Read Dii 2 NÁN KORÍŃTI VɄ 1 Bible Online

2 NÁN KORÍŃTI VɄ 1 - Dii bible

2 NÁN KORÍŃTI VɄ 1

¹Mí Póllu̵, mí waa ba'ad Yesu Krístu woo, Tayɨɨ ka been kan hí̧í̧lí̧ woo yɛ nɔ. Vɔ́ sú̵g kan da ba ví kirtȩ́n Timɔtée, vóo ba'ad ví ɗerwəl yɛ, nán sú̵ggı̵́ Tayɨɨ woo vu̵ kaa Koríńtilí, kan nán Tayɨɨ woo vu̵ hág Akáyyı̵́ 'waapád.

²Ba' baa ví Tayɨɨ kan ı̵́ 'yɛ́lı̵́ Yesu Krístu u̵u̵ kɔ́d ví zó̧ó̧ nán, u̵u̵ 'yɛ́ ví i mbaa ká̧'a̧dɨ.

³Ba na' ví Tayɨɨ, Ba' ı̵́ 'yɛ́lı̵́ baa ví Yesu Krístu woo, Ba'á ı̵́ zó̧ó̧ nán, Tayɨɨ ı̵́ zó̧ó̧ ziginí wu̵.

⁴Wu̵ baa ka̧' ba ví zó̧ó̧ ya hȩn kɛb mbalı̵́ baa ví vu̵lı̵́ kə́dkə́d, moo hȩn a mba nán tóó vu̵ kɛb tée, aa ka̧' vu̵ ví zó̧ó̧ kɔ́ ı̵́ Tayɨɨ ká ka ka̧' ba ví zó̧ó̧ yɛ máa wɔgɔ á̧ḿ.

⁵Kaa nuŋ ví hȩn ndɔ́gɔné na'a moo Krístu woolı̵́ yɛ, Krístu wú̵ń zigid ba ví zó̧ó̧ za̧a̧ná kan yɛ́g woo á̧ḿ.

⁶Moo woo nɔ oo nuŋ hȩn ndɔ́gɔné tée, vɔ́ nuŋŋɔ moo i zigid zó̧ó̧ víí, i sə́d á̧ḿ. Tayɨɨ a zigid vɔ́ zó̧ó̧ tée, kɔ́ moo i mbaa kan zó̧ó̧ ziginí víí á̧ḿ. Zó̧ó̧ ziginí yȩ wú̵ńnɔ sȩn ví fó̧ó̧ ya hȩn ndɔ́gɔné vu̵lı̵́ kɔ́ ı̵́ ká sȩn vɔ́ fó̧ó̧ máa wɔgɔ á̧ḿ.

⁷Vɔ́ 'yɛ́ zó̧ó̧ dɨ víílí dȩ"ȩ́ na'a, moo vɔ́ gaa kíí nuŋ hȩn ndɔ́gɔné yȩ, víń nuŋ zó̧ó̧ ziginí wu̵lı̵́ á̧ḿ.

⁸Dan kirtȩ́n vu̵, vɔ́ hí̧í̧ i gaa hȩn ndɔ́gɔné máa ku̵u̵ ɓəə vɔ́ hág Aazíilí máa, ká hȩn ndɔ́gɔné gbo̧o̧ȩ. Vu̵ ɓəə vɔ́ há̧á̧ vɔ́ duu 'yɛ́n sı̵́ zó̧ó̧ ba bíń za̧a̧ ó̧ máa né á̧ḿ.

⁹Vɔ́ taa á̧ḿ, nán ba vu̵n sə̧' sı̵́ moo nɔm yúú vóólı̵́ ú̵. A̧máa hȩn woo kɔ́y moo oo 'yɛ́ zó̧ó̧ vóó yúú fó̧ó̧ vóólı̵́ sá, a̧máa moo oo 'yɛ́ zó̧ó̧ vóó Tayɨɨ woolı̵́ má nɔ; wu̵ dɨ nán vu̵ nimní nɔmmé.

¹⁰Səd vɔ́ nɔm ɓı̵́d yȩlȩ́; wú̵ńnɔ duu səd vɔ́ wu̵lı̵́ á̧ḿ. Vɔ́ duu 'yɛ́ zó̧ó̧ vóó dɨ woolı̵́, wú̵ńnɔ duu səd vɔ́ wu̵lı̵́ tóó.

¹¹Ví á̧ḿ, víń sú̵g kɔ́ ba'ad kan vɔ́ sey i dȩn Tayɨɨ nag yúú vóólı̵́ máalȩ́. Nán ɓu̵u̵lı̵́ na'a vú̵ń dȩn Tayɨɨ nag yúú vóólı̵́, tée Tayɨɨ wú̵ń ki hȩn ɓá"ı̵́ voo, wú̵ń pú̵ vɔ́ zó̧ó̧ nán, ma nán vú̵ń duu dȩnnɔ nag tóó.

¹²Hȩn kóó na' yúú woolı̵́ máa, wu̵ yɛ nɔ; zó̧ó̧ vóó o̧d vɔ́ mbaalı̵́ vóó hágá yɛlı̵́ yɛ ba təə né, ba mbaa kɔ́ ı̵́ Tayɨɨ ba ka hí̧í̧ wɔgɔ, kan tíŋ́ víílí á̧ḿ. Hȩn woo hȩn gaalı̵́ nánánne pɛ́lı̵́, a̧máa néélȩ́ Tayɨɨ woo, kan zó̧ó̧ nán woo nɔ.

¹³Vɔ́ bíńda ví hȩn tóó kə́d né, vɔ́ bíńda ví séý hȩn ı̵́ i záŋ́ga tée, i ki moo woo má nɔ. Mí taa víń záŋ́ga, víń ki moo yɛ 'waa la pád

¹⁴kɔ́ ı̵́ ká ví ki ka' tóó tíŋ́ yȩlȩ́ wɔgɔ: zá̧ga̧ ı̵́ 'yɛ́lı̵́ baa ví Yesu woo a yaa tée, víń dəm vɔ́ kɔ́ ı̵́ ka vɔ́ń dəm ví yȩ wɔgɔ á̧ḿ.

¹⁵Mí 'yɛ́ zó̧ó̧ míí moo yɛlı̵́ ma mí mbɔ́g moo bi laa víílí, moo i nuŋ hȩn baggı̵́ Tayɨɨ woo ha'an idú.

¹⁶Ká mí hí̧í̧ bi ya̧a̧ duu víílí, ma bi laa hág Masedo̧wá̧nné, tée bi duu vȩ́' duu ya víílí, moo i mbɔ́gɔn hȩn gáá tée, míń dɔgɔn hág Yúúdalı̵́ wu̵lı̵́.

¹⁷A̧máa káń dɨ lá moo yȩ vu̵ mbɔ́ggı̵́ máa, tée míń ká̧ŋ́ la kpaynáa? Tóó tée mín mbɔ́g moo woo 'yɛ́ sú̵'ú̵ ma, míń o̧: “Ee,” kan “Áá'a” ya voo idú á̧ḿma?

¹⁸Tayɨɨ ta ya̧g tée, duu buu ní. Mí á̧ḿ, hȩn káń o̧d ví yɛ vu̵, ba moo ya̧g i'idúi máa pɛ́lı̵́,

¹⁹moo Waa Tayɨɨ woo Yesu Krístu kóó o̧d ví moo woo, kan Silád, kan Timɔtée vu̵ yȩ, wu̵ o̧n moo ya̧g i'idú né, a̧máa Tayɨɨ o̧d ba ví “Ee” yúú Yesu woolı̵́ sey 'waapád.

²⁰Ya̧g talı̵́ Tayɨɨ woo vu̵ 'waapád dɨ kɔ́yné yúú Yesu Krístu woolı̵́. Moo woo nɔ ma, ba o̧ ví “Aamɛ́n” yúú Yesu woolı̵́ moo ba na'an ví Tayɨɨ wu̵lı̵́.

²¹A̧máa Tayɨɨ wu̵ kɔ́, ma ba nda ví doo Krístu woolı̵́, aga Tayɨɨ wu̵ yee ba ví,

²²'yɛ́d ba ví yéé woo, dəŋ pú̵ ba ví yigid woo zó̧ó̧ baa vílí á̧ḿ.

²³Tayɨɨ gaa ú̵. A̧n kɔ́ vbáddɨ tée, a nɔɔnɔ́! Mí fíi ná kaa Koríńtilí ní, moo ka míń la vi̧i̧ ví zó̧ó̧ȩ.

²⁴Vɔ́ mbaan ví gbanaa yúú zó̧ó̧ 'yɛ́lı̵́ víí yȩlȩ́ né, moo ví nda doo zó̧ó̧ 'yɛ́lı̵́ víílí sú̵'ú̵, a̧máa ba sú̵g kɔ́ ví ba'ad moo i nuŋ zó̧ó̧ dȩ"ȩ́ȩ.