Read Dii 1 Nán Koríńti vu̵ 2 Bible Online

1 Nán Koríńti vu̵ 2 - Dii bible

1 Nán Koríńti vu̵ 2

¹Dan kirtȩ́n vu̵, sey káń laa víílí, moo bi o̧d ví moo yȩ́ń Tayɨɨ ka yu̵ggu̵ yɛ nɔ máa, mí o̧n ví moo tóó ı̵́ a mba kɛb, tóó tée, mí tú'un ví hȩn gaalı̵́ gbo̧o̧ tóó nɔ né á̧ḿ.

²Ká mí mbɔ́g moo zó̧ó̧ míílí̧, bi tú'un ví hȩn tóó nɔ né, séý bi tú'ud ví moo Yesu Krístu ı̵́ ku̵u̵ ga"u̵ la' vbagadı̵́ yȩ woo nɔ.

³Moo woo nɔ mí mbaa víílí sa̧a̧mé sɔmlɔ́gɔdná, kan dú̵ú̵, kan tu̵u̵lı̵́ á̧ḿ.

⁴Hȩn tú"í míí kan moo Tayɨɨ palı̵́ míí vu̵ máa, vu̵ man kan ı̵́ nán hȩn gaalı̵́ voo vu̵ né, a̧máa yigid Tayɨɨ woo kan néélȩ́ woo wu̵ kɔ́ ma, ví gaa ba moo yȩ́ńne.

⁵Mí kɔ́ ı̵́ yo̧go̧ moo i 'yɛ́ zó̧ó̧ víí yúú hȩn gaalı̵́ nánán voolı̵́ sá, a̧máa zó̧ó̧ víí a mbaa də́ń yúú néélȩ́ Tayɨɨ woo yȩlȩ́ kəd.

⁶Vɔ́ baa tú'ud nán kirtȩ́n ı̵́ ku̵u̵ 'yɛ́ zó̧ó̧ ı̵́ nii waa máa vu̵, moo hȩn gaalı̵́ á̧ḿ. A̧máa hȩn gaalı̵́ ı̵́ nánánne pɛ́lı̵́, kóó hȩn gaalı̵́ nán gbo̧o̧ voo u̵u̵ dɨ 'wáané yȩ voo nɔ pɛ́lı̵́ á̧ḿ.

⁷A̧máa vɔ́ pa vóó moo hȩn gaalı̵́ Tayɨɨ woo ka yu̵g nɔ́ɔ́ nánán voolı̵́ yɛ nɔ. Tayɨɨ ká dəŋ mbɔ́g moo woo, moo aa nuŋ ví na"ȩ́ wu̵lı̵́, ma yɨb hág pigim.

⁸Hȩn gaalı̵́ woo nán gbo̧o̧ tóó hágá yɛlı̵́ gaa né sá̧ḿ. Tow ka vu̵n gaa ú̵ tée, ka vu̵n ga'an ı̵́ 'yɛ́lı̵́ baa ví ı̵́ na"ȩ́ yȩ la' vbagadı̵́ né.

⁹A̧máa debtere o̧ ı̵́ yo̧go̧, o̧: “Hȩn nán ka ho̧n né, ka kin ní, ku̵u̵ taa né á̧ḿ máa, Tayɨɨ mbɔ́gɔd woo nán ı̵́ ku̵u̵ hí̧í̧wo̧ máa vu̵ yu̵.”

¹⁰Yigid Tayɨɨ woo tú'ud vɔ́ vóó hȩn yú̵ggı̵́ Tayɨɨ woo yɛ nɔ, moo yigid woo soo hȩn ho̧ 'waapád, kóó hȩn ı̵́ Tayɨɨ ka yu̵g vu̵ ɗiilí na'a máa vu̵ á̧ḿ.

¹¹Séý zó̧ó̧ nánán woo wu̵ gaa hȩn ka dɨ tíŋ́ woolı̵́ náa! Hȩn Tayɨɨ woo dɨ ı̵́ yo̧go̧ á̧ḿ; séý yigid woo wu̵ gaa á̧ḿ.

¹²A̧máa ı̵́ baa ví, ba nugun ví yigid ı̵́ nánán voo nɔ né; ba nuŋ ví yigid ı̵́ ka yaa Tayɨɨ woolı̵́ má nɔ, moo aa gaa ví hȩn ı̵́ Tayɨɨ ka pú̵ ba ví kan zó̧ó̧ nán woo máa á̧ḿ.

¹³Moo woo nɔ ma, vɔ́ moon moo ı̵́ akaw moo gaalı̵́ nánán voo nɔ né; a̧máa séý vɔ́ moo moo ı̵́ yigid Tayɨɨ woo ka tú' má nɔ. Vɔ́ tú'ud nán ku̵u̵ dɨ kan yigid Tayɨɨ woo máa vu̵ hȩn yigid Tayɨɨ woo nɔ.

¹⁴Nánán ı̵́ ka kan yigid Tayɨɨ woo pɛ́lı̵́ máa, fȩȩn woo moo hȩn yigid Tayɨɨ woo né. Woolı̵́ máa hȩn woo hȩn ya̧ŋŋɨ, wú̵ń kin ní sá̧ḿ. Séý yigid Tayɨɨ woo a tú'udu̵ pȩ́ń, wú̵ń gaa.

¹⁵Nán ı̵́ ka dɨ woo kan yigid Tayɨɨ woo máa, wu̵ baa səgən hȩn vu̵ gaa 'waapád. A̧máa fó̧ó̧ woo máa nán tóó dágá aga gaan hȩn ka dɨn zó̧ó̧ woolı̵́ né.

¹⁶Debtere o̧ ı̵́ yo̧go̧, o̧: “Nóo gaa moo taalı̵́ ı̵́ 'yɛ́lı̵́ baa ví woolá? Nóo wú̵ń tú'udu̵ moolá?” A̧máa ı̵́ baa ví, ba dɨ ví kan moo taalı̵́ ı̵́ Krístu woo nɔ.