Read Dii 1 Nán Koríńti vu̵ 8 Bible Online

1 Nán Koríńti vu̵ 8 - Dii bible

1 Nán Koríńti vu̵ 8

¹Moo wi' hȩn ha"ı̵́ máa, ba gaa ví “Ya baa ví 'waapád, ba ví nán moo gaalı̵́ vu̵ yu̵,” kɔ́ ı̵́ kíí o̧ wɔgɔ. A̧máa moo gaalı̵́ wu̵ kɔ́ ma ba na' yúú, ma hí̧nní wu̵ ha' zó̧ó̧ 'yɛ́lı̵́ nánán voo.

²Nán ı̵́ a taa bin gaa hȩnne tée, hȩn gaalı̵́ woo lá yagalı̵́ pɛ́lı̵́.

³A̧máa Tayɨɨ gaa nán ı̵́ ka hí̧í̧wo̧ máa ó̧.

⁴Moo wi' hȩn ha"ı̵́ lálı̵́ máa, ba gaa ví tayɨɨ tóó ba hágá yɛlı̵́ pɛ́lı̵́. Ba gaa ví Tayɨɨ ba dɨ dágá 'nɛ́ŋ́ á̧ḿ.

⁵Nán tóó vu̵ o̧ tayɨɨ tóó ba vu̵n dɨ be"ı̵́, tóó ba vu̵n dɨ hágá yɛlı̵́ á̧ḿ; vu̵ taa tayɨɨ vu̵n ɓu̵u̵ ú̵, ı̵́ 'yɛ́lı̵́ vu̵n ɓu̵u̵ á̧ḿ.

⁶A̧máa ı̵́ baa ví máa, ı̵́ yo̧go̧ pɛ́lı̵́. Ba dɨ ví baa kan Tayɨɨ dágá 'nɛ́ŋ́, wu̵ Ba'á wu̵. Wu̵ yɨb hȩn 'waapád kan néélȩ́ woo, moo aa mbaad ví biw. Ɨ́ 'yɛ́lı̵́ dɨ dágá 'nɛ́ŋ́ á̧ḿ, wu̵ Yesu Krístu wu̵, wu̵ yɨb hȩn 'waapád kan nag woo, wu̵ yɨb ba ví á̧ḿ.

⁷A̧máa nán 'waapád vu̵u̵ gaan moo yȩ́ń yȩ né. Há̧á̧ zá̧ga̧ ɓəə nán tóó ku̵u̵ lá wi' hȩn ha"ı̵́ tée, vu̵ ha' zó̧ó̧ yúú yo̧o̧b voolı̵́. Tée zó̧ó̧ voo ka née né yȩ, vu̵ taa ba bin kɔ́ hȩn ɓı̵́d sú̵'ú̵.

⁸A̧máa hȩn lálı̵́ tóó wú̵ń pa̧ŋ ba ví laan Tayɨɨ woolı̵́ né. Kóó aa lá ví, báń nugun ví hȩn tóó né; kóó aa lán ví ní á̧ḿ, hȩn tóó wú̵ń tin ba ví ní.

⁹A̧máa i gággú̵, moo mbaalı̵́ go'oy vəg lee víí yȩ a kɔ́ nán zó̧ó̧ 'yɛ́lı̵́ ka née né yȩ, a vȩ́' pigim sá.

¹⁰Ɨ́ móó káḿ gaa hȩn yȩ, nán tóó a ho̧m mbaalı̵́ ya hȩn lálı̵́ lig hȩn ha"ı̵́lı̵́ tée, zó̧ó̧ tóó wú̵ń zo"u̵ moo a lá wi' lálı̵́ yȩ moo hȩn ha"ı̵́ɨ. Ɨ́ yo̧go̧ náa?

¹¹Tée ı̵́ móó káḿ dii kan zó̧ó̧ 'yɛ́lı̵́ néélȩ́ na'a yȩ, dam kirtȩ́n ı̵́ Krístu ka nɔɔ moo woo, zó̧ó̧ 'yɛ́lı̵́ woo ka ɓu̵u̵ né yȩ, wú̵ń ti moo “moo gaalı̵́” móó yȩ nɔ.

¹²Tow i kɔ́d da ví kirtȩ́n vu̵ hȩn ɓı̵́d kan hȩn kíí yú̵ń vu̵ yȩ, a lı̵́d vu̵ zó̧ó̧ tée, ví kɔ́d Krístu wu̵ yȩ nɔ.

¹³Moo woo nɔ tow hȩn lálı̵́ tóó a kɔ́ dan kirtȩ́n tóó a tid moo zó̧ó̧ 'yɛ́lı̵́ woo gbɔ tée, míń lán sı̵́ míí wi' pú̵g tóó né sá̧ḿ, moo ka míń kɔ́ dan kirtȩ́n tóó kan tid zó̧ó̧ 'yɛ́lı̵́ woo gbɔ ú̵.