Read Dii 1 Nán Koríńti vu̵ 3 Bible Online

1 Nán Koríńti vu̵ 3 - Dii bible

1 Nán Koríńti vu̵ 3

¹A̧máa dan kirtȩ́n vu̵, ká mí moon ví moo kɔ́ ı̵́ nán ku̵u̵ dɨ kan yigid Tayɨɨ woo wɔgɔ né. Séý mí moo moolȩ́ ı̵́ nánánne; mí mood ví moo kɔ́ ı̵́ kaa mood náásá̧ŋ́ waa vu̵ yúú zó̧ó̧ 'yɛ́lı̵́ voolı̵́ máa wɔgɔ.

²Séý mí pú̵ ví víí va̧a̧ȩ; hȩn lálı̵́ zi̧i̧lí̧i̧ pɛ́lı̵́, moo kan ndɔ́gɔ ví silí. Há̧á̧ 'ya̧'a̧ yɛ á̧ḿ, ví dɨ sii ká̧née,

³moo ví man sey 'waapád kan nánán hágá yɛ vu̵ yu̵. Ví dɨ lá mbaalı̵́ kan sɨg mɔ́nné, kan moo kɔ́nné vu̵, yee tée víń mbaan kɔ́ ı̵́ nánán hágá yɛ vu̵ wɔgɔ náa? Víń mbaan kɔ́ ı̵́ nán lee yȩ vu̵ wɔgɔ náa?

⁴Nán tóó ka o̧: “Mí míí nán Pól woo nɔ,” tóó ka daa o̧ woo: “Mí míí nán Apolóo woo nɔ” máa, hȩn woo tú' ba vín kɔ́ hȩn kɔ́ ı̵́ nán tóó vu̵ wɔgɔ náa?

⁵Apolóo sú̵u̵ nɔ́nná? Pól sú̵u̵ nɔ́nná? Vɔ́ vóó nán ba'ad vu̵ yu̵; kóó nɔ́nná kɔ́ hȩn ı̵́ 'yɛ́lı̵́ Yesu ka o̧d vɔ́ má nɔ, ma ví 'yɛ́ zó̧ó̧ víí woolı̵́.

⁶Míi ba hȩn á̧á̧, ma Apolóo túu mam wu̵lı̵́, a̧máa Tayɨɨ wu̵ kɔ́ ma, tá̧' na'.

⁷Moo woo nɔ nán ı̵́ ka ba hȩn á̧á̧ yȩ, hȩn gbo̧o̧ȩ pɛ́lı̵́, kan ı̵́ ka túu mam wu̵lı̵́ yȩ á̧ḿ, a̧máa séý Tayɨɨ wu̵ hȩn gbo̧o̧, moo wu̵ kɔ́, ma tá̧' na'.

⁸Nán ı̵́ ka ba, kan nán ı̵́ ka túu mam wu̵lı̵́ yȩ, vu̵ hȩn dágáɨ, a̧máa kóó nɔ́nná wú̵ń nuŋ hȩn sú̵ú̵lı̵́ dáń woo yúú ba'ad dáń woolı̵́ ú̵,

⁹moo vɔ́ sú̵g kɔ́ ba'ad kan Tayɨɨ á̧ḿ. Ví víí bab woo nɔ, ví mbaa kɔ́ ı̵́ hȩn yo̧o̧lȩ́ woo wɔgɔ á̧ḿ.

¹⁰Tayɨɨ wu̵ pú̵n kɛb, ma mí pɛd lig do̧o̧ kɔ́ ı̵́ nán lig yo̧o̧lȩ́ gaalı̵́ wɔgɔ. Ma nán tóó vu̵ ha' voo. A̧máa kóó nɔ́nná a gág nag ba'ad ı̵́ woo ú̵!

¹¹Tayɨɨ pɛd lig do̧o̧ sú̵'ú̵, wu̵ Yesu Krístu wu̵. Nán tóó dɨ kan néélȩ́ duu dəgən sı̵́ lig do̧o̧ tóó kə́d né.

¹²Nán tóó wú̵ń ha' woo yúú woolı̵́ kan do̧', tóó tée kan sardi, tóó tée kan 'yɛgɛ gáálı̵́ tóó vu̵. Tóó vu̵ ha' voo kan la', tóó tée kan hó̧d, tóó tée kan tág tú̵d vu̵.

¹³A̧máa nag ba'ad voo kə́dkə́d vú̵ń vúd zá̧ga̧ moo sə̧"ȩ́lȩ́, moo zá̧ga̧ yȩ wú̵ń yaa kan veeɨ. Tée vee yȩ wú̵ń gu̵g nag ba'ad vu̵, wú̵ń tú' hȩn ı̵́ ku̵u̵ yo̧o̧ du̵u̵ na'a máa.

¹⁴Tow ba'ad nán hȩn yo̧o̧lȩ́ yȩ voo a vúd du̵u̵lı̵́ na'a ó̧ tée, vú̵ń nuŋ hȩn sú̵ú̵lı̵́ voo á̧ḿ.

¹⁵A̧máa tow ba'ad nán tóó woo a a̧n tée, wú̵ń nugun hȩn sú̵ú̵lı̵́ woo né. Fó̧ó̧ woo aga wú̵ń sə́d, a̧máa wú̵ń sə́d kɔ́ ı̵́ ka gbɔ vúd dɨ vɛlı̵́ zu wɔgɔ.

¹⁶Ví gaa náa? Ví lig Tayɨɨ woo nɔ; yigid Tayɨɨ woo dɨ mbaalı̵́ víílí á̧ḿ.

¹⁷Nán tóó a lı̵́d lig Tayɨɨ woo tée, Tayɨɨ wú̵ń lı̵́d nán yȩ á̧ḿ, moo lig Tayɨɨ woo máa, aga Tayɨɨ woo nɔ. Ma ví víí lig woo nɔ!

¹⁸Zó̧ó̧ víí a sóó ví moo sá. Nán tóó a taa ba bin nán moo gaalı̵́ɨ hágá yɛlı̵́ tée, a tii ya̧ŋ, moo a mbaa nán moo gaalı̵́ yȩ́ńne.

¹⁹Moo gaalı̵́ hágá yɛlı̵́ yɛ Tayɨɨ ho̧go̧ woo hȩn ya̧ŋŋɨ, moo debtere o̧: “Tayɨɨ wú̵ń kɔ́ nán moo gaalı̵́ vu̵, vú̵ń ma'ay kɛb hȩn sóoné dáń voolı̵́.”

²⁰Duu o̧: “Ɨ́ 'yɛ́lı̵́ Tayɨɨ gaa moo taalı̵́ nán moo gaalı̵́ voo ba hȩn za̧a̧ tóó nɔ pɛ́lı̵́.”

²¹Tée kóó nɔ́nná a na' yúú yúú nánán tóó voolı̵́ sá, moo hȩn 'waapád yȩ vu̵ víí vu̵ yu̵.

²²Pól, kan Apolóo, kan Piɛ́r, kan hág yɛ, kan vágád, kan nɔm, kan hȩn ı̵́ 'ya̧'a̧ yɛ vu̵, kan hȩn ı̵́ kɔ́ u̵u̵ dɨ yaalı̵́ máa vu̵ á̧ḿ, vu̵ víí nu 'waapád;

²³ma ı̵́ víí, ví víí Krístu woo nɔ; Krístu máa, woo Tayɨɨ woo nɔ.