Read Dii 1 Nán Koríńti vu̵ 4 Bible Online

1 Nán Koríńti vu̵ 4 - Dii bible

1 Nán Koríńti vu̵ 4

¹Tée i gaa ba vɔ́n nán ba'ad Krístu woo vu̵ yu̵, Tayɨɨ ba gbɔd vɔ́ yu̵ hȩn ka yu̵g vu̵ nagá yȩ.

²Nán ku̵u̵ gbɔddu̵ hȩn tu̵lı̵́ máa, a buu ya̧g talı̵́ woo sá.

³Ɨ́ míí máa, i sə̧' moo yúú míílí̧, kóó nán u̵u̵ wu̵ sə̧'ə̧n moo si̧', míílí̧ máa, hȩn gbo̧o̧ȩ pɛ́lı̵́. Mí á̧ḿ, aga mí sə̧'ə̧n moo yúú míílí̧ ní.

⁴Zó̧ó̧ míílí̧ máa, mí gaan hȩn tóó káń kɔ́n ɓı̵́dná máa né á̧ḿ. A̧máa kóó ı̵́ yo̧go̧ si̧', zó̧ó̧ míí wú̵ń sə̧'ə̧n moo yúú míílí̧ ní, ı̵́ 'yɛ́lı̵́ Yesu wú̵ńnɔ sə̧' moo míí.

⁵Moo woo nɔ sey ka ya̧n ná né yɛ tée, i sə̧' moo sá. Ɨ́ 'yɛ́lı̵́ a yaa pȩ́ń, tée wú̵ń vud hȩn yú̵ggı̵́ ya dimmí yȩ vu̵ la ya túlílí. Wú̵ń vud moo taalı̵́ nán voo á̧ḿ, tée Tayɨɨ wú̵ń dəm nán ı̵́ ku̵u̵ maa dəmné máa vu̵.

⁶Dan kirtȩ́n vu̵, moo káń o̧d ví 'waapád yɛ, mí moo yúú míílí̧ kan Apolóo woolı̵́ á̧ḿ, moo i gaan moo wu̵lı̵́. Mí hí̧í̧ i ho̧ hȩn kɔ́lı̵́ vóó yɛ, i kúgú ya̧g zílí ı̵́ ka o̧: “I duu də́ń hȩn debtere ka o̧ má nɔ,” moo nán tóó a na' yúú kid nán tóó tɔ́g sá, a ɓéé tóó sá á̧ḿ.

⁷Nóo 'yɛ́m nán gbo̧o̧ yúú dam voolı̵́lá? Tayɨɨ wu̵ pú̵n mɔ́ hȩn 'waapád yȩ náa? Moo ȩn káḿ na' yúú kɔ́ ı̵́ Tayɨɨ ka pú̵n mɔ́ hȩn 'waapád né wɔgɔlá?

⁸Ví nuŋ hȩn 'waapád kíí hí̧í̧ máa sú̵'ú̵. Ví nuŋ naa sú̵'ú̵. Ví sı̵́ gbanaa vu̵ yu̵, ma vɔ́ vóó gbanaa vu̵ yu̵ pɛ́lı̵́. Mí hí̧í̧ ka víń waa la gbanaa sú̵ nɔ! Tée ka vɔ́ń waa sı̵́ gbanaa kan ví á̧ḿ née!

⁹A̧máa mí taa míí ı̵́ vóó waa ba'ad Yesu woo vu̵ máa, Tayɨɨ 'yɛ́ vɔ́ dɨ vóó pigim, ma vɔ́ mbaa vóó kɔ́ ı̵́ nán ku̵u̵ maa nɔɔné zo"ı̵́ máa vu̵ wɔgɔ. Vɔ́ mbaa hȩn vı̵́d nán voo kan maleeka voo á̧ḿ.

¹⁰Vɔ́ mbaa sı̵́ vóó ya̧ŋná moo Krístu woo ú̵, a̧máa ví mbaa sı̵́ víí kan Krístu kɛbná ó̧. Vɔ́ vóó nán sɔmlɔ́gɔd vu̵ yu̵, a̧máa ví víí nán néélȩ́ vu̵ yu̵. Ví víí nán gbo̧o̧ vu̵ yu̵, ma ı̵́ vóó máa, nán vu̵ ɓéé vɔ́.

¹¹Há̧á̧ ya̧ 'ya̧'a̧ yɛ á̧ḿ, go̧o̧m dɨ vɔ́ vóó ya̧lȩ́, kan mam 'wɔnné á̧ḿ. Vɔ́ kan sa̧a̧m dɔ́lı̵́ pɛ́lı̵́; vu̵ gbɔ́ vɔ́; vɔ́ mbaan ya dágá né.

¹²Vɔ́ kɔ́ ba'ad kan nag dáń vóó, vɔ́ ta̧a̧, ma vɔ́ nuŋ hȩn lálı̵́ wu̵lı̵́. Ku̵u̵ haa vɔ́ tée, vɔ́ bag vu̵ vóó hȩn. Nán ku̵u̵ duun vɔ́ kan moo tée, vɔ́ ma' zó̧ó̧ mbaa.

¹³Nán ku̵u̵ o̧d vɔ́ moo ya̧ŋ tée, vɔ́ hí̧í̧ vóó moo dag gboo mɛ́ń. Vɔ́ mbaa kɔ́ ı̵́ hȩn kəəné gbɔlı̵́ wɔgɔ, kan hȩn fá̧á̧lȩ́ du"í búúlí wɔgɔ á̧ḿ há̧á̧ 'ya̧'a̧ yɛ yɔ.

¹⁴Mí bíńda ví hȩn yɛ moo bi gbɔn ví sȩ́ḿ wu̵lı̵́ né, a̧máa moo bi tú'ud ví hȩn kɔ́ ı̵́ waa hí̧í̧lí̧ míí vu̵ wɔgɔ.

¹⁵Mbaalı̵́ víí Yesu Krístu woolı̵́ yɛ, kóó i nuŋ nán moo tú"í tóó vu̵ uzinɛɛre wa̧nɓó' wu̵lı̵́ ú̵ si̧', ví dɨ kan ba'á dágá 'nɛ́ŋ́. Míi ha̧a̧ ví kan moo to̧o̧ 'maŋ Yesu Krístu woolı̵́.

¹⁶Moo woo nɔ ma, mí hí̧í̧ i duu hȩn kɔ́lı̵́ míí nu.

¹⁷Moo woo nɔ mí ba'ad ví waa hí̧í̧lí̧ míí Timɔtée, káń ha̧a̧wo̧ kan moo ı̵́ 'yɛ́lı̵́ woo yɛ; wu̵ nán ta ya̧g buu sá. Wú̵ńnɔ ta'ad o̧d ví moo tú"í míí káń duu Yesu Krístu woolı̵́ yɛ. Moo tú"í yɛ, mí tú'ud nán sú̵ggı̵́ vu̵ wu̵ yu̵ ya 'waapád.

¹⁸Nán tóó vu̵ na' yúú víílí sa̧a̧mé; vu̵ taan ba míń laan dɨlı̵́ né.

¹⁹A̧máa ı̵́ 'yɛ́lı̵́ a hí̧í̧ ú̧ tée, zaa míń laa víílí sú̵'ú̵. Tée míń ho̧n moo yúú na"ȩ́ voo yȩ nɔ dágá né, a̧máa míń ho̧ néélȩ́ voo, tow a dɨlı̵́ tɛ́ nɔ.

²⁰Gbaŋ waalı̵́ Tayɨɨ woo máa, wu̵ moo moolȩ́ ya̧gá̧ɨ̧ pɛ́lı̵́, a̧máa yaa woo kan néélȩ́ woo nɔ.

²¹Ví hí̧í̧ ȩná? Looa? Tóó tée, a̧n laa víílí kan zó̧ó̧ to̧o̧, kan zó̧ó̧ ká̧'a̧daa?