Read Dii 2 NÁN KORÍŃTI VɄ 10 Bible Online

2 NÁN KORÍŃTI VɄ 10 - Dii bible

2 NÁN KORÍŃTI VɄ 10

¹Mí Póllu̵, nán tóó vu̵ o̧ sey ba káń mbaa sa̧a̧m víílí tée, ba mín nán sɔmlɔ́gɔdɨ, a̧máa ba káń mbaan sa̧a̧m víílí né tée, ba mín moo moo néélȩ́ na'a. A̧máa aga mí hí̧í̧ bi o̧d ví moo kan zó̧ó̧ ká̧'a̧d, kan zó̧ó̧ to̧o̧ Krístu woo nɔ,

²i mbɔ́g moo la ú̵! Tow i mbɔ́gɔ né, sey a̧n laa víílí tée, mí gaa du̵u̵lı̵́ na'a míń kɔ́ hȩn woo kɔɔgná yúú nán ku̵u̵ taa ba vɔ́n kɔ́ hȩn kɔ́lı̵́ nánán voo nɔ yȩ nɔ.

³Moo yȩ́ńne, ba mbaa ví mbaalı̵́ nánánne, a̧máa vɔ́ kɔ́n sɨɨ kɔ́ ı̵́ nánán vu̵ wɔgɔ né.

⁴Hȩn sɨɨ máa kóó kɔ́n sɨɨ wu̵lı̵́ yɛ vu̵, vu̵ hȩn sɨɨ nánán hágá yɛ voo vu̵ yu̵ pɛ́lı̵́, a̧máa ı̵́ Tayɨɨ woo vu̵ yu̵. Vu̵ mba hȩn 'waapád, vu̵u̵ maa lig go̧ŋ tunní. Vɔ́ń tud moo taalı̵́ ɓı̵́d vu̵ kan vu̵ yu̵.

⁵Vɔ́ń tud moo yúú na"ȩ́ nán ku̵u̵ ɓéé moo Tayɨɨ woo máa vu̵ kan vu̵ yu̵; vɔ́ń ɓɛ moo taalı̵́ tóó vu̵ kɔ́ ı̵́ gba'a wɔgɔ á̧ḿ, moo u̵u̵ kid Krístu tɔ́ggɨ.

⁶Zaa i kid vɔ́ tɔ́g 'waa sú̵'ú̵ tée, vɔ́ń si̧'i̧d tɔ́g ŋgó̧ó̧lȩ́ nán voo 'waapád á̧ḿ.

⁷Ví baa ho̧ hȩn kíí ho̧ kan nɔ́ɔ́ má nɔ. Nán tóó ka taa ba bin nán Krístu woo nɔ máa, a duu taa la tóó; vɔ́ á̧ḿ, vɔ́ nán Krístu woo vu̵ yu̵!

⁸Ɨ́ 'yɛ́lı̵́ Yesu wu̵ pú̵n néélȩ́ woo moo a du̵u̵d ví ú, a̧máa a lı̵́n ví sá. Kóó a̧n dəm fó̧ó̧ míí waaná' yúú woolı̵́ ú̵ si̧', sȩ́ḿ kɔ́n mí ní.

⁹Míi bi to̧'o̧n ví zó̧ó̧ kan ɗerwəl míí yɛ vu̵ yu̵ né. I taa ı̵́ yo̧go̧ sá,

¹⁰moo nán tóó vu̵ baa o̧: “Ɗerwəl Pól woo vu̵ mba kɛbbɨ; moo woo vu̵ təə ú̵. A̧máa aga ka mbaa baa vílí tée, mbaalı̵́ woo, kan moo mbalı̵́ woo, vu̵ mbaa la sɔmlɔ́gɔdná.”

¹¹Nán tóó a taa ı̵́ yo̧go̧ tée, a gaa du̵u̵ na'a, moo ı̵́ kóó bíńda ɗerwəllı̵́ ya ɗiilílí, kan hȩn ı̵́ kóó kɔ́ sa̧a̧m víílí máa, vu̵ hȩn dágáɨ!

¹²Vɔ́ gú̵gú̵n fó̧ó̧ vóó kan nán tóó ku̵u̵ dəm fó̧ó̧ voo vu̵ yȩ vu̵ né! Vɔ́ hí̧í̧ bi man kan vu̵ né á̧ḿ! Vu̵ gaan moo taalı̵́ né, a̧máa vu̵ gú̵gú̵n fó̧ó̧ voo kan fó̧ó̧ dáń voo vu̵! Vu̵ dəm nán tóó ku̵u̵ man kan fó̧ó̧ voo máa á̧ḿ.

¹³Ɨ́ vóó máa, vɔ́ń dəm fó̧ó̧ vóó mban kɛb né, a̧máa vɔ́ń dəm fó̧ó̧ vóó dii ya Tayɨɨ ka tú'ud vɔ́ máalȩ́, ma Tayɨɨ hí̧í̧ oo kɔ́ ba'ad víílí sa̧a̧mé á̧ḿ.

¹⁴Ka vɔ́n ya̧n ná víílí sa̧a̧mé né tée, ka vɔ́ń ya̧a̧ ya̧g húḿ vóó ú̵, a̧máa vɔ́ pa̧n ví la moo to̧o̧ 'maŋ Krístu woo tíŋ́ yaalı̵́ nánán tóó voolı̵́.

¹⁵Vɔ́ na'an yúú ɓu̵u̵lı̵́ na'a yúú ya̧g ba'ad da vɔ́ voolı̵́ né. A̧máa vɔ́ taa vóó, zó̧ó̧ 'yɛ́lı̵́ víí a ɓu̵u̵ ú̵ tée, vɔ́ń nuŋ na"ȩ́ gbo̧o̧ víílí sa̧a̧mé, ya ya̧g húḿ Tayɨɨ ka 'yɛ́d vɔ́ yȩlȩ́.

¹⁶Tée vɔ́ń duu pa̧ŋ moo to̧o̧ 'maŋ laan hág tóó vu̵lı̵́ dáŋ́ víílí yȩ á̧ḿ, ma vɔ́ń na'an yúú vóó yúú ya̧g ba'ad nán tóó voo ku̵u̵ kɔ́n hág ı̵́ voolı̵́ yȩ né.

¹⁷A̧máa debtere o̧: “Nán ı̵́ ka hí̧í̧ bi dəm hȩn kɔ́lı̵́ du̵u̵ tóó nɔ tée, a dəm yúú hȩn ı̵́ 'yɛ́lı̵́ ka kɔ́ yȩlȩ́.”

¹⁸Nán ka du̵d fó̧ó̧ woo ya̧g máa, moo woo to̧o̧ né; séý nán ı̵́ 'yɛ́lı̵́ ka du̵ddu̵ ya̧g máa, moo woo wu̵ to̧o̧.