.

²²Tow nán tóó a sɛ́n ı̵́ 'yɛ́lı̵́ baa ví ní tée, Tayɨɨ a ga'adu̵ naggɨ! Maranáta; ı̵́ 'yɛ́lı̵́ vóó, a̧m yaa ú̵!

²³Ɨ́ 'yɛ́lı̵́ baa ví Yesu a kɔ́d ví zó̧ó̧ nánne.

²⁴Zó̧ó̧ míí 'waapád dɨ víílí, moo yɛ́g Yesu Krístu woo nɔ.