Read Dii 2 NÁN KORÍŃTI VɄ 11 Bible Online

2 NÁN KORÍŃTI VɄ 11 - Dii bible

2 NÁN KORÍŃTI VɄ 11

¹A̧máa mí hí̧í̧ i ma' zó̧ó̧ waaná' yúú ya̧ŋ míí káń kɔ́ yȩlȩ́ ó̧! I ma' zó̧ó̧ la ú̵!

²Mí moo sɨg moolȩ́ Tayɨɨ woo nɔ, moo mí sá̧a̧d ví wə̧ə̧ víí wu̵ Krístu wu̵ dágá, tée i mbaadu̵ víí kɔ́ ı̵́ náá gíb waa tóó ka pin nɔ́ɔ́ né máa wɔgɔ.

³A̧máa mí ndɔg moo taalı̵́ víí kan ba̧a̧ ví ú, mí ndɔg zó̧ó̧ 'yɛ́lı̵́ víí ka néé du̵u̵lı̵́ na'a yȩ kan tii, ka víń kéé Krístu gbɔ kɔ́ ı̵́ Hawwá ka ki hȩn zo"ı̵́ bɨɨg woo máa wɔgɔ.

⁴Nán tóó ku̵u̵ ya tú'ud ví Yesu tóó kə́d kóó tú'un ví lá né, tóó tée ku̵u̵ pa̧ŋ yigid tóó kə́d kíí fȩȩ ná tíŋ́ né, tóó tée ku̵u̵ tú'ud ví moo to̧o̧ 'maŋ tóó kə́d kíí 'yɛ́n ná zó̧ó̧ wu̵lı̵́ tíŋ́ né tée, ví ma' zó̧ó̧ kan vu̵ há̧ná.

⁵Mí taa míí, waa ba'ad kíí hí̧í̧ vu̵ na'a yȩ, vu̵ mban mí kan hȩn tóó né sá̧ḿ!

⁶Kóó a̧n moo moo gaa né si̧', mí gaa moo ó̧. Vɔ́ tú'ud ví hȩn vu̵ 'waapád kan ya woo sú̵'ú̵.

⁷Sey káń pad ví moo to̧o̧ 'maŋ Tayɨɨ woo, nán tóó ka sú̵u̵n mí wu̵lı̵́ né yȩ, mí kɔ́ sɔddáa? Mí tii fó̧ó̧ míí hȩn lee, moo i tii nán gbo̧o̧ vu̵ yu̵.

⁸Mí ɓɛ hȩn sú̵ú̵lı̵́ nán sú̵ggı̵́ tóó voolı̵́, ma káń kɔ́n ba'ad wu̵lı̵́ víílí yɛ nɔ.

⁹Moo woo nɔ ma, káń mbaa víílí yɛlı̵́, sɨɨde ka geen tée, káń vin nán tóó né má nɔ, moo nán kirtȩ́n tóó ku̵u̵ yaa hág Masedo̧wá̧nné máa vu̵ pa̧n hȩn maan 'má'. Mí gág hȩn 'waapád, mí vin ví hȩn tóó né, moo hȩn tóó a zi̧i̧ ví sá; míń baa kɔ́ ı̵́ yo̧go̧ á̧ḿ.

¹⁰Yúú moo yȩ́ń Krístu woo ka dɨ míílí̧ yɛlı̵́ yɛ, nán tóó wú̵ń há'an mí fó̧ó̧ dəmné yúú moo yɛlı̵́ hág Akáyyı̵́ né.

¹¹Moo ȩn káń moo moo ı̵́ yo̧go̧lá? Mí hí̧i̧n ví náa? Tayɨɨ gaa ba mín hí̧í̧ ví ú.

¹²A̧máa hȩn káń kɔ́ yȩ, míń duu laan tíŋ́ kan kɔ́lı̵́ woo, moo há̧á̧ bi sə̧' moo taalı̵́ kɛb voo, kan hȩn fó̧ó̧ dəmné voo gbɔ pȩ́ń. Vu̵ na' yúú voo, vu̵ o̧ ba bin man kan vɔ́ ú̵.

¹³Nán yȩ vu̵ waa ba'ad vbád vu̵ yu̵. Vu̵ gaŋ ba'ad vbád voo dɔ́n ya waa ba'ad Krístu woo voolı̵́.

¹⁴Ɨ́ yȩ hȩn sa̧ga̧ȩ pɛ́lı̵́, moo Seeɗán á̧ḿ baa tii fó̧ó̧ woo mbaa kɔ́ ı̵́ maleeka Tayɨɨ woo tóó ka tú na'a máa wɔgɔ.

¹⁵Moo woo nɔ, nán ba'ad Seeɗán woo u̵u̵ tii fó̧ó̧ voo dɔ́ ya ba'ad Tayɨɨ yȩ́ń yȩ woolı̵́ tée, hȩn gbo̧o̧ȩ pɛ́lı̵́ á̧ḿ. A̧máa vú̵ń nuŋ hȩn si̧'i̧ní duu ya̧g ba'ad voo yȩlȩ́ ó̧.

¹⁶Mí duu faa o̧, nán tóó a ho̧n kɔ́ ı̵́ ya̧ŋ wɔgɔ sá! A̧máa tow i taa ı̵́ yo̧go̧ tée, i fȩȩ moo míí kɔ́ ı̵́ kíí fȩȩ moo ya̧ŋ voo vu̵ wɔgɔ. Tée míń dəm fó̧ó̧ míí waaná' á̧ḿ.

¹⁷Moo káń moo yɛ, mí moon kɔ́ ı̵́ ı̵́ 'yɛ́lı̵́ Yesu ka hí̧i̧n wɔgɔ né. A̧máa káń dəm fó̧ó̧ míí ı̵́ yo̧go̧ yȩ, mí moo la kɔ́ ı̵́ nán ya̧ŋ wɔgɔ,

¹⁸moo nán tóó ku̵u̵ dəm fó̧ó̧ voo duu hȩn kɔ́lı̵́ nánán voo máa, míń dəm fó̧ó̧ ı̵́ míí yɛ á̧ḿ.

¹⁹Ɨ́ víí kíí mbaa kɛbná yȩ, ví baa ma' zó̧ó̧ kan ya̧ŋ vu̵ ú̵!

²⁰Kóó nán u̵u̵ buu ví, u̵u̵ lá ví hȩn 'waa, u̵u̵ vbid ví hȩnnɔ́ si̧', ví ma' zó̧ó̧ kan vu̵! Kóó u̵u̵ na' yúú, kóó u̵u̵ dȩ́ŋ́ ví dɨ nɔ́lȩ́ si̧', ví ma' zó̧ó̧ kan vu̵ á̧ḿ.

²¹Káy, sȩ́ḿ kɔ́n míí, moo néélȩ́ vóó ká maan vɔ́ hȩn tóó kɔ́lı̵́ ı̵́ yo̧go̧ né. A̧máa mí dɨd ví o̧lȩ́ kɔ́ ı̵́ ya̧ŋ tóó wɔgɔ; hȩn nán ku̵u̵ baa ha̧ŋ ya̧g wu̵lı̵́ máa, míń ha̧ŋ ya̧g wu̵lı̵́ á̧ḿ.

²²Nán yȩ u̵u̵ nán Yúúda vu̵ yu̵ tée, mí wu̵ yu̵ á̧ḿ. Ʉu̵ nán Izraɛ́l vu̵ yu̵ tée, mí wu̵ yu̵ á̧ḿ. Ʉu̵ zig Ibrahí̧í̧ma woo vu̵ yu̵ tée, mí wu̵ yu̵ á̧ḿ.

²³Ʉu̵ nán ba'ad Krístu woo vu̵ yu̵ tée, mí mba vu̵ sú̵'ú̵. Mí moo moo yɛ kɔ́ ı̵́ ya̧ŋ tóó wɔgɔ. Míi kɔ́ ba'ad ta̧a̧ mba vu̵. Nán vu̵ baa ma' míw tú̵' mba vu̵. Vu̵ gbɔ́ míw mba vu̵. Zaa ka vu̵n nɔɔn á̧ḿ do' ɓu̵u̵lı̵́ na'a mba vu̵ ú̵.

²⁴Do' nɔ́nɔ́ nán Yúúda vu̵ faa gbɔ́n loo nag vo' ta̧a̧nɔ́ zu̵u̵ kɛ́gdágá.

²⁵Nán Róma vu̵ gbɔ́n kan la' bá' ta̧a̧nɔ́. Sey tóólı̵́ nán vu̵ gbóon kan 'yɛgɛ bi nɔɔnɔ́ á̧ḿ. Mí də́ə́b kan nɛ́ŋ́ mammé do' ta̧a̧nɔ́. Sey tóólı̵́ mí mbaa mam gbo̧o̧lȩ́ zá̧ga̧a̧ há̧á̧ vid sa̧', ya̧g ka̧'a̧m tún la wu̵lı̵́.

²⁶Do' ɓu̵u̵lı̵́ na'a ya 'yȩ́m míí vu̵lı̵́ máa, mam baa yɔgɔn ya fó̧lȩ́. Mí baa sɔ́d kɛm voolı̵́ nagá, kan nán míí Yúúda voolı̵́ nagá, kan nán ı̵́ ku̵u̵ Yúúda pɛ́lı̵́ máa voolı̵́ á̧ḿ. Mí baa sɔ́d kaa gbo̧o̧ vu̵lı̵́, kan hó̧g kȩŋŋı̵́ á̧ḿ, kan mam gbo̧o̧lȩ́, kan nán kirtȩ́n vbád voolı̵́ nagá á̧ḿ.

²⁷Mí ta̧a̧ kan ba'ad gbo̧o̧ vu̵ do' ɓu̵u̵lı̵́ na'a. Mí baa nən né, go̧o̧m ya̧n, mam 'wɔn á̧ḿ. Mí nugun hȩn lálı̵́ né do' ɓu̵u̵lı̵́ na'a. Sey tóólı̵́ ho̧o̧m ka̧'a̧n, mí 'yɛ́n sa̧a̧m né á̧ḿ.

²⁸Mí wá'an hȩn tóó vu̵ né á̧ḿ, a̧máa bá' 'waapád mí baa ha' zó̧ó̧ míí yúú nán sú̵ggı̵́ voolı̵́ ya 'waapád á̧ḿ.

²⁹Nóo ka nugun néélȩ́ né, ma káń mbaan míí nélá? Nóo ka kɔ́ hȩn ɓı̵́d, ma zó̧ó̧ míí ka a̧n woo nélá?

³⁰Tow a̧n dəm fó̧ó̧ míí tée, míń dəm də́ń ya káń 'yɛ́n néélȩ́ wu̵lı̵́ né máalȩ́.

³¹Tayɨɨ Ba' ı̵́ 'yɛ́lı̵́ baa ví Yesu woo gaa ba mín kɔ́n vbáddɨ né. Ba na"o̧ ví há̧á̧ káákáá.

³²Sey káń dɨ kaa Damásdı̵́ máa, guvɛrnə́ər gbanii Aréta woo 'yɛ́ só̧ó̧ze woo vu̵ ya̧g dɔ́m kaalı̵́, moo u̵u̵ ma'anɔ́.

³³A̧máa vu̵ gaŋ ya̧a̧ duun mí fȩnɛ́ɛtər tóó ku̵u̵ kɛ lig ku̵u̵ ɓəg dáŋ́ dəəlı̵́ máalȩ́ kan ɓaa, ma mí sɔ́d nag woolı̵́.