Read Dii 2 NÁN KORÍŃTI VɄ 12 Bible Online

2 NÁN KORÍŃTI VɄ 12 - Dii bible

2 NÁN KORÍŃTI VɄ 12

¹Séý maa ba mín dəm fó̧ó̧ míí á̧ḿ, kóó a du̵u̵ né si̧'. A̧máa 'ya̧'a̧ yɛ míń o̧ moo ı̵́ hȩn sa̧ga̧ káń ho̧, kan hȩn yú̵ggı̵́ ı̵́ 'yɛ́lı̵́ ka tú'un máa á̧ḿ.

²Mí gaa nán kirtȩ́n tóó vu̵ kpa dɔgɔnɔ be' ı̵́ ta̧a̧nɔ́ woolı̵́ sú̵'ú̵. Ve' wa̧nɓó' zu̵u̵ ndaddú̵ woo wu̵ yɛ nɔ. (Ʉu̵ ɓɛ dɔgɔnɔ dɨ kan fó̧ó̧ yo̧go̧ woo á̧ḿma? Fó̧ó̧ yo̧go̧ woo a pɛ́láa, mí gaa né. Séý Tayɨɨ wu̵ gaa.)

³Mí gaa nán yȩ á̧ḿ (a̧máa u̵u̵ ɓɛ dɔgɔnɔ dɨ kan fó̧ó̧ yo̧go̧ woo naa? Tóó tée fó̧ó̧ yo̧go̧ woo a pɛ́láa? Mí gaa né, séý Tayɨɨ wu̵ gaa.)

⁴Ɨ́ woo vu̵ kpa dɔgɔnɔ sı̵́ lig zó̧ó̧ dȩ"ȩ́ Tayɨɨ woolı̵́ ú̵. Ki woo moo ı̵́ nán ka wu̵ kuu ya̧g o̧n né, ku̵u̵ há' nán u̵u̵ moo sá á̧ḿ má nɔ.

⁵Míń dəm fó̧ó̧ míí yúú nán yȩ woolı̵́. A̧máa fó̧ó̧ ı̵́ míí maan mín dəmmɔ né, séý míń dəm hȩn ı̵́ míí ku̵u̵ kan néélȩ́ pɛ́lı̵́ máa vu̵ yu̵.

⁶Tow ka míń hí̧í̧ fó̧ó̧ míí dəmnée tée, ka míń kɔ́n ya̧ŋ né, ka míń moo moo yȩ́ńne. A̧máa mí kéé gbɔ sú̵'ú̵, moo nán tóó a taa moo yúú míílí̧ na'a sá. Séý a ho̧ hȩn kɔ́lı̵́ míí, a ki moo míí vu̵ yu̵ á̧ḿ.

⁷A̧máa Tayɨɨ 'yɛ́n hȩn ndɔ́gɔné tóó[2] dɨ fó̧ó̧ míí yɛlı̵́. Wu̵ waa ba'ad Seeɗán woo, Tayɨɨ baa fígin mí kan wu̵ yu̵, moo ba ka míń na' yúú yúú hȩn ho̧lȩ́ míí na'a yɛ vu̵lı̵́.

⁸Do' ta̧a̧nɔ́ mí vi ı̵́ 'yɛ́lı̵́ Yesu moo yúú hȩn yȩlȩ́, moo a nəənɔ́.

⁹A̧máa o̧n: “Mí pú̵m zó̧ó̧ nán sú̵'ú̵, hȩn tóó sı̵́ń geen mɔ́ né, moo nán vu̵ ho̧ néélȩ́ míí yúú nán ku̵u̵ 'yɛ́n néélȩ́ tóó né máa voolı̵́.” Sey káń kan néélȩ́ pɛ́lı̵́ máa, mí hí̧í̧ bi dəm fó̧ó̧ míí mba, moo néélȩ́ Krístu woo a mbaa míílí̧.

¹⁰Moo woo nɔ ma, sey káń kan néélȩ́ pɛ́lı̵́, sey nán ku̵u̵ haan, ku̵u̵ vi̧i̧n zó̧ó̧, ku̵u̵ duun mí kan moo vu̵, ku̵u̵ to̧'o̧n zó̧ó̧, sey woolı̵́ máa zó̧ó̧ míí dȩ' moo Krístu woo. Káń kan néélȩ́ pɛ́lı̵́ yɛ, sey woo mí néé wu̵lı̵́.

¹¹Mí moo moo kɔ́ ı̵́ nán ya̧ŋ wɔgɔ, a̧máa víi kɔ́n. Ka víńnɔ du̵n ya̧g, moo waa ba'ad gbo̧o̧ kíí hí̧í̧ vu̵ na'a yȩ vu̵ mban mí yúú hȩn tóó vu̵lı̵́ né sá̧ḿ, kóó a̧n hȩn leene si̧'.

¹²Ba'ad káń kɔ́ víílí yȩ vu̵u̵ tú' ba mín waa ba'adɨ. Mí ma' zó̧ó̧ há̧á̧. Mí kɔ́ hȩn sa̧ga̧ tóó vu̵ kə́dkə́d, kan hȩn zálı̵́ tóó vu̵, kan hȩn gbo̧o̧ tóó vu̵ á̧ḿ.

¹³Hȩn ı̵́ kíí ho̧ káń kɔ́ ya tóó vu̵lı̵́, káń kɔ́n víílí ní máa, wu̵ ȩná? Moo káń vin ví hȩn sú̵ú̵lı̵́ né má naa? Tow i ho̧ ba yagalı̵́ pɛ́lı̵́ tée, i kéé “hȩn ɓı̵́d míí” yɛ gbɔ la ú̵!

¹⁴Míń dɨ laalı̵́ víílí do' ta̧a̧nɔ́ woo wu̵ yɛ nɔ. Míń duu vin hȩn sú̵ú̵lı̵́ tóó né á̧ḿ. Mí hí̧i̧n sɨɨde víí nu né, a̧máa mí hí̧í̧ míí víw, moo waa vu̵u̵ baa su̵g hȩn naa 'yɛ́n ı̵́ ha̧a̧lȩ́ voo vu̵ né, a̧máa ı̵́ waa ha̧a̧lȩ́ vu̵u̵ baa su̵g 'yɛ́d waa vu̵.

¹⁵Ɨ́ míí, ka mín lı̵́d hȩn míí 'waapád, kan fó̧ó̧ míí á̧ḿ moo víílí si̧', zó̧ó̧ kan dȩ'ȩnɔ́. Káń hí̧í̧ ví ı̵́ yo̧go̧ yȩ máa, víń vȩ' la sı̵́ víí ya̧g pigimaa?

¹⁶Tow. Moo yȩ́ńne, mí vin ví hȩn sú̵ú̵lı̵́ tóó né. Kóó ı̵́ yo̧go̧ si̧', nán tóó vu̵ o̧ ba mín sóo ví sóonée, ba mín yú̵g ɓɛ hȩn tóó víílí nagá.

¹⁷Nán káń ba' vu̵ la víílí máa, vu̵ vbid ví hȩn pa̧n ya wu̵láa?

¹⁸Mí o̧d Tíd u̵u̵ sú̵g laa kan da ba ví kirtȩ́n tóó yȩ á̧ḿ. Máa Tíd vbid ví hȩn tóó áa? Vɔ́ kan Tíd máa, moo taalı̵́ vóó dɨ dágá; hȩn kɔ́lı̵́ vóó dágá pɛ́láa?

¹⁹Tóó tée ví taa víí ba vɔ́n sɨɨ fó̧ó̧ vóó ɗii sú̵'ú̵. A̧máa vɔ́ dɨ vóó moo yɛ moolȩ́ 'waapád kan yɛ́g Krístu woo tíŋ́ Tayɨɨ woolı̵́. Dan gboo vu̵, vɔ́ o̧d ví moo yȩ vu̵ moo zó̧ó̧ 'yɛ́lı̵́ víí a há'ay laa tíŋ́ tíŋ́.

²⁰Zó̧ó̧ tó̧'o̧n, moo a̧n laa víílí tée, ka míń maan ví kɔ́ ı̵́ káń hí̧i̧n wɔgɔ né, tée ka víń maan mí kɔ́ ı̵́ kíí hí̧i̧n wɔgɔ né á̧ḿ. Tóó tée, moo mɔ́nné ka vu̵n dɨlı̵́, kan sɨg mɔ́nné vu̵, kan zó̧ó̧ yȩ́ȩ́, kan moo fá̧né, kan moo ɓı̵́d ó̧nné, kan moo ɓı̵́d moolȩ́ yúú daga voolı̵́, kan yúú na"ȩ́, kan hȩn hı̵́'ɨné á̧ḿ.

²¹Zó̧ó̧ tó̧'o̧n, moo a̧n laa víílí tée, Tayɨɨ kan duu tiin hȩn lee víílí tíŋ́, tée ka mín ká̧n nán ɓu̵u̵lı̵́ na'a ku̵u̵ kɔ́ hȩn ɓı̵́d tíŋ́ máa vu̵ yu̵. Vu̵ gbɔn ná hȩn sí̧i̧d kɔ́lı̵́ voo vu̵ né, kan ɓáa kɔ́lı̵́, kan dȩdȩ́ȩm kɔ́lı̵́ voo yȩ vu̵ né.